Mga Pamangkot Gikan sa mga Bumalasa

Paano Ginatamod sang mga Saksi ni Jehova ang Pagboto?

May maathag nga mga prinsipio nga ginahatag sa Biblia nga nagabulig sa mga alagad sang Dios agod matigayon ang nagakaigo nga pagtamod sa sini nga butang. Apang, daw wala sing prinsipio batok sa pagboto mismo. Halimbawa, wala sing rason kon ngaa indi magboto ang katapo sang mga direktor agod magdesisyon may kahilabtanan sa ila korporasyon. Ang mga kongregasyon sang mga Saksi ni Jehova masami nagadesisyon tuhoy sa kon san-o hiwaton ang mga miting kag paano gamiton ang mga pundo sang kongregasyon paagi sa pagboto nga ginabayaw ang kamot.

Apang, ano naman ang pagboto sa mga piniliay sa politika? Sa pagkamatuod, sa pila ka demokratiko nga kadutaan, tubtob sa 50 porsiento sang pumuluyo ang wala nagaboto sa adlaw sang piniliay. Tuhoy sa mga Saksi ni Jehova, wala sila nagapasilabot sa kinamatarong sang iban sa pagboto; ukon sa bisan ano nga paagi wala sila nagapangampanya batok sa piniliay sa politika. Nagatahod kag nagakooperar sila sa mga awtoridad nga nagdaug sa sina nga mga piniliay. (Roma 13:1-7) Kon bala personal sila nga magaboto sa isa nga nagadalagan sa piniliay, ang tagsa ka Saksi ni Jehova magadesisyon pasad sa iya nahanas-sa-Biblia nga konsiensia kag sa paghangop sa iya responsabilidad sa Dios kag sa Estado. (Mateo 22:21; 1 Pedro 3:16) Sa paghimo sining personal nga desisyon, ginabinagbinag sang mga Saksi ang pila ka butang.

Una, si Jesucristo nagsiling sa iya mga sumulunod: “Indi sila bahin sang kalibutan, subong nga ako indi bahin sang kalibutan.” (Juan 17:14) Ginatamod sing serioso sang mga Saksi ni Jehova ini nga prinsipio. Bangod “indi bahin sang kalibutan,” wala sila nagapakigbahin sa politikal nga mga hilikuton sang kalibutan.—Juan 18:36.

Ikaduha, ginpatuhuyan ni apostol Pablo ang iya kaugalingon subong “embahador” nga nagatiglawas kay Cristo sa katawhan sang iya adlaw. (Efeso 6:20; 2 Corinto 5:20) Nagapati ang mga Saksi ni Jehova nga si Cristo Jesus nagalingkod na karon sa trono subong Hari sang langitnon nga Ginharian sang Dios, kag sila, kaangay sang mga embahador, dapat magbantala sini sa mga pungsod. (Mateo 24:14; Bugna 11:15) Ginapaabot ang mga embahador nga walay nadampigan kag wala nagapasilabot sa mga hilikuton sang mga pungsod nga ginpadalhan sa ila. Subong mga tiglawas sang langitnon nga Ginharian sang Dios, ang mga Saksi ni Jehova nagabatyag man sing kaanggid nga obligasyon nga indi magpasilabot sa politika sang mga pungsod nga ila ginapuy-an.

Ang ikatlo nga butang nga dapat binagbinagon amo nga yadtong nagboto agod makapungko sa palangakuan ang isa ka tawo manabat sa kon ano ang iya ginahimo. (Ipaanggid ang 1 Timoteo 5:22, The New English Bible.) Dapat binagbinagon sing mahalungon sang mga Cristiano kon bala luyag nila abagahon ina nga responsabilidad.

Ikap-at, ginapakabahandi gid sang mga Saksi ni Jehova ang ila Cristianong paghiusa. (Colosas 3:14) Kon nagapasilabot ang mga relihion sa politika, ang resulta masami amo ang pagbinahinbahin sang ila mga katapo. Bilang pagsunod kay Jesucristo, ginalikawan sang mga Saksi ni Jehova nga madalahig sa politika kag sa amo mahuptan ang ila Cristianong paghiusa.—Mateo 12:25; Juan 6:15; 18:36,37.

