Magpadayon sa Paglakat Upod sa Dios
“Padayon sa paglakat sa espiritu kag indi gid kamo maghimo sing undanon nga kailigbon.”—GALACIA 5:16.
1. (a) Sa anong mga kahimtangan kag ano kalawig naglakat si Enoc upod sa Dios? (b) Daw ano kalawig naglakat si Noe upod sa Dios, kag ano ang iya mabug-at nga mga responsabilidad?
ANG Biblia nagasiling sa aton nga si Enoc “padayon nga naglakat upod sa matuod nga Dios.” Walay sapayan sang makakilibang nga hambal kag didiosnon nga paggawi sang katawhan sa palibot niya, padayon sia nga naglakat upod sa Dios tubtob sang napatay sia sa edad nga 365 ka tuig. (Genesis 5:23, 24; Judas 14, 15) Si Noe man “naglakat upod sa matuod nga Dios.” Ginhimo niya ini samtang ginasagod ang iya pamilya, samtang ginaatubang ang kalibutan nga impluwensiado sang rebelde nga mga anghel kag sang ila masingki nga mga anak, kag samtang ginaatipan ang tanan nga detalye may kaangtanan sa pagtukod sing daku nga arka nga daku pa sa barko sadto nga tion. Padayon sia nga naglakat upod sa Dios pagkatapos sang Anaw, bisan sang naglutaw liwat ang pagrebelde batok kay Jehova sa Babel. Sa pagkamatuod, si Noe padayon nga naglakat upod sa Dios tubtob sang mapatay sia sa edad nga 950 ka tuig.—Genesis 6:9; 9:29.
2. Ano ang kahulugan sang ‘paglakat upod sa Dios’?
2 Sang nagsiling nga ining mga lalaki sang pagtuo “naglakat” upod sa Dios, ginagamit diri sang Biblia ang tinaga sa metaporiko nga kahulugan. Nagakahulugan ini nga sanday Enoc kag Noe naggawi nga may mabakod nga pagtuo sa Dios. Ginhimo nila ang ginsugo ni Jehova sa ila kag nagkabuhi suno sa nahibal-an nila tuhoy sa iya gikan sa iya mga pagpakig-angot sa katawhan. (Ipaanggid ang 2 Cronica 7:17.) Wala lamang sila mag-ugyon sa ginsiling kag ginhimo sang Dios sa ila hunahuna kundi naghulag sila sa tanan nga ginsugo niya—indi lamang sa pila sini kundi sa tanan sini tubtob sa masarangan nila nga himuon subong dihimpit nga mga tawo. Gani si Noe, halimbawa, naghimo kon ano gid ang ginsugo sang Dios sa iya. (Genesis 6:22) Wala ginpangunahan ni Noe ang mga sugo nga ginhatag sa iya, kag indi sia mapinatumbayaon nga nagpauyaya. Subong isa nga suod kay Jehova, nga hilway sa pagpangamuyo sa Dios kag sa pagpakamahal sa sugo sang Dios, naglakat sia upod sa Dios. Ginahimo mo bala ina?
Isa ka Dalayon nga Dalanon sang Pagkabuhi
3. Ano gid ang importante para sa tanan nga dedikado kag bawtismado nga mga alagad sang Dios?
3 Makalilipay nga makita ang mga tawo nga nagasugod sa paglakat upod sa Dios. Samtang nagahimo sila sing positibo nga mga tikang suno sa kabubut-on ni Jehova, nagahatag sila sing pamatuod sang pagtuo, nga kon wala ini wala sing isa ang makapahamuot sa Dios. (Hebreo 11:6) Daku gid ang aton kalipay nga kada tuig, sa promedyo sa nagligad nga lima ka tuig, kapin sa 320,000 ka tawo ang nagdedikar sang ila kaugalingon kay Jehova kag nagpabawtismo sa tubig! Apang importante man para sa ila kag para sa aton tanan nga pirme maglakat kaupod sang Dios.—Mateo 24:13; Bugna 2:10.
4. Bisan nagpakita sila sing pagtuo, ngaa ang kalabanan nga mga Israelinhon nga nagbiya sa Egipto wala makasulod sa Ginsaad nga Duta?
