Makaalagad Bala Ikaw sa Iban nga Pungsod?
“HANDUM ko gid nga mangin misyonero. Sang soltero pa ako, nag-alagad ako sa Texas, E.U.A., diin may daku nga kinahanglanon para sa mga manugbantala. Ang akon asawa nagbuylog sa akon didto pagkatapos sang amon kasal. Sang nabun-ag ang amon anak nga babayi, nahunahuna ko, ‘Ti, amo na ini ang katapusan sang akon mga plano nga magmisyonero.’ Apang ginapahanabo ni Jehova nga magmatuod ang mga damgo, ilabi na kon may kaangtanan ini sa iya kabubut-on.”—Jesse, nagaalagad karon sa Ecuador upod sa iya asawa kag tatlo ka kabataan.
“Wala gid ako maghunahuna nga mahimo ko ang subong sina nga wala mahanas sa eskwelahan sa pagmisyonero sang Gilead. Kon makita ko ang isa sang akon mga estudyante sa Biblia nga nagapamulongpulong ukon nagabantala, nagapahalipay ini sa akon, kag nagapasalamat ako kay Jehova tungod sa paghatag niya sa akon sini nga kahigayunan.”—Karen, isa ka dalaga nga nagpayunir sing walo ka tuig sa Bagatnan nga Amerika.
“Sa tapos magbantala sing bug-os tion sa sulod sang 13 ka tuig sa Estados Unidos, nagbatyag kami sang akon asawa nga kinahanglan namon ang bag-o nga hangkat. Mas malipayon kami karon sangsa una; makalilipay gid ini nga dalanon sang pagkabuhi.”—Tom, nagapayunir upod sa iya asawa, si Linda, sa rehiyon sang Amazon.
Ining mapinasalamaton nga mga pagpabutyag naghalin sa mga tawo nga ang mga sirkunstansia wala magtugot sa ila nga mahanas subong misyonero sa Watchtower Bible School of Gilead. Walay sapayan sina, naeksperiensiahan nila ang kalipay kag mga hangkat sa pag-alagad sa iban nga pungsod. Paano ini natabo? Para bala sa imo ini nga pag-alagad?
Kinahanglan ang Nagakaigo nga mga Motibo
Kapin pa sa espiritu sang pagpasimpalad ang kinahanglanon agod magmadinalag-on sa pag-alagad sa iban nga pungsod. Yadtong mga nakabatas naghimo sini upod ang nagakaigo nga mga motibo. Kaangay ni apostol Pablo, ginkabig nila ang ila kaugalingon subong mga may utang, indi lamang sa Dios kundi sa mga tawo man. (Roma 1:14) Natuman nila kuntani ang sugo sang Dios nga magbantala paagi sa pagpakigbahin sa ministeryo sa ila tumandok nga teritoryo. (Mateo 24:14) Apang nagbatyag sila nga may utang kag napahulag nga lab-uton kag buligan yadtong talagsa lang makatigayon sing kahigayunan nga makabati sing maayong balita.
Ang handum nga magpanghikot sa mas mabungahon nga teritoryo amo sa masami ang isa pa ka motibo—kag nagakaigo man. Sin-o sa aton nga kon makakita sing isa pa ka mangingisda nga madamo sing kuha ang indi magpalapit sa sina nga bahin sang linaw? Sing kaanggid, ang makalilipay nga mga report sang tumalagsahon nga mga pag-uswag sa iban nga kadutaan nagpalig-on sa madamo nga magkadto kon diin may “madamo nga isda.”—Lucas 5: 4-10.
Isipa ang Bili
Madamo nga pungsod ang wala nagatugot sa relihioso nga mga boluntaryo nga magpamugon. Busa yadtong luyag mag-alagad sa iban nga pungsod kinaandan na nga dapat may nagakaigo nga pundo. Paano naatubang ini nga hangkat sa ekonomiya? Ang pila nagbaligya ukon nagpaarkila sang ila mga puluy-an agod makatigayon sing kinahanglanon nga kuwarta. Ang iban nagbaligya sang ila mga negosyo. Ang pila nagsupot para sa ila tulumuron. Ang iban naman nag-alagad sing isa ukon duha ka tuig sa iban nga pungsod, nagabalik sa ila kaugalingon nga pungsod sa pagtrabaho kag sa pagsupot sing kuwarta, kag dayon nagabalik agod mag-alagad liwat.
Ang maathag nga bentaha sang pagkadto sa imol nga mga pungsod amo nga ang balaklon masami nga mas barato sangsa mainuswagon nga pungsod. Nagatugot ini sa pila nga magpangabuhi sing kasarangan sa ila diutay nga pension. Sa pagkamatuod, ang gasto sang isa nasandig sing daku sa sahi sang pangabuhi nga ginapili niya. Bisan sa imol nga mga pungsod, ang komportable gid nga mga dalayunan sarang matigayon apang sa mas mataas nga bili.
