Report sang mga Manugbantala sang Ginharian

Ang mga Saksi Nagkadto sa Publiko sa Pransia

KUTOB sang temprano sang Biernes, Enero 29, 1999, kag padayon sa talipuspusan sang semana, ang mga Saksi ni Jehova sa Pransia mapagsik nga nagpanagtag sa mga kalye kag sang ulihi sa mga balay, sing 12 ka milyon nga kopya sang tract nga natig-uluhan Mga Pumuluyo Sang Pransia, Ginadayaan Kamo! Ngaa may subong sini nga kampanya?

Sa isa ka press conference sa Paris sadtong Biernes sang aga, ginhatag ang rason sang kampanya. Ang isa ka humalambal nga Saksi nagpaathag: “Ang luyag namon himuon karon amo ang pagpakilala sang amon kaugalingon kon ano kami kag pahipuson ang nagapakalain nga mga hambalanon nga ginapalapta tuhoy sa amon. Handa kami magbaton sing pagmulay, apang indi na kami magpamati sa mga kabutigan kag mga komento nga nagaguba sang amon reputasyon.”

Walay sapayan nga ang mga Saksi ni Jehova amo ang ikatlo sa labing daku nga Cristianong relihion sa Pransia, madamo nga Saksi nga kabataan ang ginainsultuhan kag ginagamo sa eskwelahan. Nadulaan sang ila mga trabaho ang mga hamtong kag ginapahog bangod sang ila relihion. Daw indi mapatihan nga bisan ang relihioso nga mga amot nga nabaton nila ginasukot sing 60-porsiento nga buhis. Paano gin-atubang sang kampanya ining pag-ihig-ihig?

Ang tract nagapahayag: “Ang 250,000 ka Saksi ni Jehova kag ang ila mga kaupod nga nagapuyo sa Pransia NAGAPROTESTA batok sa dibunayag nga paagi nga ang ila Cristianong relihion, nga nagaluntad sa Pransia kutob sang 1900, ginlakip sa makatalagam nga mga sekta kutob sang 1995. . . . NAGAPROTESTA batok sa padayon nga paggamo sa ila.” Ginbuyagyag ang butig nga mga panumbungon nga ginapatuto sa mga Saksi sa Pransia kag ang malimbungon nga mga paagi nga gingamit sang mga manugpasipala agod makatuga sing negatibo nga publisidad. Ang tract nagahinakop sa pagsiling: “Sa karon, kapin sa duha ka milyon ka Saksi ni Jehova kag sang ila kaupod ang nagapuyo sa Europa. Ginatahod nila ang kasuguan sang mga Estado diin mga banwahanon sila paagi sa pagsunod sa mga prinsipio sang Ebanghelyo. Mga pumuluyo sang Pransia, amo ini ang mga kamatuoran. Katungdanan namon nga ipresentar ini subong sang kon ano gid ini!”

Gilayon, Positibo nga Reaksion

Minilyon ka tract ang ginpanagtag sa una nga adlaw. Sa Paris lamang, pagkaudto kapin sa 7,000 ka Saksi ang nakapanagtag sing kapin sa 1.3 ka milyon nga tract sa mga kamot sang mga tawo. Namag-o gid ang mga tawo nga makita ang tuman kadamo nga mga Saksi nga nagapanagtag sing mga tract sa mga kalye. Maayo gid ang reaksion sang media, lakip ang pungsudnon kag lokal nga mga pamantalaan kag telebisyon tuhoy sa kampanya. Ang pamantalaan nga Le Progrès de Lyon nagsiling: “Ining ginhimo . . . nagpadayag sing isa ka sayop nga paghangop tuhoy sa isa ka tinaga. Sa nagligad nga napulo ka tuig, ang tinaga nga ‘sekta’ . . . ginhangop nga malain, makatalagam, kag makahalalit. . . . Ang mga Saksi ni Jehova indi makatalagam nga mahimo magpukan sa katilingban.”

Ang mga nakakilala sa mga Saksi ni Jehova nagaapresyar sang ila mahidaiton nga kinaiya kag sang ila daku nga pagtahod sa establisado nga sistema sang katilingban. Sa amo, madamo sa mga kalye ang nagpabutyag sang ila apresasyon kag suporta para sa linibo ka Saksi nga nagpakigbahin sa kampanya. Halos nabaton gilayon ang mga tawag sa telepono, mga fax, kag mga sulat gikan sa mga tawo nga nagapabutyag sang ila pagpasalamat tungod sa tract. Labaw sa tanan, nahatagan sing kahigayunan ang sinsero nga mga tawo nga mabatian ang mga kamatuoran tuhoy sa mga Saksi nga kabaliskaran sa kunokuno kag walay pulos nga mga komento, kag yadtong mga tawo nga ang ila pagtuluuhan ginpakalain nakapahayag sang ila mga balatyagon sa butang nga ila gid ginapakabahandi.