Padayon nga Maglakat sing Progresibo sa Naandan nga Buhat nga May Kahimusan

¹ Ginpalangga sing pinasahi ni apostol Pablo ang kongregasyon sang Filipos, nga ginbuligan niya nga matukod. Ginpasalamatan niya ang ila materyal nga mga aman kag ginpatuhuyan niya sila subong maayo nga halimbawa.​—2 Cor. 8:​1-6.

² Ginsulatan ni Pablo ang mga taga-Filipos bangod sang iya tudok nga gugma sa ila. Ang Insight nga libro, Tomo 2, pahina 631, nagareport: “Sa bug-os nga sulat ginapalig-on niya ang kongregasyon sang Filipos nga padayunon ang ila maayo nga dalanon​—nagatinguha nga maangkon ang daku pa nga paghantop kag nagatigayon sing malig-on nga pagpanguyapot sa Pulong sang kabuhi, sing mas malig-on nga pagtuo, kag paglaum sa padya nga magaabot.” Ginbaton nila ini sing malipayon, nga nagpabakod sang higot sang gugma sa ulot nila kag sang apostol. Ang pinamulong ni Pablo may pinasahi nga kahulugan para sa aton karon, kag may yara kita maayo nga rason nga pamatian sing maayo ilabi na ang iya laygay sa Filipos 3:​15-17.

³ Ang Hamtong nga Panghunahuna Kinahanglanon: Sa Filipos 3:​15, si Pablo nagsulat subong isa ka tawo nga may mga tinuig nga eksperiensia. Nakiluoy sia sa ila subong hamtong nga mga Cristiano nga may husto nga panghunahuna. Bangod ang ila panghunahuna nagpabanaag sang pagpaubos kag pag-apresyar nga ginpakita ni Jesus, padayon sila nga mangin “disalawayon kag inosente, mga anak sang Dios nga walay kasawayan . . . , nga padayon nga nagapanguyapot sing hugot sa pulong sang kabuhi.” (Filip. 2:​15, 16) Kon ginabasa naton ina nga mga pinamulong, dapat kita magbatyag nga si Pablo daw nagapakigsugilanon sa aton. Busa hanuot gid naton nga ginahandom nga matigayon ang panghunahuna nga kaangay kay Jesus, nagapakita sing mapainubuson nga apresasyon sa aton mga pribilehiyo. Padayon kita nga nagapakiluoy kay Jehova sa pangamuyo, nagapangayo sing bulig sa sini kag sa iban pa nga mga butang.​—Filip. 4:6, 7.

⁴ Subong sang ginapakita sang Filipos 3:​16, kita tanan dapat manikasog sa pag-uswag. Ang tinaga nga “pag-uswag” nagakahulugan sing “paglakat sing abante, paghimo sing kauswagan.” Ang mga tawo nga progresibo “interesado sa bag-ong mga ideya, mga tukib, ukon mga kahigayunan.” Luyag ni Pablo nga mahangpan sang mga taga-Filipos nga ang Cristianismo wala gid nagadulog kag yadtong nagapangangkon sini dapat padayon nga maglakat sing abante. Ang ila progresibo nga espiritu mahimo nga mapakita paagi sa kahanda sa pag-usisa sang ila kaugalingon, sa pagbaton sang ila mga kaluyahon, kag sa pagpangita sing mga kahigayunan nga makahimo sing labi pa. Sa karon ang dutan-on nga organisasyon ni Jehova padayon nga nagalakat sing abante sing progresibo. Ang kada isa sa aton dapat padayon nga makigdungan sa sini, nagahimulos sang tanan nga aman sini kag nagapakigbahin sing bug-os sa hilikuton sini.

