Magtindog sing Bug-os kag Magtuo sing Malig-on

Pagbulig sa mga Pamatan-on Paagi sa Suno-sa-Tion nga Instruksion

SI Epafras isa anay ka Cristiano sang unang siglo nga naglakbay sa Roma. Apang, tungod sa nagakaigo nga rason, pirme niya ginapanumdom ang Colosas, nga isa ka siudad sa Asia Minor. Ginbantala niya anay didto ang maayong balita kag pat-od gid nga nabuligan niya ang pila ka taga-Colosas nga mangin mga disipulo ni Jesucristo. (Colosas 1:7) Nabalaka gid si Epafras sa iya mga masigkatumuluo sa Colosas, kay gikan sa Roma si apostol Pablo nagsulat sa ila: “Si Epafras . . . nagapadala sa inyo sang iya mga panamyaw, nga pirme nagapanikasog tungod sa inyo sa iya mga pangamuyo, agod nga sa katapusan makatindog kamo sing bug-os kag may malig-on nga pagtuo sa bug-os nga kabubut-on sang Dios.”​—⁠ Colosas 4:12.

Sing kaanggid, ang Cristianong mga ginikanan sa karon nagapangamuyo sing hugot tungod sa espirituwal nga kaayuhan sang ila mga kabataan. Ini nga mga ginikanan nagapanikasog nga mapatudok sa tagipusuon sang ila mga kabataan ang gugma sa Dios agod mangin malig-on sila sa pagtuo.

Madamong Cristianong pamatan-on ang nangayo sing bulig agod maatubang nila ang mga palaligban sa eskwelahan kag sa iban pa nga mga lugar. Ang isa ka 15-anyos nga bata nga babayi nagsiling: “Ang amon mga problema labi nga nagalubha. Ang kabuhi makakulugmat gid. Nagakinahanglan kami sing tabang!” Ginsabat bala ang mga pangabay sini nga mga pamatan-on kag ang mga pangamuyo sang diosnon nga mga ginikanan? Huo! Ang instruksion pasad sa Biblia ginaaman paagi sa “matutom kag mainandamon nga ulipon.” (Mateo 24:45) Ginasambit sini nga artikulo ang pila sang mga literatura nga nakabulig sa ginatos ka libo ka pamatan-on nga ‘magtindog sing bug-os kag magtuo sing malig-on.’ Binagbinagon naton ang pila sini nga mga publikasyon.

“Tan-awa . . . ang 15,000 ka Bag-ong Saksi!”

Sang Agosto 1941, ang tumalambong nga 115,000 nagtipon sa St. Louis, Missouri, E.⁠U.⁠A., para sa pinakadaku nga kombension sang mga Saksi ni Jehova nga ginhiwat sadto nga tion. Sa katapusan nga adlaw sini​—⁠sa “Adlaw Sang mga Kabataan”​—⁠mga 15,000 ka kabataan nga nagpungko malapit sa plataporma ang namati sing maayo samtang nagapamulongpulong si Joseph F. Rutherford sa tema nga “Mga Kabataan Sang Hari.” Sang malapit na matapos ang iya pamulongpulong, ang 71-anyos nga si Rutherford naghambal sa amaynon nga tono:

“Kamo tanan . . . nga kabataan nga nagaugyon . . . sa pagtuman sa Dios kag sa iya Hari, palihug magtindog kamo.” Ang mga kabataan nagtindog subong isa ka hubon. “Tan-awa,” tu-aw ni Utod Rutherford, “ang kapin sa 15,000 ka bag-ong saksi sa Ginharian!” May mabaskog nga palakpak. Sugpon pa sang humalambal: “Kamo tanan nga magahimo sang inyo masarangan agod sugiran ang iban sang ginharian sang Dios . . . palihug maghambal sing Huo.” Ang mga kabataan nagsabat sing mabaskog nga “Huo!” Nian ginpakita niya ang bag-ong libro nga Children, nga ginbaton upod ang malawig nga palakpak.

Pagkatapos sining makatalandog nga pamulongpulong, ang malaba nga kubay sang mga pamatan-on nagsaka sa plataporma, diin gindaho ni Utod Rutherford sa ila ang isa ka regalo nga kopya sang bag-o nga libro. Ang tumalambong nakahibi sa nakita. Isa ka nakasaksi sa hitabo ang nagsiling: “Ang bato lamang sing tagipusuon ang indi matandog sa pagtan-aw sa pamatan-on nga [nagapakita sing] bug-os nga pagsalig kag pagtuo sa ila Dios, si Jehova.”

