Ang “Makugi nga mga Manugbantala sang Ginharian” Nagatipon sing Malipayon

ANG mga krisis sa moral, ekonomiya, kag politika nagatay-ug sa kalibutan. Apang, walay sapayan sining kagamo, ang mga Saksi ni Jehova nagtipon para sa mahidaiton nga tatlo ka adlaw nga “Makugi nga mga Manugbantala Sang Ginharian” Distrito nga mga Kombension. Sugod sang Mayo 2002, ining mga pagtinipon ginhiwat sa bug-os nga kalibutan.

Makalilipay gid nga mga okasyon ang mga kombension. Repasuhon naton sing malip-ot yadtong makapalig-on nga programa nga pasad sa Biblia.

Ang Una nga Adlaw Nagapadaku sang Kakugi ni Jesus

Ang tema sang nahauna nga adlaw sang kombension amo ang “Iluga ang Kakugi Sang Aton Ginuo, nga si Jesus.” (Juan 2:17) Ang pamulongpulong nga “Magkasadya sa Pagtipon Sing Tingob Subong mga Manugbantala Sang Ginaharian” mainit nga nag-abiabi sa mga nagtambong nga makigbahin sa kalipay nga pirme makita sa mga kombension sang katawhan sang Dios. (Deuteronomio 16:15) Ini nga pamulongpulong ginsundan sang mga interbyu sa makugi nga mga manugbantala sang maayong balita.

Ang pamulongpulong nga “Magkalipay Sing Daku kay Jehova” nagakobre sang Salmo 37:1-11 sing bersikulo por bersikulo. Ginpalig-on kita nga indi “magkahisa” sa daw kadalag-an sang mga malauton. Bisan pa nga magbinutig ang mga malauton tuhoy sa aton, athagon sa ulihi ni Jehova kon sin-o gid ang iya matutom nga katawhan. Ginbinagbinag sang pamulongpulong nga “Ipakita ang Pagkamapinasalamaton” kon paano naton mahimo mapakita ang aton pagpasalamat sa Dios. Ang tanan nga Cristiano dapat maghalad sing “halad sang pagdayaw” kay Jehova. (Hebreo 13:15) Sa pagkamatuod, ang kadamuon sang tion nga ginahinguyang naton sa pag-alagad kay Jehova nagadepende sa aton apresasyon kag mga kahimtangan.

Ang keynote address gintig-uluhan sing “Ang mga Manugbantala Sang Ginharian Ginapahulag Sang Kakugi.” Gintudlo sini si Jesucristo subong ang aton labing maayo nga halimbawa sang kakugi. Sa tapos natukod ang langitnon nga Ginharian sang 1914, kinahanglan sang matuod nga mga Cristiano ang kakugi agod mabantala ining maayong balita. Ginpatuhuyan sang humalambal ang kombension sa Cedar Point, Ohio, E.⁠U.⁠A., sang 1922 kag ginpahanumdom sa aton ang maragtason nga panawagan: “Ibantala ang Hari kag ang iya Ginharian”! Sang ulihi, ang kakugi sang matutom nga mga alagad sang Dios nagpahulag sa ila nga ibantala ang makalilipay nga mga kamatuoran sang Ginharian sa tanan nga kapungsuran.

Ang pamulongpulong nga “Indi Magkahadlok kay Nahibaluan Naton nga si Jehova Kaupod Naton,” nga ginhatag sang hapon sang una nga adlaw, nagpakita nga ang katawhan sang Dios amo gid ang ginapuntariya ni Satanas. Apang, walay sapayan sang mga pagpamatok nga aton ginaatubang, ang pagbinagbinag naton sa madamong Biblikanhon kag moderno nga mga halimbawa sang pagtuo nagahatag sa aton sing kaisog nga atubangon sing walay kahadlok ang mga pagtilaw kag mga pagsulay.​​—⁠Isaias 41:10.

