‘Makatabok Ka Bala sa Macedonia’?
1. Ngaa nagkadto si Pablo kag ang iya mga kaupod sa Macedonia?
1 Sang mga 49 C.E., nagbiya si apostol Pablo sa Antioquia sa Siria para sa iya ikaduha nga paglakbay subong misyonero. Maduaw sia kuntani sa Efeso kag sa iban pa nga siudad sa Asia Minor. Apang paagi sa balaan nga espiritu, nakabaton sia sing pangagda nga ‘magtabok sa Macedonia.’ Malipayon nga ginbaton nila sang iya mga kaupod ini nga imbitasyon, kag nakapribilehiyo sila sa pagtukod sang una nga kongregasyon sa sina nga lugar. (Binu. 16:9, 10; 17:1, 2, 4) Sa karon, may pila ka lugar nga nagakinahanglan gid sing dugang nga mangangani. (Mat. 9:37, 38) Makabulig ka bala?
2. Ngaa wala ginbinagbinag sang iban ang pagsaylo sa iban nga pungsod?
2 Mahimo gusto mo man magmisyonero kaangay ni Pablo, pero wala mo gid mabinagbinag ang pagsaylo sa iban nga pungsod. Halimbawa, mahimo indi ka na puede mag-eskwela sa Gilead bangod sa imo edad, isa ikaw ka di-minyo nga utod nga babayi, ukon may mga kabataan nga kinahanglan pa atipanon. Isa pa, sa banta mo daw indi mo masarangan ang pagtuon sing iban nga lenguahe. Ukon ayhan nagsaylo ka sa iban nga pungsod bangod sa kapigaduhon, amo nga daw indi ka na magsaylo pa liwat. Apang mahimo nga pagkatapos mo ini mabinagbinag kag mapangamuyuan, narealisar mo nga walay sapayan sini nga mga kahimtangan, puede ka gihapon magsaylo sa iban nga lugar diin may panginahanglan.
3. Ngaa indi kinahanglan ang paghanas sa pagmisyonero agod mangin madinalag-on sa pagbantala sa iban nga pungsod?
3 Kinahanglan Gid Bala ang Paghanas sa Pagmisyonero? Ngaa nangin madinalag-on si Pablo kag ang iya mga kaupod? Nagsalig sila kay Jehova kag sa iya balaan nga espiritu. (2 Cor. 3:1-5) Gani, bisan indi ka makabaton sing pinasahi nga paghanas bangod sa imo kahimtangan, mangin madinalag-on ka gihapon sa pagbantala sa iban nga pungsod. Dumduma man nga ginahanas ka pirme sa Teokratikong Eskwelahan Para sa Ministeryo kag sa Miting sa Serbisyo. Kag ayhan may tulumuron ka nga mag-eskwela sa Gilead ukon sa kaanggid nga mga paghanas. Gani, ang imo maeksperiensiahan sa pagsaylo kag pag-alagad sa iban nga pungsod makabulig gid sa imo sa ulihi.
4. Ngaa ang mga may edad mahimo pa magsaylo kag magbantala sa iban nga pungsod?
4 Mga May Edad: Ang mga may edad nga mapagros pa kag hamtong sa espirituwal may daku nga mabulig sa mga pungsod nga may panginahanglan. Retirado ka na bala? May pila ka pensionado nga nagsaylo sa pigado nga pungsod. Bisan gamay lang ang ila pension, napaigo nila ini bangod barato lang ang mga balaklon kag balayran didto, lakip na ang pagpabulong, kon ikumparar sa ila ginhalinan nga pungsod.
5. Isaysay ang eksperiensia sang isa ka retirado nga utod nga nagsaylo sa iban nga pungsod.
5 Ang isa ka retirado nga gulang kag payunir nga naghalin sa pungsod nga nagahambal sing Ingles nagsaylo sa isa ka lugar sa South East Asia nga popular sa mga turista. Nagbulig sia didto sa Ingles nga grupo nga may siam lang ka manugbantala. Ang grupo nagabantala sa 30,000 ka dumuluong nga nagaistar sa sina nga lugar. Sa sulod lang sang duha ka tuig, 50 na ang nagatambong sa mga miting. Nagsulat ang utod: “Ang pagsaylo diri naghatag sa akon sing dalayawon kag indi maisip nga mga pagpakamaayo nga wala ko pa anay natigayon.”
