Aguma ang “Matuod nga Kabuhi”

GINHATAGAN ni Jehova nga Dios ang tawo sing paghangop tuhoy sa walay katubtuban. (Manugwali 3:11) Bangod sini, ang mga tawo nagabatyag nga wala sing mahimo sa atubangan sang kamatayon apang, sa amo man nga tion, nagahandum pirme nga mabuhi.

Ginahatagan kita sing daku nga paglaum sang Balaan nga Biblia, ang inspirado nga Pulong sang Dios. (2 Timoteo 3:16) Wala ginhimo ni Jehova, nga bugana sa gugma, ang tawo nga may ikasarang sa paghangop sang ideya sang walay katubtuban kag dayon tagudilian sia nga magkabuhi sing pila lamang ka tuig. Supak gid sa personalidad sang Dios nga tugahon kita nga ginapabudlayan sang aton kahimtangan. Wala kita gintuga nga subong sang “wala sing pangatarungan nga mga sapat nga natawo sing kinaugali agod dakpon kag patyon.”—2 Pedro 2:12.

Sang gintuga sanday Adan kag Eva nga may duna nga igbalatyag sang walay katubtuban, ginhimo ni Jehova nga Dios ang isa ka butang nga “tama gid kaayo”; ginhimo niya sila nga may posibilidad nga mabuhi sing dayon. (Genesis 1:31) Apang sing makapasubo, gingamit sing sayop sang nahaunang mag-asawa ang ila hilway nga pagbuot, ginlapas ang maathag nga pagdumili sang Manunuga kag gindula ang ila orihinal nga pagkahimpit. Subong resulta, napatay sila, kag ginliton nila sa ila mga kaliwatan ang di-kahimpitan kag kamatayon.—Genesis 2:17; 3:1-24; Roma 5:12.

Wala ginabilin sang Biblia nga isa ka misteryo ang katuyuan sang kabuhi kag ang kahulugan sang kamatayon. Ginasiling sini nga sa kamatayon “walay buluhaton ukon pahito ukon ihibalo ukon kaalam” kag “wala [ang mga patay] makahibalo sing bisan ano.” (Manugwali 9:5,10) Sa iban nga hambal, ang mga patay mga patay. Ang doktrina tuhoy sa pagkadimamalatyon sang kalag indi Biblikanhon, gani wala sing mabudlay hangpon nga misteryo nga dapat lubaron tuhoy sa kahimtangan sang mga patay.—Genesis 3:19; Salmo 146:4; Manugwali 3:19, 20; Ezequiel 18:4.a

Ang Dios may katuyuan; wala niya gintuga ang duta “nga wala sing pulos.” Ginhimo niya ini “agod puy-an” sang himpit nga mga tawo sa paraiso nga mga kahimtangan, kag wala ginbag-o sang Dios ang iya katuyuan. (Isaias 45:18; Malaquias 3:6) Agod matuman ini, ginpadala niya ang iya Anak sa duta. Paagi sa pagpabilin nga matutom tubtob sa kamatayon, gin-aman ni Jesucristo ang paagi agod matubos ang katawhan gikan sa sala kag kamatayon. Sa katunayan, si Jesus nagsiling: “Ginhigugma gid sang Dios ang kalibutan sa bagay nga ginhatag niya ang iya bugtong nga Anak, agod nga ang bisan sin-o nga magtuo sa iya indi mawala kundi may kabuhi nga walay katapusan.”—Juan 3:16.

