Ang Aton Bahandi sa mga Suludlan nga Human sa Daga

“May yari kami sining bahandi sa human-sa-daga nga mga suludlan, agod nga ang gahom nga labaw sa kinaandan mangin iya sang Dios kag indi gikan sa amon kaugalingon.”—2 CORINTO 4:7.

1. Paano kita napalig-on sang halimbawa ni Jesus?

SAMTANG ginadihon ni Jehova diri sa duta, nakita sing personal ni Jesus ang mga kaluyahon sang tawo. Ang iya halimbawa sang paghupot sing integridad dapat gid nga magpalig-on sa aton! Ang apostol nagasiling sa aton: “Sa katunayan, sa sining dalanon gintawag kamo, bangod bisan si Cristo nag-antos tungod sa inyo, nga nagabilin sa inyo sing huwaran agod nga pagsundon ninyo sing maayo ang iya mga tikang.” (1 Pedro 2:21) Paagi sa pagpasakop sa sini nga pagdihon, nadaug ni Jesus ang kalibutan. Napabakod man niya ang iya mga apostoles agod mangin mga dumalaug. (Binuhatan 4:13,31; 9:27, 28; 14:3; 19:8) Kag daw ano ka daku nga pagpalig-on ang ginhatag niya sa konklusion sang iya katapusan nga pamulongpulong sa ila! Sia nagsiling: “Ginsiling ko ining mga butang sa inyo agod nga paagi sa akon may paghidait kamo. Sa kalibutan may kapipit-an kamo, apang magpakaisog! nadaug ko ang kalibutan.”—Juan 16:33.

2. Kon ipaanggid sa pagbulag sa kalibutan, ano nga kapawa ang yara sa aton?

² Subong man, sa tapos mapaanggid ang pagbulag nga dala sang “dios sining sistema sang mga butang” sa “kapawa sang mahimayaon nga maayong balita,” si apostol Pablo nagsiling tuhoy sa aton hamili nga ministeryo: “May yari kami sining bahandi sa human-sa-daga nga mga suludlan, agod nga ang gahom nga labaw sa kinaandan mangin iya sang Dios kag indi gikan sa amon kaugalingon. Ginaipit kami sa tagsa ka paagi, apang wala mapiuti nga indi na makagiho; ginaligban kami, indi nga wala na sing maguwaan; ginahingabot kami, apang wala mapatumbayaan; ginapukan kami, apang wala malaglag.” (2 Corinto 4:4,7-9) Bisan pa mahuyang kita nga “human-sa-daga nga mga suludlan,” gindihon kita sang Dios paagi sa iya espiritu agod madaug naton sing bug-os ang kalibutan ni Satanas.—Roma 8:35-39; 1 Corinto 15:57.

Pagdihon sa Israel sang Una

3. Paano ginlaragway ni Isaias ang pagdihon sa Judiyo nga pungsod?

³ Indi lamang mga indibiduwal ang ginadihon ni Jehova kundi ang bug-os nga mga pungsod man. Halimbawa, sang ang dumaan nga Israel nagpasakop sa pagdihon ni Jehova, nagmauswagon ini. Apang nagpakatig-a ini sang ulihi sa dalanon sang pagkamalinapason. Subong resulta, ang Naghimo sang Israel nagdala sing “kailo” sa sini. (Isaias 45:9) Sang ikawalo nga siglo B.C.E., ginsugid ni Isaias kay Jehova ang malubha nga kasal-anan sang Israel, nga nagasiling: “O Jehova, ikaw amon Amay. Kami ang daga, kag ikaw ang amon Maninihon; kag kami tanan binuhatan sang imo kamot. . . . Ang tanan namon nga matahom nga butang nangin kahapayan.” (Isaias 64:8-11) Ang Israel gindihon nga mangin isa ka suludlan nga takus lamang sa kalaglagan.

