Mabudlay Gid Bala ang Ginapatuman ni Jehova sa Aton?
“Ano bala ang ginapatuman ni Jehova sa imo kundi ang paghimo sing pagkamatarong kag ang paghigugma sang kaayo kag ang paglakat sing maugdang upod sa imo Dios?”—MIQUEAS 6:8.
1. Ano ang mahimo nga rason kon ngaa ang iban wala nagaalagad kay Jehova?
SI Jehova may ginapatuman sa iya katawhan. Apang pagkatapos mabasa ang pinamulong sa ibabaw subong nga ginbalikwat gikan sa tagna ni Miqueas, mahimo kamo maghinakop nga ang mga ginapatuman sang Dios makatarunganon. Walay sapayan sina, madamo ang wala nagaalagad sa aton Dakung Manunuga, kag ang iban nga nagaalagad anay sa iya nag-untat na sa pag-alagad sa iya. Ngaa? Bangod nagahunahuna sila nga mabudlay gid ang ginapatuman sang Dios sa aton. Mabudlay gid bala? Ukon mahimo bala nga may problema sa panimuot sang isa ka tawo tuhoy sa kon ano ang ginapatuman ni Jehova? Ang isa ka maragtason nga rekord nagahatag sing paghangop sa sini nga butang.
2. Sin-o si Naaman, kag ano ang ginsugo sa iya sang manalagna ni Jehova?
2 Ang pinuno sang militar sang Siria nga si Naaman nagmasakit sing aro, apang ginlaygayan sia nga may isa ka manalagna si Jehova sa Israel nga makapaayo sa iya. Gani si Naaman kag ang iya kaupdanan naglakbay pakadto sa Israel kag nag-abot sang ulihi sa puluy-an sang manalagna sang Dios nga si Eliseo. Sa baylo nga magbiya sa iya balay agod sug-alawon ang iya kilala nga bisita, ginpadala ni Eliseo ang isa ka alagad sa pagsiling kay Naaman: “Magpaligo ka sing makapito sa Jordan agod ang imo unod mauli sa imo; kag mangin matinlo.”—2 Hari 5:10.
3. Ngaa nangindi sang primero si Naaman sa pagtuman sang sugo ni Jehova?
3 Kon tumanon ni Naaman ang sugo sang manalagna sang Dios, magaayo ang iya makangilil-ad nga balatian. Gani, mabudlay gid bala ang ginapatuman ni Jehova sa iya? Indi gid. Apang, indi luyag ni Naaman nga tumanon ang sugo ni Jehova. “Indi bala ang Abana kag ang Farfar, nga mga suba sang Damasco, maayo pa sangsa tanan nga tubig sang Israel?” pamatok niya. “Indi bala ako makapaligo sa sini kag mangin matinlo?” Gani, naglakat si Naaman sa kaalipungot.—2 Hari 5:12.
4, 5. (a) Ano ang padya tungod sa pagkamatinumanon ni Naaman, kag ano ang reaksion niya sang mabaton niya ini? (b) Ano ang aton binagbinagon karon?
4 Ano gid bala ang problema ni Naaman? Ang sugo indi tuman kabudlay sundon. Ang mga alagad ni Naaman mataktikanhon nga nagsiling: “Kon isa ka daku nga butang ang ginasiling sang manalagna sa imo, indi mo bala ini paghimuon? Kon amo, ano pa ayhan kay nagsiling sia sa imo, ‘Maligo ka kag mangin matinlo’?” (2 Hari 5:13) Ang panimuot ni Naaman ang problema. Naghunahuna sia nga wala sia ginpakitaan sing dignidad nga nagakabagay sa iya kag ginpahimo sa iya ang isa ka butang nga ginakabig niya nga walay pulos kag makahuluya. Apang, namati si Naaman sa mataktikanhon nga laygay sang iya mga alagad kag naglumoy sa Suba Jordan sing makapito. Handurawa ang iya kalipay sang ang “iya unod nag-uli kaangay sa unod sang diutay nga bata kag nangin matinlo sia”! Daku gid ang iya pagpasalamat. Dugang pa, si Naaman nagsiling nga sugod sadto, indi na sia magasimba sa iban nga dios kundi kay Jehova lamang.—2 Hari 5:14-17.
