Pagtapna sa Salot sang Pagkadi-alalangay

Paluntaron sa indi madugay sang Manunuga ang pag-alalangay nga ginahandum gid sang mga tawo. Samtang wala pa ini, makahimo kita sing mga tikang agod matapna ang salot sang pagkadi-alalangay nga nagaapektar sa aton kag sa aton pamilya. Subong sang ginsiling ni Nelson Mandela, ang presidente anay sang Bagatnan nga Aprika, “ang aton ginahimo sa kon ano ang yara sa aton, indi sa kon ano ang ginhatag sa aton, ang nagapatuhay sang isa ka tawo sa isa.”

ANG maragtas nagapamatuod sang iya pinamulong. Madamong lalaki kag babayi nga ginhatagan sing diutay lamang sang natawo sila apang, paagi sa paggamit sa kon ano ang yara sa ila, nakatigayon sing kadalag-an nga nagpatuhay sa ila gikan sa ila ayhan may kinaadman nga mga katubotubo. Sa kabaliskaran, ang iban nga mga indibiduwal nga ginpakamaayo sing bugana sang bentaha kutob sa pagkabun-ag nag-uyang sang kon ano ang yara sa ila kag wala gingamit ang ila bug-os nga ikasarang.

Himusli sing Daku ang Yara sa Imo!

Ang mga Saksi ni Jehova interesado gid sa pagbulig sa mga tawo nga matigayon ang ihibalo tuhoy sa mga katuyuan sang Dios paagi sa pagtuon sing Biblia. Apang, nahangpan nila nga agod mapuslan sing bug-os ang impormasyon sang Biblia, dapat makahibalo magbasa kag magsulat ang mga tawo. Sa sina nga rason, linaksa ka tawo ang gintudluan sang mga Saksi ni Jehova sa pagbasa kag pagsulat, lakip ang 23,000 ka tawo (tubtob sang tungatunga sang dekada 1990) sa isa lamang ka pungsod sa Katundan nga Aprika. Nagapatuhoy sa tumalagsahon nga serbisyo sa katilingban nga ginahatag sang mga Saksi ni Jehova, ang San Francisco Examiner nagsiling: “Matamod ninyo sila subong modelo nga mga banwahanon. Maukod sila nga nagabayad sing buhis, nagaatipan sa may balatian, nagapakig-away sa indi pagkahibalo magbasa kag magsulat.”

Dugang pa, paagi sa nagauswag nga kurso sa paghambal sa publiko, ginatos ka libo ka tawo ang ginhanas sang mga Saksi ni Jehova agod mangin kalipikado nga mga humalambal, nga makasarang sa pagpabutyag sing talunsay sang ila kaugalingon sa publiko. Lakip sa sining linibo amo ang may malubha anay nga mga problema sa paghambal. Talupangda ang isa ka taga-Bagatnan nga Aprika nga nagsulat: “Tuman gid ka lain sang akon pag-ang-ang amo nga nangin mahuluy-on ako, masami nga nagasalig sa iban agod maghambal para sa akon. . . . Sang nagbuylog ako sa Teokratikong Eskwelahan sa Pagministro kag dapat magbasa sang Biblia sa atubangan sang diutay nga tumalambong . . . , grabe gid ang akon pag-ang-ang amo nga wala ko matapos ang asaynment sa gintalana nga tion. Sa tapos sang miting ang [manuglaygay] malulo nga naghatag sa akon sing praktikal nga laygay. Nagpanugda sia nga hanason ko ang pagbasa sing mabaskog nga nagaisahanon. Ginhimo ko ini, nagahinguyang sing tion adlaw-adlaw, nagabasa sing mabaskog sang akon Biblia kag sang Lalantawan nga magasin.” Maayo ang pag-uswag sining tawo amo nga karon nagapamulongpulong na sia sa publiko sa tumalambong nga nagadamo sing ginatos, kag linibo pa gani.

Pag-alalangay sa Tunga sang mga Kauturan

Kon tuhoy sa edukasyon, pag-atipan sa kapagros, kag tindog sa pangabuhi kag katilingban, ang mga kahimtangan sang mga Saksi ni Jehova magkatuhay gid. Ginapabanaag lamang sining mga kinatuhayan ang di-himpit nga mga kahimtangan sa kalibutan nga ila ginapuy-an. Apang kabaliskaran sa iban nga mga grupo sang relihion, ang pagdampigdampig sa rasa, sa katilingban, kag sa pangabuhi gindula sa tunga nila.

