Sugilanon sang Kabuhi

Malipayon kag Mapinasalamaton Walay Sapayan sang Makahalanusbo nga Kadulaan

PANUGIRON NI NANCY E. PORTER

Hunyo 5, 1947, sadto, isa ka magin-ot nga gab-i sa Bahamas, ang mga isla sa bagatnan-sidlangan nga baybayon sang Estados Unidos. Ang isa ka opisyal sang imigrasyon kibot nga nagduaw sa amon sang akon bana nga si George. Gindaho niya sa amon ang isa ka sulat nga nagasiling nga wala na kami ginatugutan nga magpabilin sa isla kag dapat “magbiya kami sing insigeda sa teritoryo!”

KAMI ni George ang una nga mga misyonero sang mga Saksi ni Jehova nga nag-abot sa Nassau, ang pinakadaku nga siudad sa Bahamas. Gin-asayn kami diri, sa tapos makagradwar sa ikawalo nga klase sang Gilead, ang isa ka misyonero nga eskwelahan sa naaminhan nga bahin sang New York. Ano ang nahimo namon ngaa may subong sini nga reaksion pagkatapos lamang sang tatlo ka bulan nga pagtener? Kag paano nga pagligad sang kapin sa 50 ka tuig, diri pa ako gihapon?

Paghanas sa Ministeryo

Ang akon amay nga si Harry Kilner, amo ang may daku nga impluwensia sa akon paagi sang pagkabuhi. Nagpahamtang sia sing maayo gid nga halimbawa sa akon, kag naghimo sing madamo nga mga sakripisyo agod mangin isa sang mga Saksi ni Jehova. Bisan pa indi maayo ang iya panglawas, nagabantala sia halos kada talipuspusan sang semana kag makugi nga nagauna sang mga intereses sang Ginharian. (Mateo 6:33) Pigado gid kami sa pinansial, apang ang iya balaligyaan sing sapatos amo ang sentro sang espirituwal nga hilikuton sa Lethbridge, Alberta, Canada, sang katuigan 1930. Ang una ko gid nga handumanan amo ang tuhoy sa bug-os tion nga mga ministro sang mga Saksi ni Jehova, nga ginatawag mga payunir, nga nagaduaw sa amon puluy-an kag nagapaambit sang mga eksperiensia.

Sang 1943, nagsugod ako sa pagpayunir malapit sa Fort Macleod kag Claresholm, Alberta. Sadto nga tion, ang amon pagbantala nga hilikuton gindumilian sa Canada bangod sang sayop nga impormasyon nga ginpalapnag sang mga manugpamatok sa tion sang Bug-os Kalibutan nga Inaway II. Ang amon teritoryo nagasakop sing 50 kilometros halin sa pamuno tubtob sa punta, apang bangod bata pa kag mapagsik, daw sa wala lang sa amon ang pagbisikleta ukon ang paglakat agod malab-ot ang magagmay nga mga kumunidad kag mga kaumhan sa sadto nga duog. Sadto nga tion, may kahigayunan ako nga makighambal sa pila ka gradwado sa Gilead, kag ang ila mga eksperiensia nagpukaw gid sang akon handum nga mangin isa ka misyonero.

Sang 1945, napamana ko si George Porter, nga taga-Saskatchewan, Canada. Ang iya mga ginikanan nangin makugi nga mga Saksi kutob pa sang 1916, kag ginpili man niya ang bug-os tion nga ministeryo subong iya karera. Ang amon una nga asaynment amo ang matahom nga Lynn Valley sa North Vancouver, Canada. Wala madugay pagkatapos sadto gin-agda kami sa Gilead.

