Si Jehova ang Dapat nga Ginasaligan Naton

“Si Jehova mismo mangin, subong sang, imo ginasaligan.”—⁠HULUBATON 3:⁠26.

1. Bisan madamo ang nagasiling nga nagasalig sila sa Dios, ano ang nagapahangop nga indi sila subong sini sa tanan nga tion?

ANG prinsipio nga “In God We Trust” makita sa kuwarta sang Estados Unidos sang Amerika. Apang nagasalig gid bala sa Dios ang tanan nga nagagamit sini nga kuwarta, sa sina nga pungsod ukon sa iban nga duog? Ukon mas nagasalig bala sila sa kuwarta mismo? Ini nga pagsalig sa kuwarta sina nga pungsod ukon sang bisan ano pa nga pungsod indi mapaangay sa pagsalig sa isa ka labing gamhanan nga Dios sang gugma nga wala nagaabuso sa iya gahom kag indi gid makagod. Sa katunayan, maathag nga ginapakamalaut niya ang kakagod.​—⁠Efeso 5:⁠5.

2. Ano ang panimuot sang matuod nga mga Cristiano sa gahom sang manggad?

² Ang matuod nga mga Cristiano nagapahamtang sang ila pagsalig sa Dios, indi sa manggad, nga may “malimbungon nga gahom.” (Mateo 13:22) Ginakilala nila nga limitado lamang ang gahom sang kuwarta sa pagpahalipay kag sa pag-amlig sa kabuhi. Indi subong sini ang gahom sang Labing Gamhanan nga Dios. (Sofonias 1:18) Busa, maalamon gid ang laygay: “Likawi ninyo ang gugma sa kuwarta, samtang kontento kamo sa mga butang karon. Kay sia nagsiling: ‘Indi ko gid kamo pagbiyaan ukon pagpatumbayaan’ ”!​—⁠Hebreo 13:⁠5.

3. Paano ang konteksto sang Deuteronomio 31:6 nagahatag sing kapawa sa bersikulo nga ginbalikwat ni Pablo?

³ Sang ginsulat ni apostol Pablo ining mga pulong sa Hebreong mga Cristiano, ginkutlo niya ang instruksion nga ginhatag ni Moises sa mga Israelinhon antes sia mapatay: “Magpakaisog kamo kag magpakabakod. Dili magkahadlok ukon magkalisang sa ila, kay si Jehova nga inyo Dios amo ang nagaupod sa inyo. Indi gid niya kamo pagbayaan ukon pagpatumbayaan.” (Deuteronomio 31:⁠6) Ginapakita sang konteksto nga ang pagsalig kay Jehova nga ginarekomendar ni Moises isa ka pagsalig indi lamang sa iya ikasarang sa paghatag sa ila sing materyal nga mga kinahanglanon. Ngaa subong sini?

4. Paano ginpamatud-an sang Dios sa mga Israelinhon nga masaligan sia?

⁴ Sa sulod sang 40 ka tuig nga nagdalangdalang ang Israel sa kahanayakan, ang Dios matutom nga naghatag sa ila sing mga kinahanglanon agod mabuhi sila. (Deuteronomio 2:​7; 29:5) Gintuytuyan man niya sila. Ang isa sini amo ang gal-um kon adlaw kag ang kalayo kon gab-i, nga nagtuytoy sa mga Israelinhon padulong sa “duta nga nagapailig sing gatas kag dugos.” (Exodo 3:​8; 40:​36-38) Sang manugsulod na sila sa Ginsaad nga Duta, ginpili ni Jehova si Josue nga amo ang magbulos kay Moises. Mahimo nga magbato ang mga pumuluyo sang duta. Apang si Jehova nag-upod sa iya katawhan sa sulod sang mga dekada, gani wala sing dapat kahadlukan. May rason gid ang mga Israelinhon nga makilala si Jehova subong isa ka Dios nga masaligan!

