Pagtuman sa Akon Panaad nga Mag-alagad sa Dios

PANUGIRON NI FRANZ GUDLIKIES

Apat lamang sa kapin sa isa ka gatos ka soldado nga kaupod ko ang nabilin nga buhi. Bangod sang nagaatubang nga kamatayon, nagluhod ako kag nanaad sa Dios, ‘Kon maluwas ako sa inaway, magaalagad ako sa imo tubtob san-o.’

GINBUNGAT ko yadto nga panaad sang nagligad nga 54 ka tuig, sang Abril 1945, sang isa ako ka soldado sa Aleman nga hangaway. Nagahingapos na sadto ang Bug-os Kalibutan nga Inaway II, kag ang Sobyet nga hangaway bug-os panikasog nga nagasalakay padulong sa Berlin. Ang amon mga tinawo nagapuwesto malapit sa banwa sang Seelow sa Suba sang Oder, kubos sa 65 kilometros ang kalayuon gikan sa Berlin. Didto ginpaarakan kami adlaw kag gab-i sing makusog nga mga kanyon, kag amat-amat nga nagakaubos ang akon mga kaupod.

Amo sadto, nga sa nahauna nga tion sa akon kabuhi, wala na ako makapugong kag nangamuyo ako sa Dios nga nagahibi. Nadumduman ko ang isa ka teksto sa Biblia nga pirme anay ginabalikwat sang akon mahinadlukon sa Dios nga iloy: “Panawag ka sa akon sa adlaw sang kalisdanan. Luwason ko ikaw, kag ikaw magahimaya sa akon.” (Salmo 50:15) Didto sa trinsera nga ginakulbaan nga basi mapatay ako, ginhimo ko ang nasambit sa ibabaw nga panaad sa Dios. Paano ko natuman ini? Kag paano ako nangin katapo sang Aleman nga hangaway?

Pagdaku sa Lithuania

Sang 1918, sa tion sang Bug-os Kalibutan nga Inaway I, gindeklarar sang Lithuania ang iya kaugalingon nga independensia kag gintukod ang isa ka demokratiko nga sistema sang panguluhan. Natawo ako sang 1925 sa distrito sang Memel (Klaipėda) malapit sa Dagat sang Baltic. Ang distrito bag-o lang ginsakop sang Lithuania isa ka tuig antes ako matawo.

Makalilipay ang akon kabuhi sang bata pa ako upod sa akon lima ka utod nga babayi. Ang amon amay daw subong sang isa ka suod nga abyan kag pirme niya kami ginaupod sa paghimo sing mga butang. Ang amon mga ginikanan mga katapo sang Evangelical Church, apang wala sila nagatambong sa mga serbisyo sini bangod wala maluyagi ni Nanay ang pagkasalimpapaw sang ministro. Apang, ginahigugma niya ang Dios kag ang iya Pulong, ang Biblia, nga iya naluyagan gid basahon.

Sang 1939, ginsakop sang Alemanya ang bahin sang Lithuania nga amon ginapuy-an. Nian, sang maaga nga bahin sang 1943, ginpatawag ako para sa serbisyo militar sa Aleman nga hangaway. Napilasan ako sa isa sang mga pagpakig-away, apang sang mag-ayo ang akon mga pilas, nagbalik ako sa Nasidlangan nga Sona. Sini nga tion nagbaylo ang lakat sang inaway kag ang mga Aleman nagaisol sa atubangan sang Sobyet nga hangaway. Amo sini sadto nga diutayan lang ako mapatay, subong sang ginsaysay sa introduksion.

Pagtuman sa Akon Panaad

Sa tion sang inaway, nagsaylo ang akon mga ginikanan sa Oschatz, Alemanya, sa bagatnan-sidlangan nayon sang Leipzig. Pagkatapos sang inaway, binudlayan ako sa pagpangita sa ila. Apang malipayon gid kami sang magkitaay kami liwat sang ulihi! Wala madugay pagkatapos sadto, sang Abril 1947, gin-updan ko si Nanay sa isa ka pamulongpulong publiko nga ginhatag ni Max Schubert, isa sang mga Saksi ni Jehova. Nagpati si Nanay nga nakita na niya ang matuod nga relihion, kag sa tapos makatambong sa pila ka miting, nag-ugyon man ako sa iya ginatuuhan.

Wala madugay pagkatapos sadto, nahulog si Nanay sa ladder (huluhagdan), kag nakatigayon sing mga samad nga amo ang iya ginkamatay pagligad sang pila ka bulan. Samtang yara sia sa ospital antes sia mapatay, ginpalig-on gid niya ako: “Pirme ko gid ginapangamuyo nga kuntani isa man lang sang akon mga anak ang makakita sa dalan padulong sa Dios. Nakita ko karon nga ginsabat ang akon mga pangamuyo, kag mapatay ako nga may kalinong.” Ginakalangkagan ko gid ang tion nga si Nanay mabugtaw gikan sa kamatayon kag mahibal-an niya nga ang iya mga pangamuyo natuman!—Juan 5:28.