4. Ano nga ilustrasyon ang ginhimo ni Jeremias?

⁴ Isa ka siglo sang ulihi, samtang ang adlaw sa pagpakighusay nagahilapit, ginsugo ni Jehova si Jeremias sa pagkuha sing human-sa-daga nga tibod kag sa pag-upod sa pila ka tigulang nga mga lalaki sang Jerusalem sa Nalupyakan sang Hinnom, nga nagasugo sa iya: “Buungon mo ang tibod sa itululok sang mga tawo nga nagaupod sa imo. Kag magsiling ka sa ila, ‘Amo ini ang ginasiling ni Jehova sang mga kasuldadusan: “Sa amo man nga paagi buungon ko ining katawhan kag ining siudad subong sang pagbuong sang isa sa suludlan sang maninihon nga indi na sarang makay-o.”’”—Jeremias 19:10, 11.

5. Daw ano ka daku ang paghukom ni Jehova sa Israel?

⁵ Sang 607 B.C.E., ginlaglag ni Nabocodonosor ang Jerusalem upod ang templo sini kag gindala nga bihag sa Babilonia ang buhi nga mga Judiyo. Apang pagkatapos sang 70 ka tuig nga pagtapok, ang mahinulsulon nga mga Judiyo nagbalik sa pagpatindog liwat sa Jerusalem kag sa templo sini. (Jeremias 25:11) Apang, sang unang siglo C.E., gintalikdan liwat sang pungsod ang Daku nga Maninihon, kag sang ulihi ginpatay pa sini ang Anak mismo sang Dios. Sang 70 C.E., gingamit sang Dios ang Bug-os Kalibutan nga Kagamhanan sang Roma subong ang iya manugpatay sa pagpapas sa Judiyo nga sistema sang mga butang, nga nagdugmok sa Jerusalem kag sa templo sini. Indi na liwat madihon sang kamot ni Jehova ang pungsod sang Israel nga mangin butang nga “balaanon kag matahom.”a

Pagdihon sa Espirituwal nga Pungsod

6, 7. (a) Paano ginlaragway ni Pablo ang pagdihon sa espirituwal nga Israel? (b) Ano ang kompleto nga kadamuon sang “mga suludlan sang kaluoy,” kag paano ini ginahuman?

⁶ Ang mga Judiyo nga nagbaton kay Jesus gindihon subong sadsaran nga mga katapo sang isa ka bag-ong pungsod, ang espirituwal nga “Israel sang Dios.” (Galacia 6:16) Nagakaigo, nian, ang pinamulong ni Pablo: “Ano? Wala bala sing gahom sa daga ang maninihon sa paghimo gikan sa amo nga linamas sing isa ka suludlan para sa dungganon nga gamit, ang isa pa para sa didungganon nga gamit? . . . Ang Dios, walay sapayan nga may kabubut-on nga ipakita ang kaakig kag ipakilala ang iya gahom, nagbatas nga may daku nga pagpailob sa mga suludlan sang kaakig nga ginhimo nga takus sa kalaglagan, agod mapahibalo niya ang kamanggaran sang iya himaya sa mga suludlan sang kaluoy, nga ginhanda niya nga daan para sa kahimayaan.”—Roma 9:21-23.

⁷ Ginpahibalo sang ulihi sang ginbanhaw nga si Jesus nga ining “mga suludlan sang kaluoy” magadamo sing 144,000. (Bugna 7:4; 14:1) Sanglit wala mapun-an sang kinaugali nga Israel ang kompleto nga kadamuon, ginpakita ni Jehova ang iya kaluoy sa katawhan sang mga pungsod. (Roma 11:25, 26) Ang bag-ong Cristianong kongregasyon nag-uswag sing madasig. Sa sulod sang 30 ka tuig ang maayong balita “ginbantala sa tanan nga tinuga sa idalom sang langit.” (Colosas 1:23) Ini nagkinahanglan nga tatapon sing nagakaigo ang madamong naglinapta nga lokal nga mga kongregasyon.

