Nagatindog sa Atangan sang Daku Pa nga Hilikuton
“WALA sing pagpaindisanay. Luyag sang tagsatagsa nga magmadinalag-on ang tanan,” siling nanday Richard kag Lusia, nga nagalaragway sang ila kaupod nga mga estudyante sa ika-105 nga klase sang Watchtower Bible School of Gilead. “Magkatuhay gid kami tanan, apang para sa amon, ang kada estudyante hamili.” Nag-ugyon ang isa ka kabutho nga si Lowell, nga nagdugang: “Ang amon mga kinatuhayan nagpasuod sa amon sa isa kag isa.”
Ang klase, nga naggradwar sang Septiembre 12, 1998, matuod gid nga magkatuhay. Ang iban nga estudyante nagpayunir sa mga duog diin mas daku ang kinahanglanon sa mga manugbantala sang Ginharian; ang iban matutom nga nag-alagad malapit sa ila puluy-an. Ang pila, kaangay ni Mats kag ni Rose-Marie, nagpangabudlay sing malawig nga inoras kag sing maukod agod mapauswag ang ila Ingles antes sila mag-eskwela. Madamo sang mga estudyante ang nagahunahuna na tuhoy sa pagmisyonero kutob sang pagkabata. Ang isa ka mag-asawa 12 ka beses na nga nagsumiter sing aplikasyon; malipayon gid sila nga nakabaton sing pangagda sa ika-105 nga klase!
Ang 20 ka semana sang maid-id nga paghanas madasig kaayo nga natapos sang tanan. Daw wala lang mahibal-an sang mga estudyante, ginpasa na gali nila ang ila katapusan nasulat nga eksaminasyon, kag ginhatag ang ila katapusan oral nga report, kag nag-abot ang adlaw sang gradwasyon.
Ang tsirman sang programa nga si Albert Schroeder, isa ka katapo sang Nagadumala nga Hubon sang mga Saksi ni Jehova, nagpahanumdom sa klase nga “nagatindog [sila] sa atangan sang daku pa nga hilikuton sa patag sang edukasyon sa Biblia,” nga nagasunod sa kapin sa 7,000 ka iban pa nga nauna sa ila sa Gilead. Nagsiling sia nga sang tig-ilinit, nakatigayon ang mga estudyante sing pinasahi nga kahigayunan sa pagpakig-upod sa madugay na nga mga misyonero sang nagduaw sila sa bug-os kalibutan nga ulong talatapan may kaangtanan sa internasyonal nga mga kombension.
Nian ginpakilala ni Utod Schroeder si Max Larson sang Bethel Operations Committee. Ginhatag niya ang tema “Ang Edukasyon nga Nagadul-ong sa Kabuhi nga Walay Katapusan.” Ginkutlo ni Utod Larson ang Hulubaton 1:5, nga nagasiling: “Ang maalam nga tawo magapamati kag magabaton sing dugang nga pagtudlo, kag ang tawo nga may paghangop nagakuha sing malantipon nga panuytoy.” Ang kalantip kinahanglanon agod mangin epektibo nga misyonero. Ang malantipon nga mga tawo nagatindog sa atubangan sang mga hari. (Hulubaton 22:29) Sa tapos matudluan sa sulod sang lima ka bulan, ang mga estudyante nasangkapan sing maayo sa pagtiglawas sa ila labing daku nga mga Hari, si Jehova nga Dios kag si Cristo Jesus.
Si David Olson sang Service Department masunod nga nagpamulongpulong sa tema nga “Magbulig sa Pagpahalipay sa Tagipusuon ni Jehova.” Namangkot sia: “Ano ang mahimo sang di-himpit nga mga tawo agod mapahalipay ang tagipusuon sang Dios?” Ang sabat? Maalagad nila sia sing matutom, mainunungon, kag malipayon. Luyag ni Jehova nga ang iya katawhan nagakalipay sa pag-alagad sa iya. Kon malipayon nga ginahimo naton ang kabubut-on sang Dios, ginapahalipay naton ang iya tagipusuon. (Hulubaton 27:11) Ginbasa ni Utod Olson ang isa ka sulat gikan sa isa ka mag-asawa nga misyonero nga naggradwar sa ika-104 nga klase sang Gilead. Nalipay bala sila sa ila bag-o nga teritoryo? “May mga 140 ka manugbantala kami,” sulat nila nahanungod sa ila kongregasyon, “nga may promedyo nga tumalambong sa miting nga 250 tubtob 300. Ang pag-alagad sa latagon amo ang pinakamaayo nga bahin. Ang kada isa sa amon may apat ka ginatun-an, kag ang iban nagatambong na sa mga miting.”