Sang Agosto 8, 1947, apat ka bulan lamang sa tapos ko mabatian ang pamulongpulong ni Utod Schubert, ginbawtismuhan ako sa isa ka asambleya sa Leipzig subong simbulo sang akon dedikasyon kay Jehova nga Dios. Ginhimo ko gid man sang ulihi ang mga tikang padulong sa pagtuman sang akon panaad sa Dios. Wala magdugay nangin payunir ako, nga amo ang pagtawag sa bug-os tion nga mga ministro sang mga Saksi ni Jehova. Sadto nga tion halos 400 ka payunir ang nagapuyo sa duog nga wala magdugay nangin ang Aleman nga Demokratiko nga Republika, ukon Nasidlangan nga Alemanya.

Una nga mga Pagtilaw sa Pagtuo

Ginbuyok ako sang isa ka kaingod sa Oschatz sa Marxismo, kag gintanyagan nga patun-on ako sang Estado sa unibersidad kon magbuylog ako sa Socialist Unity Party of Germany (SED). Wala ko ini pagbatuna, subong nga wala man ginbaton ni Jesus ang tanyag ni Satanas.—Mateo 4:8-10.

Isa ka adlaw sang Abril 1949, may duha ka pulis nga nag-abot sa akon ginaobrahan kag ginpilit ako nga mag-upod sa ila. Gindala ako sa lokal nga talatapan sang Sobyet nga mga sekreta diin gin-akusar ako nga nagaalagad para sa mga kapitalista sa Katundan. Sarang ko mapamatud-an nga wala ako sing sala, siling nila, paagi sa pagpadayon sang akon pagpamalaybalay nga hilikuton apang ireport ko sa ila ang bisan sin-o nga nagahambal sing negatibo tuhoy sa Unyon Sobyet ukon SED ukon ang bisan sin-o nga nagakadto sa mga miting sang mga Saksi ni Jehova. Sang mangindi ako, ginkandaduhan ako sa sulod sang isa ka selda. Sang ulihi, gindala ako sa atubangan sang daw subong isa ka korte sang militar. Ang pamatbat sa akon: 15 ka tuig nga pagpangabudlay sa Siberia!

Nagpabilin ako nga kalma, kag nagdayaw sa sini ang mga opisyal. Nian ginsugiran nila ako nga ang pamatbat sa akon ginapadapat, apang tuman na anay nga magreport ako sing makaisa kada semana tubtob handa na ako sa pagkooperar sa ila. Luyag ko mahibaluan kon ano ang ilaygay sa akon sang mas hamtong nga mga Saksi, gani nagkadto ako sa Magdeburg, diin nahamtang sadto ang sanga talatapan sang Watch Tower Society. Indi mahapos ang paglakbay, kay ginabantayan ako. Si Ernst Wauer nga nagaobra sa Legal Department sa Magdeburg, nagsiling sa akon: “Kon makig-away ka, madaug ka. Kon magkompromiso ka, malutos ka. Amo sina ang natun-an namon sa kampo konsentrasyon.”a Nakabulig sa akon yadto nga laygay agod tumanon ko ang akon panaad nga mag-alagad sa Dios.

Pagdumili kag Pagdakop Liwat sa Akon

Sang Hulyo 1950, ginrekomendar ako nga mag-alagad subong isa ka nagalakbay nga manugtatap. Apang, sang Agosto 30, ginsalakay sang mga pulis ang amon lugar sa Magdeburg, kag gindumilian ang amon pagbantala nga hilikuton. Gani gin-islan ang akon asaynment. Dapat namon atipanon ni Paul Hirschberger ang mga 50 ka kongregasyon, maghinguyang sing duha ukon tatlo ka adlaw sa kada isa, agod buligan ang kauturan nga maorganisar sa pagpadayon sang ila ministeryo sa idalom sang pagdumili. Sa mga binulan nga nagsunod, anom ka beses nga nalikawan ko ang pagdakop sang mga pulis!

May isa nga nakasulod sa isa sang mga kongregasyon nga nagtugyan sa amon sa Stasi, ang State Security Service. Sa amo, sang Hulyo 1951, gindakop kami ni Paul sa kalye sang lima ka tawo nga nagataya sing mga pusil. Sa pagbalikid sa nagligad, nakita namon nga wala kami magsalig sa organisasyon ni Jehova nga amo kuntani ang dapat nga ginhimo namon. Ginlaygayan na kami sang amon gulang-gulang nga mga utod nga indi gid mag-updanay sa paglakbay. Nadula namon ang amon kahilwayan bangod sang sobra nga kompiansa! Dugang pa, wala namon mahambalan sing abanse kon ano ang isiling namon hinali madakpan kami.