Nahimo nila ini paagi sa paghimo sang ila bug-os nga masarangan sa pagbuhat sang kon ano ang ila natun-an sa Biblia. Ginasunod nila sing bug-os tagipusuon ang mga prinsipio sang Biblia subong sang: “Ang Dios nagatan-aw indi subong sang pagtan-aw sang tawo, bangod ang tawo nagatulok sa kon ano ang makita sang mga mata; apang tuhoy kay Jehova, nagatulok sia sa tagipusuon.” (1 Samuel 16:7) “Ang Dios wala sing ginapasulabi, apang sa tagsa ka pungsod ang tawo nga nagakahadlok sa iya kag nagahimo sing pagkamatarong kalahamut-an sa iya.” (Binuhatan 10:34,35) “Dili magbalos sing malaut sa malaut kay bisan sin-o. Maghimo sing maayo nga mga butang sa itululok sang tanan nga tawo. Kon mahimo, sa masarangan ninyo, magpakighidait sa tanan nga tawo.”—Roma 12:17,18; tan-awa man ang 1 Timoteo 6:17-19; Santiago 2:5,9.

Bangod nagasunod sing maayo sa sining mga prinsipio sang Biblia nga nagaamot sa paghiusa, wala ginapahanugutan sang mga Saksi ni Jehova ang bisan ano nga pagpakita sing pagkadi-alalangay nga napasad sa mga kinatuhayan sa rasa, sa katilingban, ukon sa pangabuhi sa tunga nila. Ining mga butang wala sing bahin, halimbawa, sa pagpat-od kon sin-o ang hatagan sing mga pribilehiyo sa pag-alagad sa Cristianong kongregasyon. Ang mga posisyon sang responsabilidad, subong sang pagtudlo kag pagtatap, ginatangdo lamang pasad sa espirituwal nga mga kalipikasyon.—1 Timoteo 3:1-13; Tito 1:5-9.

Para sa mga indibiduwal nga nag-antos sa idalom sang pagkadi-alalangay sang may ginadampigan nga kalibutan, daw ano ka makapapagsik nga ginapakig-angutan sila sang iban subong mga utod nga lalaki kag babayi nga may alalangay nga tindog sa atubangan sang ila Manunuga! Si Martina makapamatuod sini. Sang ginbiyaan sang iya amay ang ila pamilya, nagdaku sia sa pigado, solo-sing-ginikanan nga puluy-an. Masami sia nga ginatratar nga daw tinapok sa katilingban, wala sing pagsalig sa kaugalingon, kag nabudlayan nga makigbagay sa iban. Napalambo niya ang dimasinapakon nga panimuot. Apang, nagbalhin ang kahimtangan sang magsugod sia sa pagtuon sing Biblia kag nangin isa sang mga Saksi ni Jehova. Nagsiling sia: “Dapat ko gihapon pakigbatuan ang negatibo nga panghunahuna, apang karon masarangan ko na ang paglandas sa problema. Nag-uswag ang akon pagsalig sa kaugalingon, kag nagapakighambal ako upod ang daku pa nga kompiansa. Ang kamatuoran naghatag sa akon sing pagbatyag sang responsabilidad. Karon nahibaluan ko nga ginahigugma ako ni Jehova kag ang kabuhi takus ikabuhi.”

Subong isa ka internasyonal nga grupo sang mga Cristiano, ang mga Saksi ni Jehova sa kapin sa 230 ka pungsod nagaagom sing pag-alalangay nga tumalagsahon gid sa kalibutan karon. Makapangangkon man bala sing amo sini ang iban nga relihiosong organisasyon kag mapamatud-an ini sing mga katunayan?

Sa pagkamatuod, realistiko ang mga Saksi ni Jehova. Ginabaton nila dayon nga subong mga produkto sang dihimpit nga palibot, indi nila madula ang tawhanon nga pagkadi-alalangay subong sang iban nga sa madamong siglo nagtinguha sa paghimo sini—kag napaslawan. Walay sapayan sini, nagakalipay sila nga sa tunga nila, daku ang nahimo nila sa pagtapna sining makamamatay nga salot. Kag upod ang mabakod nga pagtuo sa saad sang Dios, ginapaabot nila ang isa ka bag-ong kalibutan sang pagkamatarong nga sa diin ang pagkadi-alalangay mangin butang nga naglipas na sing dayon.

Huo, ang tanan nga matinumanon nga tawo ipasag-uli sa indi madugay sa pag-alalangay sa “dignidad kag mga kinamatarong” nga gintuyo sang ila Manunuga nga agumon nila sang una pa. Matahom gid nga panghunahuna! Kag sini nga tion mangin katunayan na ini!

[Laragway sa pahina 7]

Ang mga Saksi ni Jehova nagapakig-away sa indi pagkahibalo magbasa kag magsulat paagi sa pagtudlo sa linaksa nga tawo sa pagbasa kag pagsulat

[Laragway sa pahina 8]

Ang kamatuoran sang Biblia nagabulig sa pagdula sa mga pag-ihig-ihig sa rasa, sa katilingban, kag sa pangabuhi