Ginatuman ni Jehova ang Iya mga Saad sa mga Matutom
“Matutom sia nga nagsaad.”—HEBREO 10:23.
1, 2. Ngaa makasalig kita sing bug-os sa mga saad ni Jehova?
SI Jehova nagapangabay nga ang iya mga alagad magpalambo kag maghupot sing mabakod nga pagtuo sa iya kag sa iya mga saad. Paagi sa sina nga pagtuo ang isa makasalig sing bug-os nga himuon ni Jehova kon ano ang ginsaad niya. Ang iya inspirado nga Pulong nagasiling: “Si Jehova sang mga kasuldadusan nagsumpa, nga nagasiling: ‘Suno gid sa akon ginpainoino, amo ini ang mahanabo; kag suno gid sa akon ginlaygay, amo ini ang matabo.’ ”—Isaias 14:24.
2 Ang pinamulong, “si Jehova sang mga kasuldadusan nagsumpa,” nagapakita nga nagasumpa sia sing hanuot nga tumanon ang iya mga saad. Amo ina kon ngaa ang iya Pulong makasiling: “Magsalig kay Jehova sa bug-os mo nga tagipusuon kag indi magsandig sa imo kaugalingon nga paghangop. Sa tanan mo nga dalanon talupangda sia, kag tadlungon niya ang imo mga banas.” (Hulubaton 3:5, 6) Kon magsalig kita kay Jehova kag magpatuytoy sa iya kaalam, ang aton mga banas pat-od gid nga magapadulong sa kabuhi nga walay katapusan, kay ang kaalam sang Dios “kahoy sang kabuhi sa mga nagakapyot sa sini.”—Hulubaton 3:18; Juan 17:3.
Ang Matuod nga Pagtuo sang Una nga Panahon
3. Paano ginpakita ni Noe ang pagsalig kay Jehova?
3 Ang rekord tuhoy sa mga binuhatan ni Jehova para sa mga may matuod nga pagtuo nagapamatuod sang iya pagkamasaligan. Halimbawa, sang nagligad nga kapin sa 4,440 ka tuig, ginsugiran sang Dios si Noe nga ang kalibutan sang panahon niya pagalaglagon paagi sa tugob-globo nga Anaw. Ginsugo niya si Noe sa pagtukod sing isa ka daku nga arka agod maamligan nga buhi ang mga tawo kag mga sapat. Ano ang ginhimo ni Noe? Ang Hebreo 11:7 nagasugid sa aton: “Bangod sa pagtuo si Noe, pagkatapos ginhatagan sing paandam sang Dios nahanungod sa mga butang nga wala pa makita, nagpakita sing diosnon nga kahadlok kag nagtukod sing arka sa pagluwas sa iya panimalay.” Ngaa nagtuo si Noe sa butang nga wala pa gid anay matabo, sa butang nga “wala pa makita”? Bangod may madamo sia nga nahibaluan tuhoy sa nagligad nga mga pagpakig-angot sang Dios sa tawhanon nga panimalay kag nahangpan niya nga bisan ano man ang isiling sang Dios, ini nagakatuman. Gani si Noe nagsalig nga magaabot man ang Anaw.—Genesis 6:9-22.
4, 5. Ngaa nagsalig sing bug-os si Abraham kay Jehova?
4 Ang isa pa ka halimbawa sang matuod nga pagtuo amo si Abraham. Sang nagligad nga halos 3,900 ka tuig, ginsugo sia sang Dios nga ihalad si Isaac, ang iya bugtong nga anak sa iya asawa, nga si Sara. (Genesis 22:1-10) Ano ang reaksion ni Abraham? Ang Hebreo 11:17 nagasiling: “Bangod sa pagtuo si Abraham, sang gintilawan sia, daw subong man nga naghalad kay Isaac.” Apang, sa katapusan nga tinion, ginpunggan sang anghel ni Jehova si Abraham. (Genesis 22:11, 12) Apang, ngaa nahimo ni Abraham ang subong sadto? Bangod, subong sang ginasiling sang Hebreo 11:19, “ginkabig niya nga ang Dios makasarang sa pagbanhaw [kay Isaac] bisan gikan sa mga patay.” Apang paano makatuo si Abraham sa pagkabanhaw kon wala pa sia makakita sini ukon wala pa sing nagligad nga rekord tuhoy sini?
