Report sang mga Manugbantala sang Ginharian

Si Jehova ang ‘Nagapatubo Sini’ sa Fiji

ANG mga pagpakamaayo ni Jehova dayag sa matutom nga mga manugbantala sang Ginharian sa matahom nga kapuloan sang Fiji. Kapin na karon sa 1,049 ang mga saksi ni Jehova sa kapuloan, 10 porsiento nga pag-uswag sang sa nagligad nga tuig. Nagtanum sila kag nagbunyag, kag ginpatubo ini sang Dios.a—1 Corinto 3:6, 7.

Ang sanga talatapan sang Watch Tower Society nagsiling nga “sa wala ginapaabot ang mga tawo nagapakita sing interes sa pagtuon sing Biblia.” Ang mga katapo sang isa ka kongregasyon nagbantala sa isa ka nabaw-ing nga minuro nga sang una wala magbaton sa ila. Apang sini nga okasyon ang puno sang minuro nagpahibalo sa tanan nga taga-minuro nga magpabilin sila sa ila balay agod mamati sa mga Saksi ni Jehova kag maghanda ang mga babayi sing pamahaw para sa kauturan sa “community hall.” Sang pagduaw liwat duha ka semana sang ulihi, nasapwan sang regular payunir nga 28 ka tawo ang handa sa pagtuon sing Biblia. Kutob sadto, ini nga minuro ginaduaw nga dala ang maayong balita sa kada duha ka semana agod buligan ang mga interesado. Sa kada pagduaw “may ginadugang pa nga mga pagtuon.”

Ang isa sang 68 ka bag-o nabawtismohan sa distrito nga kombension kasan-o lang amo ang isa ka manunudlo sa “Sunday school” sa sulod sang siam ka tuig. Naghalin sia sa isa ka relihioso gid nga pamilya. Nakahambal sia sang duha ka Saksi sa ila pagpamalaybalay nga ministeryo, kag “sa tapos sang malawig nga paghambalanay kag madamo nga pagduaw liwat, ang pagtuon naumpisahan sang ulihi.” Pagligad sang duha ka bulan nga pagtuon sang Biblia, naghalin sia sa iya palangakoan subong manunudlo sa “Sunday school,” nagtindog sa kamatuoran, kag nabawtismohan isa ka tuig sang ulihi. Subong sang mga pulong ni apostol Pablo, sia nagsiling: “Mahimo nga nabatian ninyo ang akon makugi nga pagpangabudlay sa dimatuod nga relihion sang ako tuman kakugi sa mga tradisyon sang akon mga ginikanan. Apang karon nasapwan ko na ang kamatuoran kag nalipay ako sa pag-alagad kay Jehova upod sa inyo.”—Ipaanggid ang Galacia 1:13, 14.

Sang 1984, ang Fiji may duha ka distrito nga kombension sa una nga tion. Beinte-dos ka gulang gikan sa daku nga pulo ang nagtanyag sang ila kaugalingon nga gasto nga suportahon ang programa sa ikaduha gamay nga kombension sa pihak nga pulo. Ginhimus sang sanga talatapan ang paglakbay kag nagpaabot nga 90 ka utod ang magtambong gikan sa daku nga pulo. Apang, 115 ang naglakbay paagi sa espesyal nga eroplano kag 320 paagi sa gin-arkilahan nga barko. Bangod sang maayo nga paggawi sang mga Saksi, ang isa ka piloto sang eroplano nagsiling: “Natingala gid ako sa ila paggawi, handa sila sa pagsunod sang mga direksion. Sang ginpahibalo ko nga dapat sila manaug sa eroplano bangod may diperensya ang makina, mahipos sila nga nagpalanaug nga wala nagakumodkumod ukon nagareklamo. Sa pagsakay liwat malipayon nga nagsaka sila sing mahipos kag wala nagakinamog. Kuntani ang tanan nga pasahero kasubong ninyo.”

Ang puno nga inhenyero sang gin-arkilahan nga eroplano nagkomento: “Nahamuot kami sa inyo subong mga pasahero, bangod lain gid kamo sa Cristianong grupo sang mga pamatan-on nga bag-o lang namon gindul-ong sa pihak nga pulo. . . . Matinlo kamo kag mahapos pakig-angotan.” Ang isa ka kaupod nga pasahero nagsiling: “May nakita ako nga wala ko pa gid maeksperiensiahi sang una . . . Nagakatulog ako sa mabugnaw nga salog sang ang isa sang inyo mga utod nga babayi naghatag sa akon asawa kag sa akon sang iya kutson agod tulugan namon. Madugay ko na ginapangita ang relihion nga kasubong sini.” Ini nga tawo nagtambong sa kombension agod makakita kag makatuon sing dugang pa.

Ang matuod, ang maayong paggawi sining tanan nga kauturan amo ang dapat paabuton sa matuod nga mga Cristiano. Si Jesus nagsiling: “Ang tagsa ka kahoy nga maayo nagapamunga sing maayo nga bunga.” (Mateo 7:17) Makalilipay makita ang pag-uswag nga ginahatag ni Jehova sa iya matutom nga mga sumilimba sa Fiji. Kag wala sing duhaduha nga madamo pa ang magabaton sing maayong balita samtang nagapamati sila sing dugang pa kag nagapadayon sa pagpanilag sang maayong paggawi sang katawhan ni Jehova.

[Footnote]