5. Paano ang kahimtangan sang mga Cristiano karon kaanggid sa kahimtangan anay sang mga Israelinhon antes sila magsulod sa Ginsaad nga Duta?

⁵ Ang mga Cristiano karon nagalakat sa kahanayakan sang malaut nga kalibutan pasulod sa bag-ong kalibutan sang Dios. Ang iban sa ila kapin na sa 40 ka tuig nga nagalakat sa sining dalanon. Yara na sila karon sa dulunan sang bag-ong kalibutan sang Dios. Apang, may mga kaaway pa nga nagabalabag, determinado nga punggan sila sa pagsulod sa duog nga mangin kaangay sang Ginsaad nga Duta, mas matahom sangsa duog anay nga nagapailig sing gatas kag dugos. Gani para sa mga Cristiano karon, nagakaigo gid ang mga pulong ni Moises, nga ginsulit ni Pablo: “Indi ko gid kamo pagbiyaan ukon pagpatumbayaan”! Ang tanan nga nagapabilin nga malig-on kag maisugon, puno sing pagtuo, kag nagasalig kay Jehova, pat-od nga padyaan.

Pagsalig nga Napasad sa Ihibalo kag Pagpakig-abyan

6, 7. (a) Paano natilawan ang pagsalig ni Abraham kay Jehova? (b) Ano mahimo ang ginabatyag ni Abraham samtang nagalakbay sila padulong sa duog diin ihalad niya si Isaac?

⁶ Ang katigulangan sang mga Israelinhon nga si Abraham ginsugo anay nga ihalad ang iya anak nga si Isaac subong isa ka halad nga sinunog. (Genesis 22:2) Ano ang rason nga ining mahigugmaon nga amay nagpakita sing dimationg nga pagsalig kay Jehova amo kon ngaa handa sia sa pagtuman? Ang Hebreo 11:​17-19 nagasabat: “Bangod sa pagtuo si Abraham, sang gintilawan sia, daw subong nga naghalad kay Isaac, kag ang tawo nga malipayon nga nagbaton sa mga saad nagtinguha nga ihalad ang iya bugtong nga anak, bisan pa ginsilingan sia anay: ‘Ang tawgon nga “imo binhi” mangin paagi kay Isaac.’ Apang nagpati sia nga ang Dios makasarang sa pagbanhaw sa iya bisan gikan sa mga patay; kag gikan didto ginbaton man niya sia sa malaragwayon nga paagi.”

⁷ Dumduma nga tatlo ka adlaw nga naglakbay sanday Abraham kag Isaac antes sila makalab-ot sa duog nga ila halaran. (Genesis 22:4) Daku ang tion ni Abraham nga binagbinagon liwat ang ginapahimo sa iya. Mahanduraw bala naton ang iya ginabatyag, ang iya mga emosyon? Ang pagkabun-ag ni Isaac naghatag sing wala ginapaabot nga kalipay. Si Abraham kag ang iya baog anay nga asawa, si Sara, labi pa nga nangin suod sa Dios bangod sini nga ebidensia sang bugay sang Dios. Pat-od gid nga pagkatapos sadto ginapulupamensar nila kon ano ang mangin palaabuton ni Isaac kag sang iya mga kaliwat. Mapaslawan bala sa hinali ang ila damgo, bangod sang ginapahimo karon sang Dios?

8. Paano nagsalig si Abraham sa Dios nga labaw pa sa pagbanhaw kay Isaac ang Iya masarangan?

⁸ Sa gihapon, may pagsalig si Abraham nga napasad sa personal nga nahibaluan sang duha ka suod nga mag-abyanay sa isa kag isa. Subong “abyan ni Jehova,” si Abraham “nagtuo kay Jehova, kag ginkabig ini sa iya nga pagkamatarong.” (Santiago 2:⁠23) May pagsalig si Abraham kay Jehova nga labaw pa sa pagbanhaw kay Isaac ang iya masarangan. Kumbinsido man si Abraham nga nagakaigo ang ginapahimo sa iya ni Jehova, bisan pa wala mahibaluan ni Abraham ang tanan nga katunayan. Wala sia sing rason nga duhaduhaan ang pagkamatarong sang Dios sa paghimo sini nga pangabay. Nian, ang pagsalig ni Abraham napabakod sang magpatunga ang anghel ni Jehova agod indi mahalad si Isaac.​—⁠Genesis 22:​9-14.

