Report sang mga Manugbantala sang Ginharian
Paglandas sa mga Hangkat sa “Duta sang Wala Ginapaabot nga mga Butang”
SI APOSTOL Pablo namangkot sa unang siglo nga mga Cristiano sa Corinto: “Kon ang budyong indi magtunog sing maathag, sin-o bala ang magahanda sa pagpakig-away? Sa amo man nga kahulugan, kon dili kamo magamitlang sing mga hambal nga mahapos mahangpan, paano bala ini mahibaluan?”—1 Corinto 14:8, 9.
Sa Papua New Guinea, nga kon kaisa ginatawag nga Duta Sang Wala Ginapaabot nga mga Butang, ang mga Saksi ni Jehova nakaatubang sing daku nga balagbag sa pagbantala sing maathag nga mensahe sang Biblia. Nagapanaksi sila sa mga tawo nga nagahambal sing kapin sa 700 ka nagkalainlain nga lenguahe kag may nanuhaytuhay nga mga pamatasan. Ginaatubang man sang mga Saksi ang hangkat sang talakladon nga mga alagyan, wala sing mga kalsada, kag madamo nga krimen. Luwas sa sining tanan nga kabudlayan, may pagpamatok gikan sa relihioso nga mga grupo, kag kon kaisa, bisan sa mga opisyal sang eskwelahan.
Walay sapayan, ang maayong espirituwal nga mga panudlo kag ang nagadamo nga mga bulig sa pagtuon sing Biblia sa tumandok nga pinulungan nagasangkap sa mga Saksi nga ipaalinton ang maayong balita subong sang maathag nga tunog sang budyong. Sa masami ang sabat positibo, subong ginapakita sang masunod nga mga report:
• Sa pagbukas sang klase, luyag mahibaluan sang isa ka manunudlo kon ngaa ang kabataan sang mga Saksi ni Jehova wala nagasaludo sa bandera ukon nagaamba sing pungsudnon nga ambahanon. Ginpamangkot niya si Maiola, isa ka 13 anyos nga estudyante nga isa ka bawtismado nga Saksi. Si Maiola naghatag sing isa ka maathag, Makasulatanhon nga pagpaathag. Ginbaton sang manunudlo ang iya pangatarungan sanglit halin ini sa Biblia. Ang iya pagpaathag ginpaambit man sa iban nga manunudlo sa eskwelahan.
Sang ulihi, sang ang mga estudyante ginpasulat sing mga salaysay, ginpili ni Maiola ang tema tuhoy sa Trinidad. Ang iya salaysay amo ang nakabaton sing pinakamataas nga grado sa klase, kag ginpamangkot sia sang iya manunudlo kon diin sia nagkuha sing impormasyon. Ginpakita niya sa iya ang libro nga Mahimu Ka Mabuhi sing Dayon sa Paraiso sa Duta sa Ingles nga lenguahe. Ginpresentar sang ulihi sang manunudlo ang libro sa bug-os nga klase, kag madamo ang luyag makatigayon sing kaugalingon nga kopya. Sang masunod nga adlaw, si Maiola nakapahamtang sing 14 ka libro kag 7 ka magasin sa iya mga kabutho, kag nakasugod sia sing pagtuon sa Biblia sa tatlo sa ila. Ang tulumuron ni Maiola amo nga mangin isa ka bug-os tion nga ministro.
• Ang isa ka grupo sang mga Saksi ni Jehova sa isa ka naligwin baybayon nga minuro malapit sa Port Moresby nakaatubang sing paghingabot sugod pa sang maaga nga bahin sang dekada 1970. Apang sining karon lang, nakabaton sila sing bulig sa wala ginapaabot nga paagi. Isa ka adlaw, ang obispo didto sang United Church, isa ka tumandok sa Papua New Guinea nga nag-eskwela sa iban nga pungsod, naghatag sing higayon sa tumalambong sa simbahan nga makapamangkot. Isa ka tawo ang namangkot: “May duha ka relihion sa aton minuro—ang United Church kag ang mga Saksi ni Jehova. Ano ang amon himuon kon ang mga Saksi magkadto sa amon ganhaan?” Pagkatapos sang madugay nga kalinong, ang obispo nagsabat: “Kahibalo kamo, indi ko mahibaluan kon ano ang isabat sa inyo. Kasan-o lang, duha ka lamharon nga Saksi ang nanuktok sa akon ganhaan. Nagpautwas sila sing isa ka pamangkot sa akon, kag walay sapayan sang tanan nga paghanas sa unibersidad nga akon natigayon, indi ko ini masabat. Apang mahapos nga ginhatag nila sa akon ang sabat halin sa Biblia. Busa indi ako makasabat kon ano ang inyo himuon—kamo ang magdesisyon. Mahimo kamo nga indi magpamati kon indi ninyo luyag, apang indi kamo magmasingki sa ila.”
Ang nagalakbay nga tiglawas sang Watch Tower Society nga sang ulihi nagduaw sa sining grupo sang mga Saksi nagreport: “Halos tanan sa minuro nagapamati sa mga Saksi kon nagabantala sila. Ginapadayon pa sila sang iban sa ila mga puluy-an. Isa ini karon ka paraiso para sa pagbantala.”