5 Sa bug-os nga maragtas sang tawo, ginsugo ni Jehova ang mga tawo nga sundon ang lainlain nga mga regulasyon. Ginaagda namon kamo nga binagbinagon ang pila sini. Samtang ginabinagbinag ninyo ini, pamangkuta ang inyo kaugalingon kon ano ang mangin reaksion ninyo kon ginsugo ni Jehova nga himuon ninyo ini nga mga butang. Pagkatapos sini, usisaon naton kon ano ang ginapatuman ni Jehova sa aton sa karon.
Kon Ano ang Ginpatuman ni Jehova Sang Nagligad
6. Ano ang ginsugo sa unang mag-asawa, kag ano ang mangin reaksion ninyo sa subong sini nga mga instruksion?
6 Ginsugo ni Jehova ang unang mag-asawa, sanday Adan kag Eva, nga padakuon ang kabataan, gamhan ang duta, kag sakupon ang kasapatan. Ginpakamaayo man ang mag-asawa nga makatigayon sing malapad tulad-parke nga puluy-an. (Genesis 1:27, 28; 2:9-15) Apang may isa ka pagdumili. Indi nila pagkaunon ang isa ka kahoy, ang isa sa tunga sang madamong hamungang-kahoy sa hardin sang Eden. (Genesis 2:16, 17) Indi yadto mabudlay tumanon, indi bala? Indi bala kamo malipay sa pagtuman sadto nga sugo, upod ang paglaum nga magkabuhi sing dayon nga may himpit nga panglawas? Bisan pa may manunulay sa hardin, indi bala ninyo pagsikwayon ang iya argumento? Kag indi bala kamo magaugyon nga may kinamatarong si Jehova nga ipatuman ang isa ka simple nga pagdumili?—Genesis 3:1-5.
7. (a) Ano nga hilikuton ang ginsugo kay Noe, kag anong pagpamatok ang naeksperiensiahan niya? (b) Paano ninyo tamdon ang ginpatuman ni Jehova kay Noe?
7 Sang ulihi, ginsugo ni Jehova si Noe sa pagtukod sing arka subong isa ka paagi nga makalampuwas sa tugob-globo nga anaw. Bangod sang kadakuon sang arka, ang trabaho indi mahapos kag ayhan ginhimo sa atubangan sang daku nga pag-uligyat kag pagpamatok. Apang, daw ano gid nga pribilehiyo para kay Noe nga luwason ang iya panimalay, kag ang madamo man nga kasapatan! (Genesis 6:1-8, 14-16; Hebreo 11:7; 2 Pedro 2:5) Kon suguon kamo sing amo sini, magapangabudlay bala kamo sing lakas nga tumanon ini? Ukon magahinakop bala kamo nga mabudlay gid ang ginapatuman ni Jehova sa inyo?
8. Ano ang ginsugo kay Abraham, kag ano ang ginlaragway subong resulta sang iya pagtuman?
8 Ginsugo sang Dios si Abraham sa paghimo sing butang nga tuman gid kabudlay, nagasiling sa iya: “Kuhaa, palihug, ang imo anak, ang imo bugtong nga anak nga ginahigugma mo gid, si Isaac, kag kadto ka sa duta sang Moria kag ihalad mo sia didto subong halad-nga-sinunog.” (Genesis 22:2) Sanglit nanaad anay si Jehova nga ang wala pa sing anak sadto nga si Isaac magapanganak, ang pagtuo ni Abraham sa ikasarang sang Dios nga ipasag-uli ang kabuhi ni Isaac gintilawan. Sang ihalad na kuntani ni Abraham si Isaac, ginluwas sang Dios ang pamatan-on. Ginlaragway sini nga hitabo nga ihalad sang Dios ang iya mismo Anak para sa katawhan kag sa ulihi banhawon sia. —Genesis 17:19; 22:9-18; Juan 3:16; Binuhatan 2:23, 24, 29-32; Hebreo 11:17-19.