5 Dumduma, si Sara 89 anyos sang nagsaad ang Dios sa ila sing isa ka anak nga lalaki. Ang taguangkan ni Sara indi na makapanganak—patay na, kon sa aton pa. (Genesis 18:9-14) Ginpasag-uli sang Dios ang ikasarang ni Sara sa pagpanganak, kag nag-anak sia kay Isaac. (Genesis 21:1-3) Nakahibalo si Abraham nga bangod ginpasag-uli sang Dios ang patay na nga taguangkan ni Sara, nian mabanhaw man niya si Isaac kon kinahanglan. Ang Roma 4:20, 21 nagasiling tuhoy kay Abraham: “Bangod sa saad sang Dios wala sia magpangalag-ag sa kakulang sing pagtuo, kundi nangin mabaskog bangod sang iya pagtuo, nga naghatag sa Dios sing himaya kag bangod nakumbinsi sing bug-os nga ang ginsaad niya sarang man niya himuon.”
6. Paano ginpabutyag ni Josue ang pagsalig kay Jehova?
6 Sang nagligad nga kapin sa 3,400 ka tuig sang si Josue lampas sa isa ka gatos ka tuig ang edad kag pagkatapos sang bug-os kabuhi nga pag-eksperiensia kon daw ano ka masaligan ang Dios, ginhatag niya ang ini nga rason sang iya pagsalig: “Nakahibalo kamo sa bug-os ninyo nga mga tagipusuon kag sa bug-os ninyo nga mga kalag nga wala sing isa ka tinaga sa tanan nga maayong tinaga nga ginpamulong ni Jehova nga inyo Dios sa inyo nga napaslawan. Ang tanan natuman sa inyo. Wala sing isa ka tinaga sini ang napaslawan.”—Josue 23:14.
7, 8. Anong nagaluwas nga buhat ang ginhimo sang matutom nga mga Cristiano sang unang siglo, kag ngaa?
7 Sang nagligad nga mga 1,900 ka tuig, madamong mapainubuson nga tawo ang nagpakita sing matuod nga pagtuo. Nahangpan nila gikan sa katumanan sang tagna sang Biblia nga si Jesus amo ang Mesias kag ginbaton nila ang iya mga panudlo. Bangod may mabakod nga basihan sa mga katunayan kag sa Hebreong Kasulatan, nagtuo sila sa gintudlo ni Jesus. Busa, sang nagsiling si Jesus nga hukman sang Dios ang Judea kag ang Jerusalem bangod sang pagkadimatutom, nagtuo sila sa iya. Kag sang ginsugiran niya sila sang dapat himuon agod maluwas ang ila kabuhi, ginhimo nila ini.
8 Ginsilingan ni Jesus ang mga tumuluo nga kon ang Jerusalem likupan sang mga hangaway, dapat sila magpalagyo. Nag-abot matuod ang Romanong mga hangaway sa Jerusalem sang tuig 66 C.E. Apang pagkatapos sadto ang mga Romano nagbiya sa dimapaathag nga rason. Amo yadto ang sinyales para magpalagyo sa siudad ang mga Cristiano, kay si Jesus nagsiling: “Kon makita ninyo ang Jerusalem nga nalikupan sang nagkampo nga mga hangaway, nian hibalua ninyo nga ang paghapay sa iya malapit na. Nian ang mga sa Judea magpalagyo sa mga bukid, kag ang mga sa tunga sini magguwa, kag ang mga sa kaumhan indi na magsulod sa sini.” (Lucas 21:20, 21) Yadtong may matuod nga pagtuo nagbiya sa Jerusalem kag sa palibot nga duog kag nagpalagyo padulong sa kaluwasan.