8. Sin-o ang nagahuman sa unang nagadumala nga hubon, kag paano naporma ini nga hubon?

⁸ Ginhanda ni Jesus ang 12 ka apostoles nga mangin ang nahaunang nagadumala nga hubon, naghanas sa ila subong man sa iban pa para sa ministeryo. (Lucas 8:1; 9:1, 2; 10:1, 2) Sang Pentecostes 33 C.E., ang Cristianong kongregasyon gintukod, kag sa natalana nga tion ang nagadumala nga hubon sini gindugangan agod maglakip sa “mga apostoles kag sa tigulang nga mga lalaki sa Jerusalem.” Sa malawig nga tion, si Santiago nga utod ni Jesus sa iloy, bisan nga indi apostol, amo ang nag-alagad subong tsirman. (Binuhatan 12:17; 15:2, 6, 13; 21:18) Suno sa istoryador nga si Eusebius, ang mga apostoles nangin pinasahi nga mga puntariya sang paghingabot kag nag-alaplaag sa iban nga mga teritoryo. Ang miembro sang nagadumala nga hubon ginpasibu sing nagakaigo.

9. Anong masubo nga hitabo ang gintagna ni Jesus?

⁹ Sang mga talipuspusan sang unang siglo, ‘ang kaaway, ang Yawa,’ nagsugod sa ‘pagsab-ug sing mga gamhon’ sa tunga sang kaangay-sang-trigo nga mga manunubli sang “ginharian sang mga langit.” Si Jesus nagtagna nga ining masubo nga hitabo pahanugutan tubtob sa tion sang tig-alani sa “konklusion sang sistema sang mga butang.” Nian, sa liwat, ‘ang mga matarong magaiwag sing masanag subong sang adlaw sa ginharian sang ila Amay.’ (Mateo 13:24, 25, 37-43) San-o ina mahanabo?

Pagdihon sa Israel sang Dios Karon

10, 11. (a) Paano nagsugod ang modernong-adlaw nga pagdihon sa Israel sang Dios? (b) Anong magkatuhay nga mga panudlo ang makita sa Cristiandad kag sa tunga sang hanuot nga mga Estudyante sang Biblia?

¹⁰ Sang 1870, si Charles Taze Russell nagporma sing isa ka grupo sang pagtinuon sa Biblia sa Pittsburgh, Pennsylvania, E.U.A. Sang 1879 ginbalhag niya ang bulanan nga magasin nga nakilal-an karon nga Ang Lalantawan. Ining mga Estudyante sang Biblia, subong ang pagtawag anay sa ila, nakahantop sang ulihi nga ginbaton sang Cristiandad ang dimakasulatanhon nga paganong mga panudlo, subong sang pagkadimamalatyon sang kalag, kalayuhon nga impierno, purgatoryo, Trinitaryo nga dios, kag pagbunyag sa lapsag.

¹¹ Apang, ang labi ka importante, ginpasag-uli sining mga mahigugmaon sang kamatuoran sang Biblia ang sadsaran nga mga panudlo sang Biblia, subong sang pagtubos paagi sa halad-gawad ni Jesus kag sang pagkabanhaw sa kabuhi nga walay katapusan sa mahidaiton nga paraiso nga duta sa idalom sang Ginharian sang Dios. Labaw sa tanan, ginpadaku ang malapit na nga pagbindikar kay Jehova nga Dios subong Soberanong Ginuo sang uniberso. Ang mga Estudyante sang Biblia nagtuo nga ang Pangamuyo sang Ginuo pagasabton: “Amay namon nga yara sa mga langit, pakabalaanon ang imo ngalan. Magkari ang imo ginharian. Paghimuon ang imo kabubut-on, kon paano sa langit, subong man sa duta.” (Mateo 6:9,10) Gindihon sila sang balaan nga espiritu sang Dios nga mangin isa ka bug-os kalibutan nga katilingban sang mahigugmaon sa paghidait nga mga Cristiano.