4 Sang panahon ni Moises, kinahanglan ang pagtuo agod masaulog sang isa ka Israelinhon nga pamilya ang Paskwa sa Egipto kag mapalhitan sing dugo ang mga bakalan kag uluhan sang ganhaan sang ila puluy-an. (Exodo 12:1-28) Apang, nagpangalag-ag ang madamo sa ila pagtuo sang nakita nila nga halos malambot na sila sang hangaway ni Paraon sa Dagat nga Pula. (Exodo 14:9-12) Ginapakita sang Salmo 106:12 nga sang nakatabok na sila sa mamala nga letso sang dagat kag nakita ang pagpapas sang daku nga balod sa hangaway sang Egipto, sila sa liwat “nagtuo sa pulong [ni Jehova].” Apang, pagligad lamang sang pila ka tion sa kahanayakan, ang mga Israelinhon nagsugod sa pagreklamo nahanungod sa tubig nga mainom, sa pagkaon, kag sa pagdumala. Hinadlukan sila sa negatibo nga report sang 10 sang 12 ka lampitaw nga nagpauli halin sa Ginsaad nga Duta. Sa sadto nga mga kahimtangan, suno sa ginasiling sang Salmo 106:24, “wala sila magtuo sa pulong [sang Dios].” Luyag nila magbalik sa Egipto. (Numeros 14:1-4) Nagtuo lamang sila kon makakita sila sing dikinaandan nga mga pagpasundayag sang gahom sang Dios. Wala sila magpadayon sa paglakat upod sa Dios. Subong resulta, yadtong mga Israelinhon wala makasulod sa Ginsaad nga Duta.—Salmo 95:10, 11.
5. Paano maangot sa paglakat upod sa Dios ang 2 Corinto 13:5 kag Hulubaton 3:5, 6?
5 Ang Biblia nagalaygay sa aton: “Padayon ninyo nga tilawan kon yara kamo sa pagtuo, padayon ninyo nga pamatud-an kon ano gid kamo.” (2 Corinto 13:5) Ang mangin “sa pagtuo” nagakahulugan sang pagsunod sa hubon sang Cristianong mga pagtuluuhan. Importante ini agod makalakat kita sing madinalag-on upod sa Dios sa bug-os nga mga adlaw sang aton kabuhi. Agod makalakat upod sa Dios, dapat man kita magpakita sing kinaiya nga pagtuo, nagasalig sing bug-os kay Jehova. (Hulubaton 3:5, 6) May madamong siod kag tugalbong nga magasulay sa sadtong napaslawan sa paghimo sini. Ano ang pila sini?
Likawi ang Siod sang Pagsalig sa Kaugalingon
6. Ano ang nahibaluan sang tanan nga Cristiano tuhoy sa pakighilawas kag panghilahi, kag paano nila ginatamod ining mga sala?
6 Ang tanan nga nagtuon sang Biblia, nagdedikar sang iya kabuhi kay Jehova, kag nabawtismuhan nakahibalo nga ginapakamalaut sang Pulong sang Dios ang panghilawas kag panghilahi. (1 Tesalonica 4:1-3; Hebreo 13:4) Nagaugyon sila nga husto ini. Luyag nila magkabuhi suno sa sini. Apang, ang seksuwal nga imoralidad amo gihapon ang isa sang labing epektibo nga mga siod ni Satanas. Ngaa?