Maathag nga dapat anay bulubantaon ang mga kagastuhanan antes magsaylo. Apang, indi lamang pag-isip sa kagastuhanan sa ekonomiya ang nalakip sa sini. Ayhan ang mga komento sang pila nga nag-alagad sa Bagatnan nga Amerika makahatag sing ideya.
Ang Labing Daku nga Hangkat
“Ang pagtuon sing Espanyol isa gid ka daku nga pagpanikasog para sa akon,” hinumdom ni Markku, gikan sa Finland. “Naghunahuna ako nga bangod indi ako makahibalo sang hambal, madugay pa ako mangin ministeryal nga alagad. Daku gid ang akon kakibot sang ginpangabay ako nga magdumala sing isa ka pagtuon sa libro pagligad lamang sang duha ka bulan! Sa pagkamatuod, madamo gid sing makahuluya nga mga tinion. Nabudlayan gid ako ilabi na sa mga ngalan. Isa ka adlaw gintawag ko si Utod Sancho sing ‘Utod Chancho (baboy),’ kag indi ko gid malipatan ang pagtawag ko kay Utod Salamea sing ‘Malasea (malauton).’ Maayo na lang, ang mga kauturan tuman ka mapainumuron.” Sang ulihi si Markku nag-alagad sing walo ka tuig sa sina nga pungsod subong isa ka manugtatap sa sirkito upod sa iya asawa, si Celine.
Si Chris, nga asawa ni Jesse nga ginkutlo sa pamuno, nagsaysay: “Nadumduman ko ang una nga pagduaw sang amon manugtatap sang sirkito, pagligad lamang sang tatlo ka bulan nga diri kami. Mahangpan ko nga ang manugtatap sang sirkito nagagamit sing mga ilustrasyon kag nagasiling sing pila ka butang nga matahom agod matandog ang amon mga tagipusuon, apang indi ko sia mahangpan. Didto mismo sa tilipunan, naghibi ako. Indi ini pagluha lamang; nagapilisnguon ako. Sa tapos sang miting, gintinguhaan ko nga ipaathag ang akon pagginawi sa manugtatap sang sirkito. Tuman gid sa iya kaayo kag ginsilingan ako sang pirme ginasiling sang iban sa akon, ‘Ten paciencia, hermana’ (‘Magpailob ka lang, utod’). Duha ukon tatlo ka tuig sang ulihi, nagkitaay kami liwat kag naghambalanay sing 45 minutos, nagakasadya nga makahambalanay na kami.”
“Ang pagtuon kinahanglanon,” siling sang isa pa ka utod nga lalaki. “Sa labi naton nga panikasog sa pagtuon sang lenguahe, labi naton nga ginapauswag ang aton mga ikasarang sa pagpaalintunanay.”
Ang tanan nagaugyon nga ina nga mga panikasog nagahatag sing madamo nga benepisyo. Ang pagkamapainubuson, pagkamapailubon, kag pagbatas ginapalambo kon ang isa ka tawo nagatinguha sa pagtuon sing isa ka pinulungan. Ang daku nga ganhaan sang kahigayunan ginabuksan agod mabantala ang maayong balita sa iban. Halimbawa, ang pagtuon sing Espanyol nagabulig sa isa nga makapakigsugilanon sa isa ka lenguahe nga ginahambal sang kapin sa 400 milyones ka tawo sa bug-os nga kalibutan. Madamo sang mga nagpauli sang ulihi sa ila tumandok nga pungsod ang nakagamit gihapon sang ila ihibalo sa lenguahe sa pagbulig sa mga tawo nga nagahambal sing Espanyol.
Ano Naman ang Tuhoy sa Kahidlaw?
“Sang una namon nga pag-abot sa Ecuador sang 1989,” hinumdom ni Deborah, nga nag-alagad upod sa iya bana, si Gary, sa rehiyon sang Amazon, “ginhidlaw gid ako sa amon. Natun-an ko nga magsandig sing dugang sa mga kauturan sa kongregasyon. Daw pamilya ko na sila.”
Si Karen, nga ginhinambit sa pamuno, nagsiling: “Ginbatuan ko ang kahidlaw paagi sa pagpakigbahin sa ministeryo adlaw-adlaw. Sa sini nga paagi wala ako nagdalamguhanon tuhoy sa puluy-an. Pirme ko man gintandaan nga ginapabugal sang akon mga ginikanan didto sa amon ang akon hilikuton sa iban nga pungsod. Pirme ako ginpalig-on ni Nanay sang mga pulong: ‘Maatipan ka sing maayo ni Jehova sangsa akon.’”
