Nagbulig Sia sa Pagpalapnag sing Kapawa “Tubtob sa Ukbong sang Duta”
GINGAMIT anay si apostol Pablo sa pagpalapnag sing espirituwal nga kapawa “tubtob sa ukbong sang duta.” Subong resulta, madamo nga “nahuyog sa kabuhi nga wala sing katapusan ang nangin mga tumuluo.”—Binuhatan 13:47, 48; Isaias 49:6.
Makita man ang daku nga handum sa pagpalapnag sing espirituwal nga kapawa sa debotado nga pagkabuhi kag wala sing kakapoy nga Cristianong mga panikasog ni William Lloyd Barry, nga isa ka katapo sang Nagadumala nga Hubon sang mga Saksi ni Jehova. Napatay si Utod Barry sang Hulyo 2, 1999, samtang nagahatag sing bahin sa distrito nga kombension sa Hawaii.
Natawo si Lloyd Barry sa New Zealand sang Disiembre 20, 1916. Antes sina, nagpakita sing aktibo nga interes ang iya amay kag iloy sa mga kamatuoran sang Biblia nga ginpresentar sa mga publikasyon ni C.T. Russell, subong nga ginpanagtag sang Watch Tower Bible and Tract Society. Busa, nagdaku si Utod Barry sa isa ka debotado nga Cristianong panimalay.
Bisan pa interesado sia sa mga isport kag edukasyon, kag nakakuha pa gani sing titulo sa siensia, nahuptan ni Utod Barry nga nahugod ang iya igtalupangod sa espirituwal nga mga butang. Gani, sang Enero 1, 1939, nagsulod sia sa bug-os tion nga ministeryo, nga nangin katapo sang pamilya Bethel sa talatapan sang Sosiedad sa Australia. Sang gindumilian sang panguluhan ang Sosiedad sang 1941, si Utod Barry nagpabilin nga masako sa hilikuton sa opisina, kon kaisa ginpasulat sia sing materyal sa pagpalig-on sa iya mga masigkatumuluo. Nangin maayo man sia nga halimbawa sa pagpanguna sa publiko nga ministeryo.
Sang Pebrero 1942, napangasawa ni Utod Barry ang isa pa ka bug-os tion nga alagad. Ang iya mahigugmaon nga asawa, si Melba, matutom nga nagpangabudlay upod sa iya sining bug-os nga tinuig sa madamo nga bahin sang duta. Naghimo sila sing daku nga tikang sa pag-alagad sa mga pungsod sa luwas paagi sa pagtambong sa ika-11 nga klase sang Watchtower Bible School of Gilead sa Estados Unidos. Ang ila anay teritoryo amo ang mahimo kabigon sang madamo subong ‘ukbong sang duta’—ang Japan. Sang mag-abot sila sang Nobiembre 1949, nag-alagad sila subong mga misyonero sa pantalan nga siudad sang Kobe. Sadto nga tion, 12 lamang ka tawo ang nagabantala sing maayong balita sa Japan. Natun-an ni Utod Barry ang lenguahe kag mga kinabatasan sang iya bag-o nga puluy-an kag napalambo ang daku nga pagpalangga sa mga Hapones, nga upod sa ila nag-alagad sia sa nagsunod nga 25 ka tuig. Ang iya gugma sa sadtong “nahuyog sa kabuhi nga wala sing katapusan” nakita gid sang nagadamo nga Cristianong paghiliutod sa Japan, nga nagbulig sa iya nga mangin epektibo sa pagdumala sa sanga sa sulod sang mga dekada.
Sang tungatunga sang tuig 1975, sang may 30,000 ka Saksi sa Japan, ang mga Barry ginsaylo sa Brooklyn, New York. Subong hinaplas-sang-espiritu nga Cristiano, si Utod Barry gin-agda nga mag-alagad subong katapo sang Nagadumala nga Hubon sang mga Saksi ni Jehova. (Roma 8:16, 17) Ang iya eksperiensia sa pagsulat nangin daku gid nga bulig sa iya bag-o nga katungdanan sa Departamento sang Pagsulat. Kag ang iya masangkad nga eksperiensia sa sanga kag sa madamo nga pungsod nagsangkap sa iya nga makahatag sing importante nga bulig subong katapo sang Komite sa Pagbalhag sang Nagadumala nga Hubon.
Sa sulod sang mga tinuig, nahuptan ni Utod Barry ang iya gugma sa Sidlangan kag sa katawhan sini. Ang mga estudyante sa Eskwelahan sang Gilead subong man ang mga katapo sang pamilya Bethel makapat-od nga ang iya mga pamulongpulong kag mga komento magapadaku sang makalilipay nga mga sugilanon tuhoy sa madamo nga nag-alagad sa misyonero nga hilikuton. Ang mga hilikuton sa pagbantala sing Ginharian sa ‘mga ukbong sang duta’ maathag nga ginlaragway samtang ginasugid sing masinadyahon ni Utod Barry ang iya mismo mga eksperiensia. Ang pila sini ginsambit sa iya kaugalingon nga kasaysayan nga ginbalhag sa The Watchtower sang Septiembre 15, 1960.
Nagasalig kami nga subong ‘masigkamanunubli ni Cristo,’ ang interes ni Utod Barry sa sadtong “nahuyog sa kabuhi nga wala sing katapusan” magapadayon. Sa pagkamatuod, mahidlaw gid sa iya ang tanan nga nakakilala kag nagpalangga sa iya subong isa ka espirituwal nga tawo, nga debotado gid kay Jehova kag may mainit nga pagpalangga sa katawhan sang Dios. Apang, nagakalipay kami nga matutom nga nagbatas si Utod Barry tubtob sa katapusan sang iya dutan-on nga dalanon.—Bugna 2:10.
[Laragway sa pahina 16]
Sanday Lloyd Barry kag John Barr sang ginpaguwa ang “Insight on the Scriptures” sang 1988
[Laragway sa pahina 16]
Ang mga gradwado sang ika-11 nga klase sang Gilead, nga nagtipon sa Japan pagligad sang 40 ka tuig