Pagkadi-alalangay—Gintuyo Bala Ini sang Dios?

Ang sabat sa isa ka tinaga amo ang indi. Tan-awon naton kon ngaa.

GINTUYO sang Dios nga ang tanan nga tawo may alalangay nga mga kahigayunan sa pag-agom sing kabuhi kag kalipay. Sang gintuga ang tawo, aton mabasa: “Ang Dios nagsiling: ‘Himuon naton ang tawo sa dagway naton, suno sa kaanggid naton, kag magpasakop sa ila ang kaisdaan sang dagat kag ang nagalupad nga mga tinuga sang mga langit kag ang mahagop nga kasapatan kag ang bug-os nga duta kag ang tagsa ka nagagiho nga sapat nga nagagiho sa duta.’” Sang matapos ang pagpanuga sa duta, “nakita sang Dios ang tanan nga butang nga ginhimo niya kag, yari karon! tama gid ini kaayo.”—Genesis 1:26,31.

Mapahayag bala sang Dios ang masubo nga kahimtangan sang pagkadi-alalangay sa karon nga ‘tama gid kaayo’? Indi gid, kay “ang Dios gugma.” (1 Juan 4:8) Ginpatuhuyan sia nga “wala sing ginapasulabi sa mga tawo” kag “himpit ang iya binuhatan, kay ang tanan niya nga dalanon katarungan. Dios sang katutom, nga wala sing inhustisya; matarong kag matadlong sia.” (Deuteronomio 10:17; 32:4; ipaanggid ang Job 34:19.) Kag si apostol Pedro naghinakop: “Pat-od nga nahantop ko nga ang Dios wala sing ginapasulabi, apang sa tagsa ka pungsod ang tawo nga nagakahadlok sa iya kag nagahimo sing pagkamatarong kalahamut-an sa iya.”—Binuhatan 10:34,35.

Sanglit ang Dios mahigugmaon, wala sing ginapasulabi, may katarungan, matadlong, kag matarong, paano niya natuga ang mga tawo nga may duna nga pagkadi-alalangay kon tuhoy sa ila kinamatarong sa pag-agom sing kalipay? Ang pagpahanugot sa pag-ihig-ihig sa tunga sang mga tawo kag ang pagbutang sa ila sa isa ka sistema sang pagkadi-alalangay isa gid ka maathag nga pagsumpakil sa iya personalidad. Gintuyo niya nga sila tanan ‘mabun-ag nga hilway kag alalangay sing dignidad kag mga kinamatarong.’ Apang, maathag nga indi amo sina ang mga kahimtangan karon. Ngaa man?

Ang Ginhalinan sang Pagkadi-alalangay

Ang pagtuga sang Dios sa mga tawo nga alalangay wala nagakahulugan nga gintuyo niya sila tanan nga mangin magkatupong sa tanan nga bahin. Ayhan nanuhaytuhay ang ila mga kinaadman, mga interes, kag personalidad. Ayhan nanuhaytuhay man ang ila katungdanan ukon awtoridad. Halimbawa, ang lalaki kag ang babayi indi magkatupong sa tanan nga bahin, apang gintuga sang Dios ang babayi “subong komplemento” sang lalaki. (Genesis 2:18) Ang mga ginikanan kag kabataan maathag nga magkatuhay sing awtoridad. Apang, walay sapayan sining mga kinatuhayan, ang tanan—lalaki, babayi, kag kabataan—nagaagom sing alalangay nga mga kahigayunan subong isa ka hatag-Dios nga kinamatarong agod paayawan ang panguna nga mga kinahanglanon para sa kalipay. Sila tanan nagaagom sing alalangay nga dignidad kag tindog sa atubangan sang Dios.

Sing kaanggid, ang espiritu nga mga anak sang Dios, nga gintuga nga una sa mga tawo, ginhatagan sing nanuhaytuhay nga mga katungdanan kag mga responsabilidad. (Genesis 3:24; 16:7-11; Isaias 6:6; Judas 9) Walay sapayan sini, ang tanan nakaagom sing mga aman sang Dios para sa kabuhi kag kalipay sing alalangay sa sulod sang mga dulunan nga ginhatag sa ila. Sa amo ginpabanaag nila ang pagkawalay pinasulabi sang Dios sa makatilingala nga paagi.

