Ikaw Bala may “Matinumanon nga Tagipusuon”?
SANG nangin hari si Solomon sa dumaan nga Israel, nagbatyag sia nga disangkol. Busa nangabay sia sa Dios sing kaalam kag ihibalo. (2 Cronica 1:10) Si Solomon nangamuyo man: “Hatagi ang imo alagad sing matinumanon nga tagipusuon sa paghukom sang imo katawhan.” (1 Hari 3:9) Kon may “matinumanon nga tagipusuon” si Solomon, matuman niya ang mga kasuguan kag mga prinsipio sang Dios kag maeksperiensiahan ang pagpakamaayo ni Jehova.
Ang matinumanon nga tagipusuon indi isa ka kabug-atan kundi isa ka tuburan sang kalipay. Si apostol Juan nagsulat: “Amo ini ang kahulugan sang gugma sang Dios, nga sundon naton ang iya mga sugo; kag ang iya mga sugo indi makapabug-at.” (1 Juan 5:3) Sa pagkamatuod, dapat naton tumanon ang Dios. Ti, si Jehova amo ang aton Dakung Manunuga. Sia ang nagapanag-iya sa duta kag sa tanan nga yari sa sini, bisan ang tanan nga pilak kag bulawan. Gani wala gid kita sing bisan ano nga materyal nga mahatag sa Dios, bisan pa ginatugutan niya kita nga gamiton ang aton kuwarta sa pagpakita sang aton gugma sa iya. (1 Cronica 29:14) Ginapaabot ni Jehova nga higugmaon naton sia kag maglakat upod sa iya, nga nagahimo sang iya kabubut-on.—Miqueas 6:8.
Sang ginpamangkot si Jesucristo kon ano ang labing daku nga sugo sa Kasuguan, sia nagsiling: “Higugmaa si Jehova nga imo Dios sa bug-os mo nga tagipusuon kag sa bug-os mo nga kalag kag sa bug-os mo nga hunahuna. Amo ini ang labing daku kag nahauna nga sugo.” (Mateo 22:36-38) Ang isa ka paagi sa pagpakita sina nga gugma amo ang pagtuman sa Dios. Busa, ang tagsatagsa sa aton dapat mangamuyo nga hatagan kita ni Jehova sing matinumanon nga tagipusuon.
May Matinumanon Sila nga Tagipusuon
Ang Biblia may madamo nga huwaran sang mga may matinumanon nga tagipusuon. Halimbawa, ginsilingan ni Jehova si Noe nga magtukod sing isa ka daku nga arka para sa pagluwas sing kabuhi. Daku gid ini nga trabaho nga naglawig sing mga 40 ukon 50 ka tuig. Bisan kon nagagamit sang tanan modernong makusog nga mga kagamitan kag iban pa nga mga kasangkapan karon, isa gid ka daku nga hinimuan sa pag-inhinyero ang pagtukod sadtong daku nga tinukod nga makalutaw. Dugang pa, dapat paandaman ni Noe ang mga tawo nga walay duhaduha nagyaguta kag nagyubit sa iya. Apang matinumanon sia bisan sa pinakadiutay nga detalye. Ang Biblia nagasiling: “Amo gid ang ginhimo niya.” (Genesis 6:9, 22; 2 Pedro 2:5) Ginpakita ni Noe ang iya gugma kay Jehova paagi sa matutom nga pagtuman sa sulod sang madamo nga tinuig. Isa gid ka maayo nga huwaran para sa aton tanan!
Binagbinaga man ang patriarka nga si Abraham. Ginsilingan sia sang Dios nga maghalin sa mahamungaya nga Ur sang mga Caldeanhon padulong sa duta nga wala niya mahibaluan. Nagtuman si Abraham nga wala pulupamangkot. (Hebreo 11:8) Sa nabilin nga bahin sang iya kabuhi, sia kag ang iya pamilya nagpuyo sa mga tolda. Pagkatapos sang madamo nga tuig subong dumuluong sa duta, ginpakamaayo sia ni Jehova kag ang iya matinumanon nga asawa nga si Sara, sing isa ka anak nga si Isaac. Palangga gid sang 100-anyos nga si Abraham ining anak sang iya katigulangon! Pila ka tuig sang ulihi, ginpangabay ni Jehova si Abraham nga ihalad si Isaac subong isa ka halad nga sinunog. (Genesis 22:1, 2) Ang paghunahuna lamang sa paghimo sina nagpasubo gid kay Abraham. Apang, nagtuman sia bangod ginahigugma niya si Jehova kag may pagtuo nga ang ginsaad nga binhi magahalin kay Isaac, bisan kon banhawon sia sang Dios gikan sa mga patay. (Hebreo 11:17-19) Apang, sang buot na patyon ni Abraham ang iya anak, ginpunggan sia ni Jehova kag nagsiling: “Karon nahibaluan ko nga ikaw mahinadlukon sa Dios nga sa amo wala mo pag-idumili sa akon ang imo anak, ang imo bugtong nga anak.” (Genesis 22:12) Bangod sang iya pagkamatinumanon, ang mahinadlukon sa Dios nga si Abraham nakilal-an subong “abyan ni Jehova.”—Santiago 2:23.