Sang madugay na, nagsaad ang Dios nga himuon niya ang “bag-ong mga langit kag bag-ong duta.” (Isaias 65:17; 2 Pedro 3:13) Magadalahig ini sing pagpili niya sing isa ka limitado nga grupo sang matutom nga mga Cristiano para magkabuhi sa langit. Upod kay Jesucristo, sila ang magahuman sang sentro sang panguluhan. Ginatawag ini sang Biblia subong “ang ginharian sang mga langit,” ukon “ang ginharian sang Dios,” nga magadumala sang “mga butang sa duta.” (Mateo 4:17; 12:28; Efeso 1:10; Bugna 5:9,10; 14:1,3) Pagkatapos laglagon ang tanan nga pagkadidiosnon sa aton kalibutan kag paputlion ini, paluntaron sang Dios ang isa ka matarong nga bag-ong tawhanon nga katilingban, ukon “bag-ong duta.” Magalakip ini sa mga tawo nga amligan sang Dios sa nagahilapit nga kalaglagan sining malauton nga sistema sang mga butang. (Mateo 24:3,7-14, 21; Bugna 7:9,13, 14) Buylugan sila sang mga banhawon pa kabuhi paagi sa ginsaad nga pagkabanhaw.—Juan 5:28,29; Binuhatan 24:15.

Dayon ang “Matuod nga Kabuhi”

Bilang pagpalig-on sa makakulunyag nga paglaragway sang kabuhi sa palaabuton nga Paraiso nga duta, ang Dios nagsiling: “Yari karon! Ginahimo ko nga bag-o ang tanan nga butang.” (Bugna 21:5) Imposible mahangpan sing bug-os sang tawhanon nga hunahuna ang makatilingala nga mga butang nga himuon sang Dios para sa katawhan. Ang Dios magatuga sing bug-os kalibutan nga paraiso, kaangay sang Eden. (Lucas 23:43) Subong sa Eden, ang matahom kag makalilipay nga duag, tunog, kag sabor mangin bugana. Ang kaimulon kag kakulang sing pagkaon wala na, kay nahanungod sina nga tion ang Biblia nagasiling: “Ang nahaunang mga butang nagtaliwan.” (Bugna 21:4; Salmo 72:16) Wala na sing bisan sin-o nga magasiling, “Nagamasakit ako,” kay ang balatian dulaon sing dayon. (Isaias 33:24) Huo, ang tanan nga kabangdanan sang kasakit madula, lakip ang madugay na nga kaaway sang katawhan, ang kamatayon. (1 Corinto 15:26) Sa isa ka makahayanghag nga palanan-awon tuhoy sa “bag-ong duta,” ang bag-ong tawhanon nga katilingban sa idalom sang pagginahom ni Cristo, si apostol Juan nakabati sing isa ka tingog nga nagasiling: “Pahiran [sang Dios] ang tagsa ka luha sa mga mata nila, kag wala na sing kamatayon, ukon kalisod ukon paghibi ukon kasakit pa.” Ano pa ang makahatag sing daku pa nga kalipay kag kasadya sangsa katumanan sining saad sang Dios?

Sa paglaragway sang palaabuton nga kabuhi, ginapadaku sang Biblia ilabi na ang mga kahimtangan nga magabusog sa moral kag espirituwal nga mga handum sang tawo. Ang tanan matarong nga mga handum nga tungod sini ang mga tawo nagpanikasog sing walay pulos tubtob karon matigayon sing bug-os. (Mateo 6:10) Lakip sa sini amo ang handum para sa katarungan, nga wala gihapon matuman bangod ang tawo masunson nga ginapaantos sang mapintas nga mga manugpigos nga nagapigos sa mga maluya. (Manugwali 8:9) Ang salmista matagnaon nga nagsulat tuhoy sa mga kahimtangan sa idalom sang pagginahom ni Cristo: “Sa iya mga adlaw magalambo ang matarong, kag ang paghidait bugana.”—Salmo 72:7, The New Jerusalem Bible.

Ang pag-alalangay isa pa ka handum nga tungod sini madamo ang nagahimo sing mga sakripisyo. Sa “pagtuga liwat,” dulaon sang Dios ang diskriminasyon. (Mateo 19:28) Ang tanan magaagom sing palareho nga dignidad. Indi ini pag-alalangay nga ginapatuman sang mapintas nga rehimen sang gobierno. Sa kabaliskaran, ang mga ginatunaan sang diskriminasyon pagadulaon, lakip na ang kakagod kag bugal nga nagadul-ong sa tawo nga tinguhaan nga gamhan ang iban ukon magtipon sing madamo nga pagkabutang. Si Isaias nagtagna: “Magapatindog sila sing mga balay kag puy-an ini; kag magatanom gid sila sing mga ulubasan kag magakaon sang ila bunga. Indi sila magapatindog kag iban ang magapuyo; indi sila magatanom kag iban ang magakaon.”—Isaias 65:21,22.