6. Isaysay ang eksperiensia sang di-minyo nga utod nga babayi nga nagsaylo sa pungsod diin mas daku ang kinahanglanon.
6 Di-minyo nga mga Utod nga Babayi: Ginagamit ni Jehova sa talalupangdon nga paagi ang mga utod nga babayi sa pagbantala sang maayong balita sa mga pungsod diin mas daku ang kinahanglanon. (Sal. 68:11) Ang isa ka bataon kag di-minyo nga utod nga babayi luyag magpasangkad sang iya ministeryo sa iban nga pungsod, apang nabalaka ang iya mga ginikanan sa mangin kahimtangan niya didto. Gani, nagpili sia sing pungsod nga maayo ang kahimtangan sa pulitika kag ekonomiya. Nagsulat sia sa sanga talatapan kag nakabaton sing kinahanglanon nga bulig. Sa sulod sang anom ka tuig, nakabaton sia sing madamo nga pagkamaayo. Nagsiling sia: “Sa amon lugar, mahimo diutay lang ang akon madumalahan sing pagtuon sa Biblia. Apang sa akon pag-alagad sa lugar diin mas daku ang kinahanglanon, nakadumala ako sing madamo nga pagtuon sa Biblia kag napauswag ko ang akon ikasarang sa pagtudlo.”
7. Isaysay ang eksperiensia sang isa ka pamilya nga nagsaylo sa iban nga pungsod.
7 Pamilya: Kon may mga kabataan ka, makaupang bala ini sa imo nga magsaylo sa iban nga pungsod agod magbantala? Gintilawan ini sang isa ka pamilya nga may duha ka kabataan nga nagaedad sing walo kag napulo ka tuig. Ang iloy nagsulat: “Malipayon gid kami nga diri namon ginpadaku ang amon kabataan, bangod nakapakig-upod sila sa mga espesyal payunir kag misyonero. Ginpakamaayo gid kami sa amon pag-alagad sa duog diin mas daku ang kinahanglanon.”
8. Posible bala nga mag-alagad sa iban nga pungsod bisan indi ka na magtuon sing iban nga lenguahe? Ipaathag.
8 Lenguahe: Ang pagtuon bala sing iban nga lenguahe nagaupang sa imo nga magsaylo sa iban nga pungsod? Mahimo nga ang imo mismo lenguahe ginahambal man sa iban nga pungsod nga nagakinahanglan sing dugang nga manugbantala. Ang isa ka mag-asawa nga nagahambal sing Ingles nagsaylo sa pungsod nga Espanyol ang lenguahe apang may madamo nga imigrante nga nagahambal sing Ingles. Sa tapos mahatag sa ila sang sanga talatapan ang pila ka Ingles nga kongregasyon nga may panginahanglan, nagpili sila sing isa kag ginduaw ini sing duha ka beses. Nagpauli sila anay, dayon ginbuhinan ang ila mga ginabayaran kada bulan kag nagsupot sa sulod sang isa ka tuig. Sang handa na sila magsaylo, ginbuligan sila sang mga utod sa sina nga lugar nga makakita sing barato lang nga ilistaran.
9, 10. Ano ang mahimo binagbinagon sang mga nagbiya sa pungsod nga ila natawhan, kag ngaa?
9 Imigrante: Nagaistar ka bala subong sa iban nga pungsod, ayhan nakasaylo ka antes mo pa matun-an ang kamatuoran? Mahimo nga daku ang kinahanglanon sang manugbantala sa pungsod nga imo natawhan. Makabalik ka bala didto agod magbulig? Ayhan mas mahapos para sa imo nga makakita sing trabaho kag ilistaran didto sangsa mga dumuluong. Isa pa, posible nga nahibaluan mo na ang lenguahe didto. Kon ikaw ang magbantala sang mensahe sang Ginharian, mas mamati sa imo ang mga tawo sangsa mga dumuluong.