Si Jesucristo amo ang aton labing maayo nga huwaran sang pagkamatinumanon. Antes sia nangin tawo, malipayon sia nga nag-alagad sing matinumanon sa iya Amay sa langit. (Hulubaton 8:22-31) Subong isa ka tawo, gintuman ni Jesus si Jehova sa tanan nga butang, pirme nagakalipay sa paghimo sang iya kabubut-on. (Salmo 40:8; Hebreo 10:9) Sa amo, si Jesus makasiling sing maminatud-on: “Wala ako nagahimo sing bisan ano sa akon kaugalingon nga pagbulut-an; kundi suno sa gintudlo sa akon sang Amay ginapamulong ko ining mga butang. Kag sia nga nagpadala sa akon kaupod nakon; wala niya ako pagbayai sa akon kaugalingon lamang, bangod pirme ko ginahimo ang mga butang nga kalahamut-an sa iya.” (Juan 8:28, 29) Sa katapusan, agod mabindikar ang pagkasoberano ni Jehova kag matubos ang matinumanon nga katawhan, kinabubut-on nga ginhatag ni Jesus ang iya kabuhi, nakaeksperiensia sing labing makahuluya kag masakit nga kamatayon. Sa pagkamatuod, “sang nakita niya ang iya kaugalingon sa bayhon sang tawo, nagpaubos sia kag nangin matinumanon tubtob sa kamatayon, huo, kamatayon sa usok sang pag-antos.” (Filipos 2:8) Isa gid ka maayo nga halimbawa sa pagpakita sing matinumanon nga tagipusuon!
Ang Pakulahaw nga Pagtuman Indi Bastante
Indi tanan nga nagapangangkon nga matinumanon sa Dios nagtuman gid sa iya. Binagbinaga si Hari Saul sang dumaan nga Israel. Ginsugo sia sang Dios nga laglagon sing bug-os ang malaut nga mga Amaleknon. (1 Samuel 15:1-3) Walay sapayan nga ginlaglag sila ni Saul subong isa ka pungsod, wala niya ginpatay ang ila hari kag gintipigan ang pila nila ka karnero kag baka. Si Samuel namangkot: “Ngaa wala mo pagtumana ang tingog ni Jehova?” Bilang sabat, si Saul nagsiling: “Apang gintuman ko ang tingog ni Jehova . . . Ang katawhan [sang Israel] nagkuha gikan sa inagaw nga mga karnero kag mga baka, ang pinakaali sa sini . . . , agod ihalad kay Jehova.” Ginapadaku ang kinahanglanon sang bug-os nga pagtuman, si Samuel nagsabat: “May daku bala nga kahamuot si Jehova sa mga dulot nga sinunog kag mga halad sangsa pagtuman sang tingog ni Jehova? Tuluka! Ang pagtuman maayo pa sangsa halad, ang pagpamati sangsa sapay sang mga karnero; kay ang pagrebelde subong sang sala sang pagkababaylan, kag ang pagkabatinggilan subong sang pagkadiwatahan kag mga terafim. Bangod ginsikway mo ang pulong ni Jehova, sia man nagasikway sa imo subong hari.” (1 Samuel 15:17-23) Daw ano nga kadulaan kay Saul bangod wala sia sing matinumanon nga tagipusuon!
Bisan ang maalam nga si Hari Solomon, nga nagpangamuyo sing isa ka matinumanon nga tagipusuon, wala magpadayon sa pagtuman kay Jehova. Supak sa kabubut-on sang Dios, nagpangasawa sia sing dumuluong nga mga babayi nga gintunaan sang iya pagpakasala sa Dios. (Nehemias 13:23, 26) Nadula ni Solomon ang kahamuot sang Dios bangod wala sia nagpadayon nga may matinumanon nga tagipusuon. Isa gid ini ka paandam para sa aton!
Wala ini nagakahulugan nga ginapatuman ni Jehova sa iya tawhanon nga mga alagad ang pagkahimpit. ‘Ginadumdom [niya] nga kita yab-ok.’ (Salmo 103:14) Pat-od gid nga kita tanan makasala kon kaisa, apang makita sang Dios kon bala may hanuot gid kita nga handum nga pahamut-an sia. (2 Cronica 16:9) Kon makasala kita bangod sang tawhanon nga pagkadihimpit apang mahinulsulon, makapangayo kita sing patawad pasad sa halad nga gawad ni Cristo, nagasalig nga si Jehova “magapatawad sing bugana.” (Isaias 55:7; 1 Juan 2:1, 2) Ayhan kinahanglanon man ang bulig sang mahigugmaon Cristianong mga gulang agod makapanumbalik kita sa espirituwal kag matigayon ang mapagros nga pagtuo kag matinumanon nga tagipusuon.—Tito 2:2; Santiago 5:13-15.
Daw Ano ka Bug-os ang Imo Pagtuman?