9. Ngaa indi gid mabudlay ang ginpatuman ni Jehova kay Abraham?
9 Ang iban mahimo maghunahuna nga mabudlay gid ang ginpatuman ni Jehova nga Dios kay Abraham. Apang mabudlay gid bala? Indi gid bala mahigugmaon para sa aton Manunuga, nga makabanhaw sang minatay, nga suguon kita nga magmatinumanon sa iya bisan pa nga magaresulta ini sa pagtulog naton sing umalagi sa kamatayon? Wala maghunahuna sing amo sina si Jesucristo kag ang iya una nga mga sumulunod. Handa sila sa pag-antos sing pisikal nga kabudlayan, bisan sing kamatayon mismo, agod mahimo ang kabubut-on sang Dios. (Juan 10:11, 17, 18; Binuhatan 5:40-42; 21:13) Kon ginakinahanglan ini sang mga kahimtangan, handa bala kamo nga himuon man ini? Binagbinaga ang pila ka butang nga ginpatuman ni Jehova sa mga nagpasugot nga mangin katawhan niya.
Ang Kasuguan ni Jehova sa Israel
10. Sin-o ang nagsaad nga himuon ang tanan nga ginsugo ni Jehova, kag ano ang ginhatag niya sa ila?
10 Ang mga kaliwatan ni Abraham paagi sa iya anak nga si Isaac kag sa iya apo nga si Jacob, ukon si Israel, nag-uswag nga mangin pungsod sang Israel. Ginluwas ni Jehova ang mga Israelinhon gikan sa pagkaulipon sa Egipto. (Genesis 32:28; 46:1-3; 2 Samuel 7:23, 24) Wala madugay pagkatapos sadto, nagsaad sila nga himuon ang bisan ano man nga ginsugo sang Dios sa ila. Nagsiling sila: “Ang tanan nga pinamulong ni Jehova himuon namon.” (Exodo 19:8) Suno sa handum sang mga Israelinhon nga gamhan niya sila, ginhatagan ni Jehova ang pungsod sing kapin sa 600 ka kasuguan, lakip na ang Napulo ka Sugo. Sang ulihi, ining mga kasuguan sang Dios, nga ginhatag paagi kay Moises, nakilal-an na lamang nga Kasuguan.—Esdras 7:6; Lucas 10:25-27; Juan 1:17.
11. Ano ang isa ka katuyuan sang Kasuguan, kag ano ang pila ka regulasyon nga magatuman sini?
11 Ang isa ka katuyuan sang Kasuguan amo ang pag-amlig sa mga Israelinhon paagi sa pag-aman sing mapuslanon nga mga regulasyon may kaangtanan sa mga butang subong sang seksuwal nga moralidad, mga transaksion sa negosyo, kag pag-atipan sa bata. (Exodo 20:14; Levitico 18:6-18, 22-24; 19:35, 36; Deuteronomio 6:6-9) Gin-aman ang mga pagsulundan kon paano tamdon ang mga isigkatawo subong man ang ila mga kasapatan. (Levitico 19:18; Deuteronomio 22:4,10) Ang mga tulumanon may kaangtanan sa tuigan nga mga kapiestahan kag pagtipon sing tingob para sa pagsimba nakabulig agod maamligan ang katawhan sa espirituwal.—Levitico 23:1-43; Deuteronomio 31:10-13.
12. Ano ang panguna nga katuyuan sang Kasuguan?
12 Ang panguna nga katuyuan sang Kasuguan ginpatalupangod ni apostol Pablo, nga nagsulat: “Gindugang ini agod ang mga paglapas mapadayag, tubtob nga mag-abot ang binhi [si Cristo] nga sa iya ginhimo ang saad.” (Galacia 3:19) Ang Kasuguan nagpahanumdom sa mga Israelinhon nga sila mga di-himpit. Makatarunganon, kon amo, nga nagkinahanglan sila sing isa ka himpit nga halad nga magadula sing bug-os sang ila mga sala. (Hebreo 10:1-4) Gani ang Kasuguan gintuyo agod ihanda ang mga tawo nga batunon si Jesus, nga amo ang Mesias, ukon Cristo. Si Pablo nagsulat: “Ang Kasuguan nangin manunudlo naton nga nagatuytoy kay Cristo, agod mapahayag kita nga matarong bangod sa pagtuo.”—Galacia 3:24.
Mabug-at Bala ang Kasuguan ni Jehova?
13. (a) Paano gintamod sang di-himpit nga mga tawo ang Kasuguan, kag ngaa? (b) Mabug-at gid bala ang Kasuguan?