9, 10. (a) San-o si Abraham nagpakita anay sing pagsalig kay Jehova? (b) Anong importante nga leksion ang matun-an naton gikan kay Abraham?

⁹ Si Abraham nagpakita sini man nga sahi sang pagsalig sa pagkamatarong ni Jehova sang nagligad nga 25 ka tuig. Sang ginpaandaman sia nga laglagon ang Sodoma kag Gomorra, natural lamang nga nabalaka sia sa kaayuhan sang bisan sin-o nga matarong nga tawo nga nagapuyo didto, lakip ang iya hinablos nga si Lot. Nakitluoy si Abraham sa Dios sa sining mga pulong: “Indi gid mapatihan nga himuon mo ang subong sini nga patyon ang matarong nga tawo upod sa isa nga malauton sa bagay nga ang matarong mangin subong sang malauton! Indi gid ini mapatihan sa imo. Indi bala ang Hukom sang bug-os nga duta magahimo sing matarong?”​—⁠Genesis 18:⁠25.

¹⁰ Ang patriarka nga si Abraham kumbinsido nga si Jehova wala gid nagahimo sing butang nga dimatarong. Ang salmista nag-amba sang ulihi: “Si Jehova matarong sa tanan niya nga dalanon kag mainunungon sa tanan niya nga binuhatan.” (Salmo 145:⁠17) Maayo nga pamangkuton naton ang aton kaugalingon: ‘Ginabaton ko bala ang ginatugutan ni Jehova nga maeksperiensiahan ko nga wala gid ginaduhaduhaan ang iya pagkamatarong? Kumbinsido bala ako nga bisan ano man ang tugutan niya mangin para ini sa akon kaayuhan kag sa kaayuhan man sang iban?’ Kon masabat naton ini sing huo, nakatuon kita sing importante nga leksion gikan kay Abraham.

Pagpakita sing Pagsalig sa mga Ginapili ni Jehova

11, 12. (a) Ano nga pagsalig ang kinahanglanon para sa mga alagad sang Dios? (b) Ano kon kaisa ang problema naton?

¹¹ Ang mga nagasalig kay Jehova nagasalig man sa mga tawo nga ginapili ni Jehova sa pagtuman sang iya mga katuyuan. Para sa mga Israelinhon, nagkahulugan ini sing pagsalig kay Moises kag sang ulihi sa iya salili, si Josue. Para sa unang mga Cristiano, nagkahulugan ini sing pagsalig sa mga apostol kag sa gulang nga mga lalaki sang kongregasyon sa Jerusalem. Para sa aton karon, nagakahulugan ini sing pagsalig sa “matutom kag mainandamon nga ulipon” nga gintangdo sa paghatag sang aton espirituwal nga “pagkaon sa nagakaigo nga tion,” subong man sa pila sa ila nga nagahuman sang Nagadumala nga Hubon.​—⁠Mateo 24:⁠45.

¹² Ang matuod, ang aton pagsalig sa mga nagapanguna sa Cristianong kongregasyon para gid sa aton mismo kaayuhan. Ginasugo kita: “Mangin matinumanon sa mga nagapanguna sa inyo kag mangin mapinasakupon, kay ginabantayan nila ang inyo kalag nga subong nga magahatag sila sing husay; agod nga himuon nila ini nga may kalipay kag indi nga may pagbakho, kay mangin makahalalit ini sa inyo.”​—⁠Hebreo 13:⁠17.