12. Paano nahantupan sang mga Estudyante sang Biblia ang importante nga petsa?

¹² Ang maid-id nga pagtuon sa Daniel kapitulo 4 kag sa iban pa nga mga tagna nagkumbinsi sa mga Estudyante sang Biblia nga ang presensia ni Jesus subong Mesianikong Hari malapit na. Nahantop nila nga ang 1914 amo ang petsa nga matapos ang “gintangdo nga mga tion sang mga pungsod.” (Lucas 21:24; Ezequiel 21:26,27) Madasig nga napalapnag sang mga Estudyante sang Biblia ang ila hilikuton, nagtukod sing mga klase sa Biblia (nga gintawag sang ulihi nga mga kongregasyon) sa bug-os nga Estados Unidos. Sa pagsulod sa katuigan 1900, ang ila pagpanudlo sa Biblia nga hilikuton naglapnag sa Europa kag Australasia. Ang maayo nga pag-organisar nangin kinahanglanon.

13. Anong legal nga kahimtangan ang natigayon sang mga Saksi ni Jehova, kag anong tumalagsahon nga serbisyo ang ginahimo sang nahaunang presidente sang Sosiedad?

¹³ Agod mangin legal ang mga Estudyante sang Biblia, ang Zion’s Watch Tower Tract Society ginhimo nga korporasyon sang 1884 sa Estados Unidos, nga may ulong-talatapan sa Pittsburgh, Pennsylvania. Ang mga direktor sini nag-alagad subong sentro nga Nagadumala nga Hubon, nga nagatatap sa pagbantala sing Ginharian sang Dios sa bug-os nga globo. Ang nahaunang presidente sang Sosiedad, si Charles T.Russell, nagsulat sing anom ka tomo sang Studies in the Scriptures kag naghimo sing madamo nga mga paglakbay sa pagbantala. Nagdonar man sia sa bug-os kalibutan nga hilikuton sa Ginharian sing manggad nga natipon niya antes sia nagtuon sa Biblia. Sang 1916, samtang nagalapuyot ang Daku nga Inaway sa Europa, ang kapoy nga si Brother Russell napatay samtang nagalakbay sa pagbantala. Ginhatag niya ang tanan niya nga manggad sa pagpalapnag sang pagpanaksi tuhoy sa Ginharian sang Dios.

14. Paano si J. F. Rutherford ‘nakig-away sing maayo nga inaway’? (2 Timoteo 4:7)

¹⁴ Si Joseph F.Rutherford, nga isa ka huwes anay sa Missouri, nangin ang masunod nga presidente. Bangod sang iya maisugon nga pagsakdag sa kamatuoran sang Biblia, ang mga klero sang Cristiandad nakigbuylog sa mga politiko sa “pagpadihot sing gamo paagi sa dekrito.” Sang Hunyo 21, 1918, si Brother Rutherford kag ang pito pa ka pangunang Estudyante sang Biblia ginbilanggo, nga may lainlain nga pamatbat nga 10 ukon 20 ka tuig. Ang mga Estudyante sang Biblia nagbato. (Salmo 94:20; Filipos 1:7) Bangod sang apela, ginbuy-an sila sang Mayo 26, 1919, kag sang ulihi bug-os nga naabswelto sa butig nga panumbungon nga sedisyon.⁠b Ini nga eksperiensia nagdihon sa ila nga mangin mabakod nga mga sumalakdag sang kamatuoran. Paagi sa bulig ni Jehova, gintilawan nila ang tanan nga paagi agod magmadinalag-on sa espirituwal nga pagpakig-away sa pagbantala sing maayong balita walay sapayan sang pagpamatok sang Babilonia nga Daku. Ini nga pagpakig-away nagapadayon tubtob karon nga tuig 1999.—Ipaanggid ang Mateo, kapitulo 23; Juan 8:38-47.