13 Bisan nga ang Kasuguan “balaan kag matarong kag maayo,” gintamod ini sang madamo nga mabug-at. (Roma 7:12) Bangod ang Kasuguan himpit, indi matuman sang mga Israelinhon ang mataas nga talaksan sini. (Salmo 19:7) Amo sina kon ngaa gintawag ini ni apostol Pedro nga ang “gota nga bisan ang aton mga katigulangan ukon kita indi makasarang sa pagdala.” (Binuhatan 15:10) Sa pagkamatuod, ang Kasuguan mismo indi mabug-at, kag ang pagtuman sa sini nagbulig sa katawhan.
14. Ano ang pila ka halimbawa nga nagapakita nga ang Kasuguan may mapuslanon gid nga katuyuan para sa mga Israelinhon?
14 Sa idalom sang Kasuguan, halimbawa, ang makawat wala ginabilanggo kundi dapat mangabudlay agod bayaran sing pilo ukon kapin pa ang iya ginkawat. Sa amo, ang biktima wala sing kadulaan, ukon ang mapisan nga katawhan wala ginapabug-atan paagi sa pagsuporta sa sistema sang bilangguan. (Exodo 22:1, 3, 4,7) Ang makahalalit nga mga pagkaon ginadumili. Ang karne sang baboy, kon indi maluto sing maayo, makahatag sing trichinosis, kag ang koneho makahatag sing tularemia. (Levitico 11:4-12) Sing kaanggid, ang Kasuguan isa ka pangamlig paagi sa pagdumili sang pagtandog sa mga bangkay. Kon ang isa ka tawo makatandog sing bangkay, dapat niya tinluan ang iya kaugalingon subong man ang iya mga panapton. (Levitico 11:31-36; Numeros 19:11-22) Ang higko sang tawo dapat ilubong, nagaamlig sa mga tawo batok sa paglapta sang kagaw, nga ang pagluntad sini natukiban lamang sang mga sientipiko sining ulihi nga mga siglo.—Deuteronomio 23:13.
15. Ano ang napamatud-an nga mabug-at sa mga Israelinhon?
15 Indi gid mabudlay ang ginapatuman sang Kasuguan sa mga tawo. Apang indi amo sini ang masiling tuhoy sa mga tawo nga nagaangkon sang papel sang mga manugpatpat sang Kasuguan. Nahanungod sa mga pagsulundan nga ila ginapatuman, ang A Dictionary of the Bible, nga gin-edit ni James Hastings, nagsiling: “Ang tanan nga sugo sa Biblia ginpalibutan sang isa ka sistema sang indi tanto ka importante nga mga regulasyon. . . . Busa, ginpanikasugan nga ang tanan mahunahuna nga kahimtangan malakip sa Kasuguan, kag upod ang wala kaluoy nga pangatarungan ang bug-os nga paggawi sang tawo makontrol sang estrikto nga pagsulundan. . . . Ang tingog sang konsiensia ginpunggan; ang buhi nga gahom sang pulong sang Dios ginbale-wala kag gintabunan sang madamong naguwa nga mga pagsulundan.”
16. Ano ang ginsiling ni Jesus tuhoy sa mabug-at nga mga pagsulundan kag mga tradisyon sang mga lider sang relihion?
16 Ginpakamalaut ni Jesucristo ang relihiosong mga lider nga nagpatuman sing madamong pagsulundan, nga nagasiling: “Nagabugkos sila sing mga lulan nga mabug-at kag ginabutang ini sa mga abaga sang mga tawo, apang indi nila luyag tandugon ini sang ila tudlo.” (Mateo 23:2,4) Ginpakita niya nga ang ila mabug-at nga hinimo-sang-tawo nga mga pagsulundan kag mga tradisyon, lakip na ang masibod nga mga pagpaninlo, naghimo sang “pulong sang Dios nga walay pulos.” (Marcos 7:1-13; Mateo 23:13, 24-26) Apang, bisan sang wala pa si Jesus sa duta, sayop na ang paghangop sang relihiosong mga lider sa Israel sa kon ano gid ang ginapatuman ni Jehova.