Likawi ang Pagmulay sa mga Ginpili ni Jehova

13. Ano ang rason naton nga dapat kita magsalig sa mga gintangdo nga manguna sa aton?

¹³ Ang Biblia nagabulig sa aton nga mangin balanse sa pagsalig sa mga nagapanguna sa katawhan ni Jehova. Mahimo naton pamangkuton ang aton kaugalingon: ‘Nakasayop gid man bala si Moises? Nagpakita bala ang mga apostol sa tanan nga tion sing tulad Cristo nga panimuot nga amo ang luyag ni Jesus sa ila?’ Maathag ang sabat. Ginpili ni Jehova nga gamiton ang mainunungon kag debotado nga mga lalaki sa pagtuytoy sa iya katawhan, bisan pa dihimpit sila. Busa, bisan pa dihimpit ang mga gulang karon, dapat gihapon naton kilalahon sila subong “[tinangdo] sang balaan nga espiritu [nga mangin] mga manugtatap, sa pagbantay sa kongregasyon sang Dios.” Takus sila nga sakdagon naton kag tahuron.​—⁠Binuhatan 20:⁠28.

14. Ano ang talalupangdon sa pagpili ni Jehova kay Moises sa baylo ni Aaron ukon Miriam subong lider?

¹⁴ Tatlo ka tuig ang namagulangan ni Aaron kay Moises, apang pareho sila nga mas bata sa ila utod nga babayi, si Miriam. (Exodo 2:​3, 4; 7:7) Kag sanglit mas talunsay maghambal si Aaron sangsa kay Moises, gintangdo sia nga mangin humalambal sang iya utod. (Exodo 6:​29⁠–​7:2) Apang, wala ginpili ni Jehova ang kamagulangan nga si Miriam, ukon ang talunsay nga si Aaron sa pagpanguna sa mga Israelinhon. Ginpili niya si Moises sa tapos mabinagbinag ang tanan nga katunayan kag ang mga kinahanglanon sadto nga tion. Sang wala nila mahangpi ini sang primero, si Aaron kag si Miriam nagreklamo: “Kay Moises lamang bala nagpamulong si Jehova? Wala bala sia magpamulong sa aton man?” Si Miriam, nga ayhan amo gid ang una-una nga nagreklamo, ginsilutan bangod sining dimatinahuron nga panimuot sa ginpili ni Jehova, nga dapat kuntani ginkilala nila ni Aaron subong “amo ang pinakamahagop sa tanan nga tawo sa kadaygan sang duta.”​—⁠Numeros 12:​1-3, 9-15.

15, 16. Paano ginpamatud-an ni Caleb nga may pagsalig sia kay Jehova?

¹⁵ Sang ginpadala ang 12 ka espiya agod mangispeya sa Ginsaad nga Duta, 10 ang nagdala sing negatibo nga report. Hinadlukan ang mga Israelinhon sang magsugid sila nga ang mga Canaanhon “mga tawo nga tuman kadalagku.” Bangod sini, ang mga Israelinhon “nagkumod batok kay Moises kag kay Aaron.” Apang indi tanan nga espiya wala magpakita sing pagsalig kay Moises kag kay Jehova. Aton mabasa: “Nian ginpahipos ni Caleb ang katawhan sa atubangan ni Moises kag nagsiling: ‘Magtaklad kita gilayon, kag maagaw gid naton ini, kay pat-od nga madaug kita.’ ” (Numeros 13:⁠2, 25-33; 14:2) Ang kaupod nga espiya ni Caleb nga si Josue nag-ugyon man sa iya malig-on nga panindugan. Ginpakita nila nga may pagsalig sila kay Jehova sang magsiling sila: “Kon si Jehova nahamuot sa aton, nian pat-od nga pasudlon niya kita sa sining duta kag ihatag ini sa aton, duta nga nagailig sing gatas kag dugos. Lamang . . . dili kamo magkahadlok sa katawhan sang duta . . . si Jehova upod sa aton. Dili kamo magkahadlok sa ila.” (Numeros 14:​6-9) Ini nga pagsalig kay Jehova ginpadyaan. Sa kaliwatan sang mga hamtong nga buhi sadto nga tion, sanday Caleb lamang, Josue, kag pila ka Levinhon ang nakasulod sa Ginsaad nga Duta.