Daku gid ang gin-antos sang tawo bangod sang pagpatulo sing dugo sa personal kag grupo nga pagpakig-away! Nagpadayon ini sugod sang ginpatay si Abel tubtob sa mga inaway karon. Madugay na kaayo nga ginalauman kag ginahulat sang mga tawo, nga daw walay kadalag-an, ang pagluntad sang paghidait! Sa ipasag-uli nga Paraiso, ang tanan nga tawo mangin mahidaiton kag mahagop; “magakalipay sila sa kabuganaan sang paghidait.”—Salmo 37:11.

Ang Isaias 11:9 nagasiling: “Ang duta pat-od gid nga matugob sang ihibalo ni Jehova subong nga ang mga tubig nagatabon sang dagat.” Bangod sang napanubli nga di-kahimpitan, lakip sa iban pa nga butang, imposible naton mahangpan sing bug-os ang kasangkaron sina nga mga pulong. Kon paano kita ihiusa sang himpit nga ihibalo sang Dios sa iya kag kon paano ina magaresulta sa bug-os nga kalipay, hibaluon pa naton. Apang sanglit ginasugiran kita sang Kasulatan nga si Jehova isa ka Dios nga makatilingala sa gahom, kaalam, katarungan, kag gugma, makasiguro kita nga pamatian niya ang tanan nga pangamuyo nga ginpabutyag sang mga pumuluyo sang “bag-ong duta.”

Ang “Matuod nga Kabuhi” Sigurado—Hangpa Ini!

Para sa madamo, ang kabuhi nga dayon sa mas maayo nga kalibutan isa lamang ka damgo ukon ilusyon. Apang, para sa mga nagatuo gid sa saad sang Biblia, ini nga paglaum sigurado. Kaangay ini sang isa ka angkla para sa ila kabuhi. (Hebreo 6:19) Subong nga ginahuptan sang angkla ang isa ka barko nga malig-on kag ginapunggan ini nga magsadsad, ang paglaum nga kabuhi nga dayon nagapalig-on kag nagapasalig sa mga tawo kag nagabulig sa ila nga maatubang ang daku nga kabudlayan sa kabuhi kag malandas pa ini.

Makasiguro kita nga tumanon sang Dios ang iya mga saad. Naghatag pa gani sia sing garantiya paagi sa pagbungat sing isa ka sumpa, sing isa ka di-mabawi nga saad. Si apostol Pablo nagsulat: “Ang Dios, sang tuyo niya nga ipakita sing bugana pa sa mga manunubli sang saad ang pagkadimabalhinon sang iya laygay, nagsulod nga may sumpa, agod nga, paagi sa duha ka butang nga dimabalhinon nga sa sini imposible nga magbutig ang Dios, kita . . . may mabaskog nga pagpalig-on nga manguyapot sa paglaum nga ginpahamtang sa atubangan naton.” (Hebreo 6:17,18) Ang “duha ka butang nga dimabalhinon” nga indi gid madula sang Dios amo ang iya saad kag ang iya sumpa, nga sa sini ginapasad naton ang aton mga ginalauman.

