Isa ka Malipayon nga Okasyon—Ang Gradwasyon sang Ika-104 nga Klase sang Gilead

“ISA ini ka malipayon nga adlaw, kag tanan kita nagakalipay.” Paagi sa sinang mga pulong ginbuksan ni ­Carey ­Barber, isa ka katapo sang Nagadumala nga Hubon sang mga Saksi ni Jehova, ang makalilipay nga programa sang gradwasyon sang ika-104 nga klase sang Watch­tower Bi­ble ­School of ­Gilead sang Marso 14, 1998. Gin-agda ang 4,945 ka tumalambong nga sugdan ang okasyon paagi sa pagkanta sing ambahanon sang Ginharian numero 208, nga natig-uluhan “A Song of Rejoicing.”

Praktikal nga Laygay Agod Magpabilin nga Malipayon

Ang nagabukas nga bahin sang programa, nga isa ka serye sang lima ka malip-ot pasad-sa-Biblia nga pamulongpulong, naghatag sing pila ka praktikal nga laygay kon paano mahuptan ang malipayon nga espiritu nga nangibabaw sa adlaw sang gradwasyon.

Ang una nga pamulongpulong ginhatag ni ­Joseph ­Eames sang ­Writing Depart­ment. Namulongpulong sia sa tema nga “Iluga ang Espiritu Sang mga Mainunungon,” pasad sa rekord sang Biblia sa 2 Samuel kapitulo 15 kag 17, diin si Absalom nga anak ni David, nakighimbon sa pag-agaw sa hatag-Dios nga ginharian sang iya amay paagi sa pagsugyot sing isa ka pagribok. Apang, may mga nagpabilin nga mainunungon sa hinaplas ni Jehova, si Hari David. Ano nga leksion ang matun-an sang bag-o nga mga misyonero gikan sa sini? “Bisan diin man kamo magkadto nga teritoryo sa inyo pagmisyonero, mainunungon nga palambua ang espiritu sang pagkooperar kag pagtahod sa teokratikong awtoridad. Buligi ang iban nga himuon man ini,” hinakop ni Utod ­Eames.

Ang masunod sa programa amo si ­David ­Sinclair, nga nagbalay sing napulo ka kinahanglanon, nga ginhinambitan sa Salmo 15, para sa mga dinapit sa ‘kayangkayang ni Jehova.’ Ang iya pamulongpulong nga natig-uluhan “Magpadayon Subong mga Dinapit sa Inyo Misyonero nga Kayangkayang,” nagpalig-on sa naggradwar nga mga estudyante sa pag-aplikar sining salmo sa ila mga teritoryo sa pagmisyonero, diin mangin mga dinapit sila. Ginpadaku ni Utod ­Sinclair ang pagkaimportante sang pagkabuhi suno sa diosnon nga mga talaksan sa tanan nga tion. Ang resulta? Ang Salmo 15:5 nagasiling: “Sia nga nagahimo sining mga butang indi gid malingkang.”

Ang masunod amo si John Barr, isa ka katapo sang Nagadumala nga Hubon, kag ginpatalupangod niya ang nagapapagsik nga epekto sang mga pag-amba sa Cristianong mga miting. Apang ano ang labing makalilipay nga ambahanon nga ginaamba karon sa bug-os nga duta? Amo ang maayong balita tuhoy sa Mesianikong Ginharian sang Dios. Ano ang resulta sining tanan nga pag-amba, ukon pagbantala tuhoy sa Ginharian? Ang ikaduha nga stan­za sang ambahanon numero 208 nagapabutyag sini sa malip-ot: “Thru Kingdom preaching and Christian teaching, many are drawn to Jehovah’s side. These, too, are voicing songs of rejoicing, sounding them out, O so far and wide!” Huo, kada adlaw mga 1,000 ka bag-o nga disipulo ang nagapabawtismo. Si Utod ­Barr naghinakop: “Indi bala makalilipay hunahunaon, mga kauturan, nga ginapadala kamo sa mga teritoryo agod sugilanunon ang sahi sang mga tawo nga ayhan nagahulat lamang nga mamati sang inyo ambahanon sang pagdayaw?”