Subong mga alagad ni Jehova, kalabanan sa aton walay duhaduha nagabatyag nga may matinumanon kita nga tagipusuon. Mahimo kita mangatarungan, Indi bala nga nagapakigbahin ako sa pagbantala sang Ginharian nga hilikuton? Indi bala nga nagatindog ako sing malig-on kon mag-utwas ang daku nga mga hulusayon subong sang pagkaneutral? Kag indi bala tayuyon ako nga nagatambong sa Cristianong mga miting, subong sang ginsugo ni apostol Pablo? (Mateo 24:14; 28:19, 20; Juan 17:16; Hebreo 10:24, 25) Matuod, ang katawhan ni Jehova sa kabilugan nagapadayag sing tinagipusuon nga pagtuman sa sining importante nga mga bahin.
Apang kumusta naman ang aton paggawi sa matag-adlaw nga mga hilikuton, ayhan bisan sa daw magagmay nga mga butang? Si Jesus nagsiling: “Ang tawo nga matutom sa labing diutay matutom man sa madamo, kag ang tawo nga dimatarong sa labing diutay dimatarong man sa madamo.” (Lucas 16:10) Busa, maayo nga pamangkuton sang tagsa sa aton ang iya kaugalingon, May matinumanon bala ako nga tagipusuon kon tuhoy sa magagmay nga mga butang ukon mga bagay nga wala gani mahibaluan sang iban?
Ginpakita sang isa ka salmista nga bisan sa sulod sang iya balay, diin indi sia makita sang iban, ‘naglakat [sia] sa integridad sang iya tagipusuon.’ (Salmo 101:2) Samtang nagalingkod sa imo balay, mahimo mo buksan ang telebisyon kag magtan-aw sing pelikula. Dira mismo, matilawan ang imo pagkamatinumanon. Mahimo nga ang pelikula imoral. Padayon ka bala nga magatan-aw, nagapangatarungan nga amo ini nga sahi sang pelikula ang ginapaguwa karon nga mga adlaw? Ukon ang imo bala matinumanon nga tagipusuon magapahulag sa imo nga tumanon ang Makasulatanhon nga sugo, ‘ang pagkamakihilawason kag kahigkuan indi gid paghingadlan sa tunga ninyo’? (Efeso 5:3-5) Patyon mo bala ang telebisyon, bisan pa kon makawiwili ang istorya? Ukon masaylo ka bala sa lain nga estasyon kon ang programa masingki? “Si Jehova mismo nagausisa sa matarong subong man sa malauton,” amba sang salmista, “kag ang nagahigugma sa kasingki ginadumtan sang Iya kalag.”—Salmo 11:5.
Ang Matinumanon nga Tagipusuon Nagadala sing mga Pagpakamaayo
Sa pagkamatuod, may madamo nga bahin sa aton kabuhi nga mausisa naton sing mapuslanon ang aton kaugalingon agod tan-awon kon ginatuman gid bala naton sing tinagipusuon ang Dios. Ang aton gugma kay Jehova dapat magpahulag sa aton nga pahamut-an sia kag himuon ang ginasiling niya sa aton paagi sa iya Pulong, ang Biblia. Ang matinumanon nga tagipusuon magabulig sa aton nga mahuptan ang maayo nga kaangtanan kay Jehova. Sa pagkamatuod, kon matinumanon kita sing bug-os, ‘ang mga pulong sang aton baba kag ang pagpamalandong sang aton tagipusuon mangin kalahamut-an kay Jehova.’—Salmo 19:14.
Bangod ginahigugma kita ni Jehova, ginatudluan niya kita sing pagkamatinumanon para sa aton kaayuhan. Kag makabenepisyo kita sing daku paagi sa bug-os tinagipusuon nga pagpamati sa ginatudlo sang Dios. (Isaias 48:17, 18) Busa, batunon naton sing malipayon ang bulig nga ginaaman sang aton langitnon nga Amay paagi sa iya Pulong, sa iya espiritu, kag sa iya organisasyon. Maayo gid ang pagtudlo sa aton nga daw subong nga may nabatian kita nga tingog sa likuran naton nga nagasiling: “Ini amo ang dalan. Lakat sa sini, kamo nga katawhan.” (Isaias 30:21) Samtang ginatudluan kita ni Jehova paagi sa Biblia, sa Cristianong mga publikasyon, kag sa mga miting sa kongregasyon, kabay nga pamatian naton, iaplikar ang aton natun-an, kag mangin “matinumanon sa tanan nga butang.”—2 Corinto 2:9.
Ang matinumanon nga tagipusuon magaresulta sa daku nga kalipay kag madamo nga pagpakamaayo. Magahatag ini sa aton sing kalinong sa hunahuna, kay nahibaluan naton nga kalahamut-an kita kay Jehova nga Dios kag nagapahalipay sang iya tagipusuon. (Hulubaton 27:11) Ang isa ka matinumanon nga tagipusuon mangin proteksion sa aton kon ginasulay kita sa paghimo sing sayop. Sa pagkamatuod, dapat naton tumanon ang aton langitnon nga Amay kag dapat mangamuyo: “Hatagi ang imo alagad sing matinumanon nga tagipusuon.”
[Picture Credit Line sa pahina 29]
Halin sa Self-Pronouncing Edition of the Holy Bible, nga nagaunod sing King James kag sing Revised nga mga bersion