Ngaa Tuman Gid Kalip-ot sang Tion?

TION. Ayhan nabudlayan kita sa pagpaathag sing husto sini nga tinaga, apang pat-od nga nahibaluan naton nga daw pirme lang kita ginakulang sing tion. Nahibaluan man naton nga madasig ini nga nagaligad. Ang matuod, masami kita nagapanghayhay, “Kadasig gid sang tion.”

Walay sapayan sina, maathag nga mas eksakto ang Ingles nga mamalaybay nga si Austin Dobson sang nagsiling sia sang 1877: “Ang tion nagalakat, siling mo? A wala! Abaw, ang Tion nagapabilin, kita ang nagalakat.” Kutob sang mapatay sia sang 1921, si Dobson nagtaliwan na sing halos 80 ka tuig; ang tion nagpadayon.

Bugana nga Tion

Tuhoy sa Manunuga sang katawhan, ang Biblia nagasugid sa aton: “Sa wala pa matawo ang mga bukid, ukon sa wala mo pa mabun-ag nga daw ginsakitan ang duta kag ang mapatubason nga duta, kutob sa tion nga walay latid tubtob sa tion nga walay latid ikaw ang Dios.” (Salmo 90:2) Ukon subong sang pagbadbad sang The New Jerusalem Bible sa sini, “kutob sa walay katubtuban tubtob sa walay katubtuban ikaw ang Dios.” Gani ang tion magapadayon kaangay sang pagpadayon sang Dios mismo—sing dayon!

Tuhay gid sa Dios, nga may magamit nga tion nga wala sing katubtuban, mabasa naton ang tuhoy sa mga tawo: “Kay ang tanan namon nga adlaw nagataliwan sa imo kasingkal; ginatapos namon ang amon mga tuig subong sang isa ka hutik. Ang mga adlaw sang amon mga tuig kapituan ka tuig; kag kon bangod sang pinasahi nga kabaskog ini kawaluan ka tuig, apang ang ila kabakod yara sa mabudlay kag makahalalit nga mga butang; kay maabtik ini nga nagalipas, kag nagalupad kami.”—Salmo 90:9, 10.

Ngaa tuman kalip-ot sang kabuhi karon, samtang maathag nga ginatudlo sang Biblia nga tuyo sang Dios nga mabuhi sing dayon ang tawo? (Genesis 1:27, 28; Salmo 37:29) Sa baylo sang wala sing latid nga kalawigon sang kabuhi subong sang gintuyo sang Dios, ngaa ang mga tawo sa promedyo, sa labing maayo nga mga kahimtangan, may kubos pa sa 30,000 ka adlaw? Ngaa tuman gid kalip-ot sang tion sang mga tawo? Sin-o ukon ano ang kabangdanan sining masubo nga kahimtangan? Ang Biblia nagahatag sing maathag kag makaalayaw nga mga sabat.⁠a

Nagalip-ot Pa nga Tion

Ang mga tigulang magapamatuod nga sining ulihi nga mga dekada nagdasig ang lakat sang pagkabuhi. Ginsiling sang isa ka dyurnalista, nga si Dr. Sybille Fritsch, nga sang nagligad nga 200 ka tuig, ang pagtrabaho sa isa ka semana nagnubo sa 38 halin sa 80 ka oras, “apang wala sini mauntat ang aton pagreklamo.” Ginpaathag niya: “Wala sing tion; ang tion bilidhon; daku gid ang pagkinahanglan sa tion subong nga nagahapohapo sa pagginhawa; tama kasako nga kabuhi.”

Ginbuksan sang bag-o nga mga tukib ang mga kahigayunan kag mga posibilidad nga wala gani mahunahuna sang una nga mga henerasyon. Apang samtang nagadaku ang posibilidad nga himuon ang tuman kadamo nga hilikuton, nagadaku man ang kalugaw-an nga may tuman kalip-ot lamang nga tion sa paghimo sini. Sa karon, sa madamo nga bahin sang kalibutan, ang mga tawo nagakabuhi suno sa relo, nagadalidali agod matapos ang lainlain nga mga buluhaton sa katapusan na nga adlaw sang gintalana nga tion. Dapat maglakat si Tatay pakadto sa trabaho sa alas 7:00 s.a., dapat mahanda ni Nanay ang mga bata para sa eskwelahan sa alas 8:30 s.a., makigkita si Lolo sa doktor sa alas 9:40 s.a., kag kami tanan dapat mangin handa para sa importante nga miting sa alas 7:30 s.g. Nagadalidali nga matapos ang lainlain nga mga buluhaton suno sa iskedyul, halos wala na sing tion nga nabilin para sa bisan ano nga pagpahunayhunay. Kag nagareklamo kita sa paghimo sing amoamo lang pirme adlaw-adlaw, sa makatalaka nga pagdalidali.