Subong nagaisahanon sa akon selda, nagahibi nga nakitluoy ako kay Jehova nga buligan ako nga indi pag-itugyan ang akon mga utod ukon magkompromiso sa akon pagtuo. Sang matulugan ako, hinali ako nga natapungawan sa tingog sang akon abyan nga si Paul. Sa ibabaw lang sang akon selda amo ang hulot diin ginaimbestigar sia sang Stasi. Sanglit magin-ot kag mahun-og yadto nga gab-i, abierto ang ganhaan sang balkonahe, apang nabatian ko ang tanan bisan mahinay lang. Sang ulihi, sang gin-imbestigar ako, pareho gid nga mga sabat ang ginhatag ko, amo kon ngaa natingala gid ang mga opisyal. Ang paborito nga teksto ni Nanay nga, “Panawag ka sa akon sa adlaw sang kalisdanan. Luwason ko ikaw,” nagbalikbalik sa akon hunahuna, kag napalig-on ako sing daku.—Salmo 50:15.

Pagkatapos sang imbestigasyon, lima ka bulan nga nagtener kami ni Paul sa bilangguan sang Stasi sa Halle kag sang ulihi sa Magdeburg samtang ginahulat ang adlaw sang kasaba. Sang didto kami sa Magdeburg, kon kaisa masiplatan ko ang garhum sang amon sirado sadto nga mga pasilidad sang sanga. Ginhandum ko nga kuntani nagaobra ako didto sa baylo nga yara sa bilangguan! Sang Pebrero 1952 ginpahibalo ang pamatbat sa amon: “10 ka tuig nga pagkabilanggo kag 20 ka tuig nga wala sing mga kinamatarong sibil.”

Pagpabilin nga Matutom sa Bilangguan

Ang mga Saksi ni Jehova nga ginpamatbatan sing dimagkubos napulo ka tuig nagasuksok sing pinasahi nga identipikasyon para sa pila ka tion sa bilangguan. May pula nga laso nga ginatahi sa isa ka pihak sang delargo kag sa isa ka pako sang amon dyaket. Subong man, isa ka diutay, tipulon nga kardbord nga pula sing duag ang nabutang sa guwa sang puwertahan sang amon selda agod magpaandam sa mga guardia nga kami makatalagam nga mga kriminal.

Ginkabig kami sang mga awtoridad subong pinakagrabe nga mga kriminal. Wala kami ginatugutan sa paghupot sing Biblia bangod subong sang ginpaathag sang isa ka guardia: “Ang isa sang mga Saksi ni Jehova nga nagauyat sing Biblia daw kaangay sang isa ka kriminal nga nagauyat sing pusil.” Agod makatipon kami sing mga bahin sang Biblia, ginabasa namon ang mga sinulatan sang Ruso nga manunulat nga si Leo Tolstoy, nga masami nagabalikwat sing mga teksto sa Biblia sa iya mga libro. Nasaulo namon ining mga teksto sa Biblia.

Antes ako gindakop sang 1951, kalaslon na ako kay Elsa Riemer. Ginaduaw niya ako sa bilangguan sing masunson nga mahimo kag ginapadalhan sing isa ka pinutos sang pagkaon makaisa kada bulan. Nagaliklik man sia sing espirituwal nga pagkaon sa iya mga pinutos. Isa ka bes, ginsudlan niya sing mga artikulo gikan sa Lalantawan ang pila ka soriso. Masami nga ginapihak sang mga guardia ang mga soriso agod usisaon kon may butang nga natago sa sulod, apang sini nga tion nag-abot ang pinutos sang nagahingapos na ang pagtrabaho sadto nga adlaw, gani wala na ini mausisa.

Sadto nga tion, si Karl Heinz Kleber kag ako nagaupdanay sa isa ka diutay nga selda upod sa tatlo pa nga indi Saksi nga bilanggo. Paano namon basahon Ang Lalantawan nga indi kami makita? Ti, nagapakunokuno kami nga nagabasa sing libro, apang ang sa sulod sini amo ang mga artikulo sang Lalantawan. Ginapasa man namon ining hamili nga espirituwal nga pagkaon sa amon kaupod nga mga Saksi nga yara sa bilangguan.

Samtang didto kami sa bilangguan ginhimuslan man namon ang mga kahigayunan sa pagsugid sa iban tuhoy sa Ginharian sang Dios. Nalipay gid ako nga ang isa sang akon kaupod nga bilanggo nangin tumuluo subong resulta sini.—Mateo 24:14.