¹⁶ Pagligad sang pila ka tuig si Caleb nagsiling: “Tuhoy sa akon, nagsunod ako sing bug-os kay Jehova nga akon Dios. . . . Kag yari karon, suno sa ginpamulong niya, ginbuhi ako ni Jehova sa sining kap-atan kag lima ka tuig kutob sang tion nga ginsaad ini ni Jehova kay Moises sang ang Israel nagpanglakaton sa kahanayakan, kag karon, yari ako, ako kawaloan kag lima ka tuig sini nga adlaw. Apang ako karon subong kakusog sangsa adlaw nga ginpadala ako ni Moises. Subong sang kakusog ko sadto amo ang kakusog ko karon.” (Josue 14:​6-11) Talupangda ang pagkapositibo ni Caleb, ang iya katutom, kag ang iya pisikal nga mga ikasarang. Apang, indi si Caleb ang ginpili ni Jehova nga mangin salili ni Moises. Ini nga pribilehiyo ginhatag kay Josue. Makasalig kita nga si Jehova may rason sa iya ginpili, kag amo yadto ang pinakamaayo nga pagpili.

17. Bangod sang ano nga butang nga si Pedro daw indi bagay nga hatagan sing salabton?

¹⁷ Si apostol Pedro tatlo ka beses nga nagpanghiwala sa iya Agalon. Padasudaso man sia nga naghulag, sang gin-utas niya ang dulunggan sang ulipon sang mataas nga saserdote. (Mateo 26:​47-55, 69-75; Juan 18:​10, 11) Ang iban mahimo magsiling nga si Pedro talawan, indi balanse nga tawo, indi takus hatagan sing pinasahi nga mga pribilehiyo. Apang, sin-o ang ginhatagan sing mga yabi sang Ginharian, agod buksan sa tatlo ka grupo ang dalanon padulong sa langit? Amo si Pedro.​—⁠Binuhatan 2:​1-41; 8:​14-17; 10:​1-48.

18. Ano nga sayop, nga ginsambit ni Judas, ang luyag naton likawan?

¹⁸ Ginapakita sining mga halimbawa nga dapat kita maghalong sa paghukom pasad sa naguwa nga panagway. Kon ginasaligan naton si Jehova, indi naton pagduhaduhaan ang iya mga ginapili. Bisan pa ang iya dutan-on nga kongregasyon ginatapuan sang dihimpit nga mga tawo, nga wala nagasiling nga indi sila makasala, ginagamit niya sila sa isa ka talalupangdon nga paagi. Si Judas, ang utod sa iloy ni Jesus, nagpaandam sa mga Cristiano sang unang siglo batok sa mga indibiduwal nga “nagapawalay pulos sang pagkaginuo kag nagapamulong sing may pag-abuso tuhoy sa mga mahimayaon.” (Judas 8-10) Indi kita mag-ilog sa ila.

19. Ngaa wala kita sing rason nga mulayon ang mga ginapili ni Jehova?

¹⁹ Mahimo gid nga ginapili ni Jehova para sa pila ka responsabilidad ang mga indibiduwal nga may pinasahi nga mga kinaiya nga kinahanglanon sa pagtuytoy sa iya katawhan sa dalanon nga luyag niya nga pilion nila sa sinang partikular nga tion. Dapat kita magtinguha nga kilalahon ining katunayan, wala ginamulay ang mga ginapili sang Dios, kundi mangin kontento kag mapainubuson nga mag-alagad kon diin kita ginabutang ni Jehova subong mga indibiduwal. Sa amo ginapakita naton nga si Jehova ang aton ginasaligan.​—⁠Efeso 4:​11-16; Filipos 2:⁠3

Pagpakita sing Pagsalig sa Pagkamatarong ni Jehova

20, 21. Ano ang matun-an naton gikan sa pagpakig-angot sang Dios kay Moises?