Si Makiko, gikan sa Japan, linahog nga nagdugang: “Sa tapos makaalagad sa latagon sa bug-os nga adlaw, ginakapoy gid ako. Gani kon makapauli na ako kag makabatyag sang kahidlaw, masami nga nagakatulugan dayon ako. Sang ulihi, wala na nagadugay ang kahidlaw.”
Ano Naman ang Tuhoy sa Kabataan?
Kon nadalahig ang kabataan, kinahanglan binagbinagon ang ila mga kinahanglanon, subong sang edukasyon. May kaangtanan sini ang pila nagpamat-od nga magtuon samtang yara sa puluy-an samtang ang iban naman nagpatuon sang ila kabataan sa lokal nga mga eskwelahan.
Nagsaylo si Al sa Bagatnan nga Amerika upod sa iya asawa, duha ka kabataan, kag iloy. Sia nagsiling: “Nasapwan namon nga ang pagpaeskwela sa kabataan makabulig sa ila nga matun-an dayon ang lenguahe. Sa sulod sang tatlo ka bulan talunsay na gid sila maghambal.” Sa pihak nga bahin, ang duha ka solterito nanday Mike kag Carrie nagtuon paagi sa sulat. Ang mga ginikanan nagsiling: “Nasapwan namon nga ini nga mga pagtuon indi mahimo nga pabay-an na lamang sa amon kabataan. Dapat kami makigbahin sa pagtuon kag pat-uron nga ang mga kabataan nagadungan sa gintangdo nga kurikulum.”
Sanday David kag Janita, gikan sa Australia, nagpabutyag sang ila mga balatyagon tuhoy sa ila duha ka anak nga lalaki. “Luyag namon nga makita gid sang amon mga anak kon paano nagakabuhi ang iban. Mahapos haumhaumon nga ang estilo sang pagkabuhi nga amon gindak-an kinaandan, apang ang matuod diutay lang gali ang nagakabuhi sing kaangay sini. Nakita man nila kon paano ang teokratikong mga prinsipio nagapanghikot sa bug-os nga kalibutan, bisan ano man nga pungsod ukon kultura.”
“Apat lamang ako ka tuig sang magsaylo ang amon pamilya halin sa Inglaterra sang 1969,” hinumdom ni Ken. “Bisan pa nga nasubuan ako nga wala kami nagapuyo sa kamalig nga human sa daga nga may atop nga hilamon, subong sang akon ginapanan-aw, nagbatyag ako nga ako na ang may pinakamalipayon nga pagpadaku subong pamatan-on. Naluoy gid ako pirme sa iban nga kabataan nga wala sing amo nga kahigayunan! Bangod sang makalilipay nga pagpakig-upod sa mga misyonero kag mga espesyal nga payunir, nagsugod ako sa pag-auxiliary payunir sa edad nga siam.” Si Ken isa na karon ka nagalakbay nga manugtatap.
“Ang Ecuador puluy-an na gid namon karon,” ugyon ni Gabriella, anak nga babayi ni Jesse. “Nalipay gid ako nga ang akon mga ginikanan nagdesisyon sa pagkadto diri.”
Sa pihak nga bahin, may mga kabataan nga wala makapasibu tungod sang nagkalainlain nga mga rason, kag ang ila mga pamilya kinahanglan nga magpauli sa ila tumandok nga mga pungsod. Amo sina kon ngaa ang pagduaw sa iban nga pungsod antes magsaylo kinahanglanon. Sa sini nga paagi ang mga desisyon sarang mahimo pasad mismo sa impormasyon nga natigayon ukon nahibal-an.
Mga Pagpakamaayo sang Pagsaylo
Sa pagkamatuod, ang pagsaylo sa iban nga pungsod nagalakip sang madamo nga hangkat kag sakripisyo. Takus gid bala ini para sa sadtong nagsaylo? Pasugiron naton sila.
Jesse: “Sa sulod sang napulo ka tuig nga didto kami sa siudad sang Ambato, nakita namon nga nagdamo ang kongregasyon gikan sa 2 tubtob sa 11. Pribilehiyo namon nga makabulig sa pagsugod sa lima sadto nga mga kongregasyon, kag nakabulig kami sa pagtukod sing duha ka Kingdom Hall. Nalipay man kami sa pagbulig nga makapabawtismo ang duha ka estudyante sa Biblia sa promedyo kada tuig. Isa lang ang akon ginahinulsulan—ang indi pagkadto sing nagligad nga napulo ka tuig antes sini.”