Ang pagtuo sa mga saad sang Dios nagahatag sing daku nga lugpay kag espirituwal nga kusog. Si Josue, nga lider sang katawhan sang Israel, may amo sini nga pagtuo. Sang ginhatag ni Josue ang iya nagapaalam nga pamulongpulong sa mga Israelinhon, tigulang na sia kag nahibaluan niya nga malapit na sia mapatay. Apang, nagpabutyag sia sing kusog kag di-mabugto nga pagkamainunungon, nga naghalin sa bug-os nga pagsalig sa mga saad sang Dios. Pagkatapos niya mahambal nga malakat sia “sa dalanon sang bug-os nga duta,” ang banas nga nagadul-ong sang tanan nga katawhan sa kamatayon, si Josue nagsiling: “Nakahibalo gid kamo sa bug-os ninyo nga tagipusuon kag sa bug-os ninyo nga kalag nga wala sing isa ka tinaga sa tanan nga maayong tinaga nga ginpamulong ni Jehova nga inyo Dios sa inyo ang napaslawan. Ang tanan natuman sa inyo. Wala sing isa ka tinaga sini ang napaslawan.” Huo, makatlo nga ginsulit ni Josue nga pirme ginatuman sang Dios ang tanan niya nga saad.—Josue 23:14.

Mahimo man nimo matigayon ang amo man nga pagtuo sa ginsaad sang Dios nga bag-ong kalibutan nga tukuron sa dili madugay. Paagi sa hanuot nga pagtuon sa Biblia, mahangpan mo kon sin-o si Jehova kag kon ngaa takus sia sang imo bug-os nga pagsalig. (Bugna 4:11) Sanday Abraham, Sara, Isaac, Jacob, kag iban pa nga mga matutom sang una may di-mationg nga pagtuo, pasad sa ila suod nga ihibalo tuhoy sa matuod nga Dios, si Jehova. Nagpabilin sila nga mabakod sa paglaum, walay sapayan sang katunayan nga “wala nila matigayon ang katumanan sang mga saad” samtang nagakabuhi pa sila. Apang, “nakita nila ini gikan sa malayo kag gin-abiabi ini.”—Hebreo 11:13.

Nahangpan ang mga tagna sang Biblia, makita naton karon ang pagpalapit sang “dakung adlaw sang Dios nga Labing Gamhanan,” nga sa sina nga tion ang duta tinluan sang tanan nga kalautan. (Bugna 16:14,16) Kaangay sang matutom nga mga tawo sang una, dapat kita magpabilin nga masinaligon nga nagahulat sa palaabuton nga mga hitabo, ginapahulag sang pagtuo subong man sang gugma sa Dios kag sa “matuod nga kabuhi.” Ang pagkalapit sang bag-ong kalibutan nagapapagsik gid sa mga nagapakita sing pagtuo kay Jehova kag sa mga nagahigugma sa iya. Ining pagtuo kag gugma dapat palambuon agod matigayon ang kahamuot kag pangamlig sang Dios sa iya dakung adlaw, nga malapit na.—Sofonias 2:3; 2 Tesalonica 1:3; Hebreo 10:37-39.

Gani, luyag mo bala ang kabuhi? Kag labi pa bala nga ginahandum mo ang “matuod nga kabuhi”—ang kabuhi subong isa ka nahamut-an nga alagad sang Dios, nga may paglaum nga isa ka makalilipay nga palaabuton, huo, nga ginatan-aw ang kabuhi nga dayon? Kon amo sina ang ginapangita mo, pamatii ang laygay ni apostol Pablo, nga nagsulat nga dapat naton ‘ibutang ang paglaum, indi sa dimasaligan nga mga manggad, kundi sa Dios.’ Si Pablo nagpadayon: “Magmanggaranon sa maayong mga buhat,” nga nagapadungog sa Dios, agod ‘makapanguyapot sing hugot sa matuod nga kabuhi.’—1 Timoteo 6:17-19.

Paagi sa pagbaton sa tanyag nga isa ka pagtuon sa Biblia upod sa mga Saksi ni Jehova, matigayon mo ang ihibalo nga “nagakahulugan sing kabuhi nga walay katapusan.” (Juan 17:3) Sing mahigugmaon, ginarekord sang Biblia ining amaynon nga imbitasyon sa tanan: “Anak ko, dili pagkalimti ang akon kasuguan, kag tumanon sang imo tagipusuon ang akon mga sugo, bangod ang kalawigon sang mga adlaw kag katuigan sang kabuhi kag paghidait idugang sa imo.”—Hulubaton 3:1, 2.

[Footnote]