15. Ngaa ang tuig 1931 importante sing maragtason?

¹⁵ Sang katuigan 1920 kag 1930, ang hinaplas nga Israel sang Dios padayon nga gindihon sa idalom sang panuytoy sang Daku nga Maninihon. Ang matagnaon nga kapawa gikan sa Kasulatan nag-iwag, naghatag sing kadungganan kay Jehova kag nagpatalupangod sa Mesianikong Ginharian ni Jesus. Sang 1931 ang mga Estudyante sang Biblia nalipay sa pagbaton sa bag-ong ngalan, Mga Saksi ni Jehova.—Isaias 43:10-12; Mateo 6:9, 10; 24:14.

16 kag kahon sa pahina 19. San-o nakompleto ang kadamuon sang 144,000, kag ano ang ebidensia sa sini?

¹⁶ Sang katuigan 1930, ang kadamuon sang “mga gintawag kag ginpili kag matutom,” ang 144,000, daw nakompleto na. (Bugna 17:14; tan-awa ang kahon sa pahina 19.) Wala kita makahibalo kon pila sa mga hinaplas ang natipon sang unang siglo kag kon pila ang natipon sa tunga sang “mga gamhon” sang panahon sang madulom nga mga siglo sang daku nga apostasya sang Cristiandad. Apang sang 1935 may kabug-usan nga 52,465 ka manugbantala sa bug-os nga kalibutan, gikan sa kadamuon nga 56,153, nga nagpakita sang ila langitnon nga paglaum paagi sa pagpakigbahin sa mga emblema sang Memoryal. Ano ang madangatan sang madamo nga pagatipunon pa lang?

“Yari Karon! ang Isa ka Dakung Kadam-an”

17. Anong maragtason nga butang ang natabo sang 1935?

¹⁷ Sa kombension nga ginhiwat halin sang Mayo 30 tubtob Hunyo 3, 1935, sa Washington, D.C., E.U.A., si Brother Rutherford naghatag sing tumalagsahon nga pamulongpulong nga natig-uluhan sing “The Great Multitude.”c Ining grupo, “nga wala sing tawo ang makaisip,” magaluntad samtang nagahingapos ang pagpat-in sa 144,000 ka espirituwal nga Israel. Sila man magatuo sa nagagawad nga gahom sang “dugo sang Kordero,” si Jesus, kag magahimo sing balaan nga pag-alagad sa kahimusan ni Jehova nga pagsimba sa templo. Subong isa ka grupo, sila “nagguwa sa dakung kapipit-an” nga buhi, sa pagpanubli sing Paraiso sa duta diin “wala na sing kamatayon.” Mga pila ka tuig antes sadto nga kombension, ini nga grupo ginapatuhuyan subong ang mga Jonadab.—Bugna 7:9-17; 21:4; Jeremias 35:10.

18. Sa anong mga paagi ang tuig 1938 importante?

¹⁸ Ang tuig 1938 importante sa pagkilala sing maathag sa duha ka klase. Ang Marso 15 kag Abril 1, 1938, nga mga guwa sang The Watchtower nagpresentar sing duha-ka-bahin nga pagtinuon sa “Ang Iya Panong” kag gin-athag ang relatibo nga mga duog sang hinaplas nga nagkalabilin kag sang ila kaupdanan, ang dakung kadam-an. Nian ang Hunyo 1 kag Hunyo 15 nga mga guwa may tulun-an nga mga artikulo tuhoy sa “Organisasyon,” pasad sa Isaias 60:17. Ang tanan nga kongregasyon ginpangabay sa paghingyo sa Nagadumala nga Hubon nga magtangdo sing lokal nga mga alagad, sa amo nagpaluntad sing napauswag, gintangdo sang Dios nga teokratiko nga kahimusan. Ginhimo ini sang mga kongregasyon.

19 kag foot­note. Anong mga katunayan ang nagapalig-on nga ang panawagan sa “iban nga mga karnero” ginahimo na karon sa sulod sang kapin sa 60 ka tuig?

