Padayon nga Mag-uswag sa Espirituwal!
Ang Adlaw Sang Aton Bawtismo Amo Ang Adlaw Nga Dapat Naton Padayon nga Pakabahandion Kag Dumdumon. Kon Sa Bagay, Amo Ini Ang Adlaw Nga Ginpahibalo Naton Sing Dayag Nga Nagdedikar Kita Agod alagaron Ang Dios.
PARA sa madamo nga indibiduwal kinahanglan ang daku nga panikasog agod himuon ini—bag-uhon ang madugay na malain nga mga batasan, biyaan ang indi maayo nga mga kaupdanan, bag-uhon ang tudok nga mga paagi sang panghunahuna kag pagginawi.
Walay sapayan nga ang bawtismo isa ka malipayon kag importante nga hitabo sa kabuhi sang isa ka Cristiano, sa gihapon isa lamang ini ka panugod. Ginsilingan ni apostol Pablo ang bawtismado nga mga Cristiano sa Judea: “Karon nga ginbiyaan na naton ang panguna nga doktrina tuhoy kay Cristo, magpadayon kita sa pagkahamtong.” (Hebreo 6:1) Huo, kinahanglan sang tanan nga Cristiano nga “makadangat sa paghiusa sa pagtuo kag sa sibu nga ihibalo tuhoy sa Anak sang Dios, sa isa ka hamtong nga tawo, sa talaksan sang kataason sang kabug-usan ni Cristo.” (Efeso 4:13) Paagi lamang sa pag-uswag padulong sa pagkahamtong nga kita gid ‘mapalig-on sa pagtuo.’—Colosas 2:7.
Pila ka tuig na ang nagligad, ginatos ka libo sang bag-o nagdedikar nga sumilimba ang nagsulod sa Cristianong kongregasyon. Mahimo nga isa ikaw sa ila. Kaangay sang imo mga kauturan sang una nga siglo, indi mo luyag magpabilin sa espirituwal nga pagkalapsag. Luyag mo magtubo, mag-uswag! Apang paano? Kag ano ang pila ka paagi nga mahimo ikaw mag-uswag?
Pag-uswag Paagi sa Personal nga Pagtuon
Ginhambalan ni Pablo ang mga Cristiano sa Filipos: “Amo ini ang padayon ko nga ginapangamuyo, nga kabay nga ang inyo gugma magbugana sing labi kag labi pa gid sa ihibalo kag sa bug-os nga paghantop.” (Filipos 1:9) Ang pagtubo sa “sibu nga ihibalo” importante agod mag-uswag ikaw sa espirituwal. Ang ‘pagkuha sing sibu nga ihibalo tuhoy kay Jehova nga Dios kag kay Jesucristo’ isa ka nagapadayon nga proseso, nga wala nagakatapos sa bawtismo.—Juan 17:3.
Narealisar ini sang isa ka utod nga babayi nga si Alexandra, napulo ka tuig pagkatapos nga nabawtismuhan sia sa edad nga 16. Ginpadaku sia sa kamatuoran kag regular nga nagatambong sa Cristianong mga miting kag sa pagpakigbahin sa pagbantala nga hilikuton. Sia nagsulat: “Sang nagligad nga binulan, narealisar ko nga may malain gid nga nagakatabo sa akon. Gin-usisa ko sing maayo kag sing bunayag ang akon kaugalingon, kon ano ang akon nabatyagan para sa kamatuoran, kag kon ngaa yari pa ako sa kamatuoran.” Ano ang iya nasapwan? Sia nagpadayon: “Nasapwan ko nga ginaligban ako sa mga rason nga yari ako sa kamatuoran. Nadumduman ko nga samtang nagadaku ako, ginapadaku ang mga miting kag pag-alagad sa latagon. Subong bala nga ang batasan sing personal nga pagtuon kag pagpangamuyo mahanabo lamang. Apang samtang ginaanalisar ko ang akon kahimtangan, narealisar ko nga wala ini natabo.”
Si apostol Pablo nagapalig-on: “Sa kasangkaron nga nakahimo kita sing pag-uswag, magpadayon kita sa paglakat sing mahim-ong sa sini gihapon nga kinabatasan.” (Filipos 3:16) Ang isa ka rutina ukon kinabatasan nga butang amo ang nagapahamtang sang dalanon sang pag-uswag. Antes ikaw nagpabawtismo, pat-od nga may rutina ikaw sa pagtuon sing Biblia kada semana upod sa kalipikado nga manunudlo. Samtang nagatubo ang imo apresasyon, ginlakip mo sa sini nga rutina ang paghanda para sa leksion kada semana, ginatan-aw ang ginsambit nga mga teksto sa Biblia, kag iban pa. Karon nga bawtismado ka na, nagapadayon ka bala sa ‘paglakat sa sini nga rutina’?