Ang masunod nga bahin sang programa amo ang tatlo-sing-bahin nga simposium nga may tema nga “Ang Tagna ni Miqueas Nagapalig-on sa Aton nga Maglakat sa Ngalan ni Jehova.” Ginkomparar sang nahauna nga humalambal ang pagkalusod sang moral, relihioso nga apostasya, kag materyalismo sang adlaw ni Miqueas sa aton adlaw karon. Sia nagsiling: “Mangin pat-od ang aton paglaum sa palaabuton kon ginapalambo naton ang matinumanon nga tagipusuon kag ginapat-od nga ang aton paggawi balaan kag ang aton kabuhi puno sang mga buhat nga may diosnon nga debosyon​​—⁠kag kon indi naton pagkalimtan nga ang adlaw ni Jehova magaabot gid.”​​—⁠2 Pedro 3:​11, 12.

Ginpatalupangod sang ikaduha nga humalambal sa simposium ang pagpakamalaut ni Miqueas sa mga lider sang Juda. Ginpigos nila ang mga imol kag wala sing inugpangapin nga mga tawo. Apang gintagna man ni Miqueas ang kadalag-an sang matuod nga pagsimba. (Miqueas 4:​1-5) Bangod ginapabaskog sang balaan nga espiritu ni Jehova, determinado kita nga ibantala ining makaparepresko nga mensahe sang paglaum. Apang ano dapat ang panimuot naton kon daw ginaupangan kita sang mga balatian ukon nagabatyag nga ginabalabagan sa iban pa nga paagi? Ang ikatlo nga humalambal nagsiling: “Ang mga ginapatuman ni Jehova rasonable kag sarang malab-ot.” Padayon niya nga ginbinagbinag ang nanuhaytuhay nga aspekto sang Miqueas 6:⁠8, diin aton mabasa: “Ano bala ang ginapatuman ni Jehova sa imo kundi ang paghimo sing katarungan kag ang paghigugma sa kaayo kag ang paglakat sing maugdang upod sa imo Dios?”

Bangod ang pagnubo sang moral sa kalibutan mahimo makaapektar sa mga Cristiano, tanan kita nakabenepisyo gikan sa pamulongpulong nga gintig-uluhan “Hupti ang Katinlo sa Moral Paagi sa Pag-amlig sa Inyo Tagipusuon.” Halimbawa, ang pagpabilin naton nga putli magabulig sa aton nga makatigayon sing isa ka malipayon nga pag-asawahay. Subong mga Cristiano, indi gid naton dapat paghunahunaon nga maghimo sing seksuwal nga imoralidad.​​—⁠1 Corinto 6:⁠18.

Ginpakita sang pamulongpulong nga “Magbantay Batok sa Paglimbong” nga maalamon naton nga ginakabig nga hilo ang mga pagpatiko, hapaw nga mga kamatuoran, kag ang mga kabutigan nga ginapalapnag sang mga apostata. (Colosas 2:⁠8) Subong man, indi naton dapat paglimbungan ang aton kaugalingon sa paghunahuna nga sarang naton mapaayawan ang aton makasasala nga mga handum nga wala sing makahalalit nga mga resulta.

Ang tig-ulo sang katapusan nga pamulongpulong sa una nga adlaw amo ang “Simbaha ang Lamang Matuod nga Dios.” Samtang ang mga kahimtangan sa kalibutan labi pa nga nangin makahalanguyos, daw ano ka makapalig-on mahibaluan nga sa dili madugay paluntaron na ni Jehova ang iya matarong nga bag-ong kalibutan! Sin-o ang magapuyo sa sini? Ang mga nagasimba lamang kay Jehova. Agod buligan kita kag ang aton kabataan kag mga estudyante sang Biblia nga malab-ot ini nga tulumuron, ginpaguwa sang humalambal ang bag-o nga tulun-an nga libro nga Simbaha ang Lamang Matuod nga Dios. Nalipay gid kita nga matigayon ini!