“Pamatii ang mga Tingog Sang Eksperiensia” amo ang tig-ulo sang pamulongpulong nga ginhatag ni ­James ­Mantz sang ­Writing Depar­tment. Ginpatalupangod niya nga ang pila ka butang matun-an lamang paagi sa personal nga eksperiensia. (Hebreo 5:⁠8) Apang, ang Hulubaton 22:17 nagapalig-on sa aton nga ‘ilingig ang aton igdulungog kag pamatian ang mga pulong sang mga maalam,’ ukon sang mga eksperiensiado. Ang naggradwar nga mga estudyante makatuon sing daku gikan sa mga nauna sa ila. “Nahibaluan nila kon paano makig-angot sa lokal nga mga manugbaligya. Nahibaluan nila kon diin nga mga duog sa siudad ang likawan bangod sang katalagman sa pisikal ukon sa moral. Nahibaluan nila kon ano ang madali makasaklaw sa lokal nga mga tawo. Nahibaluan sang madugay na nga mga misyonero ang imo kinahanglanon agod mangin malipayon kag magmadinalag-on sa imo asaynment,” siling ni Utod ­Mantz.

Nagapamulongpulong sa tema nga “Apresyaha ang Imo Teokratikong Asaynment,” ginpaathag ni Wal­lace Liv­erance, rehistrador sang ­Gilead ­School, nga bisan pa ang pila ka misyonero, subong nanday apostol Pablo, Timoteo, kag Bernabe, nakabaton sang ila mga asaynment gikan sa Dios paagi sa balaan nga espiritu ukon sa pila ka milagro, ang nahanas sa Gilead nga mga misyonero ginatangduan sing duog sa bug-os kalibutan nga latagon sang “matutom kag mainandamon nga ulipon.” (Mateo 24:​45-​47) Ginpaanggid niya ang mga teritoryo sang mga misyonero sa mga duog nga gintangdo ni Gideon sa iya mga tinawo nga nakig-away sa mga Midianhon. (Hukom 7:​16-21) “Apresyaha ang inyo teokratikong asaynment sa pagmisyonero. Subong nga ang mga soldado ni ­Gideon ‘padayon nga nagtindog sa tagsa nila ka duog,’ tamda ang imo teritoryo subong amo ang imo duog. Magtuo nga mahimo ikaw gamiton ni Jehova subong nga gingamit niya ang tatlo ka gatos nga soldado ni Gideon,” palig-on ni Utod ­Liverance.

Ang Pagpakita sing Interes sa mga Tawo Nagaresulta sa Kalipay

Ang Lalantawan nagsiling anay: “Sa baylo nga isentro ang aton interes kag kabuhi sa mga produkto kag mga kasangkapan sang kalibutan karon, mga butang nga indi pat-od nga magapadayon, daw ano ka maayo kag maalamon pa nga ang pakitaan naton sing interes amo ang katawhan kag magtuon kon paano kita makatigayon sing matuod nga kalipay sa paghimo sing mga butang para sa iban.” Nahisuno sa sina, ginbinagbinag ni Utod Mark Nou­mair, isa sang mga instruktor sa ­Gilead ­School, upod sa isa ka grupo sang mga estudyante ang ila mga eksperiensia sa pag-alagad sa latagon kag nagsiling: “Ang pagpakita sing personal nga interes sa iban amo ang magahimo sa inyo nga maayo nga mga misyonero.”

Mga Sekreto sa Kalipay sa Latagon sa Luwas

Ano ang pila ka sekreto sa kadalag-an kag kalipay sa misyonero nga hilikuton? Sanday Utod ­Charles ­Woody sang ­Service Department kag ­Harold ­Jackson, isa anay ka misyonero sa Latin Amerika kag kabulig sa Teach­ing Com­mittee, nag-interbyu sa mga katapo sang nanuhaytuhay nga Komite sang Sanga nga nag-eskwela sa ikasiam nga klase sang eskwelahan para sa talapuanan sang sanga. Yari ang halimbawa sang laygay nga ginhatag nila:

Si Albert Musonda gikan sa Zambia nagsiling: “Kon ang misyonero ang una magpalapit kag magtamyaw sa mga kauturan, magaresulta ini sa makapalig-on gid nga espiritu bangod ang mga kauturan magasuod sa misyonero, kag ang misyonero magasuod sa ila.”

Si Rolando Morales sang Guatemala nagpanugyan nga kon tanyagan sing mainom sang mainabyanon nga mga tawo ang bag-o nga mga misyonero, makasabat sila sing mainayuhon kag mataktikanhon: “Bag-uhan lang ako sa pungsod. Luyag ko kuntani batunon ini, apang wala sing kinaugali nga depensa ang akon lawas subong sang inyo lawas. Ginalauman ko nga sa pila ka adlaw mabaton ko ini, kag malipay ako nga himuon ina.” Ano ang kaayuhan sinang sahi sang pagsabat? “Indi masaklaw ang mga tawo, kag ang mga misyonero nagapakita sing kaayo sa iban.”