Mga Resulta sang Kakulang sing Pagtuo
9, 10. (a) Paano ginpakita sang relihiosong mga lider ang ila kakulang sing pagtuo kay Jesus? (b) Ano ang mga resulta sinang kakulang sing pagtuo?
9 Ano ang ginhimo sadtong mga wala sing matuod nga pagtuo? Wala sila magpalagyo sang may higayon sila. Naghunahuna sila nga luwason sila sang ila mga lider. Apang, yadtong mga lider kag ang ila mga sumulunod may pamatuod man tuhoy sa pagka-Mesias ni Jesus. Gani ngaa wala nila pagbatuna ang ginsiling niya? Bangod sang ila malaut nga kahimtangan sa tagipusuon. Nabuyagyag ini sang nagligad sang nakita nila ang madamong tawo nga nagdugok kay Jesus sang ginbanhaw niya si Lazaro. Ang Juan 11:47, 48 nagasaysay: “Gintipon sang puno nga mga saserdote kag sang mga Fariseo ang Sanhedrin [ang mataas nga korte sang mga Judiyo] kag nagsiling: ‘Ano bala ang aton himuon, bangod ining tawo [si Jesus] nagahimo sing madamong tanda? Kon pabayaan naton sia, sila tanan magatuo sa iya, kag ang mga Romano magakari kag magakuha sang aton duog kag sang aton pungsod.’ ” Ang bersikulo 53 nagasiling: “Busa kutob sadto nagsinapol sila nga patyon sia.”
10 Isa gid ka makatilingala nga milagro ang ginhimo ni Jesus—ang pagbanhaw kay Lazaro! Apang luyag sang relihiosong mga lider nga patyon si Jesus tungod sa paghimo sina. Ang ila daku nga kalautan dugang nga nabuyagyag sang “ang puno nga mga saserdote nagsinapol agod patyon man si Lazaro, kay bangod sa iya madamo sang mga Judiyo ang nagkadto kag nagtuo kay Jesus.” (Juan 12:10, 11) Bag-o lang nabanhaw si Lazaro, kag luyag sadtong mga saserdote nga makita sia nga mapatay liwat! Indi sila interesado sa kabubut-on sang Dios ukon sa kaayuhan sang katawhan. Makagod sila, interesado lamang sa ila mga posisyon kag mga kaayuhan. “Ginhigugma nila ang himaya sang tawo labaw pa sa himaya sang Dios.” (Juan 12:43) Apang nagbayad sila bangod sang ila kakulang sing pagtuo. Sang tuig 70 C.E., ang Romanong mga hangaway nagbalik kag naglaglag sang ila duog kag sang ila pungsod, subong man sang madamo sa ila.
Ang Pagtuo Ginpasundayag sa Aton Tion
11. Sang maaga nga bahin sining siglo, paano ginpakita ang matuod nga pagtuo?
11 Sa sining siglo, madamo pa nga lalaki kag babayi ang may matuod man nga pagtuo. Halimbawa, sadtong maaga nga bahin sang dekada 1900, ang katawhan sa kabilugan nagalaum sing isa ka mahidaiton kag mabuganaon nga palaabuton. Sadto man nga tion, yadtong nagtuo kay Jehova nagpahibalo nga ang katawhan magasulod sa pinakamalubha nga tion sang kagamo. Amo sina ang gintagna sang Pulong sang Dios sa Mateo kapitulo 24, 2 Timoteo kapitulo 3, kag sa iban pa. Ang ginhambal sadtong mga tawo nga may pagtuo natabo matuod, nga nagsugod sang 1914 paagi sa Inaway Kalibutanon I. Ang kalibutan nagsulod matuod sa gintagna nga “katapusan nga mga adlaw” paagi sa “makahalanguyos nga mga tion nga mabudlay atubangon.” (2 Timoteo 3:1) Ngaa nahibaluan sang mga alagad ni Jehova ang kamatuoran tuhoy sa mga kahimtangan sang kalibutan sadto anay samtang ang iban wala? Bangod, kaangay ni Josue, nagatuo sila nga wala sing isa ka pinamulong ni Jehova ang mapaslawan.