Kon wala, ayhan kinahanglan nga usisaon mo liwat ang imo mga prioridad, ‘ginapat-od ang mas importante nga mga butang.’ (Filipos 1:10) Sa aton masako nga pangabuhi, kinahanglan ang kontrol sa kaugalingon agod magtigana sing tion para sa pagbasa kag pagtuon sa Biblia sing personal. Apang ang mga benepisyo takus sa sining mga panikasog. Binagbinaga liwat ang eksperiensia ni Alexandra. “Masiling ko nga yara ako sa kamatuoran sa nagligad nga 20 ka tuig ukon kapin pa paagi lamang sa pagtambong sa mga miting kag pag-alagad sa ministeryo sa latagon,” baton niya. Apang, nagpadayon sia, “Naghinakop ako nga walay sapayan nga importante ini nga mga butang, indi ini makabulig sa akon sa tion sang kabudlayan. Natabo ini bangod wala na ako nagatuon sing personal, kag talagsa na lang kag pakulahaw ang akon pagpangamuyo. Narealisar ko nga dapat ko bag-uhon ang akon panghunahuna kag sugdan ang isa ka mapuslanon nga programa sang pagtuon agod makilala ko sing labi pa si Jehova kag matun-an sia nga higugmaon kag maapresyar ang ginhatag sa aton sang iya Anak.”
Kon nagakinahanglan ikaw sing bulig sa pagtuon sing personal, malipay sa pagbulig sa imo ang mga gulang kag ang iban pa hamtong nga mga Cristiano sa inyo kongregasyon. Dugang pa, ang mga artikulo sa Mayo 1, 1995; Agosto 15, 1993; kag Mayo 15, 1986, nga mga isyu sang Ang Lalantawan may pila ka mabuligon nga panugda.
Ang Kinahanglanon nga Mangin Suod sa Dios
Ang isa pa ka bahin nga dapat mo tinguhaan nga mag-uswag amo ang imo kaangtanan sa Dios. Sa pila ka kahimtangan mahimo nga daku gid ini nga kinahanglanon. Binagbinaga si Anthony, nga nabawtismuhan sing bata pa. “Ako ang una nga bata sa amon pamilya nga nabawtismuhan,” siling niya. “Pagkatapos sang akon bawtismo, mainit ako nga ginhakos sang akon iloy. Wala ko sia makita nga amo sadto ka malipayon. May daku gid nga kalipay, kag maayo gid ang akon pamatyag.” Apang, may isa pa ka bahin sang istorya. “Sa sulod sang pila ka tion, wala pa sing iban nga pamatan-on nga nabawtismuhan sa kongregasyon,” padayon ni Anthony. “Gani ginpabugal ko gid ang akon kaugalingon. Ginpabugal ko man ang akon mga komento kag mga pamulongpulong sa mga miting. Ang pagtigayon sing pagdayaw kag kahamuot sang mga tawo nangin mas importante sa akon sangsa paghatag sing kadayawan kay Jehova. Wala gid ako sing suod nga kaangtanan sa iya.”
Kaangay ni Anthony, ang iban mahimo nga nagdedikar bangod sa handum nga pahamut-an ang iban sangsa handum nga pahamut-an si Jehova. Walay sapayan, ginapaabot sang Dios nga magkabuhi sila suno sa ila ginsaad nga mag-alagad sa iya. (Ipaanggid ang Manugwali 5:4.) Apang, bangod wala sila sing personal nga kaangtanan sa Dios, masami nga mabudlay sa ila nga himuon ini. Si Anthony nagapanugiron: “Ang akon daku nga kalipay sang ginbawtismuhan ako wala magdugay. Wala pa isa ka tuig sa tapos ako mabawtismuhan, nakahimo ako sing daku nga sala kag dapat nga sabdungon sang mga gulang sa kongregasyon. Bangod sang sulitsulit nga paghimo sing sala, ginsikway ako (gindisfellowship) sa kongregasyon. Anom ka tuig pagkatapos sang akon pagdedikar kay Jehova, gin-aresto ako kag ginbilanggo sa sala nga pagpatay.”
Pagpalambo sing Suod nga Kaangtanan kay Jehova
Walay sapayan sang imo kahimtangan, sarang mabaton sang tanan nga Cristiano ang pangagda sang Biblia: “Magpalapit kamo sa Dios, kag magapalapit sia sa inyo.” (Santiago 4:8) Pat-od nga nakatigayon ikaw sing suod nga kaangtanan sa Dios sang una nga gintun-an mo ang Biblia. Natun-an mo nga ang Dios indi isa ka walay persona nga diosdios nga ginasimba sang Cristiandad, kundi isa ka persona nga amo si Jehova. Natun-an mo man nga may makadalayaw sia nga mga kinaiya, nga sia “isa ka Dios nga maluluy-on kag mainayuhon, mahinay sa pagpangakig kag bugana sa mahigugmaon nga kaayo.”—Exodo 34:6.
