Gamita ang mga Tract sa Pagpalapnag sang Maayong Balita
1. Paano gingamit sang katawhan sang Dios ang mga tract?
1 Madugay na nga ginagamit sang katawhan ni Jehova ang mga tract base sa Biblia sa pagpalapnag sang maayong balita. Sang 1880, si C. T. Russell kag ang iya mga kaupod nagbalhag sang Bible Students’ Tracts, kag ginpanghatag ini sa mga bumalasa sang Watch Tower para ipanagtag sa publiko. Importante gid ang mga tract amo nga sang ginparehistro ni Russell ang legal nga korporasyon sa pagpalapnag sang intereses sang Ginharian sang 1884, ang tinaga nga “tract” ginlakip sa ngalan nga Zion’s Watch Tower Tract Society, karon ginatawag nga Watch Tower Bible and Tract Society of Pennsylvania. Sang 1918, kapin sa 300 ka milyon nga tract ang ginpanagtag sang mga Estudyante sang Biblia. Padayon ini nga nangin epektibo nga galamiton sa pagpanaksi.
2. Ngaa epektibo ang mga tract?
2 Kon Ngaa Epektibo: Matahom ang kolor sang mga tract kag makagalanyat ini. Malip-ot lang ang mensahe sini pero madamo ka sing matun-an. Manamian sa sini ang mga tawo nga natamaran magbasa sing magasin ukon libro. Mahapos lang itanyag ang mga tract, bisan sang mga bag-uhan kag kabataan. Isa pa, mahapos lang ini dal-on.
3. Magsugid sing kaugalingon ukon nabalhag nga eksperiensia nga nagapakita sang balor sang mga tract.
3 Madamo ang nakatuon sang kamatuoran paagi sa tract. Halimbawa, ang isa ka babayi sa Haiti may nakita nga tract sa dalan. Ginpulot niya ini, ginbasa, kag dayon nakasiling sia, “Nasapwan ko ang kamatuoran!” Nagtambong sia gilayon sa Kingdom Hall, nagtuon sa Biblia, kag nabawtismuhan. Ini tanan bangod sa gahom sang Pulong sang Dios paagi sa tract.
4. Ano ang aton tulumuron kon tract ang tanyag sa sina nga bulan?
4 Pagpamalaybalay: Bangod epektibo ang mga tract sa pagpanaksi, amo ini ang aton itanyag sa pila ka bulan sugod sa Nobiembre. Indi lamang kita manghatag sing tract kundi gamiton naton ini sa pagsugod sang paghambalanay. Kon interesado sia sa una nga pag-istoryahanay ukon sa pagduaw liwat, ipakita kon paano tun-an ang Biblia paagi sa libro nga Ginatudlo Sang Biblia ukon iban pa nga publikasyon para sa pagtuon. Paano naton itanyag ang mga tract? Lainlain ang mga tract, gani dapat mangin pamilyar kita sa aton itanyag.
5. Paano naton matanyag ang mga tract sa pagpamalaybalay?
5 Dapat naton ipasibu ang aton presentasyon sa teritoryo kag sa tract nga aton gamiton. Mahimo naton idaho ang tract sa tagbalay. Ayhan manamian sia sa panghapin sini. Puede man naton mapakita ang dala naton nga mga tract kag papilion sia. Kon nagaalang-alang ang tagbalay nga buksan ang puertahan, mahimo naton kaptan ang tract nga makita niya ang panghapin, ukon hambalon sia nga isuok naton ini sa puertahan kag luyag naton pangayuon ang iya opinyon. Kon pamangkot ang tig-ulo sang tract, pangayuon naton ang iya opinyon sa sini. Ukon puede kita maghimo sing pamangkot nga makapainteres sa iya kag makaumpisa sang pag-istoryahanay. Basahon naton dayon ang isa ka bahin sang tract, magdulog sa mga pamangkot kag pangabaya sia kon ano ang iya masiling sa sini. Basaha ang yabi nga mga teksto. Pagkatapos mabinagbinag ang pila ka bahin, tapusa ang paghambalanay kag maghimo sing kahimusan sa pagbalik. Kon kinaandan sa inyo ang pagbilin sing literatura sa mga balay nga wala sing tawo, mahimo kamo magbilin sang tract sa lugar nga indi dali makita sang iban.
6. Paano naton magamit ang mga tract sa pagpanaksi sa dalan?
6 Pagpanaksi sa Dalan: Nagamit mo na bala ang mga tract sa pagpanaksi sa dalan? Nagadali ang pila ka tawo nga nagalabay kag indi nila luyag makig-istorya sa aton. Mabudlay man hibaluon kon interesado gid sila. Gani sa baylo nga hatagan sila sang pinakabag-o nga magasin bisan indi kita sigurado nga basahon nila ini, mas maayo kon hatagan naton sila sang tract. Bangod makagalanyat ang panghapin kag malip-ot lang ang mensahe, mahimo basahon nila ang tract kon may diutay sila nga tion. Siempre pa, kon wala sila nagadali, mahimo naton binagbinagon sa ila ang pila ka bahin sang tract.
7. Isaysay ang mga eksperiensia kon paano gamiton ang mga tract sa di-pormal nga pagpanaksi.
7 Di-pormal nga Pagpanaksi: Mahapos lang manaksi sing di-pormal paagi sa mga tract. Ang isa ka brother nagabutang sang pila ka tract sa iya bulsa kon may kadtuan sia. Kon may maistorya sia, pareho sang tindera, ginahatagan niya ini sang tract. Sang naglagawlagaw sa New York City ang isa ka mag-asawa, nahunahuna nila nga lainlain nga tawo ang ila maistorya. Gani nagdala sila sang Nations nga bukleta kag mga tract sa lainlain nga lenguahe. Dayon, kon may mabatian sila nga nagahambal sing lain nga lenguahe nga nagabaligya sa kilid sang dalan ukon nagapungko malapit sa ila sa parke ukon sa restawran, nagahatag sila sang tract sa kaugalingon sini nga lenguahe.
8. Paano ang tract kaangay sang binhi?
8 “Isab-ug ang Imo Binhi”: Ang tract kaangay sang binhi. Ang mangunguma nagasabwag sang madamo nga binhi bangod wala sia nakahibalo kon diin ang matubo. Ang Manugwali 11:6 nagasiling: “Sa kaagahon isab-ug ang imo binhi, kag sa kahaponon dili pagpunggi ang imo kamut; kay wala ka makahibalo kon diin ang magauswag, kon ini ukon ina, ukon kon sila nga duha mangin-alangay nga maayo.” Gani, padayon naton nga ipalapnag ang ihibalo paagi sa sining epektibo nga galamiton sa pagtudlo.—Hulu. 15:7.
[Blurb sa pahina 3]
Epektibo ang mga tract sa pagpanaksi, gani sugod sa Nobiembre amo ini ang aton itanyag sa pila ka bulan