Si Lyman Swingle, sang Nagadumala nga Hubon, nagpamulongpulong sa topiko nga “Isa ka Tion sa Pagdulog Sing Makadali kag Pag-isip Sang Imo mga Pagpakamaayo.” Ang paghanas sa Gilead nagdala sing madamo nga pagpakamaayo. Nabuligan sini ang mga estudyante nga mapauswag ang ila ihibalo, mapadaku ang ila apresasyon sa organisasyon ni Jehova, kag mapalambo ang importante nga mga kinaiya, subong sang pagkamapainubuson. “Makapaubos gid nga eksperiensia ang pagkadto diri kag paghinguyang sing tion sa pagpamati sa instruksion,” siling ni Utod Swingle, nga nagdugang: “Magalakat kamo gikan diri nga nasangkapan sing mas maayo sa pagdayaw kay Jehova.”
“Daku Gid ang Inyo Kalipay—Gani Ngaa Magkabalaka?” amo ang titulo sang pamulongpulong ni Daniel Sydlik, katapo man sang Nagadumala nga Hubon. Kon mag-utwas ang mga problema, pangitaa ang panuytoy sang Kasulatan, laygay niya. Paagi sa paggamit sing pinili nga mga bersikulo sa ikan-um nga kapitulo sang Mateo, ginpakita ni Utod Sydlik kon paano ini himuon. Bangod sang kakulang sing pagtuo mahimo kita magkabalaka tuhoy sa kalibutanon nga mga butang, subong sang kalan-on kag panapton. Apang, nakahibalo si Jehova sang aton mga kinahanglanon. (Mateo 6:25, 30) Ang pagkabalaka magadugang lamang sa mga kabalaka nga ginadala sang tagsa ka adlaw. (Mateo 6:34) Sa pihak nga bahin, ang pila ka pagplano kinahanglanon. (Ipaanggid ang Lucas 14:28.) “Ginadili ni Jesus, indi ang maalamon nga paghunahuna para sa palaabuton, kundi ang di-maalamon nga pagkabalaka tuhoy sini,” paathag ni Utod Sydlik. “Ang paghulag isa sang labing maayo nga bulong para sa kabalaka. Kon nagakabalaka kita, maayo nga sugdan naton ang paghambal tuhoy sa kamatuoran.”
Nagapamilinbilin nga Laygay Gikan sa mga Instruktor
Nagsunod ang mga pamulongpulong sang tatlo ka katapo sang talapuanan sang mga manunudlo sang Gilead. Una nga nagpamulongpulong si Carl Adams, sa tema nga “Ano ang Ibalos Ninyo kay Jehova?” Ang iya pamulongpulong napasad sa ika-116 sang Salmo, nga mahimo gin-amba ni Jesus sang gab-i antes sia mapatay. (Mateo 26:30, footnote) Ano ang ginahunahuna ni Jesus samtang ginaamba niya ang mga pulong: “Ano bala ang ibalos ko kay Jehova tungod sa tanan niya nga kaayo sa akon”? (Salmo 116:12) Mahimo nga ginhunahuna niya ang himpit nga lawas nga gin-aman ni Jehova para sa iya. (Hebreo 10:5) Sa masunod nga adlaw, idulot niya yadto nga lawas bilang halad, nga nagapamatuod sang kadakuon sang iya gugma. Ang mga estudyante sang ika-105 nga klase nakatilaw sang kaayo ni Jehova sa sulod sang nagligad nga lima ka bulan. Karon mapakita nila ang ila gugma sa Dios paagi sa pagpangabudlay sing lakas sa mga teritoryo nga idestino sa ila.
