Mahimo Ka Bala Mangin Malapit sa Indi Makita nga Dios?

‘Paano ko mapalambo ang suod nga kaangtanan sa isa nga indi ko makita?’ mahimo ipamangkot mo. Daw makatarunganon ina nga pamangkot. Apang binagbinaga:

DAW ano bala ka importante ang panan-aw sa pagpalambo sing mahigugmaon kag mapinadayunon nga mga kaangtanan? Indi bala ang di-makita nga mga butang pareho lang, kon indi man kapin, ka importante? Matuod gid! Bangod sina ang pila ka tawo nakapalambo sing suod nga kaangtanan sa iban paagi sa tayuyon nga pagsulatay—ang ila mga sulat bunayag nga nagapaalinton sang mga naluyagan, wala naluyagan, tulumuron, prinsipio, lahog, kag iban pa nga mga kinaiya sang personalidad ukon mga ginakawilihan.

Ginapakita man sang mga bulag nga ang panan-aw indi importante sa pagpalambo sing suod nga kaangtanan sa iban. Binagbinaga ang halimbawa nanday Edward kag Gwen, isa ka mag-asawa nga bulag.a Nakilala ni Edward si Gwen sa isa ka eskwelahan para sa mga bulag, diin magkabutho sila. Nagdayaw sia sa mga kinaiya ni Gwen, ilabi na ang pagkabunayag niya sa paghambal kag paggawi, kag ang iya maayo gid nga panimuot sa trabaho. Subong man, naluyagan ni Gwen si Edward bangod, suno sa iya, “yara sa iya ang tanan nga kinaiya nga gindak-an ko nga ginapatihan nga importante.” Nagnobyahanay sila, kag pagligad sang tatlo ka tuig nagpakasal sila.

“Kon magkaupod kamo,” siling ni Edward, “ang pagkabulag wala gid sing kabilinggan sa pagtukod sing isa ka kaangtanan sa iban. Mahimo nga indi ninyo makita ang isa kag isa, apang ang mga balatyagon indi bulag.” Sa karon, pagligad sang 57 ka tuig, nagahigugmaanay gihapon sila sing tudok. Ginapaathag nila nga ang sekreto sang ila makalilipay nga kaangtanan nagadalahig sang di-magkubos apat ka butang: (1) pagtalupangod sa mga kinaiya sang iban, (2) paghunahuna kag pagkaganyat sa sina nga mga kinaiya, (3) paghupot sing maayo nga komunikasyon, kag (4) paghimo sing mga butang nga magkaupod.

Ining apat ka punto importante sa bisan anong maayo nga kaangtanan, sa ulot man sang mga mag-abyan, mag-asawa ukon, sing labi pa ka importante, sa ulot sang mga tawo kag sang Dios. Sa masunod nga artikulo, tan-awon naton kon paano ang pag-aplikar sining mga punto makabulig sa aton sa pagpalambo sing suod nga kaangtanan sa Dios, bisan pa indi naton sia makita.b

[Mga nota]