Kon Ano Gid ang Ginapatuman ni Jehova
17. Ngaa wala mahamuot si Jehova sa mga halad-nga-sinunog sang di-matutom nga mga Israelinhon?
17 Paagi kay manalagna Isaias, si Jehova nagsiling: “Tuman na sa akon ang bug-os nga mga halad-nga-sinunog nga mga karnero nga lalaki kag ang sapay sang mga sapat nga pinatambok; kag sa dugo sang tinday nga mga baka nga lalaki kag sang mga karnero nga lalaki kag sang mga kanding nga lalaki wala ako nagakalipay.” (Isaias 1:10, 11) Ngaa wala mahamuot ang Dios sa mga dulot nga ginpatuman niya mismo sa Kasuguan? (Levitico 1:1–4:35) Bangod wala sing pagtahod sa iya ang katawhan. Gani, ginlaygayan sila: “Panghugas kamo; paninlo kamo; kuhaa ang kalainan sang inyo mga buhat gikan sa atubangan sang akon mga mata; mag-untat sa paghimo sing malain. Magtuon sa paghimo sing maayo; pangitaa ang katarungan; tadlunga ang manugpigos; maghukom pabor sa ilo nga bata nga lalaki; apini ang balo nga babayi.” (Isaias 1:16, 17) Wala bala ini nagabulig sa aton nga mahangpan kon ano ang ginapatuman ni Jehova sa iya mga alagad?
18. Ano gid bala ang ginpatuman ni Jehova sa mga Israelinhon?
18 Ginpakita ni Jesus kon ano gid ang ginapatuman sang Dios. Ginhimo niya ini sang ginpamangkot sia, “Ano ang labing daku nga sugo sa Kasuguan?” Si Jesus nagsabat: “‘Higugmaa si Jehova nga imo Dios sa bug-os mo nga tagipusuon kag sa bug-os mo nga kalag kag sa bug-os mo nga hunahuna.’ Amo ini ang labing daku kag nahauna nga sugo. Ang ikaduha, kaangay sini, amo ini, ‘Higugmaa ang imo isigkatawo subong sang imo kaugalingon.’ Sa sining duha ka sugo nasandig ang bug-os nga Kasuguan, kag ang mga Manalagna.” (Mateo 22:36-40; Levitico 19:18; Deuteronomio 6:4-6) Amo man sini ang ginpakita ni manalagna Moises sang namangkot sia: “Ano bala ang ginapatuman sa imo ni Jehova nga imo Dios kundi ang magkahadlok kay Jehova nga imo Dios, agod maglakat sa tanan niya nga dalanon kag agod higugmaon sia kag agod alagaron si Jehova nga imo Dios sa bug-os mo nga tagipusuon kag sa bug-os mo nga kalag; agod sundon ang mga sugo ni Jehova kag ang iya mga palatukuran?”—Deuteronomio 10:12, 13; 15:7,8.
19. Paano nagtinguha ang mga Israelinhon nga daw balaan tan-awon, apang ano ang ginsiling ni Jehova sa ila?
19 Walay sapayan sang ila kasal-anan, luyag sang mga Israelinhon nga mangin balaan tan-awon. Bisan nga ginpatuman sang Kasuguan ang pagpuasa lamang sa tuigan nga Adlaw sang Katumbasan, nagpuasa sila sing masunson. (Levitico 16:30, 31) Apang ginsabdong sila ni Jehova, nga nagasiling: “Indi bala amo ini ang puasa nga ginpili ko? Ang paghubad sang mga gapos sang pagkamalaut, ang pagpalos sang mga higot sang gota, kag ang pagbuhi sang mga ginpigos, kag nga balion ninyo ang tagsa ka gota? Indi bala ini ang pagpaambit sang imo tinapay sa isa nga nagutom, kag nga dalhon mo sa imo balay ang mga nasit-an, wala sing puluy-an nga mga tawo? Nga, kon may makita ka nga hubo, panaptan mo sia, kag dili ka magpanago gikan sa imo kaugalingon nga unod?”—Isaias 58:3-7.
20. Tungod sa ano nga ginsabdong ni Jesus ang relihiosong mga salimpapaw?
20 Ang mga nagapakamatarong-sa-kaugalingon nga mga Israelinhon may problema nga kaanggid sa iya sang relihiosong mga salimpapaw nga ginsilingan ni Jesus: “Nagahatag kamo sang ikapulo sang hierbabuena kag sang anis kag sang comino, apang ginsikway ninyo ang mas mabug-at nga mga butang sang Kasuguan, nga amo, ang katarungan kag ang kaluoy kag ang katutom. Ining mga butang dapat ninyo kuntani buhaton, apang indi pagsikwayon ang iban nga mga butang.” (Mateo 23:23; Levitico 27:30) Wala bala kita ginabuligan sang mga pulong ni Jesus nga mahangpan kon ano gid ang ginapatuman ni Jehova sa aton?
