Madumduman Mo Bala?

Nasapwan mo bala nga ang ulihi nga mga guwa sang Ang Lalantawan may praktikal nga kabilihanan sa imo? Nian ngaa indi tilawan ang imo memorya paagi sa masunod nga mga pamangkot?

◻ Ano ang kinatuhayan sa ulot sang “adlaw sang Ginuo” kag sang “adlaw ni Jehova”? (Bugna 1:​10; Joel 2:​11)

Ang “adlaw sang Ginuo” nagalakip sa katumanan sang 16 ka palanan-awon nga ginlaragway sa Bugna kapitulo 1 tubtob 22 kag sa panguna nga mga hitabo nga gintagna ni Jesus bilang sabat sa pamangkot sang iya mga disipulo tuhoy sa tanda sang iya presensia. Subong talipuspusan nga bahin sang adlaw sang Ginuo, ang makakulugmat nga adlaw ni Jehova magasugod kon himuon niya ang paghukom sa malauton nga kalibutan ni Satanas. (Mateo 24:​3-​14; Lucas 21:11)​—⁠12/15, pahina 11.

◻ Ano ang pila sang talalupangdon nga bahin sang Makarios nga Biblia?

Ang ngalan nga Jehova mabasa sing kapin sa 3,500 ka beses sa Makarios nga Biblia. Ang isa ka iskolar sang relihioso nga literatura sang Rusya nagsiling: “Ginasunod gid sang iya badbad ang Hebreong teksto, kag ang pamulong sang badbad putli kag nagakabagay sa tema.”​—⁠12/15, pahina 27.

◻ Ano “ang kamatuoran” nga ginsiling ni Jesus nga magahilway sa aton? (Juan 8:32)

Buot silingon ni Jesus sa “kamatuoran” amo ang gin-inspirar nga impormasyon halin sa Dios​—⁠ilabi na ang impormasyon nahanungod sa kabubut-on sang Dios​—⁠nga gintipigan sa Biblia.​—⁠1/1, pahina 3.

◻ Sin-o ang modernong-adlaw nga Jehu kag Jehonadab?

Si Jehu nagalaragway kay Jesucristo, nga ginarepresentar sa duta sang “Israel sang Dios,” ang hinaplas nga mga Cristiano. (Galacia 6:​16; Bugna 12:17) Subong nga si Jehonadab nagguwa agod sugataon si Jehu, isa ka “daku nga kadam-an” gikan sa mga pungsod ang nagguwa agod sakdagon ang dutan-on nga mga tiglawas ni Jesus. (Bugna 7:​9, 10; 2 Hari 10:15)​—⁠1/1, pahina 13.

◻ Ano ang kahulugan sang ‘paglakat upod sa Dios’? (Genesis 5:​24; 6:⁠9)

Nagakahulugan ini nga ang mga nagahimo sini, subong nanday Enoc kag Noe, naggawi sa paagi nga nagapamatuod sang mabakod nga pagtuo sa Dios. Ginhimo nila ang ginsugo ni Jehova sa ila kag nagkabuhi suno sa nahibaluan nila tuhoy sa iya gikan sa iya mga pagpakig-angot sa katawhan.​—⁠1/15, pahina 13.

◻ Ngaa dapat magplano sing abanse ang isa ka tawo para sa posibilidad nga mapatay sia?

Ang matuod, ang paghimo sing subong sini nga kahimusan isa ka dulot sa pamilya sang isa. Ginapakita sini ang gugma. Pamatuod ini nga luyag sang isa ‘mag-aman para sa katapo sang iya pamilya’ bisan pa nga wala na sia. (1 Timoteo 5:⁠8)​—⁠1/15, pahina 22.

◻ Ano ang nahimuan sang “daan nga katipan”? (2 Corinto 3:​14)

Naglandong ini sa bag-ong katipan kag, paagi sa sulit-sulit nga mga halad sini, ginpasundayag sini ang daku nga pagkinahanglan sang tawo sing pagtubos gikan sa sala kag kamatayon. Isa yadto ka “manunudlo padulong kay Cristo.” (Galacia 3:​24)​—⁠2/1, pahina 14.