Si Mark Noumair, ang ikaduha nga instruktor sang Gilead nga nagpamulongpulong, naglaygay sa mga estudyante nga “Magpadayon sa Paghimo Sing Matarong.” Si Jose, sa tapos nga ginbaligya subong isa ka ulipon sa Egipto, nagbatas sing 13 ka tuig sang dimakatarunganon nga pagtratar. Gintugutan bala niya ang mga sayop sang iban nga pauntaton sia sa pag-alagad sa Dios? Wala, nagpadayon sia sa paghimo sing matarong. Nian, sa gintalana nga tion sang Dios, ginhilway si Jose gikan sa iya mga kabudlayan. Hinali lang nga nagbag-o ang iya kahimtangan halin sa pagpuyo sa prisuhan pakadto sa pagpuyo sa palasyo. (Genesis, kapitulo 37-50) Ginpamangkot sang insruktor ang iya mga estudyante: “Kon indi ninyo matigayon ang ginapaabot ninyo sa inyo pagmisyonero, magauntat bala kamo? Maluyahan bala kamo sing buot? Ukon magabatas bala kamo kaangay ni Jose?”
Sa katapusan, ang rehistrador sang Gilead School nga si Wallace Liverance, nagdumala sing mapagsik nga paghinun-anon sa mga katapo sang klase sa tema nga “Ibantala ang Hari kag ang Ginharian.” Ginsaysay sang pila ka estudyante ang mga eksperiensia nila samtang nagabantala sa mga pamalay, sa mga tiendahan, kag sa mga kalye. Ang iban nagsugid kon paano sila nagpanaksi sa mga tawo nga nagahambal sing tuhay nga lenguahe. Ang iban pa nagpakita kon paano magbantala sa mga tawo nga nanuhaytuhay ang relihion. Ang tanan nga naggradwar nalangkag nga makapakigbahin sing bug-os sa ministeryo sa latagon subong mga misyonero.
Malipayon, Madugay Na nga mga Misyonero
Ang masunod nga bahin, nga natig-uluhan “Ang Makalilipay nga mga Resulta Sang Pag-alagad Subong Misyonero,” ginhatag ni Robert Wallen kag naglakip sing mga interbyu sa apat ka kauturan nga lalaki sa talapuanan sang ulong talatapan nga wala pa lang madugay nakapakig-upod sing makapalig-on sa eksperiensiado nga mga misyonero. Gilayon nga ginbaton sadtong mga misyonero nga indi mahapos para sa ila nga magtuon sing bag-o nga lenguahe, magpasibu sa iban nga kultura, ukon maanad sa tuhay nga klima. Nian yara ang paglandas sa kahidlaw sa pamilya. Kon kaisa, nagautwas ang problema sa panglawas. Apang walay sapayan sini tanan, ginhuptan sang mga misyonero ang positibo nga panimuot, kag ang ila pagpadayon ginpakamaayo. Ang pila nakabulig sa madamo nga tawo nga makilala si Jehova. Ang iban nakabulig sa nanuhaytuhay nga paagi sa kabilugan nga pag-uswag sang hilikuton sang Ginharian sa madamo nga pungsod.
Ang katapusan nga namulongpulong amo si Carey Barber, isa ka katapo sang Nagadumala nga Hubon. Ginrepaso niya ang dalagku nga mga punto sa programa sang “Dalanon Sang Dios sa Kabuhi” nga kombension. “Ano ang epekto sang programa sang kombension sa inyo kaangtanan kay Jehova?” pamangkot niya sa iya mga tumalambong. Ginpaanggid sang humalambal ang makalilipay nga mga resulta sang pagsunod sa dalanon sang Dios sa malaglagon nga resulta para sa mga nagasunod sa dalanon sang kalibutan. Ginapatuhuyan ang sala ni Moises sa Meriba, sia nagpaandam: “Bisan pa ang isa ka tawo nagaalagad sing matutom sa sulod sang madamo nga tuig, wala ginapasapayanan ni Jehova bisan ang gamay nga paglapas sa Iya matarong nga kasuguan.” (Numeros 20:2-13) Kabay nga ang tanan nga alagad sang Dios bisan diin man manguyapot sing hugot sa ila hamili nga pribilehiyo sang pag-alagad!