Apang, agod mapahisuno mo ang imo kabuhi sa imo pagdedikar nga alagaron ang Dios, dapat ikaw mangin suod sing labi sa iya! Paano? Ang salmista nangamuyo: “Ipakita sa akon ang imo mga dalanon, O Jehova; tudlui ako sang imo mga banas.” (Salmo 25:4) Ang personal nga pagtuon sa Biblia kag sa mga publikasyon sang Sosiedad makabulig sa imo nga makilala sing suod si Jehova. Ang regular nga pagpangamuyo sing hanuot importante man. “Ibubo ang imo tagipusuon sa atubangan niya,” siling sang salmista. (Salmo 62:8) Kon maeksperiensiahan mo nga ginasabat ang imo mga pangamuyo, mabatyagan mo ang personal nga interes sang Dios sa imo. Magabulig ini sa imo nga mangin suod sa iya.
Ang mga pagtilaw kag mga problema nagadala sing dugang pa nga mga kahigayunan nga mangin suod sa Dios. Mahimo ikaw makaatubang sing mga hangkat kag pagtilaw sa pagtuo, subong sang balatian, mga pag-ipit sa eskwelahan kag sa ulubrahan, ukon sang kapigaduhon sa pangabuhi. Mahimo gani nga ang kinaandan nga teokratikong rutina sa pagpakigbahin sa ministeryo, pagtambong sa mga miting, ukon pagtuon sa Biblia upod sa inyo kabataan mangin mabudlay para sa imo. Indi pag-atubanga sing isahanon ina nga problema! Mangayo sing bulig sa Dios, ginapangayo ang iya panuytoy kag pag-ubay. (Hulubaton 3:5, 6) Pangabaya sa iya ang iya balaan nga espiritu! (Lucas 11:13) Kon matigayon mo ang mahigugmaon nga bulig sang Dios, labi nga mangin suod ikaw sa iya. Subong sang ginsiling ni salmista David, “tilawi kag tan-awa nga si Jehova maayo . . . Malipayon ang mapagros nga tawo nga nagadangop sa iya.”—Salmo 34:8.
Kamusta si Anthony? “Ginhunahuna ko ang tion sadtong madamo pa ako sing espirituwal nga tulumuron nga nasentro sa paghimo sang kabubut-on ni Jehova,” hinumdom niya. “Masakit ini. Apang sa tanan nga kasakit kag kalisod, nadumduman ko ang gugma ni Jehova. Nadugayan antes ako nakapangamuyo kay Jehova, apang nangamuyo gid ako, kag ginbubo ko ang akon tagipusuon sa iya, nagapangayo sang iya pagpatawad. Nagabasa man ako sing Biblia kag nakibot ako sa kadamuon sang akon nalipatan kag kon daw ano kadiutay sang akon nahibaluan tuhoy kay Jehova.” Walay sapayan nga ginatapos pa ni Anthony ang iya sentensia, nakabaton sia sing bulig gikan sa lokal nga mga Saksi kag nagapasag-uli na karon sa espirituwal. Sing mapinasalamaton, si Anthony nagasiling: “Salamat kay Jehova kag sa iya organisasyon, nahimo ko nga ubahon ang daan nga personalidad, kag nagatinguha ako nga isuklob ang bag-o nga personalidad kada adlaw. Ang pinakaimportante karon sa akon amo ang akon kaangtanan kay Jehova.”
Espirituwal nga Pag-uswag sa Inyo Ministeryo
Ginsugo ni Jesucristo ang iya mga sumulunod nga mangin mga manugbantala sing “maayong balita sang Ginharian.” (Mateo 24:14) Subong bag-uhan nga manugbantala sing maayong balita, mahimo nga diutay pa lamang ang imo eksperiensia sa ministeryo. Paano, nian, ikaw mag-uswag agod imo ‘matuman sing bug-os ang imo ministeryo’?—2 Timoteo 4:5.
Ang isa ka paagi amo ang magpalambo sing positibo nga panimuot. Tun-i nga tamdon ang pagbantala nga hilikuton subong isa ka “manggad,” isa ka pribilehiyo. (2 Corinto 4:7) Isa ini ka kahigayunan nga mapakita naton ang aton gugma, pagkamainunungon, kag integridad kay Jehova. Isa man ini ka kahigayunan nga mapakita naton ang aton pag-ulikid sa aton isigkatawo. Ang aton dimakagod nga pagsakripisyo sa sini nga bahin isa ka tuburan sang matuod nga kalipay.—Binuhatan 20:35.