Ang Ikaduha nga Adlaw Nagapadaku sang Kakugi sa Kon Ano ang Maayo

Ang tema sang ikaduha nga adlaw sang kombension amo, “Mangin Makugi sa Kon Ano ang Maayo.” (1 Pedro 3:13) Ginbinagbinag sang nahauna nga humalambal ang teksto sa sina nga adlaw. Ginpadaku niya nga ang isa ka regular kag mapuslanon nga pagbinagbinag sa adlaw-adlaw nga teksto nagapalambo sang aton kakugi.

Nagsunod dayon ang simposium nga “Ang mga Manugbantala Sang Ginharian nga Nagahimaya sa Ila Ministeryo.” Ang una nga bahin nagpadaku sang kinahanglanon nga gamiton sing matadlong ang Pulong sang Dios. (2 Timoteo 2:15) Ang epektibo nga paggamit naton sa Biblia nagatugot sa sini nga ‘maghatag sing gahom’ sa kabuhi sang mga tawo. (Hebreo 4:12) Dapat naton ipatuhoy ang igtalupangod sa Biblia kag mangatarungan sa sini sing makapakumbinsi. Ang ikaduha nga bahin sang simposium nagpalig-on sa aton nga pirme duawon liwat ang mga interesado. (1 Corinto 3:⁠6) Ang paghanda kag kasidla kinahanglan agod maduaw liwat sa gilayon ang tanan nga mga interesado. Ginrekomendar sang ikatlo nga bahin nga dapat naton tamdon ang tagsa ka tawo nga masugilanon naton subong posible nga mangin disipulo kag ginpakita man sini nga ang pagtanyag sing isa ka pagtuon sa Biblia sa una nga pagduaw mahimo maghatag sa aton sing kalipay nga mabuligan ang mga indibiduwal nga mangin mga disipulo.

Ang tema sang masunod nga pamulongpulong amo ang “Kon Ngaa ‘Indi Mag-untat sa Pagpangamuyo.’” Ginapalig-on sang Biblia ang mga Cristiano nga mangayo sa Dios sing panuytoy sa tanan nga aspekto sang kabuhi. Dapat kita magtalana sing tion para mangamuyo. Dugang pa, dapat kita padayon nga mangamuyo, kay mahimo kita tugutan ni Jehova nga himuon ini sa pila ka tion antes mangin maathag ang iya sabat.​—⁠Santiago 4:8.

Ang pamulongpulong nga “Nagapalig-on ang Paghambalanay Tuhoy sa Espirituwal nga mga Butang” naglaygay sa aton nga gamiton ang aton dulot sa paghambal agod makabenepisyo kita kag ang iban. (Filipos 4:⁠8) Ang mga magtiayon kag ang mga kabataan nagakinahanglan sing pila ka paghambalanay sa espirituwal nga mga butang kada adlaw. Agod matigayon ini, dapat tinguhaan sang mga pamilya nga magdungan sa pagkaon sing bisan makaisa lang sa isa ka adlaw, sa amo may yara makapalig-on nga paghambalanay.

Ang programa sa aga natapos paagi sa makapalig-on nga pamulongpulong nga “Kon Paano ang Dedikasyon kag Bawtismo Nagadul-ong sa Kaluwasan.” Ang mga kandidato sa bawtismo nagkuha sing ihibalo, nagpakita sing pagtuo, naghinulsol, nagtalikod sa sala, kag nagdedikar sang ila kaugalingon sa Dios. Pagkatapos mabawtismuhan, siling sang humalambal, dapat sila magpadayon sa pagtubo sa espirituwal kag huptan ang ila kakugi kag maayong paggawi.​—⁠Filipos 2:​15, 16.

