Report sang mga Manugbantala sang Ginharian

Ginapatubo Ini sang Dios sa Alaska

SA IDALOM sang mga niebe kag yelo, nagahulat ang isa ka magamay nga liso sing kahigayunan nga magtubo. Sa sulod sang tatlo ka malip-ot nga bulan sang tig-ilinit sa Alaska, ang liso sang repolyo nga tatlo ka milimetros ang diametro mahimo magtubo tubtob sa halos 40 ka kilo! Huo, ining duta nga ginhunahuna anay sang madamo subong isa ka lamgod, indi mapuslan yelohon nga duta makapatubas sing dagaya.

Ilabi na nga matuod ini sa espirituwal nga patag sa Alaska. Didto, sa pungsod nga malawig ang tigtulugnaw, ang mga Saksi ni Jehova padayon nga nagasab-ug sing binhi sang Ginharian. Subong sa iban nga bahin sang duta, ginapatubo sang Dios ang mga binhi sa mauyahon nga mga tagipusuon.​—⁠1 Corinto 3:​6, 7.

● Samtang nagasakay sa bus sang eskwelahan, natalupangdan sang isa ka lamharon nga Saksi nga si Vanessa ang masigka-estudyante nga si Ann, nga pirme nagapungko sing isahanon. Daw masinulub-on si Ann, gani ginpapungko ni Vanessa si Ann sa tupad niya. Indi katingalahan nga masinulub-on gali si Ann! Napatay ang iya iloy bangod sang atake sa tagipusuon, kag wala madugayan, napatay ang iya amay bangod sang kanser. Amo nga si Ann nagapuyo sa iya mga paryente sa Alaska.

Sang isa ka Sabado naghapit si Vanessa sa balay sang iya bag-o nga kakilala samtang nagaalagad sia sa latagon kag ginbilinan sia sing brosyur nga Nagaulikid Gid Bala ang Dios sa Aton? Pagkalunes sa eskwelahan, ginpangita ni Ann ang lamharon nga Saksi. Madamo sing pamangkot sa Biblia si Ann nga nasabat ni Vanessa. “Diin ninyo ginahiwat ang inyo mga serbisyo sa pagsimba?” pamangkot niya. Sadto nga gab-i nagtambong si Ann sa una nga tion sa miting sa Kingdom Hall.

Wala magdugay, ining 17-anyos nga ilo nakasalapo sing madamo nga ‘amay’ kag ‘iloy,’ subong gid sa ginsaad ni Jesus. (Mateo 19:29) Kag makalilipay gid nga okasyon sadto nga makita ang malipayon kag nagayuhum nga si Ann nga nagasimbulo sang iya dedikasyon kay Jehova paagi sa bawtismo sa tubig sa “Mga Mensahero Sang Diosnon nga Paghidait” Distrito nga Kombension!

● Sa naligwin nga mga duog sa malapad nga rehiyon sang Arktiko sa Alaska​—⁠diin ang mga minuro tuman kalayo ang antad​—⁠gingamit ang duha sing makina nga eroplano sang Watch Tower Society sa pagsab-ug sing binhi sang Ginharian sa kapin sa 150 ka komunidad. Apang ang pagtubo sa espirituwal paagi sa tayuyon nga pagtuon sa Biblia posible lamang paagi sa sulat. Sanglit ang pagsulat mabudlay para sa madamo, ang nagatudlo sing Biblia kinahanglan mangin mapahituon agod mahuptan nga buhi ang interes sang estudyante. Paano ini mahimo?

Si Kathy nagdumala sing progresibo nga pagtuon sa Biblia kay Edna, bisan pa 600 kilometros ang ila antad sa isa kag isa! Sa baylo nga kopyahon lamang ang mga pamangkot sa publikasyon nga ginatun-an, ginasulat ni Kathy sa tuhay nga panid sang papel ang mga pamangkot kag ginahatagan ini sing lugar para sulatan sing sabat. Pagkatapos nga masabtan ini ni Edna, nagabalos si Kathy kag nagasal-ot sing mga komento kon kinahanglanon agod ipaathag ang isa ka punto. Si Kathy nagsiling: “Gin-eskedyul ko ang Mierkoles sang gab-i para sa amon ‘pagtuon,’ kag ginatuman ko ini subong sang ginahimo ko sa iban pa nga mga eskedyul sa pagtuon sa Biblia. Ginapadalhan ko man si Edna sing sobre nga nasulatan sing direksion nakon kag may selyo na. Sanglit nagalawig sing duha ka semana antes mabaton ang sulat, ang pagtuon paagi sa sulat medyo mahinay.”

Handurawa lamang ang kakunyag sang magkit-anay si Kathy kag si Edna sa distrito nga kombension sa Anchorage pagkatapos sang napulo ka bulan nga pagtuon paagi sa sulat! Nalipay man ang mga Saksi sa pagtambong sang mga estudyante sa Biblia kag sang iban pa nga mga interesado gikan sa pila ka naligwin nga mga minuro sa Alaska.

Walay sapayan nga ang pagtubo kon kaisa daw mahinay, ang pila ka “mga binhi” madasig nga nagatubo kon mapadayag sa kapawa sang kamatuoran. Sa promedyo, kapin sa isa ka gatos ka bag-o nga mga dumalayaw ni Jehova ang ginabawtismuhan kada tuig sa Alaska! Nagasiling kami, “Salamat Jehova,” sa pagpatubo sini!