Nakapakighambal ako sa mga naggradwar sa nagkalainlain nga teolohiko nga mga seminaryo sa sulod sang mga tinuig kag nakita ko kon paano ang ila teolohiko nga paghanas amat-amat nga nagpaluya sang ila pagtuo sa Dios kag sa iya Pulong, ang Biblia. Sa kabaliskaran, ang amon natun-an sa Gilead nagpauswag sang amon ikasarang sa paghunahuna kag labaw sa tanan nagpabakod sang amon pagtuo kay Jehova nga Dios kag sa iya Pulong. Ang amon mga kabutho gin-asayn sa Tsina, Singapore, India, mga pungsod sa Aprika, Bagatnan nga Amerika kag sa iban pa nga duog. Madumduman ko pa ang kalangkag sang nahisayran namon nga ang amon asaynment amo ang tropiko nga mga isla sang Bahamas.

Kon Paano Kami Nakapabilin

Kon ipaanggid sa mga paglakbay sang amon mga kabutho pakadto sa ila teritoryo, ang amon paglakbay pakadto sa Bahamas indi tuman kadugay. Wala madugayi, nabatyagan na namon ang mainit nga klima kag nakita ang asul nga kalangitan, ang buluberdihon nga tubig, ang nanuhaytuhay malus-aw nga duag sang mga tinukod, kag ang di-maisip nga mga bisikleta. Apang, ang una nga nagtandog gid sa akon amo ang diutay nga grupo sang lima ka Saksi nga naghulat sa amon sang nagdungka ang amon sakayan. Sang ulihi amon nahisayran nga tuhay gid ang kultura diri gikan sa amon nga naandan. Halimbawa, ginsilingan ang akon bana nga untaton niya ang pagtawag sa akon nga sweetheart sa atubangan sang mga tawo, bangod ina nga ekspresyon masami ginagamit sa relasyon sa guwa sang pag-asawahay.

Wala magdugay ang mga klero, nga nahangawa bangod sang hilway nga pagpakig-angot namon sa mga tawo, sayop nga nagsumbong sa amon subong mga Komunista. Subong resulta, nakabaton kami sing mando nga maghalin sa pungsod. Apang ang mga Saksi​​—⁠nga wala pa 20 sa mga isla sadto⁠​—⁠​insigeda nga nakatigayon sing linibo ka pirma sa isa ka petisyon nga tugutan kami sa pagpabilin. Sa amo, ang pagpahalin sa amon wala magmadinalag-on.

Padulong sa Isa ka Bag-o nga Teritoryo

Ang kamatuoran sa Biblia madasig nga nagtubo sa mga tagipusuon sang nagahigugma sa Dios, gani dugang pa nga mga misyonero sa Gilead ang ginpadala sa Bahamas. Nian, sang 1950, gintukod ang isa ka sanga talatapan. Napulo ka tuig sang ulihi, si Milton Henschel, isa ka katapo sang talapuanan sa ulong-talatapan sa Brooklyn, New York, nagduaw sa Bahamas kag namangkot sa mga misyonero kon sin-o ang maluyag nga magsaylo kag sugdan ang pagbantala nga hilikuton sa isa pa ka isla sang Bahamas. Nagboluntaryo kami ni George, kag sa amo nagsugod ang nangin 11 ka tuig nga pagpabilin sa Long Island.

Ining isla, nga isa sang madamo nga pulo sang Bahamas, may kalabaon nga 140 kilometros kag kasangkaron nga 6 kilometros, kag wala ini sing kinaandan nga mga banwa sadto. Ang kapital sini nga Clarence Town, may mga 50 ka pamalay. Ang kabuhi medyo sinadto pa​​—⁠wala sing elektrisidad, wala sing mga gripo, ukon pasilidad sa pagluto ukon mga tubo sa sulod sang balay. Sa amo dapat kami magpasibu sa ginatawag nga naligwin nga pangabuhi sa isla. Ang naluyagan gid nga topiko sang paghambalanay diri amo ang tuhoy sa kapagros sang tawo. Natun-an namon nga indi pag-ilakip sa amon panamyaw ang pamangkot nga, “Kamusta ka na karon?” sanglit ang sabat sa masami amo ang malawig nga kasaysayan sang bug-os nga pagpabulong sang isa ka tawo.