Ikalima kag katapusan, ang indi nila pagpakigbahin sa politika nagahatag sa mga Saksi ni Jehova sing kahilwayan agod makapakighambal sa mga tawo sa tanan nga partido tuhoy sa importante nga mensahe sang Ginharian.—Hebreo 10:35.

Bangod sang Makasulatanhon nga mga prinsipio nga ginhinambitan, ang mga Saksi ni Jehova sa madamo nga kadutaan namat-od sing personal nga indi magboto sa mga piniliay sa politika, kag ang ila kahilwayan sa paghimo sina nga desisyon ginasakdag sang kasuguan sang pungsod. Apang, ano kon ginapatuman sang kasuguan nga magboto ang mga banwahanon? Sa sina nga kahimtangan, salabton sang tagsa ka Saksi ang pagdesisyon suno sa ila konsiensia kag pasad sa Biblia kon paano atubangon ang kahimtangan. Kon ang isa mamat-od nga magkadto sa presinto, iya ina desisyon. Kon ano man ang iya himuon sa presinto yara na ina sa ulot niya kag sang iya Manunuga.

Ang Nobiembre 15, 1950, nga guwa sang The Watchtower, sa pahina 445 kag 446, nagsiling: “Kon ginapilit ni Cesar ang iya mga pumuluyo nga magboto . . . makakadto [ang mga Saksi] sa mga presinto. Diri sini nga kinahanglan nila markahan ukon sulatan ang balota sa kon ano ang ila tindog. Ang mga botante makahimo sang luyag nila sa ila balota. Busa diri sa presensia sang Dios nga ang iya mga saksi magahulag nahisuno sa iya mga sugo kag suno sa ila pagtuo. Indi namon responsabilidad nga tudluan sila kon ano ang himuon sa balota.”

Ano abi kon ang di-tumuluo nga bana sang isa ka Cristianong babayi mamilit nga magkadto sia sa presinto? Bueno, napaidalom sia sa iya bana, subong nga ang mga Cristiano napaidalom sa superyor nga mga awtoridad. (Efeso 5:22; 1 Pedro 2:13-17) Kon tumanon niya ang iya bana kag magkadto sa presinto, personal niya ina nga desisyon. Wala sing dapat magmulay sa iya.—Ipaanggid ang Roma 14:4.

Ano naman ang tuhoy sa pungsod nga wala ginmando sang kasuguan ang pagboto apang ang mga balatyagon mabaskog batok sa wala nagakadto sa presinto—ayhan nagabutang sa ila sa pisikal nga katalagman? Ukon ano abi kon ang mga indibiduwal, samtang indi obligado sing legal sa pagboto, multahan sing daku sa pila ka paagi kon indi sila magkadto sa presinto? Sa sini kag sa kaanggid nga mga kahimtangan, ang isa ka Cristiano amo ang maghimo sang iya kaugalingon nga desisyon. “Ang tagsatagsa magadala sang iya kaugalingon nga lulan.”—Galacia 6:5.

May mga tawo nga mahimo masandad kon makita nila nga sa tion sang piniliay sa ila pungsod, ang pila ka Saksi ni Jehova nagakadto sa presinto kag ang iban wala. Mahimo sila magsiling, ‘Ang mga Saksi ni Jehova wala nagahilisugot.’ Apang, dapat kilalahon sang mga tawo nga sa mga butang nga nagadalahig sang indibiduwal nga konsiensia kaangay sini, ang tagsa ka Cristiano dapat maghimo sang iya kaugalingon nga desisyon sa atubangan ni Jehova nga Dios.—Roma 14:12.

Kon ano man ang personal nga mga desisyon sang mga Saksi ni Jehova sa nanuhaytuhay nga mga kahimtangan, nagahalong sila nga mahuptan ang ila Cristianong pagkawalay nadampigan kag kahilwayan sa paghambal. Sa tanan nga butang, nagasandig sila kay Jehova nga Dios agod palig-unon sila, hatagan sila sing kaalam, kag buligan sila nga malikawan ang pagkompromiso sang ila pagtuo sa bisan ano nga paagi. Busa ginapakita nila ang pagsalig sa pinamulong sang salmista: “Ikaw ang akon igang kag akon kuta; kag tungod sa imo ngalan ubayan mo ako kag tuytuyan mo ako.”—Salmo 31:3.