Kita ang Sahi nga may Pagtuo

Pagbantala sing Ginharian sang Dios sa mga Isla sang Fiji

NAGHAMBAL anay si Jesucristo tuhoy sa duha ka dalan. Ang isa malapad kag nagapadulong sa kamatayon. Ang isa naman masipot apang nagapadulong sa kabuhi. (Mateo 7:13, 14) Agod buligan ang mga tawo sa pagpili sing husto nga dalan, gintuyo ni Jehova nga Dios nga mabantala sa bug-os nga kalibutan ang maayong balita sang Ginharian. (Mateo 24:14) Busa, nagapamati ang mga tawo bisan diin sa mensahe sang Ginharian, kag ang iban nagapili sing kabuhi paagi sa paghimo sang ila kaugalingon nga mangin “ang sahi nga may pagtuo padulong sa pagtipig nga buhi sa kalag.” (Hebreo 10:39) Ginaagda namon kamo nga basahon ang pagpili sing kabuhi sang pila ka pumuluyo sang Fiji kag sang kaiping nga mga isla sang Bagatnan nga Pasipiko.

Nagsalig Sila kay Jehova

Nagaeskwela pa lang si Mere sang una niya nga nabatian ang mensahe sang Ginharian sang 1964. Bangod nagaistar sia sa isa ka naligwin nga isla, talagsa lang sia mapakig-angutan sang mga Saksi ni Jehova. Apang, sang ulihi, nakatigayon sia sing sibu nga ihibalo sa Biblia. Sadto, kasal sia sa isa ka lalaki nga pangulo sa iya minuro. Bangod sang pagpili ni Mere nga magkabuhi suno sa mga prinsipio sang Biblia, ginpintasan sia sang iya bana kag sang iya mga paryente, kag gintamay sia sang iya mga kasimaryo. Walay sapayan sina, nabawtismuhan sia sang 1991.

Wala madugay sa tapos sadto, naghumok ang balatyagon sang bana ni Mere, nga si Josua, kag nagbuylog pa gani sia sa mga paghinun-anon sa Biblia nga ginahimo ni Mere upod sa ila kabataan. Wala na nagsimba si Josua sa Metodista nga Simbahan. Apang, subong pangulo, gindumalahan niya gihapon ang semanal nga mga miting sang minuro. Sa panulok sang mga taga-minuro, indi mainunungon si Josua, kay ang Metodista nga Simbahan isa ka importante nga bahin sang pagkabuhi sa minuro sa Fiji. Gani, ginlaygayan sang lokal nga pastor si Josua nga magbalik sa iya una nga relihion.

Maisugon nga ginpahibalo ni Josua nga namat-od na sila sang iya pamilya kag determinado sila nga simbahon si Jehova nga Dios “sa espiritu kag kamatuoran.” (Juan 4:24) Sa masunod nga miting sang minuro, nagdesisyon ang pinakamataas nga pangulo nga pahalinon si Josua kag ang iya pamilya sa minuro subong mga sinikway. Ginhatagan sila sing pito ka adlaw nga biyaan ang isla kag ang ila balay, kadutaan, kag pananom—huo, ang ila bug-os nga palangabuhian.

Ginbuligan si Josua kag ang iya pamilya sang ila espirituwal nga mga kauturan sa iban nga isla, naghatag sa ila sing lugar nga maistaran kag duta nga mapangumahan. Bawtismado na karon si Josua kag ang iya panganay nga anak nga lalaki, kag ang isa pa ka anak nga lalaki nagaalagad subong di-bawtismado nga manugbantala sang maayong balita. Nagpalista sining karon lang si Mere subong regular payunir (bug-os tion nga manugbantala sang Ginharian). Ang pagpili nila nga alagdon si Jehova nagresulta sa pagkadula sing posisyon kag materyal nga mga butang, apang kaangay ni apostol Pablo, ginkabig nila ini subong wala sing pulos kon ipaanggid sa kon ano ang ila natigayon.—Filipos 3:8.

Pagpili nga Nagadalahig sa Konsiensia

Ang pagpili nga sundon ang nahanas-sa-Biblia nga konsiensia nagakinahanglan sing pagtuo kag kaisog. Amo gid sini ang kahimtangan sang ­bag-o bawtismado nga si Su­raang, isa ka lin-ay nga nagaistar sa Tarawa, isa sang mga isla sang Kiribati. Nangayo sing pahanugot si Su­raang nga indi niya mahimo ang isa ka bahin sang iya trabaho subong nars sa ospital. Wala sia gintugutan, kag bangod sini ginpadala sia sa pag-atipan sa isa ka diutay nga sentro sa nabaw-ing nga isla diin napahilayo sia sa iya mga masigkatumuluo.

