Ang Kompiansa Mahimo Mapasag-uli!

WALAY sapayan nga ang krisis sa kompiansa karon isa ka tanda sang “katapusan nga mga adlaw,” ang pagkawala sing kompiansa nagluntad man sang nagligad nga linibo ka tuig. (2 Timoteo 3:⁠1) Una ini nga nagtuhaw sa daw indi mapatihan nga duog​—⁠sa isa ka paraiso. Ang Biblia nagasiling tuhoy sa nahamtangan sini: “Ang Dios naghimo sing katamnan sa Eden, sa sidlangan nayon, kag ginbutang niya didto ang tawo nga iya ginhimo. Sa amo si Jehova nga Dios nagpatubo gikan sa duta sing tagsa ka kahoy nga halandumon sa itululok kag maayo nga kalan-on kag subong man sing kahoy sang kabuhi sa tunga sang hardin kag sing kahoy sang pagkilala sang maayo kag malaut.”​—⁠Genesis 2:​8, 9.

Ginapaathag sang masunod nga mga bersikulo ang kaangtanan sini sa krisis sang kompiansa karon. Aton mabasa: “Si Jehova nagbutang man sini nga sugo sa tawo: “Gikan sa tagsa ka kahoy sa katamnan mahimo ka makakaon nga may kaayawan. Apang tuhoy sa kahoy sang ihibalo sang maayo kag malaut indi ka magkaon gikan sini, kay sa adlaw nga magkaon ka gikan sini mapatay ka nga totoo.” (Genesis 2:​16, 17) May rason bala si Adan sa pagduhaduha sa ginsiling ni Jehova?

Padayon nga mabasa naton: “Karon ang man-ug napamatud-an nga amo ang labing malalangon sa tanan ilahas nga sapat sang latagon nga nahimo ni Jehova nga Dios. Gani nagsiling ini sa babayi: ‘Ginsiling gid bala sang Dios nga indi kamo magkaon sing bisan ano nga kahoy sang katamnan?’ Sa sini nagsiling ang babayi sa man-ug: ‘Sa bunga sang mga kahoy sang katamnan makakaon kami. Apang nahanungod sa pagkaon sa bunga sang kahoy nga yara sa tunga sang katamnan, ang Dios nagsiling, “Indi kamo magkaon gikan sa sini, indi, indi kamo magtandog sini agod indi kamo mapatay.” ’ Sa sini ang man-ug nagsiling sa babayi: ‘Indi kamo mapatay nga totoo. Kay ang Dios nakahibalo nga sa adlaw nga magkaon kamo sa sini magamuklat ang inyo mga mata kag mangin kaangay kamo sang Dios, nga nakakilala sa maayo kag malaut.’ Sa amo nakita sang babayi nga ang kahoy maayo nga kalan-on kag nga makagalanyat ini sa mga mata, huo, ang kahoy halandumon gid tulukon. Gani nagkuha sia sing bunga sini kag nagkaon sini. Pagkatapos ginhatagan man niya ang iya bana kag nagkaon sia sini.”​—⁠Genesis 3:​1-6.

Paagi sa indi pagsapak sa maathag nga paandam sang Dios, ginpakita nanday Adan kag Eva nga wala sila sing pagsalig kay Jehova. Ginapabanaag nila ang kaaway sang Dios nga si Satanas, nga nagpakighambal kay Eva paagi sa literal nga man-ug. Wala sing pagsalig si Satanas sa paagi sang paggahom ni Jehova. Bangod sini kag sang bugalon kag ambisyuso nga tagipusuon, nagrebelde sia sa Dios kag ginpatalang ang mga tawo sa paghimo sing subong man. Gin-impluwensiahan niya sila sa paghunahuna nga ang Dios indi masaligan.

Ang Resulta? Naguba nga mga Kaangtanan

Ayhan natalupangdan mo nga ang mga indibiduwal nga wala nagasalig sa iban ginabudlayan maghupot sing mga pag-abyanay. Si Publilius Syrus, isa ka Latin nga manunulat sang unang siglo B.C.E., nagsulat: “Ang kompiansa amo ang lamang nga wagkus sang pag-abyanay.” Bangod sang ila pagrebelde, ginpakita nanday Adan kag Eva nga wala sila nagsalig sa Dios. Busa, wala gid sing rason nga magsalig ang Dios sa ila. Bangod sang pagkadula sing pagsalig, ukon kompiansa, nadula sang una nga mga tawo ang pagpakig-abyan sang Dios. Wala sing pamatuod nga nagpakighambal pa liwat si Jehova sa ila pagkatapos sang pagpakamalaut niya sa ila bangod sang ila pagrebelde.

Nahalitan man ang kaangtanan sa ulot ni Adan kag ni Eva. Ginpaandaman ni Jehova si Eva: “Sa kasakit magapanganak ka, kag ang imo handum mangin sa imo bana, kag sia magagahom sa imo.” (Genesis 3:​16) Ang The Jerusalem Bible nagasiling: “Magadumala sia sa imo.” Sa baylo nga magpakita sing mahigugmaon nga pagkaulo sa iya asawa, suno sa luyag sang Dios, si Adan karon nangin iya agalon, nga nagadumala sa iya.