Sadto nga hapon, duha ka dalagku nga mga punto ang ginpatalupangod sa pamulongpulong nga “Mangin Maugdang, kag Hupti nga Simple ang Imo Mata.” Ang kaugdang nagakahulugan sang pagtigayon sing realistiko nga pagtamod sa aton mga limitasyon kag sa aton tindog sa atubangan sang Dios. Ang kaugdang nagabulig sa aton nga huptan nga “simple” ang aton mata​—⁠nasentro sa Ginharian sang Dios, indi sa materyal nga mga butang. Kon himuon naton ini, indi kita dapat mabalaka, kay ihatag ni Jehova ang aton mga kinahanglanon.​—⁠Mateo 6:22-24, 33, 34.

Ginpakita sang masunod nga humalambal kon ngaa dapat kita “Magsalig Sing Bug-os kay Jehova sa Tion Sang Kalisdanan.” Paano naton maatubang ang mga butang subong sang personal nga mga kaluyahon kag mga problema sa pinansial ukon sa panglawas? Mangayo kita sing praktikal nga kaalam kay Jehova kag sing bulig sa iban. Sa baylo nga mahangawa ukon maluyahan sing buot, dapat naton palig-unon ang aton pagsalig sa Dios paagi sa pagbasa sa iya Pulong.​—⁠Roma 8:35-39.

Ang katapusan nga simposium sa kombension may tema nga “Ang Kalidad Sang Aton Pagtuo nga Natilawan Sang Nanuhaytuhay nga mga Pagtilaw.” Ang una nga bahin nagpahanumdom sa aton nga ang tanan nga matuod nga mga Cristiano pagahingabuton. Mangin isa ini ka panaksi sa iban, nagapabakod ini sang aton pagtuo kag nagahatag sa aton sing kahigayunan nga ipasundayag ang aton katutom sa Dios. Bisan pa wala kita nagapasayangsayang, indi gid kita dapat maghimo sing di-makasulatanhon nga mga butang agod likawan ang paghingabot.​—⁠1 Pedro 3:16.

Ang ikaduha nga humalambal sa sini nga simposium nagsabat sang mga pamangkot tuhoy sa neutralidad. Ang una nga mga Cristiano indi mga pasipista, apang ginakilala nila nga ang ila panguna nga katutom yara sa Dios. Amo man sa karon, ginasunod gid sang mga Saksi ni Jehova ang prinsipio: ‘Indi kamo bahin sang kalibutan.’ (Juan 15:19) Sanglit ang aton neutralidad mahimo hinali nga tilawan, ang mga pamilya dapat mag-iskedyul sing tion nga repasuhon ang mga panuytoy sang Biblia sa sini nga topiko. Subong sang ginpakita sang ikatlo nga pamulongpulong sa sini nga simposium, ang tulumuron ni Satanas indi gid man nga patyon kita, kundi nga ipiton kita agod indi kita mangin matutom. Paagi sa matutom nga pagbatas sa yaoyao, imoral nga mga pag-ipit, emosyonal nga kasakit, kag mga balatian, nagahatag kita sing kadayawan kay Jehova.

Ang mainit nga pangagda nga “Mangin Suod kay Jehova” amo ang tig-ulo sang katapusan nga pamulongpulong sadto nga adlaw. Naganyat kita kay Jehova sang nahangpan naton ang iya panguna nga mga kinaiya. Ginagamit niya ang iya wala sing latid nga gahom agod amligan ang iya katawhan, ilabi na sa espirituwal. Ang iya katarungan indi mapintas kundi nagapahulag sa iya nga ihatag ang dayon nga kabuhi sa tanan nga nagahimo sing pagkamatarong. Ang kaalam sang Dios makita sa kon paano niya gingamit ang di-himpit nga mga tawo sa pagsulat sa Biblia. Ang labing makabibihag amo ang iya gugma, nga nagpahulag sa iya sa paghimo sing kahimusan para sa kaluwasan sang katawhan paagi kay Jesucristo. (Juan 3:16) Ang humalambal naghinakop paagi sa pagpaguwa sing makapahalipay nga bag-o nga libro nga Mangin Suod kay Jehova.

