Ang mga Simbahan Nagatu-ad

“Ginausisa Sang Papa ang Simbahan.” “Inkisisyon kag Batok-Semitismo​—⁠Ang Simbahan Nagahanda Sang Iya Mea Culpa.”a “Mea Culpa Para sa Holocaust.” “Ang mga Metodista Nagapangayo Sing Pasaylo sa mga Indian Sang Malayo nga Katundan.”

NAKABASA ka na bala sing mga ulong-dinalan kaangay sini? Sing daw labi pa kasunson, ang mga simbahan nagabaton sang sala kag nagapangayo sing pasaylo tungod sa ginhimo nila sa sulod sang mga siglo. Ang balita dalayon nga nagapadaku sang bag-ong mga mea culpa sang papa.

Sang ang Papa Nagpangayo sing Kapatawaran

Sa ulot sang 1980 kag 1996, si Juan Paulo II ‘nagbaton sang maragtason nga mga kasaypanan sang Simbahan kag nagpangayo sing kapatawaran’ sa dimagkubos 94 ka beses, siling sang komentarista sang Batikano nga si Luigi Accattoli sa iya libro nga Quando il papa chiede perdono (Sang ang Papa Nagpangayo Sing Kapatawaran). Suno kay Accattoli, “sa Iglesia Katolika, ang papa lamang ang may kinamatarong sa paghimo sing mea culpa.” Kag ginhimo niya ini, ginapatuhuyan ang labing kontrobersiyal nga mga pahina sang maragtas sang mga Katoliko​—⁠mga Krusada, mga inaway, pagsuporta sa mga diktatorya, pagbinahinbahin sa mga simbahan, batok-Semitismo, mga Inkisisyon, Mafia, kag rasismo (pag-ihig-ihig sa rasa). Sa isa ka memorandum nga ginpadala sang 1994 sa mga kardinal (nga ginkabig sang iban subong ang labing importante nga dokumento sang papa), si Juan Paulo II nagpanugda sing “kabilugan nga pagtu-ad sa mga sala nga nahimo sadtong ikaduhang Cristianong milenyo.”

Ginsunod sang pila ka prelado ang halimbawa sang papa. Sang Disiembre 1994 ang Italyano nga pamantalaan nga Il Giornale nagreport: “Madamong Amerikanong obispo ang nagguwa sa telebisyon kag dayag nga nagpangayo sing kapatawaran.” Tungod sa ano? Tungod sa pagpakadiutay sa problema sang pedopilya nga mga pari, sa kahalitan sang madamong lamharon nga biktima. Sang Enero 1995 ang pamantalaan nga La Repubblica nagreport tuhoy sa “isa ka buhat nga dimatupungan sa maragtas sang moderno nga Katolisismo”​—⁠ang problema sang paghipos ni Papa Pio XII may kaangtanan sa Holocaust ginpatalupangod. Sang Enero 1995 ini man nga pamantalaan nagreport nga ang Aleman nga dioseses nagpangayo sing kapatawaran tungod sa “madamong kasaypanan” sang mga Romano Katoliko nga nagsuporta sang mga krimen sang mga Nazi. Ang lainlain nga Protestante nga mga simbahan nagbaton man sang ila kaugalingon nga kasaypanan.

Ngaa?

Ang Biblia nagapalig-on sa aton sa pagpangayo sing kapatawaran kon makasala kita, kag madamo ang nagdayaw sa mga simbahan sang ginbaton sini ang ila kaugalingon nga kasaypanan. (Santiago 5:16) Apang ngaa ginahimo ini sang mga simbahan? Kag paano ini makaapektar sa pagtamod naton sa ila?

[Footnote]