²⁰ Kon matabo nga kon kaisa mas daku ang pagsalig naton sa aton kaugalingon sangsa kay Jehova, manuto kita kay Moises. Sang 40 anyos ang edad niya, gintinguhaan niya nga hilwayon ang mga Israelinhon gikan sa pagkabihag sa Egipto. Wala sing duhaduha nga maayo ang katuyuan sang iya panikasog, apang wala ini magresulta sa gilayon nga kahilwayan sang Israel, ukon sa pag-uswag sang iya mismo kahimtangan. Sa katunayan, napilitan sia nga malagyo. Pagkatapos lamang nga makahanas sia sing lakas sa sulod sang 40 ka tuig sa iban nga pungsod nga sia nakalipikar nga pilion sa paghimo sang luyag niya himuon sang primero. Sini nga tion masaligan niya ang pagsakdag ni Jehova kay karon ang mga butang ginahimo suno sa paagi ni Jehova sa tion nga nagasibu sa Iya gintalana nga tion.​—⁠Exodo 2:​11⁠–​3:⁠10.

²¹ Ang tagsatagsa sa aton mahimo mamangkot sa iya kaugalingon: ‘Ginaunahan ko bala kon kaisa si Jehova kag ang mga gulang nga gintangdo sa kongregasyon, ginapadali ukon ginahimo ang mga butang suno sa akon paagi? Sa baylo nga magbatyag nga nalaktawan ako para sa pila ka pribilehiyo, ginabaton ko bala dayon ang tion sang paghanas para sa akon?’ Nakatuon bala kita sing importante nga leksion gikan kay Moises?

22. Walay sapayan nga nadulaan sia sing pribilehiyo, ano ang ginbatyag ni Moises kay Jehova?

²² Dugang pa, makatuon kita sing isa pa ka leksion gikan kay Moises. Ang Numeros 20:​7-13 nagasugid sa aton sang sayop nga nahimo niya, nga ginbayaran niya sing daku. Nadula niya ang pribilehiyo nga pangunahan ang mga Israelinhon pasulod sa Ginsaad nga Duta. Nagsiling bala sia nga indi matarong ang desisyon ni Jehova sa sini nga butang? Nagpakuribong bala sia, nga nagahinakit bangod indi makatarunganon ang ginhimo sang Dios sa iya? Nadulaan bala sing pagsalig si Moises sa pagkamatarong ni Jehova? Masapwan naton ang mga sabat sa mga pulong nga ginpamulong mismo ni Moises sa Israel antes sia mapatay. Tuhoy kay Jehova, si Moises nagsiling: “Ang Igang, himpit ang iya binuhatan, kay ang tanan niya nga dalanon katarungan. Isa ka Dios sang katutom, nga sa iya wala sing inhustisya; matarong kag matadlong sia.” (Deuteronomio 32:⁠4) Wala gid madula ang pagsalig ni Moises kay Jehova tubtob sa katapusan. Kamusta naman kita? Kita bala subong mga indibiduwal nagahimo sing mga tikang agod mapabakod naton ang aton pagsalig kay Jehova kag sa iya pagkamatarong? Paano naton mahimo ini? Tan-awon naton.

Paano Mo Sabton?

◻ Ano ang mga rason sang mga Israelinhon sa pagsalig kay Jehova?

◻ Tuhoy sa pagsalig, ano ang matun-an naton kay Abraham?

◻ Ngaa dapat naton likawan ang pagmulay sa mga ginpili ni Jehova?

[Retrato sa pahina 13]

Ang pagsalig kay Jehova nagalakip sang pagtahod sa mga nagapanguna sa kongregasyon