Ang Ikatlo nga Adlaw Nagapatalupangod sang Kakugi Para sa Maayong mga Buhat

Ang tema sang ikatlo nga adlaw sang kombension amo ang “Isa ka Katawhan nga Makugi sa Maayong mga Buhat.” (Tito 2:14) Nagsugod ang programa sa aga paagi sa paghinun-anon sang isa ka pamilya sa teksto sa sina nga adlaw. Ang masunod amo ang pamulongpulong nga “Kay Jehova Ka Bala Nagasalig?” Ang mga pungsod nagsayop sa pagsalig sa ila mismo kaalam kag kusog. Apang, sa pagpatuhay, ang mga alagad ni Jehova maisugon kag malipayon nga nagasalig sa iya walay sapayan sang mga kalamidad.​—⁠Salmo 46:​1-3, 7-11.

Ang bahin nga gintig-uluhan “Mga Pamatan-on​—⁠Magplano Kamo Para sa Palaabuton Upod sa Organisasyon ni Jehova” nagsabat sini nga pamangkot: Paano matigayon sang pamatan-on ang labing maayo gikan sa kabuhi? Indi ini matigayon paagi sa pagpaninguha nga makatigayon sing kuwarta, mga pagkabutang, kag kadungganan. Mahigugmaon nga ginalaygayan sang aton Manunuga ang mga pamatan-on nga dumdumon sia samtang lamharon pa sila. Ang humalambal nag-interbyu sang pila nga nagpanikasog nga makigbahin sa Cristianong pag-alagad samtang bata pa sila, kag nabatyagan naton ang ila kalipay. Kag daw ano gid ka mapuslanon nga mabaton ang bag-o nga tract, Mga Pamatan-on​—⁠Ano ang Himuon Ninyo sa Inyo Kabuhi?, nga gindesinyo agod buligan ang lamharon nga mga Saksi sa pagpasad sing sadsaran para sa walay katapusan nga palaabuton upod sa organisasyon ni Jehova!

Ang masunod amo ang makawiwili nga drama sa Biblia nga “Magtindog Sing Malig-on sa Mabudlay nga mga Tion.” Gin-asoy sini sa malip-ot ang malawig nga karera ni Jeremias kutob sa iya pagkapamatan-on tubtob sa kalaglagan sang Jerusalem, nga makugi niya nga gintagna. Nagbatyag si Jeremias nga indi sangkol sa iya asaynment, apang gintuman niya ini walay sapayan sang mga pagpamatok, kag ginluwas sia ni Jehova.​—⁠Jeremias 1:​8, 18, 19.

Ang drama ginsundan sang pamulongpulong nga “Mangin Kaangay ni Jeremias​—⁠Maisugon nga Ibantala ang Pulong Sang Dios.” Ang mga manugbantala sang Ginharian sa karon masami nga amo ang puntariya sang mga kabutigan kag malaut nga propaganda. (Salmo 109:​1-3) Apang, kaangay ni Jeremias, maatubang naton ang pagluya sing buot paagi sa pagkalipay sa Pulong ni Jehova. Kag nagasalig kita nga ang mga nagapakig-away batok sa aton indi magmadinalag-on.

Sa pagkamatuod, suno gid sa tion ang diskurso publiko, nga gintig-uluhan “Ang Danyag Sining Kalibutan Nagabag-o.” Ang aton adlaw gintandaan sing dramatiko nga mga pagbag-o. Gintagna sang Biblia nga ini nga mga kahimtangan, lakip ang pagsinggit sing “paghidait kag kalig-unan,” magadul-ong sa makapulunaw nga adlaw sang paghukom sang Dios. (1 Tesalonica 5:⁠3) Magapahanabo ini sing makalilipay nga mga pagbag-o​—⁠ang katapusan sang tanan nga giyera, krimen, kasingki, kag bisan sang balatian. Busa, sa baylo nga magsalig sa sining sistema sang mga butang, karon na ang tion nga himud-usan ang diosnon nga debosyon kag huptan ang putli nga pagginawi.