12. Sa karon, ano nga saad ni Jehova ang ginasaligan sing bug-os sang iya mga alagad?
12 Sa karon, ang mga alagad ni Jehova, nga nagasalig sa iya, nagadamo sing halos anom ka milyon sa bug-os nga kalibutan. Nahibaluan nila gikan sa pamatuod sang katumanan sang matagnaon nga pulong sang Dios nga laglagon niya sa dili madugay ining masingki, imoral nga sistema sang mga butang. Gani nagasalig sila nga malapit na ang tion nga makita nila ang katumanan sang 1 Juan 2:17, nga nagasiling: “Ang kalibutan nagataliwan kag amo man ang kailigbon sini, apang sia nga nagahimo sang kabubut-on sang Dios nagapabilin sing dayon.” Ang iya mga alagad nagasalig sing bug-os nga tumanon ni Jehova ini nga saad.
13. Tubtob diin ka makasalig kay Jehova?
13 Tubtob diin ka makasalig kay Jehova? Makasalig ikaw sing bug-os kay Jehova! Bisan pa mapatay ikaw karon tungod sa pag-alagad sa iya, ibalik niya sa imo ang mas malipayon nga kabuhi sa pagkabanhaw. Si Jesus nagapasalig sa aton: “Ang oras magaabot nga ang tanan nga yara sa handumanan nga lulubngan [kon sayuron, sa handumanan sang Dios] makabati sang iya tingog kag magaguwa.” (Juan 5:28, 29) May kilala bala ikaw nga doktor, lider sang politika, sientipiko, negosyante, ukon bisan sin-o nga tawo nga makahimo sina? Ginapakita sang ila nagligad nga mga rekord nga indi nila ina mahimo. Si Jehova makahimo sina, kag himuon niya!
Isa ka Makalilipay nga Palaabuton Para sa mga Matutom
14. Anong makalilipay nga palaabuton ang ginasaad sang Pulong sang Dios sa mga matutom?
14 Ginpakita ni Jesus ang kapat-uran sang isa ka bag-ong kalibutan sa idalom sang langitnon nga Ginharian sang Dios, nga nagasiling: “Malipayon ang mga malulo, kay sila magapanubli sang duta.” (Mateo 5:5) Nagpabakod ina sa saad sang Dios nga masapwan sa Salmo 37:29: “Ang mga matarong magapanag-iya sang duta, kag magapuyo sing dayon sa sini.” Kag antes gid lang napatay si Jesus sang ang isa ka malauton nagpabutyag sing pagtuo sa iya, si Jesus nagsiling sa sadto nga tawo: “Mangin kaupod ka nakon sa Paraiso.” (Lucas 23:43) Huo, subong Hari sang Ginharian sang Dios, pat-uron ni Jesus nga ining tawo banhawon sa duta nga may kahigayunan nga magkabuhi sing dayon sa sina nga Paraiso. Sa karon, ang nagatuo sa Ginharian ni Jehova malangkagon man nga makapaabot nga magkabuhi sa Paraiso kon “pahiran [sang Dios] ang tagsa ka luha sa mga mata nila, kag wala na sing kamatayon, ukon kalisod ukon paghibi ukon kasakit pa.”—Bugna 21:4.
15, 16. Ngaa tuman ka mahidaiton ang pagkabuhi sa bag-ong kalibutan?
