Tamda ang mga Butang Gikan sa Pagtamod sang Dios

SA NEW YORK, E.⁠U.⁠A., ang Septiembre 14, 2002, isa ka manayanaya kag mainit nga adlaw. Sadto nga adlaw, 6,521 ka tawo gikan sa nagkalainlain nga mga pungsod ang nagtipon sa Patterson Educational Center, kag sa duha pa ka duog sang mga Saksi ni Jehova sa Brooklyn kag sa Wallkill. Ang kadam-an nagtipon agod saksihan ang gradwasyon sang ika-113 nga klase sang Watchtower Bible School of Gilead. Ang mga estudyante naghalin sa 14 ka pungsod kag ginhinguyang nila ang ulihi nga lima ka bulan agod maghanda para sa pag-alagad subong mga misyonero sa 19 ka pungsod nga padalhan sa ila.

Si Carey Barber, nga 98 anyos na, kag katapo sang Nagadumala nga Hubon sang mga Saksi ni Jehova, ang tsirman sang programa. Ginpatalupangod niya ang halos 60-ka-tuig nga kahimusan sang Eskwelahan sang Gilead, nga nagsangkap sa linibo agod mag-alagad subong mga misyonero sa iban nga mga pungsod. Si Utod Barber nagkomento: “Indi pagpasobra ang magsiling nga may maayo gid nga mga resulta ang dugang nga paghanas sa ila. Linibolibo gid ka mahagop nga mga tawo sa bug-os nga duta ang nagdedikar sang ila kabuhi kay Jehova kag nagbaton sang iya matuod nga pagsimba kag sagrado nga pag-alagad sa bulig sang nahanas nga mga misyonero.”

Antes mag-eskwela sa Gilead, madamo sa mga estudyante ang nagpakita sing interes nga pasangkaron ang ila ministeryo. Isa ka mag-asawa ang nagtuon sing Mandarin sa sulod sang kapin sa isa ka tuig sa panikasog nga mahambal ang madamo nga mga Intsik sa ila lugar sa Canada. Isa pa ka mag-asawa ang nagmatumato sa pagtuon sing hambal nga Albanian kag sang ulihi nagsaylo sa Albania agod maatipan didto ang madamo nga mga interesado sa Biblia. Ang iban sa klase nagkadto sa Gilead gikan sa Hungary, Guatemala, kag Dominican Republic, ang mga pungsod nga ginsayluhan nila diin kinahanglan sing daku ang mga manunudlo sang Pulong sang Dios.

Antes maglakbay padulong sa ila mga teritoryo sa Aprika, Nasidlangan nga Europa, Sentral kag Bagatnan nga Amerika, kag sa Malayong Sidlangan, ang tanan nga naggradwar nga mga estudyante ginpalig-on nga binagbinagon ang Dios sa tanan nga ginahimo nila.

Tamda ang mga Butang Gikan sa Pagtamod sang Dios

Pagkatapos sang iya introduksion, ginpakilala ni Utod Barber si Maxwell Lloyd, nga katapo sang Komite sang Sanga sang Estados Unidos. Ginpadaku niya ang tema nga “Tamda ang Tanan nga Butang Gikan sa Pagtamod Sang Dios.” Ginpatalupangod ni Utod Lloyd ang halimbawa ni David kag sang Anak sang Dios, nga si Jesus. (1 Samuel 24:⁠6; 26:11; Lucas 22:42) Sa tapos mapahanumdom sa mga estudyante nga ang ila lima-ka-bulan nga pagtuon sang Biblia naghanas sa ila nga tamdon ang mga butang gikan sa pagtamod sang Dios, ang humalambal nagpamangkot: “Kon magdumala kamo sing mga pagtuon sa Biblia sa mga tawo sa inyo bag-o nga teritoryo, buligan bala ninyo sila sa pagpangatarungan gikan sa pagtamod sang Dios?” Kag tuhoy sa paglaygay sa iban, ginlaygayan niya ang mga estudyante: “Indi kamo magsiling, ‘Sa akon pagtamod, sa banta ko . . .’ Sa baylo, buligi sila nga mahangpan kon ano ang pagtamod sang Dios. Kon sundon ninyo ini nga paagi, mangin pagpakamaayo gid kamo sa inyo mga kaupod sa inyo teritoryo.”