Ano ang makabulig sa mga misyonero nga makabatas sa ila mga asaynment? Si Utod ­Paul Cru­dass, isa ka gradwado sang ika-79 nga klase sang Gilead, nga nagaalagad sa Liberia sa sulod sang nagligad nga 12 ka tuig, nagsiling: “Nahibaluan ko nga matuod nga ang mga ginikanan nahidlaw sa ila mga kabataan. Apang may mga tion nga ang misyonero nagatinguha nga makigbagay sa pungsod, sa palibot, sa kultura, sa mga tawo. Ayhan daw luyag niya biyaan ang iya teritoryo. Kon makabaton sia sing sulat gikan sa iya puluy-an nga nagasiling, ‘Nahidlaw na gid kami sa imo; indi namon mahibaluan ang amon himuon kon wala ka,’ mahimo ini makapahulag sa iya nga magpamutos kag magpauli. Importante gid nga dumdumon ini sang mga kaparyentehan nga yari diri karon.”

Pagkatapos sang mga interbyu, ang katapusan nga pamulongpulong sa programa ginhatag ni ­Theodore ­Jaracs, isa ka katapo sang Nagadumala nga Hubon. Ang iya tema: “Hupti nga Una sa Imo Kabuhi ang Ginharian.” Paano ang mga misyonero makapabilin nga makugi kag indi matublag sa ila hilikuton? Ginpalig-on niya sila nga mag-eskedyul para sa personal nga pagtuon sing Biblia, nga makabulig sa ila nga mahuptan nga una sa ila kabuhi ang mga interes sang Ginharian. Kag ginhatag ining suno sa tion nga pahanumdom: “Napatumbayaan sang pila ka misyonero ang personal nga pagtuon bangod nabuyo sila sa elektroniko nga mga kagamitan, E-mail, kag kompyuter. Dapat maalamon kita nga mangin balanse sa paggamit sa bisan ano nga kagamitan kag indi maghinguyang sing daku nga tion sa butang nga makasablag sang aton personal nga pagtuon sa Pulong sang Dios.”

Pagkatapos sang pamulongpulong ni Utod ­Jaracs ginpanagtag ang mga diploma kag ang pagbasa sing sulat sang pagpasalamat gikan sa klase. Ginpabutyag sang tiglawas sang klase ang balatyagon sang tagsatagsa sa sining paagi: “Nakita naton ang kitaon nga ebidensia sang gugma nga ginsiling ni Jesus nga makita sa iya mga disipulo, kag nagapasalig ini sa aton liwat nga bisan diin man kita, may mainit, mahigugmaon, tulad-iloy nga organisasyon nga nagasakdag sa aton. Bangod sina nga pagsakdag, handa kami magkadto tubtob sa mga ukbong sang duta.” Isa yadto ka makatalandog nga paghinakop sa isa ka malipayon nga adlaw sang gradwasyon para sa ika-104 nga klase sang Gilead.

[Kahon sa pahina 25]

Estadistika sang Klase

Kadamuon sang pungsod nga gintiglawasan: 9

Kadamuon sang pungsod nga ginpadalhan: 16

Kadamuon sang mga estudyante: 48

Kadamuon sang mag-asawa: 24

Promedyo nga edad: 33

Promedyo nga tinuig sa kamatuoran: 16

Promedyo nga tinuig sa bug-os tion nga ministeryo: 12

[Retrato sa pahina 26]

Ika-104 nga Naggradwar nga Klase Sang Watchtower Bible School of Gilead

Sa listahan sa ubos, ang mga raya nanumeruhan halin sa atubang pa likod, kag ang mga ngalan nalista halin sa wala pa tuo sa tagsa ka raya.

(1) Romero, M.; Howarth, J.; Blackburne-Kane, D.; Hohengasser, E.; West, S.; Thom, S. (2) Colon, W.; Glancy, J.; Kono, Y.; Drews, P.; Tam, S.; Kono, T. (3) Tam, D.; Zechmeister, S.; Gerdel, S.; Elwell, J.; Dunec, P.; Tibaudo, H. (4) Taylor, E.; Hildred, L.; Sanches, M.; Anderson, C.; Bucknor, T.; Hohengasser, E. (5) Howarth, D.; Ward, C.; Hinch, P.; McDonald, Y.; Sanches, T.; Thom, O. (6) Drews, T.; Tibaudo, E.; Elwell, D.; Dunec, W.; Blackburne-Kane, D.; Ward, W. (7) Anderson, M.; Zechmeister, R.; McDonald, R.; Bucknor, R.; Glancy, S.; Gerdel, G. (8) Romero, D.; Hinch, R.; Hildred, S.; Taylor, J.; Colon, A.; West, W.

[Retrato sa pahina 27]

Mga kauturan nga nagpakigbahin sa pagtudlo sa ika-104 nga klase: (halin sa wala) W. Liverance, U. Glass, K. Adams, M. Noumair