Ang kalabanan sang amon pagpanaksi ginahimo sa kusina pa kusina bangod masapwan sing masami ang mga tawo sa sulod sang ila kusina sa guwa sang balay nga may atop nga kugon kag gatong-nga-kahoy sa dapog. Ang mga kumunidad panguna nga ginahuman sang mga imol apang mabuot gid nga mga mangunguma kag mga mangingisda. Ang kalabanan sa ila indi lamang tuman ka relihioso kundi labi ka mapinatihon sa disparatis. Ang tumalagsahon nga mga hitabo kinaandan nga ginahangop subong mga patimaan.

Ang mga klero wala gid natahap sa pagsulod sa mga puluy-an sang mga tawo kag ginagisi ang mga literatura sang Biblia nga ginbilin namon didto. Sa amo hinadlukan ang mga mahinadlukon, apang indi tanan naghadlok sa ila. Halimbawa, ang isa ka maisog nga 70 anyos nga babayi wala nagpadala sa pahog. Luyag niya nga mahangpan mismo ang Biblia, kag sang ulihi nangin isa sia ka Saksi upod sang pila nga iban pa. Bangod nasapwan namon ang dugang pa nga interesado sa tunga sang mga tawo, nagamaneho si George sing mga 300 kilometros sa pila ka Domingo, sa pagbulig sa sining mga interesado nga makatambong sa amon mga miting.

Sa sulod sang una nga mga binulan sang wala pa sang iban nga mga Saksi, ginhuptan namon ni George ang amon espirituwalidad paagi sa paghiwat sang tanan nga Cristianong mga miting sing regular. Dugang pa, maukod namon nga ginasunod ang programa sa pagtuon kada Lunes sang gab-i sa pagtinuon sa magasin nga Lalantawan kag pagbasa sang Biblia. Ginabasa man namon ang tanan nga guwa sang Ang Lalantawan kag Magmata! insigeda pagkabaton namon sini.

Napatay ang akon amay samtang didto pa kami sa Long Island. Sang masunod nga tig-ilinit, sang 1963, ginpatigayon namon nga magkari si Nanay nga magpuyo malapit sa amon. Bisan pa tigulang na sia, nakapasibu sia sing maayo kag nagpuyo sa Long Island tubtob sang iya kamatayon sang 1971. Sa karon, may yara na kongregasyon sa Long Island kag isa ka bag-o nga Kingdom Hall.

Makahalanusbo nga Hangkat

Sang 1980, nabatyagan ni George nga amat-amat nagalain ang iya kapagros. Sa amo nagsugod ang isa sang pinakamasakit nga eksperiensia sa akon kabuhi​​—⁠ang makita ko ang akon pinalangga nga bana, ang akon masigkamanugpangabudlay, kag kaupod nga nagaluya bangod sang Alzheimer’s nga balatian. Nagbalhin ang iya bug-os nga personalidad. Ang katapusan kag labing makahalanusbo nga bahin naglawig sing halos apat ka tuig antes sia mapatay sang 1987. Ginaupdan niya ako sa ministeryo kag sa mga miting tubtob sa iya masarangan, bisan pa sa madamong beses ining panikasog nagpahibi sa akon. Ang pagpakita sang gugma sang amon Cristianong mga kauturan nangin makalulugpay gid, apang nahidlaw gid ako gihapon sa iya.