Ang masunod nga may bahin sa programa amo si Gerrit Lösch, nga katapo sang Nagadumala nga Hubon. Sa pagpamulongpulong sa tema nga “Nagaupod Ako sa Inyo,” ginpatalupangod niya ang madamo nga mga okasyon nga nagsiling si Jehova sa iya matutom nga mga alagad, ‘Nagaupod ako sa inyo.’ (Genesis 26:​23, 24; 28:15; Josue 1:⁠5; Jeremias 1:​7, 8) Sa panahon naton, mapakita man naton ini nga pagsalig kay Jehova kon magpabilin kita nga matutom. Si Utod Lösch nagsiling: “Nagakabalaka bala kamo kon bala may makita kamo nga magatuon sing Biblia? Dumduma, si Jehova nagsiling, ‘Nagaupod ako sa inyo.’ Nagakabalaka bala kamo kon bala may bastante kamo nga materyal? Si Jehova nagsiling: ‘Indi ko gid kamo pagbiyaan ukon pagpatumbayaan.’ ” (Hebreo 13:⁠5) Naghinakop si Utod Lösch paagi sa pagpahanumdom sa mga estudyante nga nagsaad si Jesus nga mangin kaupod sia sang iya matutom nga mga disipulo sa paghimo-disipulo nga hilikuton.​—⁠Mateo 28:20.

“Masapwan Bala Ninyo ang Inyo Seguridad sa Masingki nga mga Pagtilaw?” amo ang tema sang instruktor sang Gilead nga si Lawrence Bowen. Nagsiling sia nga bangod sang mga hulusayon nga ginpautwas sa Eden, ang tanan nga maluyag sa paghatag kay Jehova sing eksklusibo nga debosyon nagaatubang sing mga kabudlayan kag, kon kaisa, sing masingki nga mga pagtilaw. Ginpalig-on niya ang naggradwar nga mga estudyante nga sundon ang halimbawa ni Jesus, nga nakasapo sing matuod nga seguridad paagi sa pagsalig sing bug-os kay Jehova kag sa pagbaton sa masingki nga mga pagtilaw nga gintugot ni Jehova agod mahimpit ang pagkamatinumanon sang iya Anak. (Hebreo 5:​8, 9) Si Jehova mahimo mapaanggid sa isa ka manugputli sing bulawan nga nagagamit sing hustuhan lamang nga init agod kuhaon ang mga higko. Sa pagkamatuod, ang pagtuo nga gintilawan sa kalayo nagahatag sing daku pa nga seguridad sangsa ginputli nga bulawan. Ngaa? “Bangod sarang mabatas sang ginputli nga pagtuo ang bisan ano nga pagtilaw,” siling ni Utod Bowen, “kag nagasangkap ini sa aton nga makabatas tubtob sa ‘katapusan.’ ”​​—⁠Mateo 24:13.

Ang isa pa ka instruktor sang Gilead, si Mark Noumair, nagpamangkot: “Mangin Kalahamut-an Bala Kamo?” Ang iya tema nasentro sa ginasiling sang 1 Samuel 2:​26, diin ginlaragway si Samuel subong “kalahamut-an sa pagtamod sang Dios kag sang mga tawo.” Sa tapos mabinagbinag ang halimbawa ni Samuel, si Utod Noumair, nga nagmisyonero sa Aprika sing kapin sa 10 ka tuig, nagsiling: “Mangin kalahamut-an man kamo sa mata sang Dios paagi sa pagpabilin nga matutom sa hilikuton nga ginsugo sang Dios sa inyo. Ginhatagan niya kamo sing hamili nga teritoryo subong mga misyonero.” Nian ginpalig-on ni Utod Noumair ang naggradwar nga klase nga tamdon ang ila mga teritoryo subong isa ka sagrado nga responsabilidad nga gintulin sa ila sang Dios kag ilugon ang panghunahuna sang Dios sa pagtuman sang ila mga hilikuton.

Samtang nagaeskwela, ang mga estudyante may madamo nga kahigayunan sa mga talipuspusan sang semana nga ibantala sa mga tawo ang “halangdon nga mga butang sang Dios” nga ginsambit sa Biblia. (Binuhatan 2:11) Sa katunayan, napamulong nila ining mga butang sa napulo ka hambal. Gin-interbyu ni Wallace Liverance, nga isa pa ka instruktor sa Gilead, ang isa ka grupo sang mga estudyante nga nagsaysay sang ila mga eksperiensia sa idalom sang tema nga “ ‘Ang Halangdon nga mga Butang Sang Dios’ Nagapahulag sa mga Tawo.” Nagsiling sia: “Ang mga tawo sa naibabaw nga hulot sang Pentecostes napahulag sa pagpamulong tuhoy sa ‘halangdon nga mga butang sang Dios.’ Ini man nga espiritu ang nagapahulag karon sa tanan nga matutom nga mga alagad sang Dios.” Napahulag pa gani ang iban nga magtuon sing bag-o nga mga hambal agod mapanaksihan ang madamo pa nga mga tawo.