⁵ Ang Pag-uswag Nagakinahanglan sing Naandan nga Buhat nga May Kahimusan: Si Pablo nagpadayon paagi sa paglaygay sa mga kauturan nga “padayon nga maglakat sa sining naandan nga buhat nga may kahimusan.” (Filip. 3:16) Agod may kahimusan, dapat naton ibutang ang mga bagay sa ila nagakaigo nga mga duog may kaangtanan sa isa kag isa. Ginhuptan sang mga Cristiano sa Filipos ang ila kaugalingon sa ila nagakaigo nga duog, nagpabilin nga suod sa organisasyon ni Jehova kag sa isa kag isa. Ang ila kabuhi ginagahuman sang kasuguan sang gugma. (Juan 15:17; Filip. 2:​1, 2) Ginlaygayan sila ni Pablo nga “maggawi sing takus sa maayong balita.” (Filip. 1:27) Importante man sa karon para sa mga Cristiano ang mangin may kahimusan kag maayo nga paggawi.

⁶ Ang naandan nga buhat amo ang kinabatasan nga paghimo sang isa ka napamatud-an nga paagi. Mapuslanon ang pagtigayon sing naandan nga buhat bangod indi na kinahanglan nga magdulog pa kita kag mamat-od kon ano ang masunod nga himuon​—nakatukod na kita sing isa ka pagsulundan nga ginasunod naton bangod naandan na.

⁷ Ang teokratikong naandan nga buhat nga may kahimusan nagalakip sang mga batasan nga maayo​—upod ang tulumuron nga pabakuron ang aton kaugalingon sa espirituwal, buligan ang iban, kag himuon ang labi pa sa pag-alagad kay Jehova. Agod matigayon ining mga tulumuron, nagakinahanglan ini sang pagtukod sing isa ka naandan nga buhat sang personal nga pagtuon, tayuyon nga pagtambong sa mga miting, kag pagpakigbahin sa pagbantala nga hilikuton.

⁸ Ang mga Kinahanglanon nga Nalakip sa Naandan nga Buhat nga May Kahimusan: Ang isa ka kinahanglanon amo ang “sibu nga ihibalo kag lubos nga paghantop.” (Filip. 1:9) Ang personal nga pagtuon nagapadalom sang aton pagtuo, nagapabakod sang aton gugma sa kamatuoran, kag nagapahulag sa aton sa pagtuon sang maayong mga buhat. Apang, ang iban nabudlayan sa paghupot sing mga batasan sang tayuyon nga pagtuon. Ang isa sa mga rason nga ginhatag amo ang kakulang sing tion.

⁹ Ang adlaw-adlaw nga pagbasa sang Biblia “mapuslanon” sa tanan nga paagi. (2 Tim. 3:​16, 17) Paano kita makasapo sing tion para sa pagtuon sang Biblia sa aton naandan nga buhat sa adlaw-adlaw? Ginahimo ini sang iban paagi sa pagbugtaw sing pila ka minuto sing temprano kada aga, samtang ang ila hunahuna alisto. Ang iban nagabasa sa pila ka minuto antes magtulog. Ang mga asawa nga yara sa puluy-an mahimo nga makahinguyang sang diutay nga oras sa mga hapon antes makapauli ang iban halin sa obra ukon eskwelahan. Dugang sa pagbasa sang Biblia, ginalakip sang iban ang pagbasa sang Proclaimers nga libro sa ila naandan nga buhat sa pagtuon kada semana.

¹⁰ Kon nagatukod kita sing bag-ong mga batasan, mahimo nga tuhay gid ini katama sa aton nagligad nga mga batasan. Sang nagligad mahimo nga gintugutan naton ang dikinahanglanon nga mga aktibidad sa pag-ubos sang aton tion. Ang pag-untat sina nga batasan indi mahapos. Wala sing isa ang nagadikta sang aton mga batasan sa pagtuon; ni dapat kita makighusay sa kon ano ang aton ginahimo may kaangtanan sa sini. Ang aton mga batasan sang tayuyon nga pagtuon nagadepende sa aton apresasyon sa “mas importante nga mga butang” kag sa aton kahanda sa paghimulos sang “nagakaigo nga tion.”​—Filip. 1:10; Efe. 5:16.