Sadtong di-malipatan nga asambleya, 1,300 ka pamatan-on ang ginbawtismuhan bilang simbulo sang ila dedikasyon kay Jehova. Madamo sa ila ang nagapabilin nga malig-on sa pagtuo tubtob karon. Ginasuportahan nila ang lokal nga mga kongregasyon, nagaboluntaryo sa Bethel, ukon nagaalagad subong mga misyonero sa mga pungsod sa luwas. Sa pagkamatuod, ang “Adlaw Sang mga Kabataan” kag ang libro nga Children nagbilin sing dayon nga impresyon sa madamong lamharon nga tagipusuon!

“Daw Nag-abot Ini sa Husto Gid nga Tion”

Sang katuigan 1970, ang mga Saksi ni Jehova nagbalhag sing tatlo pa ka libro nga nagtandog sang tagipusuon sang ginatos ka libo ka pamatan-on. Ini amo ang Pagpamati sa Dakung Manunudlu, Your Youth​—⁠Getting the Best out of It, kag Ang Akon Libro sang mga Sugilanon sa Biblia. Sang 1982 ang mga serye sang “Pamangkot Sang mga Pamatan-on . . .” ginsugdan nga ibalhag sa Magmata! nga magasin. Ining mga artikulo ginbaton sing mapagsik sang mga pamatan-on kag mga tigulang. “Kada gab-i nagapasalamat ako sa Dios nga ginbalhag niya ini,” siling sang isa ka 14-anyos nga pamatan-on. “Naluyagan ko ang mga artikulo,” siling sang 13-anyos nga bata nga babayi, “daw nag-abot ini sa husto gid nga tion.” Ang mga ginikanan kag ang gintangdo nga Cristianong mga gulang nagaugyon nga ining mga artikulo suno sa tion kag mapuslanon.

Sang 1989 mga 200 ka artikulo sang “Pamangkot Sang mga Pamatan-on. .” ang ginbalhag sa Magmata! Sa “Diosnon nga Debosyon” nga Distrito nga Kombension sadto nga tuig, ang libro nga Questions Young People Ask​—⁠Answers That Work ginpaguwa. Nakabulig bala ini sa mga pamatan-on nga magpabilin nga malig-on sa pagtuo? Ang tatlo ka pamatan-on nagsulat: “Ini nga libro isa gid ka dalayawon nga butang para sa amon agod mahangpan ang amon mga problema kag agod mahibaluan kon paano ini atubangon. Salamat tungod sa inyo pagkabalaka sa amon kaayuhan.” Madamong lamharon nga bumalasa sa bug-os nga kalibutan ang nagaugyon.

“Ginbusog Sini ang Amon Pagkagutom”

Sang 1999, ang mga Saksi ni Jehova naghimo sing isa pa ka suno-sa-tion nga porma sang instruksion para sa mga pamatan-on​—⁠ang video nga Young People Ask​—⁠How Can I Make Real Friends? Ginbaton ini sing mapagsik. “Natandog gid ako sini nga video,” siling sang 14-anyos nga dalagita. “Mangin regular nga bahin ini sang amon espirituwal nga pagkaon,” siling sang isa ka nagasolo nga iloy. “Makalilipay mahibaluan nga ang aton mahirop nga Abyan, nga si Jehova, nagahigugma kag nagaulikid gid sa mga pamatan-on sa iya bug-os nga kalibutan nga organisasyon,” siling sang isa ka lamharon nga minyo nga babayi.

Ano ang nahimo sang video? Ang mga pamatan-on nagsiling: “Nakabulig ini sa akon agod mabantayan ang akon kaupdanan, agod magpasangkad sa kongregasyon, kag agod makig-abyan kay Jehova.” “Nagbulig ini sa akon nga maatubang sing maisog ang akon mga katubotubo.” “Nagpalig-on ini sang akon determinasyon nga alagaron si Jehova sa akon bug-os nga masarangan.” Kag ang isa ka mag-asawa nagsulat: “Salamat gid sa inyo tungod sang pag-aman sa amon sini nga ‘pagkaon.’ Ginbusog sini ang amon pagkagutom.”

Suno gid sa sugo nga ginhatag sang Dios, ang hinaplas nga “matutom kag mainandamon nga ulipon” nag-aman sing suno-sa-tion nga espirituwal nga pagkaon para sa tanan nga magabaton sini. Kag daw ano gid nga kalipay nga makita kon paano ining Makasulatanhon nga instruksion nagabulig sa mga pamatan-on sa karon nga ‘makatindog sing bug-os kag may malig-on nga pagtuo sa bug-os nga kabubut-on sang Dios’!