Praktikal nga Laygay Kon Paano Tamdon ang mga Butang Gikan sa Pagtamod sang Dios

Pagkatapos sang nagabukas nga mga pamulongpulong, gin-interbyu ni Gary Breaux kag ni William Young, nga mga katapo sang sanga sang Estados Unidos, ang mga katapo sang nagkalainlain nga mga komite sang sanga diin may mga misyonero pa nga nagaalagad karon kag subong man ang isa ka mag-asawa nga naghinguyang sing 41 ka tuig sa pagmisyonero. Ang isa ka komento amo: “Ang mga misyonero nga wala nagapangayo sing madamo nga kasulhayan amo ang nagadugay. Ginatuon nila ang igtalupangod sa rason kon ngaa nagkari sila. Nahibaluan nila nga nagkari sila agod ibantala ang maayong balita kag agod buligan ang mga tawo nga makilala si Jehova.”

Ginsumaryo ni David Splane, nga isa pa ka katapo sang Nagadumala nga Hubon, ang programa paagi sa isa ka pamulongpulong sa tema nga “Indi Kamo Magakadto sa Malayo!” Ano ang iya buot silingon sa sini, walay sapayan sang kamatuoran nga ang 46 ka naggradwar ipadala karon sa mga pungsod sa bug-os nga kalibutan? Nagpaathag sia: “Bisan diin man kamo sa duta, yara kamo pirme sa balay sang Dios mientras matutom kamo.” Huo, bisan diin man ang tanan nga matutom nga mga Cristiano, nagaalagad sila subong bahin sang daku nga espirituwal nga templo, ukon balay, sang Dios, nga nagsugod sa pagluntad sang ginbawtismuhan si Jesus sang nahaunang siglo. (Hebreo 9:⁠9) Daw ano gid ka makalulugpay nga mahibaluan sang mga tumalambong nga si Jehova malapit sa iya tanan nga matutom nga mga alagad sa duta! Subong nga si Jehova interesado kay Jesus sang yari sia sa duta, interesado man Sia sa aton tanan kag sa aton pag-alagad sa Iya, bisan diin man kita. Gani tuhoy sa pagsimba, indi gid kita malayo sa isa kag isa kag kay Jehova kag kay Jesus.

Sa tapos mabaton ang mga panamyaw gikan sa bug-os nga kalibutan, maanunsio ang mga teritoryo sang mga estudyante, kag mabasa ang isa ka sulat gikan sa klase nga nagapabutyag sing apresasyon tungod sa paghanas nga nabaton sa Gilead, madinalag-on nga ginhinakpan sang tsirman ang programa. Ginpalig-on niya ang bag-o nga mga misyonero nga padayunon ang ila maayo nga binuhatan kag magkasadya sa pag-alagad kay Jehova.​—⁠Filipos 3:1.

[Kahon sa pahina 23]

ESTADISTIKA SANG KLASE

Kadamuon sang mga pungsod nga gintiglawas: 14

Kadamuon sang mga pungsod nga ginpadalhan: 19

Kadamuon sang mga estudyante: 46

Promedyo nga edad: 35.0

Promedyo nga tuig sa kamatuoran: 17.2

Promedyo nga tuig sa bug-os tion nga ministeryo: 13.7

[Retrato sa pahina 24]

Ika-113 nga Naggradwar nga Klase Sang Watchtower Bible School of Gilead

Sa listahan sa ubos, ang mga raya ginanumeruhan halin sa atubangan pakadto sa likod, kag ang mga ngalan ginalista halin sa wala pakadto sa tuo sa kada raya.

(1) Ligthart, M.; Hosoi, S.; Berktold, A.; Liem, C.; Aoki, J. (2) Baglyas, J.; Bouqué, S.; Bossi, A.; Alton, J.; Escobar, I.; Escobar, F. (3) Stoica, A.; Stoica, D.; Freimuth, S.; Karlsson, M.; LeBlanc, R. (4) Bianchi, R.; Bianchi, S.; Kaminski, L.; Joseph, L.; Paris, S.; LeBlanc, L. (5) Paris, M.; Skidmore, B.; Horton, J.; Horton, L.; Skidmore, G. (6) Liem, B.; Alton, G.; Quirici, E.; Langlois, M.; Steininger, S.; Aoki, H. (7) Langlois, J.; Steininger, M.; Bossi, F.; Kaminski, J.; Bouqué, J.; Ligthart, E.; Hosoi, K. (8) Baglyas, J.; Quirici, M.; Karlsson, L.; Freimuth, C.; Berktold, W.; Joseph, R.