Report sang mga Manugbantala sang Ginharian
“Ang Imo Katawhan Magahalad sang Ila Kaugalingon sing Kinabubut-on”
ANG gamhanan nga pangulo sang kasuldadusan sang Siria nga si Naaman aruon. Kon indi mabulong, ining makangilil-ad nga balatian magaresulta sa pagkaitos kag kamatayon. Ano ang himuon ni Naaman? Kaupod sa panimalay ni Naaman amo ang isa ka diutay nga lin-ay, “isa ka bihag gikan sa duta sang Israel.” May kasidla nga ginsugid niya kag ginpakilala si manalagna Eliseo subong ang isa nga makabulong kay Naaman.—2 Hari 5:1-3.
Bangod sang iya maisog nga panindugan, ginpangita ni Naaman si Eliseo kag nag-ayo sia. Dugang pa, si Naaman nangin isa ka sumilimba ni Jehova! Ini nga eksperiensia, nga narekord sa Biblia, natabo sang ikanapulo nga siglo B.C.E. (2 Hari 5:4-15) Sa karon, madamo nga pamatan-on ang nagapakita sing amo man nga kaisog sa paghambal tuhoy sa intereses sang Ginharian. Ang masunod nga eksperiensia gikan sa Mozambique nagapamatuod sini.
Ang sies anyos nga si Nuno isa ka dibawtismado nga manugbantala sing maayong balita. Bisan antes pa sia nangin dibawtismado nga manugbantala, ginatipon ni Nuno ang mga kabataan sa iya lugar, nagapangamuyo, kag nagatudlo sa ila sang Biblia, paagi sa publikasyon nga Ang Akon Libro sang mga Sugilanon sa Biblia.
Madamo nga beses nga si Nuno temprano pa nagabugtaw kon Sabado sing aga kag ginapahanumdom ang iya pamilya: “Magguwa kita sa latagon karon nga adlaw.” Ang iya kakugi sa pag-alagad ginpadayag sa iban pa nga mga paagi. Samtang nagapakig-upod sia sa iya mga ginikanan sa pagministeryo sa kalye sa Maputo, masunson nagapakighambal si Nuno sa mga tawo nga sia lamang. Sang isa ka okasyon, ang negosyante nagpalapit sa iya kag nagpamangkot: “Ngaa ginabaligya mo ini nga mga magasin?” Nagsabat si Nuno: “Wala ko ginabaligya ini nga mga magasin, apang nagabaton ako sing amot agod masuportahan ang pagbantala nga hilikuton.” Ang negosyante nagsabat: “Bisan indi ako interesado, nahamuot ako sa imo panimuot kag kinaadman. Luyag ko maghatag sing amot sa sini nga hilikuton.”
Sang isa naman ka okasyon, ginpalapitan ni Nuno ang isa ka tawo sa kalye kag nagtanyag sa iya sing libro nga True Peace and Security— How Can You Find It? Ang tawo nagpamangkot: “Indi bala didto ikaw nagaeskwela?” “Huo,” sabat niya, “Nagaeskwela ako didto, apang karon nagatanyag ako sing isa ka importante nga mensahe gikan sa sining libro. Ginapakita sini nga mahimo ka magkabuhi sa isa ka bag-ong kalibutan nga paluntaron sang Dios, subong sang ginapakita sa laragway sa sini nga libro.” Wala gid marealisar ni Nuno nga ang iya nasugilanon maestro gali sa ila eskwelahan. Indi lamang nga ginbaton sang maestro ang libro kundi regular man sia karon nga nagabaton sing Lalantawan kag Magmata! nga mga magasin halin kay Nuno.
Kon ginapamangkot gani si Nuno kon ngaa naluyagan niya ang pagbantala nga hilikuton, sia nagasiling: “Luyag ko magpakighambal sa mga tawo kag magtudlo sa ila nahanungod kay Jehova kag sa iya Anak, nga si Cristo Jesus.” Nagdugang pa sia: “Kag kon ang mga tawo indi magpamati, wala sing rason nga magpangakig.”
Sa bug-os nga kalibutan, linibo ka pamatan-on katulad ni Nuno ang nagahalad sang ila kaugalingon sing kinabubut-on agod magpanudlo kag magbantala nahanungod sa Ginharian sang Dios. (Salmo 110:3) Apang indi ini natabuan lamang. Ang mga ginikanan nga nagatudlo sa ila mga kabataan nahanungod kay Jehova kutob sa pagkalapsag, nagapahamtang sing maayong halimbawa sa ila ministeryo, kag makugi nga nagasakdag sa intereses sang Ginharian pagapadyaan sing bugana.