7. Sa Kapatagan sang Moab, paano ang Israelinhon nga mga lalaki nakahimo sing paggawi nga nahibal-an nila nga malain?
7 Una, ang mga nakahimo sining imoral nga paggawi mahimo nga wala magplano sini. Ayhan matuod man yadto sa mga Israelinhon sa Kapatagan sang Moab. Sa Israelinhon nga mga lalaki nga natak-an na sa pangabuhi sa kahanayakan, ang mga babayi sang Moab kag Midian nga nagsulay sa ila mahimo nga daw mainabyanon kag maabiabihon lamang sang primero. Apang ano ang natabo sang ginbaton sang mga Israelinhon ang mga pangagda nga makig-upod sa mga tawo nga nagaalagad kay Baal kag indi kay Jehova, sa mga tawo nga nagtugot sa ila mga kabataan nga babayi (bisan halin sa kilala nga mga pamilya) nga maghulid sa mga lalaki nga indi sila kasal? Sang ginkabig sang mga lalaki halin sa kampo sang Israel yadto nga mga pagpakig-upod nga maayo, nasulay sila sa paghimo sang mga butang nga nahibaluan nila nga malain, kag napatay sila bangod sini.—Numeros 22:1; 25:1-15; 31:16; Bugna 2:14.
8. Sa panahon naton, ano ang mahimo nga magdul-ong sa isa ka Cristiano sa seksuwal nga imoralidad?
8 Ano ang mahimo tunaan nga mahulog ang isa sa sini man nga siod sa aton adlaw? Walay sapayan nga nahibaluan niya ang kabug-aton sang seksuwal nga imoralidad, kon wala man niya mahangpan ang katalagman sang pagsalig sa kaugalingon, mahimo niya ibutang ang iya kaugalingon sa kahimtangan diin ang iya pangatarungan madaug sang pagsulay nga maghimo sing sala.—Hulubaton 7:6-9, 21, 22; 14:16.
9. Anong Makasulatanhon nga mga paandam ang magaamlig sa aton batok sa imoralidad?
9 Sing maathag ang Pulong sang Dios nagapaandam sa aton nga indi magpadaya sa paghunahuna nga tuman gid sa aton kabakod nga ang malain nga mga pagpakig-upod indi makapalain sa aton. Nagalakip ina sang pagtan-aw sing mga programa sa telebisyon nga nagapasalida sang pangabuhi sang imoral nga mga tawo kag sa pagtan-aw sing mga magasin nga nagapukaw sang imoral nga mga kailigbon. (1 Corinto 10:11, 12; 15:33) Bisan ang pagpakig-upod sa mga masigkatumuluo sa idalom sang sayop nga mga sirkunstansia mahimo magdul-ong sa mabug-at nga mga sala. Ang ganyat sa ulot sang mga sekso daku gid katama. Busa bangod sang mahigugmaon nga pag-ulikid ang organisasyon ni Jehova nagpaandam nga likawan sang isa ang mangin isahanon kag indi makita sang tanan upod sa isa nga indi naton tiayon ukon katapo sang pamilya. Agod padayon nga maglakat upod sa Dios, dapat naton likawan ang siod sang pagsalig sa kaugalingon kag pamatian ang laygay nga ginahatag niya sa aton.—Salmo 85:8.
Indi Pagtuguti nga Kontrolon Ikaw sang Kahadlok sa Tawo
10. Paano ang “pagkurog sa mga tawo” nangin isa ka siod?
10 Ang isa pa ka katalagman ginahatag sang Hulubaton 29:25, nga nagasiling: “Ang pagkurog sa tawo amo ang nagadala sing siod.” Ang siod sang isa ka mangangayam masami na nga nagalakip sa isa ka higot nga nagahugot sa liog kon butungon ukon sa pisi nga nagasalawid sa tiil sang isa ka sapat. (Job 18:8-11) Ang pagkurog sa tawo mahimo man nga magalatid sa ikasarang sang isa sa paghambal sing hilway kag sa paggawi nga nagapahamuot sa Dios. Ang handum nga maluyagan sang iban normal lamang, kag ang matig-a nga dipagsapak sa ginahunahuna sang iban nga mga tawo indi Cristiano. Apang kinahanglan ang pagkatimbang. Kon ang pagkabalaka sa mangin reaksion sang iban nga mga tawo mangin ang kabangdanan nga himuon sang isa ka tawo kon ano ang ginadumili sang Dios ukon untatan ang paghimo sang kon ano ang ginasugo sang Pulong sang Dios, ina nga indibiduwal nasiod na.
11. (a) Ano ang pangamlig batok sa pagtugot nga ang isa kontrolon sang kahadlok sa tawo? (b) Paano ginbuligan ni Jehova ang iya mga alagad nga nagapakig-away sang kahadlok sa tawo?