Ang isa sang pinakabilidhon nga bahin sang amon pag-asawahay ni George amo ang amon makalilipay pirme nga komunikasyon. Sa karon nga wala na si George, labi pa gid ako nga nagapasalamat nga si Jehova nagaagda sang iya mga alagad nga ‘magpangamuyo sing walay langan,’ nga ‘magpadayon sa pagpangamuyo,’ kag panginpuslan ang “tanan nga porma sang pangamuyo.” (1 Tesalonica 5:​17; Roma 12:12; Efeso 6:18) Makalilipay gid mahibaluan nga si Jehova nagakabalaka sa aton kaayuhan. Nabatyagan ko gid ang kaangay sa nabatyagan sang salmista nga nag-amba: “Pakamaayuhon si Jehova, nga sa adlaw-adlaw nagadala sang aton lulan.” (Salmo 68:19) Ang pag-atubang sa kon ano ang mahanabo kada adlaw, pagbaton sang akon mga limitasyon, kag pagpasalamat sa mga pagpakamaayo nga ginadala sang tagsa ka adlaw, subong sang ginalaygay ni Jesus, amo gid sa pagkamatuod ang pinakamaayo nga paagi sang pagkabuhi.​​—⁠Mateo 6:⁠34.

Makalilipay nga mga Padya sa Ministeryo

Ang padayon nga mangin masako sa Cristianong ministeryo nakabulig sa akon nga indi pagdumdumon sing labi ang nagligad. Sa amo nalandas ko ang sahi sang emosyon nga magdul-ong sa akon sa kapung-aw. Ang pagtudlo sa iban tuhoy sa kamatuoran sang Biblia isa ka pinasahi nga tuburan sang kalipay. Nag-aman ini sing maayong espirituwal nga rutina nga naghatag sing kahim-ong kag kalig-unan sa akon kabuhi.​​—⁠Filipos 3:⁠16.

Isa ka bes, nakabaton ako sang isa ka tawag sa telepono gikan sa isa ka babayi diin akon napaambit ang mensahe sang Ginharian mga 47 ka tuig ang nakaligad antes sini. Anak sia sang isa sang akon una nga mga estudyante sa Biblia sang nag-abot kami sa Bahamas sang 1947. Ang iya iloy, amay, kag tanan niya nga manghod nga lalaki kag mga utod nga babayi nangin mga Saksi ni Jehova subong man ang kalabanan sang ila mga kabataan kag mga kaapuhan. Sa katunayan, kapin sa 60 ka katapo sang pamilya sining babayi mga Saksi. Apang sia mismo wala gid magbaton sang kamatuoran sa Biblia. Apang, sa karon, handa na gid man sia nga mangin isa ka alagad ni Jehova nga Dios. Isa gid ka daku nga kalipay nga makita ang diutay nga grupo sang mga Saksi didto sa Bahamas sang nag-abot kami ni George nga nagdamo sa kapin sa 1,400!

Kon kaisa ginapamangkot ako sang mga tawo kon bala nangilin ako nga wala sang mga anak nga akon. Sa pagkamatuod, ang pagtigayon sang mga kabataan mahimo nga isa ka pagpakamaayo. Apang, ang gugma nga padayon nga ginapakita sa akon sang akon espirituwal nga mga kabataan, mga kaapuhan, kag mga apo-sa-tuhod isa ka butang nga ayhan wala maeksperiensiahan sang tanan biolohiko nga ginikanan. Sa pagkamatuod, ang mga ‘nagahimo sing maayo’ kag ang “manggaranon sa maayong mga buhat” amo ang pinakamalipayon nga mga tawo. (1 Timoteo 6:18) Amo kon ngaa padayon nga masako ako sa ministeryo samtang ginatugot pa sang akon kapagros.

Isa ka adlaw sadto sa klinika sang dentista, isa ka babayi ang nagpalapit sa akon kag nagsiling, “Wala mo ako makilala, apang kilala ko ikaw, kag luyag ko lang pahibaluon ka nga ginapalangga ko gid ikaw.” Dayon ginsugid niya sa akon kon paano sia nakasapo sang kamatuoran sa Biblia kag daku gid ang iya pagpasalamat sa amon nga mga misyonero nga nag-abot kami sa Bahamas.