Sa sina nga isla kinabatasan na para sa ­bag-o nga mga nagaabot nga magdulot sa lokal nga “espiritu.” Nagapati ang mga tawo nga magaresulta sing kamatayon ang indi paghimo sini. Bangod wala magpasugot si Su­raang nga himuon ini nga buhat sang idolatriya para sa iya kag sa iya kaupdanan, ginpaabot-abot sang mga taga-minuro nga kug-on sia sang akig nga espiritu. Sang wala sing malain nga natabo kay Su­raang ukon sa iya kaupdanan, madamong kahigayunan ang nabuksan sa iya agod makapanaksi.

Apang wala pa matapos ang mga pagtilaw kay Su­raang. Ginkabig sang pila ka soltero sa sina nga isla nga isa ka hangkat ang pagsulay sa mga lin-ay nga nagaduaw. Apang, ginpamatukan ni Su­raang ang ila mga paghaylo kag ginhuptan ang iya integridad sa Dios. Sa pagkamatuod, nakaregular payunir pa sia, bisan pa nagatrabaho sia bilang nars sing 24 oras kada adlaw.

Antes sang salosalo para kay Su­raang sang manughalin na sia sa isla, nagsiling ang mga tigulang sa minuro nga sia ang nahaunang matuod nga misyonera nga nagduaw sa ila. Bangod sang malig-on niya nga panindugan sa mga prinsipio sa Biblia, ang iban sa sina nga isla nagbaton sang mensahe sang Ginharian.

Mga Hangkat sa Pisikal

Ang pagkanaligwin sang pila ka minuro nagakahulugan nga dapat manikasog sing lakas ang katawhan ni Jehova agod makapakigbahin sa ministeryo kag makatambong sa Cristianong mga miting. Binagbinaga ang halimbawa sang apat ka bawtismado nga mga Saksi—isa ka lalaki kag tatlo ka babayi—nga nagahinguyang sing inoras sa pagpakadto kag sa pagpauli halin sa mga miting. Ang ila paglakbay sa pagpakadto lamang nagalakip sing tatlo ka pagtabok sa suba. Kon madalom ang tubig, ang utod nga lalaki amo anay ang una nga nagalangoy, ginaguyod ang daku nga kaldero nga ginasudlan sang ila mga bag, libro, kag mga bayo para sa miting. Nian nagalangoy sia pabalik agod buligan ang tatlo ka utod nga babayi.

Ang isa pa ka diutay nga grupo, nga nagatambong sa mga miting sa nabaw-ing nga isla sang Nonouti sa Kiribati, nakasumalang sing lainlain nga mga hangkat. Pito ukon walo lamang ka tawo ang makaigo sa balay nga ginatipunan nila. Ang iban nga nagatambong nagapungko sa guwa kag nagalili sa ­chicken ­wire nga mga dingding. Ang duog-tilipunan kitaon sa iban pa nga mga taga-minuro nga nagalabay halin kag pakadto sa ila dalagku nga mga simbahan. Sa pagkamatuod, nahibaluan sang mga alagad ni Jehova nga ang mga tawo, indi ang mga tinukod, ang matuod nga ginakahamut-an sang Dios. (Hageo 2:7) Ang isa ka bawtismado nga utod nga babayi sa isla tigulang na kag indi na makalakat sing malayo. Apang, ginabuligan sia sa ministeryo sang isa ka pamatan-on nga babayi, isa ka di-bawtismado nga manugbantala nga nagatulod sa iya sa karito. Daw ano nga apresasyon ang ginapakita nila para sa kamatuoran!

Ang kapin sa 2,100 ka manugbantala nga nagaalagad sa mga isla sang Fiji determinado nga magpadayon sa pagbantala sing maayong balita sang Ginharian sang Dios. Kag nagasalig sila nga madamo pa ang mangin “ang sahi nga may pagtuo padulong sa pagtipig nga buhi sa kalag.”

[Mapa sa pahina 8]

(Para sa aktual nga pormat, tan-awa ang publikasyon)

Australia

Fiji