¹¹ Ang Cristianong mga miting may yara importante nga papel sa aton espirituwal nga pag-uswag, nga nagaaman sing panudlo kag pagpalig-on. Hanti, ang pagtambong sa mga miting isa pa ka kinahanglanon nga bahin sang aton naandan nga buhat nga may kahimusan. Ginpadaku ni Pablo nga indi ini isa ka pililian nga ginapat-od sang luyag.​—Heb. 10:​24, 25.

¹² Paano naton ginapakita nga may kahimusan kita kon nagaplano sang aton semanal nga iskedyul? Ang iban nagatalana sing espesipiko nga mga oras agod maatipan ang personal nga mga hilikuton kag ugaling nagatinguha nga madasok ang mga miting sa bisan anong matigayon nga mga bukas nga kahigayunan, apang indi amo sini ang dapat matabo. Ang aton semanal nga mga miting dapat hatagan sing prioridad, kag ang iban pa nga mga aktibidad ginaplano para sa mga tion nga wala sing mga miting.

¹³ Ang tayuyon nga pagtambong sa mga miting nagakinahanglan sing maayo nga pagplano kag pagbuligay sang pamilya. Sa ordinaryo nga mga adlaw sang semana ang kalabanan sa aton may yara masako nga iskedyul. Nagakahulugan ini nga ang panihapon dapat iskedyulon sing temprano agod ang pamilya may tion sa pagkaon, paghanda, kag pag-abot sa mga miting antes ini magasugod. Sa sina nga katuyuan ang mga miembro sang pamilya mahimo makabulig sa lainlain nga mga paagi.

¹⁴ Ang tayuyon nga pag-alagad sa latagon kinahanglanon gid agod padayon kita nga maglakat sing progresibo sa naandan nga paagi nga may kahimusan. Ginabaton naton tanan ang aton responsabilidad nga ibantala ang mensahe sang Ginharian. Amo ina ang nagahimo sa aton nga mga Saksi ni Jehova. (Isa. 43:10) Sanglit amo ini ang labing hilingagawon nga hilikuton nga ginahimo sa karon, indi ini mahimo tamdon subong natabuan lamang nga bahin sang aton naandan nga buhat sa adlaw-adlaw. Subong sang ginlaygay ni Pablo: “Maghalad kita pirme sa Dios sing halad sang pagdayaw, nga amo, ang bunga sang mga bibig nga nagapahayag sing dayag sang iya ngalan.”​—Heb. 13:15.

¹⁵ Kon nagaplano kita sang aton hilikuton para sa tagsa ka semana, dapat magtalana sing espesipiko nga mga tion para sa pag-alagad sa latagon. Maayo nga tinguhaan nga makapakigbahin sa tanan nga bahin sang pag-alagad, subong sang pagpamalaybalay nga hilikuton, paghimo sing mga pagduaw liwat, kag pagdumala sing mga pagtuon sa Biblia. Mahimo pa gani kita makaplano sing abanse sa paghimo sing dipormal nga pagpanaksi paagi sa pagdala sing literatura kag mangin alisto sa mga kahigayunan nga makasugod sing mga paghambalanay. Sanglit masunson kita nga nagaguwa kaupod sang iban, dapat naton sila pamangkuton sang ila iskedyul agod makahimo kita sing mga kahimusan nga mangin kombeniente sa aton tanan.

¹⁶ Ang aton naandan nga buhat sa pagbantala dapat padayunon walay sapayan sang dipagsapak sa teritoryo. Nahibaluan naton nga daan nga pila lamang ang magapamati. (Mat. 13:15; 24:9) Si Ezequiel gintangdo sa pagbantala sa mga tawo nga ‘rebelyuso, lampingasan, kag matig-a sing tagipusuon.’ Nagsaad si Jehova kay Ezequiel nga ‘patig-ahon niya ang iya agtang batok sa ila mga agtang,’ kon sayuron, “subong sang diamante, nga matig-a pa sa santikan.” (Ezeq. 2:​3, 4; 3:​7-9) Busa ang tayuyon nga naandan nga buhat para sa pag-alagad nagakinahanglan sing pagkamabinatason.