Sa isa pa ka tion sang pagpauli ko gikan sa bakasyon, nakita ko ang isa ka rosas sa ganhaan sang akon karon ginapuy-an nga sanga talatapan sang mga Saksi ni Jehova sa Nassau. May yara ini malip-ot nga sulat, “Nalipay gid kami sa imo pagbalik.” Ang akon tagipusuon nagaawas sa pagpasalamat, kag naghimo ini sa akon nga higugmaon si Jehova sing labi pa kon makita ko ang sahi sang mga tawo nga ginpatubas sang iya Pulong, organisasyon, kag espiritu! Sa pagkamatuod, ang masinakdagon nga kamot ni Jehova masami ginapadayag paagi sa mga tawo sa palibot naton.

Puno Gid Sing Pagpasalamat

Indi pirme nangin mahapos ang akon kabuhi, ni ang mga bahin sini mahapos sa karon. Apang may madamo gid ako nga rason nga mangin mapinasalamaton​—⁠ang kalipay sa ministeryo, ang gugma kag pagpalangga sang madamo gid nga Cristianong kauturan, ang mahigugmaon nga pag-atipan sang organisasyon ni Jehova, ang matahom nga mga kamatuoran sa Biblia, ang paglaum nga mangin kaupod sang mga hinigugma kon sila pagabanhawon, kag ang mga handumanan sang 42 ka tuig nga pag-asawahay sa isa ka matutom nga alagad ni Jehova. Antes sang amon pag-asawahay, ginpangamuyo ko nga kabay pa pirme ako mangin isa ka bulig sa akon bana agod makapabilin sa bug-os tion nga ministeryo, nga iya gid ginhigugma sing labi. Ginsabat ni Jehova sing mainayuhon ini nga pangamuyo. Gani luyag ko ipabutyag ang akon pagpasalamat kay Jehova paagi sa pagpabilin nga matutom sa iya.

Ang Bahamas isa ka bantog nga kaladtuan sang mga turista, nga nagagasto sing linibo ka dolyar agod makakadto kag magkalipay sa tropiko nga palibot. Bangod sang pagpamat-od nga alagdon si Jehova diin man luyag sang iya organisasyon, may makalilipay ako nga eksperiensia sa paglakbay halin sa pinakapunta nga bahin sining mga isla pakadto sa isa pa, nga nagabantala sang maayong balita sang Ginharian sang Dios. Apang, mas importante, akon nahisayran kag ginapakabahandi ang gugma sang pinakamainabyanon sa mga taga-Bahamas.

Nagapasalamat gid ako sa mga nagdala sang kamatuoran sa akon mga ginikanan, nga nagtanom man sa akon lanubo nga hunahuna kag tagipusuon sang tudok nga handum nga pangitaon una ang Ginharian sang Dios. Ang mga pamatan-on nga alagad ni Jehova sa karon mahimo man makabaton sang madamo nga pagpakamaayo kon sila man magsulod sa “daku nga ganhaan” nga nagadul-ong sa daku nga kahigayunan sang napasangkad nga ministeryo. (1 Corinto 16:⁠9) Kamo man magapasalamat gid sing daku kon gamiton ninyo ang inyo kabuhi sa pagpadungog sa “Dios sang mga dios,” nga si Jehova.​​—⁠Deuteronomio 10:17; Daniel 2:⁠47.

[Retrato sa pahina 24]

Nagabantala sa dalan sa Victoria, B.⁠C., sang 1944

[Retrato sa pahina 24]

Nag-eskwela kami ni George sa Eskwelahan sang Gilead sang 1946

[Retrato sa pahina 25]

Kaupod ni George sa atubangan sang puluy-an para sa mga misyonero sa Nassau, Bahamas, sang 1955

[Retrato sa pahina 26]

Ang puluy-an para sa mga misyonero sa Deadman’s Cay, diin nag-alagad kami halin sang 1961 tubtob 1972