15 Handurawon naton ang aton kaugalingon nga yadto didto sa bag-ong kalibutan. Handurawa nga nagapuyo na kita didto. Makita naton gilayon bisan diin ang malipayon nga mga tawo nga nagakabuhi sing mahidaiton. Nagaagom sila sing mga kahimtangan nga kaanggid sa sadtong ginlaragway sa Isaias 14:7: “Ang bug-os nga duta nagapahuway, nangin hilway sa tublag. Ang mga tawo nagahinugyaw sa pag-amba.” Ngaa nagagawi sila sing subong sina? Una, talupangda nga ang mga ganhaan sang kabalayan wala sing trangka. Indi na ini kinahanglan, kay wala na sing krimen ukon kasingki. Suno gid ini sa ginsiling sang Pulong sang Dios nga mahanabo: “Magalingkod sila, ang tagsa sa idalom sang iya ubas kag sa idalom sang iya higuera, kag wala na sing magapakurog sa ila.”—Miqueas 4:4.
16 Wala naman sing inaway, kay sa sining bag-ong kalibutan, ang inaway wala ginatugot. Ang tanan nga hinganiban nangin mga gamit sa paghidait. Sa bug-os nga kahulugan, ang Isaias 2:4 natuman: “Salsalon nila ang ila mga espada nga mga punta sang arado kag ang ila mga bangkaw nga mga galab nga inughagbas. Ang pungsod indi magabayaw sing espada batok sa pungsod, kag indi na sila magtuon sing inaway.” Apang, amo gid sina ang aton ginapaabot! Ngaa? Bangod madamong pumuluyo sang bag-ong kalibutan ang nakatuon nga himuon ina samtang nagaalagad sa Dios sa daan nga kalibutan.
17. Anong mga kahimtangan sa pagkabuhi ang magaluntad sa idalom sang Ginharian sang Dios?
17 Ang isa pa ka butang nga imo matalupangdan amo nga wala sing kaimulon. Wala sing isa nga nagapuyo sa mga hayubhayob ukon nagasuksok sing gision nga bayo ukon wala sing puluy-an. Ang tanan may masulhay nga puluy-an kag naatipan sing maayo nga duog nga may matahom nga kakahuyan kag kabulakan. (Isaias 35:1, 2; 65:21, 22; Ezequiel 34:27) Kag wala na sing gutom bangod gintuman sang Dios ang iya saad nga may bugana nga pagkaon para sa tanan: “May bugana nga uyas sa duta; sa putukputukan sang kabukiran magahapayhapay ini.” (Salmo 72:16) Sa pagkamatuod, sa idalom sang panuytoy sang Ginharian sang Dios, ang isa ka mahimayaon nga paraiso mangin bug-os duta, suno sa ginsaad sadto sang Dios sa Eden.—Genesis 2:8.
18. Sa bag-ong kalibutan anong mga butang ang indi na magapahadlok sa katawhan?
18 Nagadayaw man ikaw sa kapagsik sang tanan. Ini bangod himpit na ang ila lawas kag hunahuna. Wala na sing balatian, kasakit, ukon kamatayon. Wala na sing naga-wheelchair ukon naospital. Ina tanan madula sing dayon. (Isaias 33:24; 35:5, 6) Aba, wala man sing kasapatan ang mangin makatalagam, kay paagi sa gahom sang Dios sila nangin mahagop.—Isaias 11:6-8; 65:25; Ezequiel 34:25.
19. Ngaa ang tagsa ka adlaw sa bag-ong kalibutan mangin ‘makalilipay’?
19 Isa gid ka malipayon nga sibilisasyon ang ginahuman sang matutom nga mga pumuluyo sining bag-ong kalibutan! Ang ila mga enerhiya kag mga ikasarang kag ang manggad sang duta gamiton sa mapuslanon nga mga hilikuton, indi sa mga butang nga makahalalit; sa pagbulig sa iban, indi sa pagpakig-indisanay sa ila. Kag imo masaligan ang tanan nga makilala mo bangod, suno sa ginsaad sang Dios, ang tanan “mga tawo nga gintudluan ni Jehova.” (Isaias 54:13) Sanglit ang tanan ginatuytuyan sang kasuguan sang Dios, ang duta “matugob sang ihibalo kay Jehova subong nga ang mga tubig nagatabon sang dagat.” (Isaias 11:9) Sa pagkamatuod, ang tagsa ka adlaw sa sining bag-ong kalibutan mangin suno gid sa ginsiling sang Salmo 37:11, isa nga dapat ‘kalipayan.’