Nag-abot ang tion sang pagbaton sang mga estudyante sang ila mga diploma. Dayon, ginbasa sang tiglawas sang klase ang isa ka sulat sang pagpasalamat tungod sa paghanas nga nabaton sang mga estudyante. Sa tapos sang nagatakop nga ambahanon kag tinagipusuon nga pangamuyo, natapos ang gradwasyon. Apang, para sa ika-105 nga klase, pamuno lamang ini, kay ang bag-o nga mga misyonero “nagatindog sa atangan sang daku pa nga hilikuton.”
[Kahon sa pahina 23]
Estadistika sang Klase
Kadamuon sang pungsod nga gintiglawasan: 9
Kadamuon sang pungsod nga ginpadalhan: 17
Kadamuon sang mga estudyante: 48
Kadamuon sang mag-asawa: 24
Promedyo nga edad: 33
Promedyo nga tinuig sa kamatuoran: 16
Promedyo nga tinuig sa bug-os tion nga ministeryo: 12
[Kahon sa pahina 24]
Ginpili Nila ang Bug-os Tion nga Pag-alagad
“Sang bata pa ako, wala ako sing plano nga magpayunir,” siling ni Ben, naggradwar sa ika-105 nga klase. “Pagdumdom ko ang mga may pinasahi lamang nga ikasarang kag maayo nga kahimtangan ang makapayunir,” dugang pa niya. “Apang naluyagan ko ang pag-alagad sa latagon. Nian isa ka adlaw nahangpan ko nga ang pagpayunir nagakahulugan lamang sing dugang nga pagpakigbahin sa ministeryo. Amo sadto nga narealisar ko nga mahimo ako makapayunir.”
“Ang bug-os tion nga mga alagad pirme ginapabaloran sing daku sa amon puluy-an,” panaysayon ni Lusia. Ginahinumdom niya ang daku nga kakunyag sa iya kongregasyon sa tagsa ka tion nga magduaw ang mga misyonero. “Sang nagadaku ako,” siling niya, “nahangpan nila nga ang bug-os tion nga pag-alagad nalakip sa akon mga plano.”
Napatay ang iloy ni Theodis sang 15 anyos sia. “Sadtong tion, ang kongregasyon nagsakdag gid sa akon,” siling niya, “gani ginpamangkot ko ang akon kaugalingon, ‘Ano ang himuon ko agod ipakita ang akon pagpasalamat?’ ” Nagdul-ong ini sa iya nga magsulod sa bug-os tion nga pag-alagad kag karon sa misyonero nga hilikuton.
[Retrato sa pahina 25]
Ika-105 nga Naggradwar nga Klase sang Watchtower Bible School of Gilead
Sa listahan sa ubos, ang mga raya nanumeruhan halin sa atubangan pa likod, kag ang mga ngalan nalista halin sa wala pa tuo sa tagsa ka raya
(1) Sampson, M.; Brown, I.; Heggli, G.; Abuyen, E.; Desbois, M.; Pourthié, P. (2) Kassam, G.; Lindberg, R.; Dapuzzo, A.; Taylor, C.; LeFevre, K.; Walker, S. (3) Baker, L.; Pellas, M.; Woggon, E.; Böhne, C.; Asplund, J.; Haile, J. (4) Pourthié, T.; Whittaker, J.; Palmer, L.; Norton, S.; Gering, M.; Haile, W. (5) Walker, J.; Böhne, A.; Groenveld, C.; Washington, M.; Whittaker, D.; Abuyen, J. (6) Gering, W.; Washington, K.; Pellas, M.; Desbois, R.; Heggli, T.; Asplund, Å. (7) Woggon, B.; LeFevre, R.; Taylor, L.; Brown, T.; Groenveld, R.; Palmer, R. (8) Norton, P.; Sampson, T.; Baker, C.; Lindberg, M.; Kassam, M.; Dapuzzo, M.