Pagbenepisyo sing Bug-os Gikan sa “Makugi nga mga Manugbantala sang Ginharian” Distrito nga Kombension

¹ Isa ka Makapapagsik nga Programa: Daw ano ka makapapagsik nga programa ang nabatian naton sa bag-o lang natapos nga distrito nga kombension! Nagtipon kita para sa isa ka katuyuan, agod masangkapan pa gid sing maayo sa pagbantala sing Ginharian sang Dios sing makugi. Madumduman bala ninyo kon paano ginpaathag sang unang humalambal ang tinaga nga “pagbantala”? Madumduman bala ninyo kon ano nga pagpanalawsaw ang ginpalig-on nga himuon naton sa pamulongpulong nga “Indi Magkahadlok kay Nahibaluan Naton nga si Jehova Kaupod Naton”? Kay sin-o sugilanon sa kabuhi ang nabasa mo na?

² Ang simposium nga “Ang Kalidad Sang Aton Pagtuo nga Natilawan Sang Nanuhaytuhay nga mga Pagtilaw” naghatag sing tatlo ka panguna nga rason kon ngaa ginatugutan ni Jehova ang paghingabot. Mapaathag mo bala kon ano ini? Ano nga teksto sa Kasulatan ang ginabasihan sang aton Cristianong neutralidad? Ano ang ginapalig-on sa aton nga himuon agod mangin handa kita sa mga problema nga mag-utwas bangod sang aton neutral nga tindog? Paano nagadala sing himaya kay Jehova ang aton matutom nga pagbatas sing paghingabot?

³ Ano nga mga danyag sa drama nga “Magtindog Sing Malig-on sa Mabudlay nga mga Tion” ang ilabi na nga nagpabakod sa imo? Paano kita mangin kaangay ni Jeremias?

⁴ Anong talalupangdon nga mga pagbag-o nga mahanabo sa dili madugay ang ginlaragway sang diskurso publiko nga “Ang Danyag Sining Kalibutan Nagabag-⁠o,” nga magadul-ong sa makakulugmat nga adlaw sang Dios? Samtang nagapamati sa katapusan nga pamulongpulong nga “Mangin Bugana sa Maayong mga Buhat Subong Makugi nga mga Manugbantala Sang Ginharian,” paano mo magamit ang impormasyon sa imo mismo ministeryo?

⁵ Pangunang mga Punto nga Maaplikar: Subong sang ginpaathag sa pamulongpulong nga “Ipakita ang Pagkamapinasalamaton,” paano naton mapabutyag ang aton tinagipusuon nga pagpasalamat kay Jehova? Sa keynote address nga “Ang mga Manugbantala Sang Ginharian Ginapahulag Sang Kakugi,” kay sin-o kakugi ang ginapalig-on nga ilugon naton? Ano nga pag-usisa sa kaugalingon ang ginpangabay nga himuon naton?

⁶ Ang simposium nga “Ang Tagna ni Miqueas Nagapalig-on sa Aton nga Maglakat sa Ngalan ni Jehova” nagapadaku sang anong tatlo ka kinahanglanon nga dapat naton tumanon agod mabaton naton ang kahamuot ni Jehova? Masarangan bala naton ini? (Miq. 6:⁠8) Suno sa pamulongpulong nga “Hupti ang Katinlo sa Moral Paagi sa Pag-amlig sa Inyo Tagipusuon,” sa anong mga paagi nga dapat kita mangin matinlo sa moral? Sa anong mga bahin ang pamulongpulong nga “Magbantay Batok sa Paglimbong” nagapaandam sa aton nga indi magpalimbong kag indi maglimbong sa iban?

⁷ Ano nga praktikal nga mga punto gikan sa simposium nga “Ang mga Manugbantala Sang Ginharian nga Nagahimaya sa Ila Ministeryo” ang nasugdan mo na nga iaplikar sa imo ministeryo? Sa pamulongpulong nga “Nagapalig-on ang Paghambalanay Tuhoy sa Espirituwal nga mga Butang,” ginbinagbinag ang Filipos 4:⁠8. Paano ining kasulatan nagabulig sa aton nga hambalan ang espirituwal nga mga butang, kag san-o naton dapat ini himuon?

⁸ Ang pamulongpulong nga “Magsalig Sing Bug-os kay Jehova sa Tion Sang Kalisdanan” naghinun-anon kon paano naton maatubang ang makahalanusbo nga mga hitabo, kapigaduhon, indi maayo nga panglawas, mga problema sa pamilya, kag tudok nga mga kaluyahon. Paano naton mapakita ang pagsalig kay Jehova kon nagaatubang sining mga kahimtangan?

⁹ Bag-ong Espirituwal nga mga Bahandi: Nalipay kita nga makabaton sing bag-o nga libro nga Simbaha ang Lamang Matuod nga Dios. Ano ang epekto sa imo sang pahibalo kon ano ang katuyuan sini nga libro? Ngaa makabulig ini sa hilikuton naton nga paghimo sing mga disipulo subong ang ikaduha nga libro nga pagatun-an?

¹⁰ Nabaton man naton ang matahom nga libro nga Mangin Suod kay Jehova. Ano ang pila ka pinasahi nga bahin sini? Diin nga ilustrasyon ang imo gid naluyagan? Ang pagbasa mo bala sini nagpasuod pa sa imo kay Jehova? Sin-o pa ang makabenepisyo sa sini?

¹¹ Ang “Makugi nga mga Manugbantala Sang Ginharian” Distrito nga Kombension naghatag sa aton sing espirituwal nga pagpalig-on nga kinahanglan naton agod maatubang ining mabudlay nga mga tion. Agod makabenepisyo sing bug-os gikan sa sining importante nga espirituwal nga aman, kabay nga himuon naton ang aton labi nga masarangan agod dumdumon ang aton nabatian, pasalamatan ang aton nabaton, kag iaplikar ang aton natun-an. (2 Ped. 3:14) Ang paghimo sini magapabakod sa aton nga mahuptan ang aton integridad kag mangin makugi nga mga manugbantala sang Ginharian subong pag-ilog sa aton Ginuong Jesucristo, tanan sa kahimayaan ni Jehova.​​—⁠Fil. 1:​9-​11.