Isa ka Makalilipay nga Palaabuton Ginagarantiya
20. Ano ang dapat naton himuon agod maagom ang mahidaiton nga palaabuton?
20 Ano ang dapat naton himuon agod mangin bahin sinang makalilipay nga palaabuton? Ang Isaias 55:6 nagasugid sa aton: “Pangitaa ninyo si Jehova samtang nga makita pa sia. Tawga ninyo sia samtang malapit pa sia.” Kag samtang nagapangita kita, ang aton panimuot dapat nga mangin suno sa ginlaragway sa Salmo 143:10: “Tudlui ako sa paghimo sang imo kabubut-on, kay ikaw amo ang akon Dios.” Yadtong nagahimo sini makalakat nga wala sing kasawayan sa atubangan sang Dios sa sining katapusan nga mga adlaw kag makatan-aw sing malaumon sa isa ka maayo nga palaabuton. “Bantayi ang isa nga wala sing kasawayan kag tan-awa ang isa nga matadlong, kay ang palaabuton sina nga tawo mangin mahidaiton. Apang ang mga malinapason laglagon sing tingob; ang palaabuton sang mga malauton utdon gid.”—Salmo 37:37, 38.
21, 22. Ano ang ginapasad sang Dios sa karon, kag paano ginahimo ang paghanas?
21 Sa karon si Jehova nagapanawagan gikan sa tanan nga pungsod sa tanan nga maluyag sa paghimo sang iya kabubut-on. Himuon niya sila nga sadsaran sang iya bag-ong dutan-on nga katilingban, suno sa gintagna sang Biblia: “Sa ulihing bahin sang mga adlaw [ang tion nga ginapuy-an naton karon] . . . madamong tawo ang pat-od nga magalakat kag magasiling: ‘Kari, kamo nga katawhan, kag magataklad kita sa bukid ni Jehova [ang iya mataas nga matuod nga pagsimba] . . . Tudluan niya kita sang iya mga dalanon, kag magalakat kita sa iya mga banas.’ ”—Isaias 2:2, 3.
22 Ginalaragway sila sang Bugna 7:9 subong “ang isa ka dakung kadam-an . . . gikan sa tanan nga pungsod kag tribo kag katawhan kag hambal.” Ang bersikulo 14 nagasiling: “Ini amo sila ang nagguwa sa dakung kapipit-an,” nagalampuwas sa katapusan sang karon nga sistema. Ining sadsaran para sa sining bag-ong kalibutan halos anom ka milyon na karon, kag madamong bag-uhan ang nangin bahin sini kada tuig. Ining tanan nga matutom nga mga alagad ni Jehova ginahanas para sa kabuhi sa iya bag-ong kalibutan. Nagatuon sila sang espirituwal kag sang iban pa nga ikasarang nga kinahanglanon sa paghimo sining duta nga isa ka paraiso. Kag nagasalig sila sing bug-os nga ang Paraiso mangin katunayan bangod “matutom sia nga nagsaad.”—Hebreo 10:23.
Mga Punto Para sa Repaso
◻ Anong mga resulta ang gindala sang kakulang sing pagtuo sang unang siglo?
◻ Tubtob diin ang mga alagad sang Dios makasalig sa iya?
◻ Anong palaabuton ang natigana sa mga matutom?
◻ Ano ang dapat naton himuon agod pat-uron ang isa ka makalilipay nga palaabuton para sa aton sa bag-ong kalibutan sang Dios?
[Retrato sa pahina 18]
Si Jehova nagahimo karon sing sadsaran sang isa ka bag-ong dutan-on nga katilingban