¹⁹ Ang report sa 1939 Yearbook of Jehovah’s Witnesses nagsiling: “Ang hinaplas nga mga sumulunod ni Cristo Jesus karon sa duta diutay lamang ang kadamuon, kag indi na magadugang ang ila kadamuon. Gintawag sila sang Kasulatan subong ang ‘nagkalabilin’ sang anak sang Sion, ang organisasyon sang Dios. (Bug. 12:17) Ang Ginuo nagatipon karon sang iya ‘iban nga mga karnero,’ nga magahuman sa ‘dakung kadam-an.’ (Juan 10:16) Ang mga ginatipon karon mga kaupdanan sang nagkalabilin, nga nagapangabudlay upod sa nagkalabilin. Kutob sini nga tion padayon ang mga nagahuman sa ‘iban nga mga karnero’ magadamo tubtob matipon ang ‘dakung kadam-an.’” Ang hinaplas nga nagkalabilin gindihon sa pag-atipan sang pagtipon sa dakung kadam-an. Sila man dapat dihunon.d

20. Anong mga pagbag-o sa organisasyon ang natabo sugod sang 1942?

²⁰ Sang Enero 1942, sang ang Inaway Kalibutanon II nagadabdab, si ­Joseph Rutherford napatay kag ginbuslan ni Nathan Knorr subong presidente. Ang ikatlo nga presidente mapinalanggaon nga gindumdom tungod sang pagtukod sing teokratikong mga eskwelahan sa mga kongregasyon kag sing Eskwelahan sang Gilead para sa paghanas sa mga misyonero. Sa tuigan nga miting sang Sosiedad sang 1944, ginpahibalo niya nga ang karta sang Sosiedad ginrebisado agod ang katapo ibase, indi sa materyal nga mga amot, kundi sa espirituwalidad. Sang masunod nga 30 ka tuig, ang kadamuon sang mga nagapangabudlay sa latagon nag-uswag halin sa 156,299 tubtob sa 2,179,256 sa bug-os nga kalibutan. Sang 1971-75 ang dugang nga mga pagbag-o sa organisasyon ginkinahanglan. Indi na lamang ang isa nga nagaalagad subong presidente ang magahatag sing maid-id nga pagtatap sa hilikuton sang Ginharian sa bug-os nga duta. Ang Nagadumala nga Hubon, nga may nagabinuslanay nga tsirman, gindugangan nga mangin 18 ka hinaplas nga katapo, nga halos ang katunga sa ila nakatapos na sang ila pagkabuhi sa duta.

21. Ano ang naghimo sa mga katapo sang diutay nga panong nga kalipikado para sa Ginharian?

²¹ Ang nabilin nga mga katapo sang diutay nga panong gindihon sa sulod sang madamong dekada sang mga pagtilaw. Napalig-on sila, kay maathag nga nakabaton sila sing ‘panaksi sang espiritu.’ Si Jesus nagsiling sa ila: “Kamo ang nagpabilin nga kaupod ko sa akon mga pagtilaw; kag nagpakigkatipan ako sa inyo, subong nga ang akon Amay nagpakigkatipan sa akon, para sa isa ka ginharian, agod magkaon kag mag-inom kamo sa akon latok sa akon ginharian, kag maglingkod sa mga trono sa paghukom sa napulog-duha ka tribo sang Israel.”—Roma 8:16, 17; Lucas 12:32; 22:​28-30.

22, 23. Paano ang diutay nga panong kag ang iban nga mga karnero ginadihon?

²² Samtang ang kadamuon sang hinaplas-sang-espiritu nga nagkalabilin sa duta nagadiutay, ang hamtong nga mga kauturan nga lalaki sang dakung kadam-an gintangdo sa pagdumala sa espirituwal sa halos tanan nga kongregasyon sa bug-os nga kalibutan. Kag kon matapos na sang katapusan nga tigulang nga hinaplas nga mga saksi ang ila dutan-on nga pagkabuhi, ang prinsipenhon nga sa·rimʹ sang iban nga mga karnero nahanas na sa pagtuman sa administratibo nga mga katungdanan subong pangulo nga klase sa duta.—Ezequiel 44:3; Isaias 32:1.