11 Ang pangamlig batok sa sini nga siod nasandig, indi sa duna nga disposisyon sang isa, kundi sa “pagsalig kay Jehova.” (Hulubaton 29:25b) Paagi sa pagsalig sa Dios, bisan ang isa ka tawo nga mahuluy-on mangin maisugon kag dimationg. Tubtob ginapalibutan kita sing mga pag-ipit sining satanikong sistema sang mga butang, dapat kita magbantay batok sa nagasiod nga pagkahadlok sa tawo. Walay sapayan nga si manalagna Elias may maayong rekord sang maisugon nga pag-alagad, nagpalagyo sia sa kahadlok sang ginpahog sia nga ipapatay ni Jezebel. (1 Hari 19:2-18) Sa idalom sang pag-ipit, mahinadlukon nga ginpanghiwala ni apostol Pedro nga kilala niya si Jesucristo, kag mga tinuig sang ulihi naggawi sia supak sa pagtuo bangod sang iya kahadlok. (Marcos 14:66-71; Galacia 2:11, 12) Apang, sanday Elias kag Pedro lunsay nakabaton sing espirituwal nga bulig kag, upod ang pagsalig kay Jehova, nagpadayon sa pag-alagad sa Dios sing kalahamut-an.
12. Anong modernong-adlaw nga mga halimbawa ang nagapakita kon paano nabuligan ang mga indibiduwal nga malikawan ang pagtugot sa kahadlok nga magatiklod sa ila nga indi pagpahamut-an ang Dios?
12 Madamo sang mga alagad ni Jehova sa panahon naton ang nakatuon man sa paglandas sa makapasiod nga kahadlok. Isa ka tin-edyer nga Saksi sa Guyana ang nagbaton: “Sa eskwelahan daku gid katama ang pagpakig-away batok sa pag-ipit sang mga katubotubo.” Apang nagdugang sia: “Amo man ang akon pagtuo kay Jehova.” Sang ginyaguta sia sang iya maestro sa atubangan sang bug-os nga klase bangod sang iya pagtuo, mahipos sia nga nangamuyo kay Jehova. Sang ulihi sing pribado ginpanaksihan niya sing mataktikanhon ang maestro. Sang nagduaw sa iya tumandok nga banwa sa Benin, ang isa ka pamatan-on nga lalaki nga nagatuon sang mga sugo ni Jehova determinado nga ihaboy ang diosdios nga ginhimo sang iya amay para sa iya. Nakahibalo sia nga ang imahen wala sing kabuhi, kag wala sia mahadlok sa sini, apang nakahibalo man sia nga mahimo sia nga patyon sang akig nga mga tagaminuro. Nangamuyo sia kay Jehova, kag nian sa kagab-ihon gindala niya ang diosdios sa puongpuong kag ginguba ini. (Ipaanggid ang Hukom 6:27-31.) Sang ang isa ka babayi sa Dominican Republic nagsugod sa pag-alagad kay Jehova, ginpapili sia sang iya bana sa ila nga duha ni Jehova. Namahog ang lalaki nga bulagan sia. Talikdan bala niya ang iya pagtuo bangod sa kahadlok? Nagsabat sia: “Kon nagluib ako, mahimo ako mahuya, apang wala ako mahuya sa pag-alagad kay Jehova nga Dios!” Padayon sia nga naglakat upod sa Dios, kag sang ulihi ang iya bana nagbuylog sa iya sa paghimo sang kabubut-on ni Jehova. Upod ang bug-os nga pagsalig sa aton langitnon nga Amay, malikawan man naton ang pagtugot sa pagkahadlok sa tawo nga mangin rason agod mag-untat kita sa paghimo sang nahibaluan naton nga kalahamut-an kay Jehova.