10 Isa ka taga-Albania nga nangin refugee sa Italya ang nakakita didto sing maayo nga trabaho, kag ginasustentuhan niya ang iya pamilya sa Albania. Sang matun-an niya ang kamatuoran, gintudluan niya sing Albaniano ang isa ka grupo sang Italyano nga mga espesyal payunir nga magasaylo didto agod magbulig. Nagsulat ang utod: “Makadto sila sa teritoryo nga akon ginbiyaan. Indi sila makahibalo sang lenguahe pero nalangkag sila nga makadto. Albaniano ang akon lenguahe kag kultura. Nagaano ako diri sa Italya?” Nagbalik ang utod sa Albania agod magbulig sa pagpalapnag sang maayong balita. Nagsiling sia: “Naghinulsol bala ako nga ginbiyaan ko ang akon obra sa Italya? Wala gid! Nakasapo ako sing matuod nga obra sa Albania. Para sa akon, ang labing importante kag nagadala sing matuod nga kalipay amo ang pag-alagad kay Jehova sa bug-os nga masarangan!”
11, 12. Ano ang himuon sang mga nagaplano nga magsaylo sa iban nga pungsod?
11 Kon Paano Ini Himuon: Antes magkadto sa Macedonia, tuyo nanday Pablo kag sang iya mga kaupod nga maglakbay pa katundan, pero “gindumilian sila sang balaan nga espiritu,” gani nagpaaminhan sila. (Binu. 16:6) Sang lapit na sila sa Bitinia, ginpunggan sila ni Jesus. (Binu. 16:7) Paagi kay Jesus, padayon nga ginadumalahan ni Jehova ang pagbantala nga hilikuton. (Mat. 28:20) Gani, kon nagahunahuna ka nga magsaylo sa iban nga pungsod, mangayo sing panuytoy kay Jehova paagi sa pangamuyo.—Luc. 14:28-30; Sant. 1:5; tan-awa ang kahon nga “Kon Paano Mahibaluan nga May Panginahanglan sa Pungsod nga Imo Sayluhan.”
12 Pamangkuta ang mga gulang ukon iban nga hamtong nga Cristiano kon bala nagakaigo nga magsaylo ka. (Hulu. 11:14; 15:22) Magbasa sing mga publikasyon parte sa pagsaylo sa iban nga pungsod, kag magpanalawsaw parte sa mga pungsod nga ginaplano mo nga sayluhan. Mahimo mo kadtuan ini nga pungsod, ayhan bisan sa pila lang ka adlaw. Kon desidido ka gid nga magsaylo sa iban nga pungsod, mahimo ka makapangayo sing dugang nga impormasyon paagi sa pagsulat sa sanga talatapan sina nga lugar. Makita mo ang adres sa pinakabag-o nga Tuigan nga Libro. Apang, sa baylo nga ipadala ini sing direkta sa sanga talatapan, ihatag anay ini sa mga gulang sa inyo kongregasyon, agod malakipan nila ini sing rekomendasyon antes ipadala.—Tan-awa ang Organisado sa Paghimo Sang Kabubut-on ni Jehova, pahina 111-112.
13. Ano ang mabulig sa imo sang sanga talatapan, apang ano ang imo mga responsibilidad?
13 Padal-an ka sang sanga talatapan sing mapuslanon nga mga impormasyon parte sa pungsod nga luyag mo sayluhan, kag makabulig ini sa imo pagdesisyon. Apang, indi sila makahatag sa imo sing mga sponsorship letter, residency, visa, kag iban pa nga legal nga pormas ukon mangita sing mga ilistaran para sa imo. Personal ini nga mga butang nga kinahanglan mo binagbinagon sing mahalungon antes ka magsaylo. Isa pa, ikaw man ang dapat magkontak sa mga embassy ukon consulate para sa mga impormasyon tuhoy sa mga kinahanglanon sa pagkuha sing visa kag permiso sa pagtrabaho. Dapat masarangan nga atipanon sang mga luyag magsaylo ang ila personal kag legal nga mga kinahanglanon.—Gal. 6:5.