Sing makapasubo, wala makontento ang isa ka espiritu nga tinuga sa walay ginapasulabi nga kahimusan sang Dios. Luyag niya ang kapin pa sa ginhatag sang Dios sa iya, naghandum sing mas daku, mas mataas, nga posisyon. Paagi sa pagpalambo sining sayop nga handum, ginhimo niya ang iya kaugalingon nga karibal ni Jehova, nga subong Manunuga may kinamatarong sa posisyon sang bug-os nga pagkasupremo. Ining rebelyuso nga espiritu nga anak sang Dios naghaylo sang ulihi sa mga tawo nga pangayuon sa Dios ang kapin pa sa ginhatag Niya sa ila. (Genesis 3:1-6; ipaanggid ang Isaias 14:12-14.) Busa, ang aman ni Jehova agod maagom sang mga tawo ang kabuhi kag kalipay daw hinali nga nangin di-timbang. Ining espiritu nga rebelde, nga ginpakilala sa Bugna 20:2 subong “Yawa kag Satanas,” nangin malaut nga manugsugyot sang tawhanon nga pagkadi-alalangay.

Magabag-o Pa Ayhan ang Kahimtangan?

Ang sabat sa isa ka tinaga amo ang huo! Apang sin-o ang makapaluntad sang ginahandum nga mga pagbalhin? Ang tawhanon nga mga lider, ang iban walay duhaduha nga sinsero gid, nagtinguha nga himuon ini sa sulod sang madamong siglo. Limitado ang ila kadalag-an, sa amo nagdul-ong sa madamong tawo sa paghinakop nga indi realistiko nga magpaabot nga malubad pa ang problema sang pagkadi-alalangay sa mga tawo. Apang, ang pagtamod sang Dios narekord sa Isaias 55:10,11: “Subong nga nagatupa ang ulan, kag ang nieve, gikan sa langit kag wala nagabalik didto, luwas kon mabasa gid sini ang duta kag nagahimo sini nga magpatubas kag magpanalingsing, kag ang binhi mahatag gid sa manugsab-ug kag ang tinapay sa manugkaon, mangin subong sini ang pulong nga nagaguwa sa akon baba. Indi ini magbalik sa akon nga wala sing resulta, kundi himuon gid sini ang akon nahamut-an, kag magamadinalag-on gid ini sa butang nga ginpadal-an ko sini.”

Makalilipay gid mahibaluan nga ginpahayag ni Jehova nga Dios nga tumanon niya ang iya orihinal nga katuyuan nga hatagan ang tanan nga tawo sing alalangay nga mga kahigayunan sa kabuhi kag kalipay! Subong Dios sang kamatuoran, gin-obligar niya ang iya kaugalingon nga tumanon kon ano ang iya ginsaad. Makalilipay nga may ikasarang kag gahom sia sa paghimo sini. Paano niya ini himuon?

Ang sabat nagasandig sa Ginharian nga gintudlo ni Jesucristo nga ipangamuyo sang tanan niya nga sumulunod: “Amay namon nga yara sa mga langit, . . . Magkari ang imo ginharian. Paghimuon ang imo kabubut-on, kon paano sa langit, subong man sa duta.” (Mateo 6:9,10) Huo, ang Ginharian sang Dios amo ang gamiton ni Jehova agod ‘dugmukon kag papason ini tanan nga ginharian [nga nagaluntad karon], kag magapadayon ini tubtob sa walay katubtuban.’—Daniel 2:44.

Sa idalom sang paggahom sang langitnon nga Ginharian, magaluntad ang bag-ong tawhanon nga katilingban. Nahanungod sini, si apostol Juan nagsulat sa katapusan nga tulun-an sang Biblia, ang Bugna: “Nakita ko ang bag-ong langit kag ang bag-ong duta; kay ang nahaunang langit kag ang nahaunang duta nagtaliwan.” (Bugna 21:1) Wala na ang tanan malaw-ay nga bahin sang pagkadi-alalangay—kaimulon, balatian, pagkaignorante, pag-ihig-ihig, kag iban pa nga mga problema sang tawo.a

Sa sulod sang kapin na sa isa ka siglo, ginapatuhoy sang mga Saksi ni Jehova ang igtalupangod sang mga tawo sa sina nga Ginharian. (Mateo 24:14) Paagi sa naimprinta nga publikasyon kag paagi sa pagbulig sing personal, nagpanikasog sila sa pagbulig sa mga tawo nga matigayon ang ihibalo tuhoy sa katuyuan sang Dios suno sa narekord sa Biblia. Apang, ang ila bug-os kalibutan nga hilikuton sa pagpanudlo wala lamang maghatag sa mga tawo sing paglaum nga mabuhi sing may pag-alalangay kag kalipay sa palaabuton kundi nagdala man sing mga kaayuhan karon mismo sa pagtapna sa salot sang pagkadi-alalangay. Tan-awon naton kon paano.

[Footnote]

[Kapsion sa pahina 5]

Gintuyo sang Dios nga ang tanan nga tawo may alalangay nga mga kahigayunan sa kabuhi kag kalipay