TOPIKO SA KOBER | PUEDE KA BALA MANGIN SUOD SA DIOS?
Nagabatyag Ka Bala nga Suod sa Dios?
“Mangin malipayon ka kag indi magkabalaka kon may suod ka nga kaangtanan sa Dios. Daw pareho bala nga ginahunahuna niya pirme kon ano ang pinakamaayo para sa imo.”—CHRISTOPHER, PAMATAN-ON NGA TAGA-GHANA.
“Makita sang Dios ang imo kasubo kag higugmaon ka niya kag talupangdon labaw sa imo ginapangayo.”—HANNAH, 13 ANYOS, ALASKA, U.S.A.
“Amo ini ang pinakabilidhon kag mahim-ong nga balatyagon, kon may suod ka nga kaangtanan sa Dios!”—GINA, JAMAICAN NGA BABAYI NGA MGA 45 ANYOS.
Indi lang sanday Christopher, Hannah, kag Gina ang kumbinsido nga ginakabig sila sang Dios nga iya mga abyan kundi madamo pa sa bilog nga kalibutan. Ikaw? Nagabatyag ka man bala nga suod sa Dios? Ukon gusto mo bala nga mangin suod sa iya? Mahimo maghunahuna ka: ‘Posible gid bala nga mangin suod sa Labing Gamhanan nga Dios? Kon huo, paano?’
POSIBLE NGA MANGIN SUOD SA DIOS
Suno sa Biblia, posible kita makatigayon sang suod kag personal nga kaangtanan sa Dios. Ang Biblia nagasiling nga ang Dios nagtawag sa Hebreong patriarka nga si Abraham nga “akon abyan.” (Isaias 41:8) Talupangda man ang pangagda nga mabasa sa Santiago 4:8: “Magpalapit kamo sa Dios, kag magapalapit sia sa inyo.” Gani maathag nga ang suod nga kaangtanan, ang pagpakig-abyan sa Dios, posible gid. Pero bangod di-makita ang Dios, paano kita ‘makapalapit’ kag mangin suod sa iya?
Para masabat ina nga pamangkot, binagbinaga kon paano nagapakig-abyan ang tawo. Masami nga nagasugod ini sa pagpakilala sang ila ngalan. Dayon, paagi sa pag-istoryahanay pirme parte sa ila panghunahuna kag balatyagon, nagasuod pa gid sila. Mangin malig-on pa gid ini kon manikasog sila sa paghimo sang maayo sa isa kag isa. Pareho man sini ang pagpakigsuod sa Dios. Tan-awon naton kon paano.