²³ Ang diutay nga panong kag ang iban nga mga karnero padayon nga ginadihon nga mangin mga suludlan para sa dungganon nga gamit. (Juan 10:​14-16) Yara man sa “bag-ong mga langit” ukon sa “bag-ong duta” ang aton paglaum, kabay nga batunon naton sing tinagipusuon ang imbitasyon ni Jehova: “Magkasadya, kamo nga katawhan, kag magkalipay sing dayon sa kon ano ang akon ginatuga. Kay yari karon akon ginatuga ang [langitnon nga] Jerusalem nga isa ka rason sa pagkasadya kag ang iya katawhan nga rason sa pagkalipay.” (Isaias 65:17, 18) Kabay nga kita nga mahuyang nga mga tawo pirme magaalagad sing mapainubuson, subong nga gindihon paagi sa “gahom nga labaw sa kinaandan”—ang gahom sang balaan nga espiritu sang Dios!—2 Corinto 4:7; Juan 16:13.

[Mga footnote]

Madumduman Mo Bala?

◻ Sa pagpasakop sa pagdihon sang iya Amay, paano si Jesus ang aton Huwaran?

◻ Anong pagdihon ang natabo sa dumaan nga Israel?

◻ Paano ginadihon ang “Israel sang Dios” tubtob sa karon?

◻ Tungod sa anong katuyuan nga ang “iban nga mga karnero” gindihon?

[Kahon sa pahina 18]

Dugang Pa nga Pagdihon sa Cristiandad

Ang balita sang Associated Press halin sa Atenas, Gresya, nagreport sing masunod tuhoy sa kasan-o lang gintangdo nga pangulo sang Griegong Ortodokso nga Simbahan: “Sia kuntani mensahero sang paghidait. Apang ang lider sang Griegong Ortodokso nga Simbahan daw subong sa isa ka heneral nga nagahanda para sa inaway.

“‘Handa kami, kon kinahanglanon, sa pagpatulo sing dugo kag sa pagsakripisyo. Kami, subong isa ka simbahan, nagapangadi para sa paghidait . . . Apang ginabendisyunan namon ang sagrado nga mga hinganiban kon ginakinahanglan ini sang higayon,’ siling kasan-o lang ni Arsobispo Christodoulos tuhoy sa balaan nga adlaw sang Assumption of the Virgin, nga ginsaulog man dungan sa adlaw sang armado nga mga puwersa sang Gresya.”

[Kahon sa pahina 19]

“Wala Na sing mga Dugang!”

Sa gradwasyon sang Gilead sang 1970, si Frederick Franz, bise-presidente sadto sang Watch Tower Society, nagsiling sa mga estudyante tuhoy sa posibilidad nga sila, nga tanan katapo sang iban nga mga karnero nga may dutan-on nga mga paglaum, mahimo magabawtismo sa isa nga ayhan magapangangkon nga hinaplas nga nagkalabilin. Matabo bala ini? Ti, ginpaathag niya nga si Juan Bautista isa sang iban nga mga karnero, kag ginbawtismuhan niya si Jesus kag ang pila sa mga apostoles. Nian namangkot sia kon may panawagan pa bala para sa pagtipon sa dugang pa sang nagkalabilin. “Wala, wala na sing mga dugang!” siling niya. “Yadto nga panawagan natapos sadtong 1931-35! Wala na sing mga dugang. Sin-o, nian, ang pila ka bag-ong mga nakig-upod nga nagapakigbahin sa mga emblema sang Memoryal? Kon sila mga nagkalabilin, sila mga tal-us! Indi sila mga dugang sa grupo sang mga hinaplas, kundi mga tal-us para sa mga nagtalikod.”

[Retrato sa pahina 15]

Ginahamili gid naton ang aton bahandi sang pag-alagad!

[Retrato sa pahina 16]

Ang dumaan nga Israel nangin suludluan nga takus lamang sa kalaglagan