◻ Sa anong mga paagi nga dayon ang bag-ong katipan? (Hebreo 13:20)

Una, indi kaangay sa Kasuguan nga katipan, indi gid ini pag-islan. Ikaduha, ang mga resulta sang pagpanghikot sini permanente. Kag ikatlo, ang dutan-on nga mga sakop sang Ginharian sang Dios padayon nga magabenepisyo gikan sa bag-ong katipan nga kahimusan tubtob sa Milenyo.​—⁠2/1, pahina 22.

◻ Anong mga kaayuhan ang nagaresulta gikan sa pagkamapasalamaton?

Ang kalipay nga nabatyagan sang isa ka tawo bangod sang tinagipusuon nga pagkamapasalamaton nagadugang sa iya kalipay kag kalinong. (Ipaanggid ang Hulubaton 15:​13, 15.) Subong isa ka positibo nga kinaiya, ang pagkamapasalamaton nagaamlig sa isa gikan sa negatibo nga mga kinaiya subong sang kaakig, kahisa, kag kaugot.​—⁠2/15, pahina 4.

◻ Sa anong mga katipan gindala ang mga ginpanganak-sang-espiritu?

Ang bag-ong katipan, nga ginhimo ni Jehova sa mga katapo sang espirituwal nga Israel, kag ang katipan para sa Ginharian, nga ginhimo ni Jesus sa mga hinaplas nga sumulunod sang iya tikang. (Lucas 22:​20, 28-​30)​—⁠2/15, pahina 16.

◻ Ano ang tatlo ka daku nga piesta nga ginsugo ang mga Israelita nga tambungan?

Ang Piesta sang mga Tinapay nga Walay Tapay, pagkatapos gid sang Paskua sang Nisan 14; ang Piesta sang mga Semana, sa ika-50 nga adlaw kutob sang Nisan 16; kag ang Piesta sang Ani, ukon Piesta sang mga Kayangkayang, sa ikapito nga bulan. (Deuteronomio 16:​1-​15)​—⁠3/1, pahina 8, 9.

◻ Ngaa isa ka pribilehiyo ang magtambong sa Cristianong mga pagtilipon?

Si Jesus nagsiling: “Kay kon diin may duha ukon tatlo nga nagatipon sa akon ngalan, yara ako sa tunga nila.” (Mateo 18:20; 28:20) Subong man, ang isa ka importante nga paagi nga ginahimo ang espirituwal nga pagpakaon amo ang paagi sa mga miting sa kongregasyon kag sa dalagku nga mga pagtilipon. (Mateo 24:45)​—⁠3/1, pahina 14.

◻ Ano ang ginhalinan sang ngalan nga Nimrod?

Ang pila ka iskolar nagaugyon sa opinyon nga ang ngalan nga Nimrod indi isa ka ngalan nga ginhatag sa pagkabun-ag. Sa baylo, ginakabig nila ini subong isa ka ngalan nga ginhatag sang ulihi agod ibagay sa iya rebelyuso nga kinaiya sa tapos ini mapadayag.​—⁠3/15, pahina 25.

◻ Daw ano ka importante ang pamilya sa tawhanon nga katilingban?

Ang pamilya kinahanglanon sang tawo. Ginapakita sang maragtas nga kon ang kahimusan sang pamilya nagaluya, ang kusog sang mga komunidad kag mga pungsod nagahuyang. Gani ang pamilya may direkta nga epekto sa kalig-unan sang katilingban kag sa kaayuhan sang kabataan kag sang ulihi nga mga kaliwatan.​—⁠4/1, pahina 6.

◻ Ano ang tatlo ka pamatuod nga ang Biblia Pulong sang Dios? (1) Nagasibu ini sa siensia; (2) nagaunod ini sing wala nagalubad nga mga prinsipio nga praktikal gihapon para sa pagkabuhi karon; (3) nagaunod ini sing espesipiko nga mga tagna nga natuman na, subong ginapamatud-an sang maragtason nga mga katunayan.​—⁠4/1, pahina 15.