Pagbalik sa Bug-os Tion nga Ministeryo

Sang Abril 1, 1957, pagkatapos sang halos anom ka tuig nga pagkabilanggo, ginpaguwa ako. Wala pa magduha ka semana sang ulihi, ginpakaslan ko si Elsa. Sang mabatian sang Stasi ang pagpaguwa sa akon, nangita sila sing balibad agod ibalik ako sa bilangguan. Sa paglikaw sa sini nga posibilidad, nagtabok kami ni Elsa sa dulunan agod magpuyo sa West Berlin.

Pag-abot namon sa West Berlin, ginpamangkot kami sang Sosiedad kon ano ang amon plano. Ginpaathag namon nga ang isa sa amon mapayunir samtang ang isa naman maobra.

“Luyag bala ninyo kon duha kamo magpayunir?” amo ang pamangkot sa amon.

“Kon posible ina,” sabat namon, “magasugod kami sa gilayon.”

Sa amo ginhatagan kami sing diutay nga allowance kada bulan subong bulig para sa amon, kag nagsugod kami sa pag-alagad subong mga espesyal nga payunir sang 1958. Nalipay gid kami sa pagtan-aw sa mga indibiduwal nga amon ginatudluan sing Biblia nga nagbag-o sang ila kabuhi agod mangin mga alagad ni Jehova! Sa nagsunod nga napulo ka tuig nga pag-alagad subong mga espesyal payunir, natun-an namon ang pagpanghikot sing suod subong mag-asawa. Pirme sa tupad ko si Elsa, bisan kon nagakay-o ako sing awto. Dungan man kami nga nagabasa, nagatuon kag nagapangamuyo.

Sang 1969 gin-asayn kami sa paglakbay nga hilikuton, nga nagaduaw sa tuhay nga kongregasyon kada semana agod mag-alagad sa mga kinahanglanon sang mga katapo sini. Si Josef Barth, isa ka tawo nga eksperiensiado sa paglakbay nga hilikuton, naghatag sa akon sini nga laygay: “Kon luyag mo magmadinalag-on sa imo asaynment, tinguhai nga kabiga ang mga utod nga daw imo gid utod.” Gintinguhaan ko nga iaplikar yadto nga laygay. Subong resulta, nangin mainit gid kag malinong ang amon kaangtanan sa amon kaupod nga mga Saksi, amo kon ngaa nangin mahapos ang paghatag sa ila sing laygay kon kinahanglanon.

Sang 1972, natukiban nga may kanser si Elsa kag gin-operahan. Sang ulihi, ginrayuma man sia. Bisan pa nagabatyag sia sing kasakit, ginaupdan niya ako gihapon kada semana, nagaduaw sa mga kongregasyon, nagapakig-upod sa mga utod nga babayi sa ministeryo sa masarangan niya.

Pagpasibu sang mga Kinahanglanon

Sang 1984 kinahanglan nga atipanon sing dalayon ang akon mga ugangan, gani nag-untat kami sa paglakbay nga hilikuton agod magbulig sa pag-atipan sa ila tubtob napatay sila pagligad sang apat ka tuig. (1 Timoteo 5:8) Nian, sang 1989, naggrabe si Elsa. Makalilipay nga daw nag-ayuayo sia, apang nangin kinahanglanon nga ako ang maghimo sang tanan nga buluhaton sa sulod sang balay. Nagatuon pa ako gihapon kon paano pakig-angutan ang isa ka tawo nga nagaantos sa dalayon nga kasakit. Apang, walay sapayan sang kahuol sa mental kag sa emosyon, nahuptan namon ang amon gugma sa espirituwal nga mga butang.

Nagapasalamat kami nga tubtob karon lakip gihapon kami sa listahan sang mga payunir. Apang, natun-an namon apresyahon nga indi ang aton posisyon ukon kon sig-ano ang aton mahimo, ang importante, kundi nga kita magpabilin nga matutom. Luyag namon alagdon ang aton Dios, nga si Jehova, indi lamang sing pila ka tuig, kundi tubtob sa walay katubtuban. Ang amon naeksperiensiahan nangin isa ka dalayawon gid nga paghanas para sa palaabuton. Kag ginahatagan kami ni Jehova sing kusog agod dayawon sia bisan sa idalom sang labing mabudlay nga mga kahimtangan.—Filipos 4:13.

[Footnote]

[Laragway sa pahina 23]

Ginbilanggo ako diri sa Magdeburg

[Kapsion]

Gedenkstätte Moritzplatz Magdeburg für die Opfer politischer Gewalt; Foto: Fredi Fröschki, Magdeburg

[Laragway sa pahina 23]

Sang magpakasal kami sang 1957

[Laragway sa pahina 23]

Upod kay Elsa karon