Linda: “Ang apresasyon sang mga tawo sa maayong balita kag sa amon mga panikasog nagpalig-on gid sa amon. Halimbawa, sa isa ka diutay nga banwa sa kagulangan, ang isa ka estudyante sa Biblia nga si Alfonso nakarealisar kon daw ano ka mapuslanon ang paghiwat sing mga pamulongpulong publiko sa iya duog. Bag-o lang sia magsaylo sa iya bag-o napatindog nga balay nga human sa kahoy, isa sang pila lang ka balay sa minuro. Namat-od nga ang iya balay amo lamang ang tinukod sa banwa nga takus kay Jehova, nagsaylo sia liwat sa iya balay nga human sa kugon kag ginpagamit ang iya balay sa mga kauturan subong Kingdom Hall.”
Jim: “Ang tion nga ginahinguyang namon sing aktuwal sa pagpakighambal sa mga tawo sa ministeryo napulo ka pilo ang kalabawon sangsa Estados Unidos. Dugang pa, ang pagpangabuhi diri mas matawhay. Wala sing duhaduha nga may kapin nga tion sa pagtuon kag pag-alagad sa latagon.”
Sandra: “Ang makita kon paano mabag-o sang kamatuoran sa Biblia ang mga tawo nga mangin mas maayo nagapahalipay gid sa akon. Nagtuon ako anay sa Biblia upod kay Amada, 69-anyos ang edad nga tag-iya sang isa ka diutay nga tiangge. Ginadugangan niya anay sing duha ka bahin nga tubig ang tagsa ka napulo nga bahin sang gatas. Ginadayaan pa gid niya ang iya mga kustomer paagi sa pagbaligya sa ila sang nasamuan nga gatas nga kulangkulang sa takus. Apang sa tapos matun-an ang materyal sa ubos sang ikaduha nga uluhan nga ‘Ang Pagkabunayag Nagaresulta sa Kalipay’ sa kapitulo 13 sang libro nga Ang Ihibalo nga Nagadul-ong sa Kabuhi nga Walay Katapusan, gin-untatan ni Amada ining sayop nga mga buhat. Makalilipay gid nga makita sia nga ginbawtismuhan pila ka tion pagkatapos sadto!”
Karen: “Wala gid ako anay makasandig kay Jehova ukon gingamit niya sangsa yari ako diri. Ang akon pagpakig-abyan kay Jehova labi nga nagdalom kag nagbakod.”
Kamusta Ikaw?
Sa sulod sang mga tinuig linibo ka Saksi ang nagsaylo sa iban nga pungsod. Ang iban nagpabilin sing isa ukon duha ka tuig, ang iban sing walay latid. Gindala nila ang ila mga eksperiensia, pagkahamtong sa espirituwal, kag pinansial nga mga pagkabutang, upod ang tulumuron nga pauswagon ang mga intereses sang Ginharian sa iban nga pungsod. Nakaalagad sila sa mga duog diin ang lokal nga mga manugbantala sang Ginharian indi makaalagad bangod sang kaiwaton sang sekular nga trabaho. Madamo ang nagbakal sing may duwal nga salakyan agod makadtuan ang daw indi malab-ot nga teritoryo. Ang iban, nga naluyag sang kabuhi sa siudad, nangin makapalig-on nga bulig sa dalagku nga mga kongregasyon sa diin diutay ang mga gulang. Apang, wala sing eksepsion, ang tanan nagpamatuod nga nakabaton sila sing mas madamo nga pagpakamaayo sa espirituwal sangsa nahatag nila.
Makapakigbahin ka bala sa pribilehiyo nga mag-alagad sa iban nga pungsod? Kon ginatugot sang imo mga kahimtangan, ngaa indi magpangusisa sang posibilidad nga makasaylo? Ang una kag kinahanglanon nga tikang amo ang pagsulat sa sanga talatapan sang Sosiedad sa pungsod nga ginahunahuna mo nga alagaran. Ang espesipiko nga mga impormasyon nga imo nabaton makabulig sa imo nga mapat-od ang imo kahigayunan nga magmadinalag-on. Dugang pa, madamong praktikal nga panugda ang makita sa artikulo nga “Halin Ka sa Imo Duta kag sa Imo Kahimataan,” sa Agosto 15, 1988, nga guwa sang Ang Lalantawan. Upod ang maayo nga pagplano kag pagpakamaayo ni Jehova, ayhan ikaw man makaeksperiensia sang kalipay sa pag-alagad sa iban nga pungsod.
[Laragway sa pahina 24]
SANDAY TOM KAG LINDA SA NABAW-ING NGA BANAS, PADULONG SA KOMUNIDAD SANG MGA INDIAN SA SHUAR
[Laragway sa pahina [25]
MADAMO ANG NAG-ALAGAD SA QUITO, ANG KAPITAL NGA SIUDAD SANG ECUADOR
[Laragway sa pahina [25]
SI MAKIKO NGA NAGABANTALA SA KABUKIRAN SANG ANDES
[Laragway sa pahina 26]
LIMA KA TUIG NA NGA NAGAALAGAD ANG PAMILYA HILBIG SA ECUADOR