14. Ano ang mga dapat halungan kon magaduaw ka ukon magasaylo sa pungsod nga ginadumilian ang hilikuton?
14 Mga Pungsod nga Ginadumilian ang Hilikuton: Sa pila ka pungsod, ang mga kauturan dapat maghalong gid sa ila pagsimba. (Mat. 10:16) Ang mga manugbantala nga magaduaw ukon magasaylo didto mahimo indi hungod nga makakuha sing igtalupangod sa aton hilikuton kag magbutang sa katalagman sa aton mga kauturan. Kon ginaplano mo nga magsaylo sa sina nga lugar, palihug magsulat sa inyo sanga talatapan paagi sa hubon sang mga gulang.
15. Kon indi ka makasaylo sa iban nga pungsod, paano mo mapasangkad ang imo ministeryo?
15 Kon Indi Ka Makasaylo: Kon indi ka makasaylo sa iban nga pungsod, indi ka dapat maluyahan sing buot. Mahimo mabuksan sa imo ang “isa ka daku nga ganhaan nga nagadul-ong sa hilikuton.” (1 Cor. 16:8, 9) Ayhan ang inyo manugtatap sang sirkito may nabal-an nga malapit nga mga lugar nga nagakinahanglan sing bulig. Mahimo makabulig ka sa malapit nga dumuluong-sing-lenguahe nga kongregasyon ukon grupo. Ukon mahimo mo pasangkaron ang imo ministeryo sa inyo kongregasyon. Ang importante, nagasimba ka sing bug-os kalag bisan ano man ang imo kahimtangan.—Col. 3:23.
16. Ano ang aton himuon kon may luyag magsaylo sa iban nga pungsod?
16 May kilala ka bala nga hamtong nga Cristiano nga luyag mag-alagad sa iban nga pungsod? Sakdaga sia kag palig-una! Sang naghalin si Pablo sa Antioquia sa Siria, amo ini ang ikatlo sa pinakadaku nga siudad sa Emperyo sang Roma (ang una Roma kag ang ikaduha Alexandria). Sa sining daku nga teritoryo, mahimo kinahanglan gid sang kongregasyon sa Antioquia ang bulig ni Pablo kag hidlawon gid sila sa iya. Apang, indi mabasahan sa Biblia nga ginpunggan sang mga kauturan si Pablo. Sa baylo nga pamensaron lang ang ila kaugalingon nga lugar, gindumdom nila nga ang “uma amo ang kalibutan.”—Mat. 13:38.
17. Ngaa maayo nga binagbinagon mo ang ‘pagtabok sa Macedonia’?
17 Ginpakamaayo gid si Pablo kag ang iya mga kaupod sa pagbaton nila sa pangagda nga magtabok sa Macedonia. Sang didto sila sa Filipos, isa ka siudad sa Macedonia, nasapwan nila si Lidia, kag “ginbuksan ni Jehova ang iya tagipusuon agod talupangdon ang mga ginahambal ni Pablo.” (Binu. 16:14) Handurawa ang kalipay ni Pablo kag sang iya mga kaupod sang magpabawtismo si Lidia kag ang iya bug-os nga panimalay! Sa madamo nga pungsod, may mga interesado man kaangay ni Lidia nga wala pa makabati sang mensahe sang Ginharian. Kon “magtabok ka sa Macedonia,” mangin malipayon ka gid sa pagbulig sa ila.
[Kahon sa pahina 5]
Kon Paano Mahibaluan nga May Panginahanglan sa Pungsod nga Imo Sayluhan
• Tan-awa ang bag-o nga Tuigan nga Libro. Hibalua kon daw ano kadamo ang mga Saksi didto kon ipaanggid sa populasyon.
• Gamita ang Index sa pagpangita sang mga artikulo kag mga eksperiensia sa sina nga pungsod.
• Mamangkot sa mga manugbantala nga nakakadto ukon nakaistar sa sina nga pungsod.
• Kon ginabinagbinag mo ang pungsod nga mahimo ka makabantala sa imo kaugalingon nga hambal, magpanalawsaw kon daw ano kadamo didto ang nagahambal sang imo lenguahe paagi sa sekular nga mga reperensia, kaangay sang Internet.