Indi Pagpakadiutaya ang Laygay
13. Tuhoy sa anong siod kita ginapaandaman sang 1 Timoteo 6:9?
13 Bisan pa nga ang pila ka siod nga ginagamit sang mga mangangayam gindesinyo sa pagdakop sa bisan ano nga sapat nga matabuan nga makalabay sa isa ka lugar, ang iban nga mga siod nagaganyat sa mga sapat paagi sa makagalanyat sing malimbungon nga paon. Sa madamo nga tawo, ang mga manggad kaangay sina. (Mateo 13:22) Sa 1 Timoteo 6:8, 9, ang Biblia nagalaygay sa aton nga mangin kontento sa pagkaon kag panapton. Nian ini nagapaandam: “Ang mga determinado nga magmanggaranon nagakahulog sa pagsulay kag sa siod kag sa madamong binuang kag makahalalit nga kailigbon, nga nagatugdang sang mga tawo sa kalaglagan kag kahapayan.”
14. (a) Ano ang mahimo magapugong sa isa ka tawo nga dumdumon ang laygay nga mangin kontento sa pagkaon kag panapton? (b) Paano ang sayop nga pagtamod sa manggad nagatiklod sa isa nga pakadiutayon ang paandam nga ginrekord sa 1 Timoteo 6:9? (c) Sa anong paagi ang “kailigbon sang mga mata” mahimo nga magabulag sa iban sa siod nga nagahulat sa ila?
14 Walay sapayan sini nga paandam, madamo ang nasiod bangod wala nila ginaaplikar ang laygay. Ngaa? Mahimo ayhan nga ginatiklod sila sang bugal nga padayunon ang pagsunod sa estilo sang pagkabuhi nga nagakinahanglan sing labi pa sa “pagkaon kag panapton” nga ginalaygay sang Biblia nga dapat mangin kontento kita? Ginapakadiutay ayhan nila ang paandam sang Biblia bangod ginatan-aw nila ang manggad suno sa ginapanag-iyahan sang tuman ka manggaranon nga mga tawo? Ginapaanggid sing simple sang Biblia ang determinasyon nga magmanggaranon sa pagkakontento sa pagkaon kag panapton. (Ipaanggid ang Hebreo 13:5.) Ang “kailigbon sang mga mata”—ang handum nga mapanag-iyahan ang mga butang nga nakita nila, bisan pa bayaan ang espirituwal nga mga hilikuton—nagatiklod bala sa ila nga ipahigad ang mga interes sang matuod nga pagsimba sa ikaduha nga duog? (1 Juan 2:15-17; Hageo 1:2-8) Daw ano ka mas malipayon ang tunay nga nagapamati sa laygay sang Biblia kag nagalakat upod sa Dios paagi sa pag-una sa kabuhi sang pag-alagad kay Jehova!
Pag-atubang sing Madinalag-on sa mga Kabalaka sa Kabuhi
15. Anong mga kahimtangan ang halangpunon nga ginakabalak-an sang madamo sang katawhan ni Jehova, kag sa anong siod dapat kita mangin alisto kon napaidalom kita sa sina nga pag-ipit?
15 Mas kinaandan sangsa determinasyon nga magmanggaranon amo ang kabalaka sa pagtigayon sang mga kinahanglanon sa kabuhi. Madamo sang mga alagad ni Jehova ang nagakabuhi nga diutay lamang ang mga pagkabutang. Nagapangabudlay sila sing lakas sa madamong inoras agod matigayon bisan man lang ang kinahanglanon nga panapton, duog nga matulugan sang ila pamilya sa gab-i, kag sa dimagkubos ang pagkaon para sa sina nga adlaw. Ang iban naman nagaagwanta sang mga problema bangod sang balatian ukon sang katigulangon nila ukon sang mga katapo sang pamilya. Daw ano gid kadali nga tugutan nga lumsan sini nga mga sirkunstansia ang espirituwal nga mga interes sa ila kabuhi!—Mateo 13:22.