Indi Lamang Kita ang May Malip-ot nga Tion

Ang Kaaway sang Dios, si Satanas nga Yawa, ang isa nga ang padugi nagdul-ong sa naglip-ot nga kalawigon sang kabuhi sang katawhan, nangin biktima karon sang iya kaugalingon nga kalautan. (Ipaanggid ang Galacia 6:7,8.) Nagahambal tuhoy sa pagkabun-ag sang Mesianikong Ginharian sa langit, ang Bugna 12:12 nagahatag sa aton sing rason nga maglaum sang nagsiling ini: “Bangod sini magkalipay kamo, kamo nga mga langit kag kamo nga nagapuyo sa sini! Kailo para sa duta kag para sa dagat, kay ang Yawa nagpanaug sa inyo, nga may daku nga kaakig, sa pagkahibalo nga malip-ot na lang ang iya tion.”

Suno sa masaligan nga kronolohiya sang Biblia kag sa katumanan sang tagna sang Biblia, nagakabuhi kita karon sa hingapusan sinang ‘malip-ot na lang nga tion.’ Makalilipay gid mahibaluan nga ang tion ni Satanas malapit na maubos! Sa tion nga matagbong sia sa kadadalman, ang matinumanon nga mga tawo ipasag-uli sa kahimpitan, kag matigayon nila ang kabuhi nga walay katapusan nga gintuyo ni Jehova para sa ila sa ginsuguran. (Bugna 21:1-4) Indi na problema ang kakulang sing tion.

Mahanduraw bala ninyo kon ano ang mangin kahulugan sang pagtigayon sing kabuhi nga walay katapusan—ang mabuhi sing dayon? Indi na gid kamo liwat magkabalaka bangod sang mga butang nga dapat ninyo pabay-an nga indi matapos. Kon kinahanglan ninyo ang dugang nga tion, yara pa ang buwas, ukon ang masunod nga semana, ukon ang masunod nga tuig—sa katunayan, ang malawig nga walay katubtuban yara sa inyo atubang!

Paggamit sing Maalamon sang Aton Tion Karon

Nakahibalo nga limitado na lang ang iya tion agod mahaylo ang mga tawo, ginatinguhaan ni Satanas nga magpabilin nga masako ang mga tawo amo nga wala na sila sing tion sa pagpamati sa maayong balita tuhoy sa natukod na nga Ginharian sang Dios. Busa, maayo nga sundon naton ang laygay gikan sa Dios: “Magpadayon kamo sa pagbantay sing maayo nga ang inyo paglakat indi subong sang di-maalam kundi subong sang mga tawo nga maalamon, nga ginabakal ang nagakaigo nga tion para sa inyo kaugalingon, bangod nga ang mga adlaw malaut. Bangod sini mag-untat na kamo nga mangin di-makatarunganon, kundi padayon ninyo nga hangpon kon ano ang kabubut-on ni Jehova.”—Efeso 5:15-17.

Daw ano gid ka kinahanglanon nga gamiton naton sing maalamon ang aton tion para sa mga butang nga labi ka importante sa baylo nga uyangan lang ini sa walay pulos nga mga pagtinguha nga wala sing mahatag nga dayon nga kaayuhan! Dapat naton palambuon ang panimuot nga kaanggid kay Moises sang nakitluoy sia kay Jehova sa sining tinagipusuon nga mga pulong: “Tudlui kami sa pag-isip sang amon mga adlaw sa paagi nga makaagom kami sing tagipusuon nga may kaalam.”—Salmo 90:12.

Matuod, sa kalibutan karon ang tanan masako. Apang, ginapalig-on gid kamo sang mga Saksi ni Jehova nga ihinguyang ang pila sang inyo hamili nga tion sa pagtuon tuhoy sa mga ginapatuman sang Dios agod matigayon ang kabuhi nga walay katapusan sa idalom sang paggahom sang iya Ginharian. Ang paggamit sing isa ka oras sa isa ka semana sa sistematiko nga pagtuon sa Biblia, nga ‘nagahangop kon ano ang kabubut-on ni Jehova,’ magabulig sa inyo nga maeksperiensiahan sing personal ang katumanan sining mga pulong: “Magtalikod sa malaut kag himua ang maayo, sa amo magkabuhi tubtob sa tion nga indi pat-od. Ang mga matarong magapanag-iya sang duta, kag magapuyo sila sing dayon sa sini.”—Salmo 37:27,29.

[Footnote]