¹⁷ Maayong mga Halimbawa nga Ilugon: Mas maayo ang mahimo sang kalabanan sa aton sa pag-alagad sa latagon kon may isa nga nagapanguna. Si Pablo kag ang iya mga kaupdanan nagpahamtang sing maayo nga halimbawa, kag ginlaygayan niya ang iban nga ilugon sia.​—Filip. 3:17.

¹⁸ Sa karon, man, madamo kita sing maayong mga halimbawa. Sa Hebreo 13:​7, si Pablo naglaygay: “Dumduma yadtong nagapanguna sa tunga ninyo, . . . kag samtang ginapamalandungan ninyo ang kaulihian sang ila paggawi iluga ang ila pagtuo.” Sa pagkamatuod, si Cristo amo ang aton Huwaran, apang sarang naton mailog ang pagtuo sadtong nagapanguna. Kaangay ni Pablo, ang mga gulang dapat mangin maayong mga halimbawa para sa iban. Ang kada isa dapat nga may yara naandan nga buhat nga may kahimusan nga nagauna pirme sang mga interes sang Ginharian. Bisan pa nga may yara sekular kag pangpamilya nga mga obligasyon, ang mga gulang dapat nga may natukod sing maayo nga mga batasan sang personal nga pagtuon, pagtambong sa mga miting, kag pagpanguna sa pag-alagad sa latagon. Kon ang mga gulang ‘nagadumala sa ila panimalay sa maayo nga paagi,’ ang tanan sa kongregasyon mapalig-on nga magpadayon sa pagpanghikot sa naandan nga buhat nga may kahimusan.​—1 Tim. 3:​4, 5.

¹⁹ Mga Tulumuron Para sa Bag-ong Tuig sang Pag-alagad: Ang pamuno sang bag-ong tuig sang pag-alagad isa ka nagakaigo nga tion sa pagbinagbinag sang aton personal naandan nga buhat. Ano ang ginapakita sang pagrepaso naton sa aton hilikuton sang nagligad nga tuig? Napauswag bala naton ang aton hilikuton? Mahimo nga nangin mas maukod kita sa aton personal nga pagtuon. Mahimo nga mas tayuyon kita nga nagtambong sa mga miting ukon mahimo nga gindugangan ang aton pag-alagad sa latagon paagi sa pag-auxiliary payunir. Ayhan nakahimo kita sing espesipiko nga mga buhat sang Cristianong kalulo tungod sa iban sa aton kongregasyon ukon pamilya. Kon amo, may rason kita sa pagkasadya nga naglakat kita sa dalan nga nagapahamuot sa Dios, kag may maayong rason kita nga “padayon ini nga himuon sing labi pa.”​—1 Tes. 4:1.

²⁰ Ano kon ang aton naandan nga buhat daw indi mapinadayunon ukon talagsa lamang? Paano kita naapektuhan sa espirituwal? Naupangan bala ang aton pag-uswag bangod sang pila ka rason? Ang pag-uswag nagasugod paagi sa pagpangayo sing bulig kay Jehova. (Filip. 4:​6, 13) Ipakighambal ang imo mga kinahanglanon sa iban nga miembro sang pamilya, nga nagapangayo sang ila bulig sa pagbag-o sang imo naandan nga buhat. Kon may mga problema ka, mangayo sing bulig sa mga gulang. Kon hanuot kita nga manikasog kag maghulag sa panuytoy ni Jehova, makapat-od kita nga malikawan naton ang “mangin diaktibo ukon dimabungahon.”​—2 Ped. 1:​5-8.

²¹ Ang paglakat sa naandan nga buhat nga may kahimusan nagadul-ong sa mga pagpakamaayo nga nagahimo sang aton mga panikasog nga takus. Samtang determinado ka sa paglakat sing progresibo sa naandan nga buhat nga may kahimusan, “indi magpabuyan-buyan sa inyo ginahimo. Magmainit sa espiritu. Magpaulipon kamo para kay Jehova.” (Roma 12:11)​—Para sa mas detalyado nga pagbinagbinag sa sining topiko, tan-awa ang The Watchtower sang Mayo 1, 1985 pahina 13-15 (Nobiembre 1, 1985 sa Ang Lalantawan.)