Ang sumaryo sang pagtuon sa Lalantawan sadto nga semana ginsundan sang katapusan nga pamulongpulong sa kombension, nga gintig-uluhan “Mangin Bugana sa Maayong mga Buhat Subong Makugi nga mga Manugbantala Sang Ginharian.” Ginpakita sang humalambal kon paano ang programa nagpapagsik sa aton sa espirituwal kag nagpalig-on sa aton nga magsalig kay Jehova. Sa paghinakop, ginpalig-on kita nga mangin matinlo, mahigugmaon, kag makugi nga mga manugbantala sang Ginharian sang Dios.​​—⁠1 Pedro 2:⁠12.

Upod ang espiritu kaangay sang mga alagad ni Jehova sang panahon ni Nehemias, pat-od gid nga nagpauli kita nga nagakalipay sa espirituwal nga mga pagpakamaayo nga nabaton naton gikan sa “Makugi nga mga Manugbantala Sang Ginharian” Distrito nga mga Kombension. (Nehemias 8:12) Indi bala nga napuno ka sing kalipay kag determinasyon nga magpadayon subong isa ka makugi nga manugbantala sang Ginharian bangod sining makapapagsik nga kombension?

[Kahon/Retrato sa pahina 23]

Isa ka Bag-o nga Bulig sa Pagtuon!

Sa pagtakop sang una nga adlaw sang kombension, nalipay ang mga tumalambong sang ginpaguwa ang bag-o nga libro nga Simbaha ang Lamang Matuod nga Dios. Gindesinyo ini nga tun-an upod sa mga nakatapos na sa pagtuon sa libro nga Ang Ihibalo nga Nagadul-ong sa Kabuhi nga Walay Katapusan kag pat-od gid nga magapalig-on ini sa pagtuo sang mga “husto nga napahamtang para sa kabuhi nga walay katapusan.”​​—⁠Binuhatan 13:48.

[Credit Line]

Image on book cover: U.⁠S. Navy photo

[Kahon/Retrato sa pahina 24]

Bulig Agod Labi Pa nga Magsuod sa Dios

Ang katapusan nga humalambal sa ikaduha nga adlaw sang kombension nagpahibalo sang pagpaguwa sa bag-o nga libro nga Mangin Suod kay Jehova. Nagalakip ini sing apat ka panguna nga mga seksion, tig-isa para sa panguna nga mga kinaiya ni Jehova​​—⁠gahom, katarungan, kaalam, kag gugma. Ang tagsa ka seksion sang libro may isa ka kapitulo nga nagapakita kon paano ginpasundayag sing maathag ni Jesucristo ang mga kinaiya sang Dios. Ang panguna nga katuyuan sining bag-o nga libro amo ang pagbulig sa aton kag sa aton mga estudyante sa Biblia nga matukod ang isa ka mas suod kag mas mabakod nga kaangtanan kay Jehova nga Dios.

[Kahon/Mga retrato sa pahina Pictures on page 26]

Espirituwal nga Panuytoy Para sa mga Pamatan-on

Ang isa ka pinasahi nga tract nga may tig-ulo nga Mga Pamatan-on​​—⁠Ano ang Himuon Ninyo sa Inyo Kabuhi? ginpaguwa sa ikatlo nga adlaw sang kombension. Bangod gindesinyo agod buligan ang mga pamatan-on nga Saksi sa paghimo sing husto nga mga desisyon tuhoy sa ila palaabuton, ining bag-o nga tract nagahatag sing Makasulatanhon nga laygay sa pagtukod sing isa ka walay katapusan nga karera sa pag-alagad kay Jehova.