Buligi ang Iban nga Mangin “Matinumanon Gikan sa Tagipusuon”

1. Ano ang ginapatuman ni Jehova sa iya mga sumilimba?

¹ Ang pagkamatinumanon importante sa kalahamut-an nga pagsimba kay Jehova. (Deut. 12:28; 1 Ped. 1:14-16) Sa dili madugay, ang paghukom sang Dios magaabot sa ‘mga wala nagakilala sa Dios kag sa mga wala nagatuman sa maayong balita.’ (2 Tes. 1:8) Paano naton mabuligan ang iban nga mangin ‘matinumanon gikan sa tagipusuon’ sa mga panudlo sang Pulong sang Dios?—⁠Roma 6:⁠17.

2. Ngaa importante nga buligan ang iban nga pabakuron ang ila pagtuo?

² Paagi sa Pagbulig nga Pabakuron ang Pagtuo kag Gugma: Sa Kasulatan, ang pagkamatinumanon suod nga naangot sa pagtuo. Nagpamulong si apostol Pablo tuhoy sa “sugo sang walay katapusan nga Dios agod sakdagon ang pagkamatinumanon paagi sa pagtuo.” (Roma 16:26) Ang Hebreo kapitulo 11 nagsambit sang madamong halimbawa sang pagtuo, nga madamo sa ila ang nagapanghikot nahisuno sa napabutyag nga kabubut-on ni Jehova. (Heb. 11:7, 8, 17) Sa pihak nga bahin, ang pagkadimatinumanon naangot sa pagkawalay pagtuo. (Juan 3:36; Heb. 3:18, 19) Dapat naton pauswagon ang aton ikasarang sa paggamit sang Pulong sang Dios agod mabuligan ang iban nga mapalambo ang isa ka pagtuo nga nagapatubas sang pagkamatinumanon.—⁠2 Tim. 2:15; Sant. 2:14, 17.

3. (a) Paano ang pagkamatinumanon naangot sa gugma? (b) Paano naton mabuligan ang mga estudyante sa Biblia nga mapalambo ang gugma kay Jehova?

³ Ang pagkamatinumanon naangot man sa gugma sa Dios. (Deut. 5:10; 11:1, 22; 30:16) “Kay amo ini ang kahulugan sang gugma sa Dios,” siling sang 1 Juan 5:3, “nga sundon naton ang iya mga sugo; apang ang iya mga sugo indi mabug-at.” Paano naton mabuligan ang mga estudyante sa Biblia nga mapalambo ang gugma kay Jehova? Mangita sing kahigayunan sa tion sang pagtuon nga pabakuron ang iya apresasyon sa mga kinaiya ni Jehova. Ipabutyag ang imo tudok nga balatyagon para sa Dios. Buligi ang estudyante nga hunahunaon ang pagpalambo sang personal nga kaangtanan kay Jehova. Labaw sa tanan, ang gugma kay Jehova magapahulag sa iban—⁠lakip sa aton—⁠nga magtuman sa iya gikan sa tagipusuon.—⁠Mat. 22:37.

4. (a) Ngaa ang aton halimbawa importante? (b) Ano ang dapat naton himuon agod mapalambo ang isa ka “matinumanon nga tagipusuon”?

⁴ Paagi sa Aton Halimbawa: Ang epektibo nga paagi nga mapalig-on naton ang iban nga magtuman sa maayong balita amo ang aton halimbawa. Apang, ginakinahanglan naton ang padayon nga panikasog agod mapalambo ang isa ka “matinumanon nga tagipusuon.” (1 Hari. 3:⁠9; Hulu. 4:23) Ano ang nalakip sa sini? Palig-una ang imo tagipusuon paagi sa regular nga pagtuon sa Biblia kag pagtambong sa mga miting. (Sal. 1:1, 2; Heb. 10:24, 25) Makig-upod sa mga tawo nga ang tagipusuon nasentro lamang sa matuod nga pagsimba. (Hulu. 13:20) Regular nga pagministeryo, upod ang tudok nga handum nga buligan ang mga tawo sa inyo teritoryo. Mangamuyo kay Jehova nga buligan kita sa pagpalambo sing maayong tagipusuon. (Sal. 86:11) Likawi ang mga butang nga makadagta sa imo tagipusuon, subong sang imoral ukon masingki nga kalingawan. Tinguhai ang mga butang nga makapasuod sa imo sa Dios kag makapabakod sang imo kaangtanan sa iya.—⁠Sant. 4:7, 8.

5. Paano pakamaayuhon ang mga matinumanon?

⁵ Ginpasalig ni Jehova ang iya mga katawhan sang una nga pakamaayuhon gid sila kon mamati sila sa iya tingog. (Deut. 28:1, 2) Amo man karon, bugana nga ginapakamaayo ni Jehova ang “mga nagatuman sa iya subong manuggahom.” (Binu. 5:32) Busa, paagi sa aton pagpanudlo kag halimbawa, kabay nga mabuligan naton ang iban nga mangin matinumanon gikan sa tagipusuon.