Pagkatapos sang pagpakasala nila, ginbasol ni Adan ang iya asawa. Sa iya opinyon, bangod sang ginhimo ni Eva kon ngaa gintabog sila gikan sa isa ka himpit nga hardin pakadto sa wala makultibar nga duta, ginpakamalaut nga maulipon sa idalom sang dihimpit nga kahimtangan antes magbalik sa yab-ok. (Genesis 3:​17-​19) Mahanduraw naton sing maathag nga gintunaan ini sang binangig sa ulot sang duha. Ayhan sobra ang reaksion ni Adan, nagpabutyag nga indi na gid sia mamati liwat kay Eva. Ayhan ginbatyag niya nga makatarunganon ang pagsiling sa iya, ‘Kutob karon, ako na ang masunod!’ Sa pihak nga bahin, ayhan nakita ni Eva nga napaslawan si Adan sa iya papel subong ulo sang pamilya, amo nga nadula ang iya kompiansa kay Adan. Sa bisan anong kasangkaron, bangod sang pagpakita sing pagkawala sing pagsalig sa Dios, nadula sang katawhan ang pagpakig-abyan sa iya kag nagguba sang ila kaangtanan sa isa kag isa.

Sin-o ang Aton Masaligan?

Indi tanan takus sang aton kompiansa, subong ginapakita sang halimbawa nanday Adan kag Eva. Paano naton mahibaluan kon sin-o ang takus kag indi takus sang aton kompiansa?

Ang Salmo 146:3 nagalaygay sa aton: “Dili kamo magsalig sa mga dungganon, ukon sa anak sang dutan-on nga tawo, nga sa iya wala sing kaluwasan.” Kag sa Jeremias 17:​5-7, aton mabasa: “Pinakamalaut ang mabukod nga tawo nga nagasalig sa dutan-on nga tawo kag nagahimo gid sang unod nga iya butkon, kag ang iya tagipusuon nagapalayo kay Jehova mismo.” Sa pihak nga bahin, “bulahan ang mabukod nga tawo nga nagasalig kay Jehova, kag ang iya pagsalig amo si Jehova.”

Ibutang ta, nga ang pagkompiansa sa mga tawo indi pirme sayop. Ginapakita lamang sina nga mga teksto nga ang pagsalig sa Dios nagakaigo gid, apang ang pagkompiansa sa dihimpit nga mga tawo makadul-ong kon kaisa sa kapahamakan. Halimbawa, ang katawhan nga nagasalig sa mga tawo sa paghimo sing mga bagay nga Dios lamang ang makahimo​—⁠paghatag sing kaluwasan kag pagpaluntad sing bug-os nga paghidait nga may kalig-unan​—⁠nagapadulong sa kabang-awan.​—⁠Salmo 46:9; 1 Tesalonica 5:⁠3.

Sa pagkamatuod, ang mga tawo kag tawhanon nga mga institusyon nagakadapat lamang kompiansahan sa kasangkaron nga nagapanghikot sila suno sa mga katuyuan sang Dios kag nagapadayag sing diosnon nga mga prinsipio. Busa, agod mapalig-on naton ang iban nga magkompiansa sa aton, dapat kita maghambal sing kamatuoran, mangin bunayag kag masaligan. (Hulubaton 12:19; Efeso 4:​25; Hebreo 13:18) Paagi lamang sa paggawi naton suno sa mga prinsipio sang Biblia nga mangin makatarunganon ang pagsalig sang iban sa aton kag mapamatud-an nga mangin makapabakod kag makapalig-on man kita sa iban.

Pagpasag-uli sang Kompiansa

Ang mga Saksi ni Jehova may malig-on nga sadsaran sa pagsalig sa Dios kag sa pagpalig-on sa iban nga himuon man ini. Si Jehova matutom kag mainunungon, ang isa nga pirme mo masaligan nga himuon ang iya ginsiling, bangod “imposible para sa Dios ang pagbutig.” Ang pagsalig sa Dios sang gugma indi gid magresulta sa kabang-awan.​—⁠Hebreo 6:​18; Salmo 94:14; Isaias 46:​9-​11; 1 Juan 4:⁠8.

Ang nahiusa nga katawhan nga may pagsalig kay Jehova kag nagakabuhi suno sa iya mga prinsipio napahulag gid sa pagpakita sing kompiansa sa isa kag isa. Sa isa ka kalibutan nga may krisis sa kompiansa, makalilipay gid nga makasalapo sing mga tawo nga masaligan! Handurawa kon daw ano ka tuhay ang kalibutan kon may bug-os kita nga kompiansa sa ginasiling ukon ginahimo sang tagsatagsa! Sa nagapakari nga bag-ong kalibutan nga ginsaad sang Dios mangin amo sini ang kahimtangan. Wala na gid sing bisan ano nga krisis sa kompiansa!

Luyag ninyo bala nian magpuyo sa sini? Kon huo, ginaagda kamo sang mga Saksi ni Jehova sa pagpalig-on sang inyo kompiansa sa Dios kag sa iya mga saad paagi sa pagtuon sing dugang pa tuhoy sa iya mga ginapatuman sa kabuhi. Ang pagtuon sa Biblia nagahatag sing pamatuod nga nagaluntad ang Dios, nga interesado sia sa kaayuhan sang katawhan, kag nga sa indi madugay magapanghikot sia agod tadlungon ang mga problema sa kalibutan paagi sa iya Ginharian. Minilyon ang nakatuon nga magsalig sa Dios kag sa iya Pulong, ang Biblia. Ang mga Saksi ni Jehova malipay sa pagpasundayag sa inyo sang ila ginatanyag nga serbisyo publiko nga pagtuon sing Biblia nga wala sing bayad. Ukon magsulat sa manugbalhag sini nga magasin para sa dugang nga impormasyon.

[Blurb sa pahina 5]

Ang pagkawala sing pagsalig sa Dios nagahalit sa tawhanon nga mga kaangtanan

[Blurb sa pahina 6]

Ang mga tawo nagakadapat lamang kompiansahan sa kasangkaron nga nagapanghikot sila suno sa diosnon nga mga prinsipio