21. Paano ginsumaryo ni manalagna Miqueas kon ano ang ginapatuman ni Jehova sa aton ukon kon ano ang indi?
21 Agod maathagan kon ano ang ginapatuman ni Jehova sa aton ukon kon ano ang indi, ang manalagna sang Dios nga si Miqueas nagpamangkot: “Sa ano bala magaatubang ako kay Jehova? Sa ano bala magayaub ako sa Dios nga mataas? Magaatubang bala ako sa iya nga may bug-os nga mga halad-nga-sinunog, nga may mga tinday nga isa ka tuig ang edad? Mahamuot bala si Jehova sa linibo ka karnero nga lalaki, sa linaksa ka suba nga lana? Ihatag ko bala ang akon anak nga panganay nga lalaki tungod sa akon pagribok, ang bunga sang akon tiyan tungod sa sala sang akon kalag? Napahayag niya sa imo, O tawo, ang maayo. Kag ano bala ang ginapatuman ni Jehova sa imo kundi ang paghimo sing pagkamatarong kag ang paghigugma sang kaayo kag ang paglakat sing maugdang upod sa imo Dios?”—Miqueas 6:6-8.
22. Ano ilabi na ang ginapatuman ni Jehova gikan sa mga napaidalom sa Kasuguan?
22 Gani, nian, ano gid bala ang ginapatuman ni Jehova sa mga nagakabuhi sa idalom sang Kasuguan? Siempre pa, dapat nila higugmaon si Jehova nga Dios. Dugang pa, si apostol Pablo nagsiling: “Ang bug-os nga Kasuguan natuman sa isa ka pulong, nga amo: ‘Higugmaa ang imo isigkatawo subong sang imo kaugalingon.’” (Galacia 5:14) Sing kaanggid, ginsilingan ni Pablo ang mga Cristiano sa Roma: “Sia nga nagahigugma sa iya isigkatawo nakatuman sang kasuguan. . . . Ang gugma amo ang katumanan sang kasuguan.”—Roma 13:8-10.
Indi Gid Ini Mabudlay
23, 24. (a) Ngaa indi gid mabudlay ang ginapatuman ni Jehova sa aton? (b) Ano ang aton masunod nga binagbinagon?
23 Wala bala kamo nagadayaw kon daw ano ka mahigugmaon, madinumdumon, maluluy-on nga Dios si Jehova? Ang iya bugtong nga Anak, si Jesucristo, nagkari sa duta agod padakuon ang gugma sang Dios—agod ipahibalo sa mga tawo kon daw ano sila ka hamili kay Jehova. Nagalaragway sang gugma sang Dios, si Jesus nagsiling nahanungod sa kubos nga mga maya: “Wala sing isa sa ila nga mahulog sa duta nga indi mahibaluan sang inyo Amay.” Gani naghinakop sia: “Dili kamo mahadlok: mahal pa kamo sa madamo nga maya.” (Mateo 10:29-31) Sa pagkamatuod, indi gid mabudlay para sa aton nga himuon ang bisan ano man nga ginapatuman sang subong sini ka mahigugmaon nga Dios!
24 Apang, ano ang ginapatuman karon ni Jehova sa aton? Kag ngaa daw nagahunahuna ang iban nga mabudlay gid ang ginapatuman sang Dios? Paagi sa pag-usisa sining mga pamangkot, makita naton kon ngaa isa ka matahom nga pribilehiyo nga tumanon ang bisan ano man nga ginapatuman ni Jehova.
Masabat Bala Ninyo?
◻ Ngaa ang iban wala mag-alagad kay Jehova?
◻ Paano ang mga ginapatuman ni Jehova nagkalainlain sa sulod sang mga tinuig?
◻ Ano ang mga katuyuan sang Kasuguan?
◻ Ngaa indi gid mabudlay ang ginapatuman ni Jehova sa aton?
[Laragway sa pahina 18]
Ang hinimo-sang-tawo nga mga pagsulundan, subong sang masibod nga pagpaninlo, naghimo sang pagsimba nga mabug-at