16. Paano kita ginabuligan ni Jehova nga atubangon ang mga pag-ipit sa kabuhi?
16 Sing mahigugmaon, ginasugid ni Jehova sa aton ang tuhoy sa paumpaw nga maagom sa idalom sang Mesianikong Ginharian. (Salmo 72:1-4, 16; Isaias 25:7, 8) Ginabuligan man niya kita nga malandas ang mga pag-ipit sa kabuhi sa karon paagi sa paghatag sa aton sing laygay sa kon paano huptan sing nagakaigo ang aton mga prioridad. (Mateo 4:4; 6:25-34) Paagi sa rekord sa kon paano niya ginbuligan ang iya mga alagad sang nagligad nga mga tion, si Jehova nagapasalig sa aton. (Jeremias 37:21; Santiago 5:11) Ginapabakod niya kita sa pagkahibalo nga, walay sapayan sang mga kalisdanan nga mahanabo sa aton, ang iya gugma sa iya mainunungon nga mga alagad nagapabilin nga wala nagabag-o. (Roma 8:35-39) Para sa mga nagasalig kay Jehova, nagsiling sia: “Indi ko ikaw nga mas-a pagbayaan ukon pagsikwayon.”—Hebreo 13:5.
17. Maghatag sing mga halimbawa sa kon paano ang mga indibiduwal nga nakaeksperiensia sing mabug-at nga kalisdanan nakapadayon sa paglakat upod sa Dios.
17 Ginpabakod sini nga ihibalo, ang matuod nga mga Cristiano padayon nga nagalakat upod sa Dios sa baylo nga nagaliso sa kalibutanon nga mga dalanon. Ang kinaandan nga kalibutanon nga pilosopiya sa tunga sang mga imol sa madamong kadutaan amo nga ang pagkuha gikan sa isa nga mas masulhay ang pangabuhi agod mapakaon mo ang imo pamilya indi pagpangawat. Apang ginasikway sang mga nagalakat paagi sa pagtuo ina nga pagtamod. Ginapabaloran nila ang kahamuot sang Dios labaw sa tanan pa nga butang kag nagahulat sa iya sa pagpadya sa ila bunayag nga paggawi. (Hulubaton 30:8, 9; 1 Corinto 10:13; Hebreo 13:18) Nasapwan sang isa ka balo sa India nga ang kahanda sa pagtrabaho lakip ang pagkamahimulaton nakabulig sa iya nga mabuhi. Sa baylo nga maakig sa iya kahimtangan, nahibaluan niya nga kon unahon niya ang Ginharian sang Dios kag ang iya pagkamatarong sa iya kabuhi, pakamaayuhon ni Jehova ang iya mga panikasog nga matigayon ang mga kinahanglanon niya kag sang iya anak nga lalaki. (Mateo 6:33, 34) Linibolibo sa bug-os nga duta ang nagapakita nga, walay sapayan sang kalisdanan nga naagom nila, si Jehova amo ang ila dalangpan kag kuta. (Salmo 91:2) Matuod bala ina sa imo?
18. Ano ang yabi sa paglikaw sa mga siod sang kalibutan ni Satanas?
18 Tubtob nagakabuhi kita sa karon nga sistema sang mga butang, may mga siod nga dapat likawan. (1 Juan 5:19) Ginapakilala ini sang Biblia kag ginapakita sa aton kon paano ini malikawan. Yadtong tunay nga nagahigugma kay Jehova kag nahadlok nga indi sia mapahamut-an madinalag-on nga makasarang sini nga mga siod. Kon sila ‘padayon nga maglakat sa espiritu,’ indi sila madala sang kalibutanon nga mga paagi. (Galacia 5:16-25) Para sa tanan nga nagasentro sang ila kabuhi sa ila kaangtanan kay Jehova, yara ang makalilipay nga palaabuton nga maglakat upod sa Dios, nga suod gid kaayo sa iya sing dayon.—Salmo 25:14.
Ano ang Imo Komento?
◻ Paano ang pagsalig sa kaugalingon mangin isa ka siod?
◻ Ano ang makaamlig sa aton agod indi makontrol sang kahadlok sang tawo?
◻ Ano ang rason kon ngaa indi naton maaplikar ang laygay tuhoy sa katalagman sang paghimud-os sing manggad?
◻ Ano ang makabulig sa aton nga indi masiod sang mga kabalaka sang kabuhi?
[Retrato sa pahina 16, 17]
Madamo ang padayon nga nagalakat upod sa Dios sa bug-os nga kabuhi