Si Jesus mismo may positibo nga pagtamod sa pagbantala nga hilikuton. Ang pagpaambit sing mga kamatuoran sang Biblia sa iban kaangay sang “pagkaon” para sa iya. (Juan 4:34) Busa ang iya motibo sa pagbulig sa iban matingob sa iya mga pinamulong, “luyag ko.” (Mateo 8:3) Mainawaon si Jesus sa mga tawo, ilabi na yadtong ‘ginpanitan kag ginpaaplaag’ sang kalibutan ni Satanas. (Mateo 9:35, 36) “Luyag” mo man bala buligan yadtong yara sa espirituwal nga kadudulman kag nagakinahanglan sing kasanag gikan sa Pulong sang Dios? Nian mapahulag ikaw nga tumanon ang sugo ni Jesus: “Busa lakat kamo kag maghimo sing mga disipulo sa mga tawo sa tanan nga kapungsuran.” (Mateo 28:19) Sa pagkamatuod, mapahulag ikaw nga makigbahin sing bug-os sa sining hilikuton suno sa ginatugot sang imo panglawas kag mga kahimtangan.
Ang isa pa ka sekreto sa pag-uswag amo ang regular nga pagpakigbahin sa ministeryo—kada semana kon posible. Mabuhinan sini ang pagpangalag-ag kag kahadlok nga mahimo nagaupang sa isa nga talagsa lamang nagabantala. Ang regular nga pagpakigbahin sa pag-alagad sa latagon makabulig man sa imo sa iban nga paagi. Ginapauswag sini ang imo pag-apresyar sa kamatuoran, ginapatubo ang imo gugma kay Jehova kag sa isigkatawo, kag makabulig sa imo nga isentro ang hunahuna sa paglaum sa Ginharian.
Apang, ano kon ang imo karon kahimtangan nagaupang sing daku sa imo pagpakigbahin sa pagbantala nga hilikuton? Kon wala gid sing mahimo nga mga pagpasibu, nian dumduma nga ang Dios nahamuot sa bisan ano nga masarangan mo, lamang kon bug-os tagipusuon ikaw sa imo pag-alagad. (Mateo 13:23) Mahimo ikaw mag-uswag sa iban nga paagi, subong sang pagpauswag sang imo ikasarang sa pagbantala. Sa kongregasyon, ang Teokratikong Eskwelahan sa Pagministro kag ang Miting sa Serbisyo nagahatag sing madamong maayo nga paghanas sa sini nga bahin. Siempre pa, kon mas epektibo kita sa ministeryo, labi kita nga malipay sa sini kag makatigayon sing maayo nga mga resulta.
Maathag, kon amo, nga ang espirituwal nga pag-uswag wala nagakatapos sa adlaw sang pagpabawtismo sang isa. Si apostol Pablo nagsulat tuhoy sa iya paglaum nga matigayon ang dimamalatyon nga kabuhi sa langit: “Mga kauturan, wala ko pa ginakabig ang akon kaugalingon nga nagauyat na sa sini; apang may isa ka butang tuhoy sa sini: Ginakalimtan ang mga butang sa likuran kag ginalab-ot ang mga butang sa unahan, nagatinguha ako padulong sa lalambuton tungod sa padya nga langitnon nga pagtawag sang Dios paagi kay Cristo Jesus. Kon amo, kita tanan nga mga hamtong, maghupot sini nga panghunahuna; kag kon kamo sa bisan ano nga paagi may tuhay nga panghunahuna, ipahayag sang Dios ang nasambit nga panimuot sa inyo.”—Filipos 3:13-15.
Huo, ang tanan nga Cristiano, walay sapayan kon ang ila paglaum amo ang pagkadimamalatyon sa langit ukon ang kabuhi nga walay katapusan sa Paraiso sa duta, dapat ‘maglab-ot’—maghimakas, kon sa aton pa, agod matigayon ang ginatumod nga kabuhi! Ang imo bawtismo isa ka maayo nga panugod, apang panugod lamang ini. Padayon nga maghimakas nga mag-uswag sa espirituwal. Paagi sa mga miting kag personal nga pagtuon, “mangin hamtong sa ikasarang sang paghangop.” (1 Corinto 14:20) “Hangpa . . . ang kalaparon, kag kalabaon kag kataason kag kadalumon” sang kamatuoran. (Efeso 3:18) Ang imo pag-uswag makabulig sa imo indi lamang sa pagtigayon sing kasadya kag kalipay karon kundi sa pagtigayon sing malig-on nga duog sa bag-ong kalibutan sang Dios, diin sa idalom sang paggahom sang iya langitnon nga Ginharian, magauswag ikaw sing padayon!
[Retrato sa pahina 29]
Kinahanglan ang disiplina agod makakita sing tion sa pagtuon sing personal
[Retrato sa pahina 31]
Ang pagtigayon sing positibo nga panimuot makabulig sa aton nga magmalipayon sa ministeryo