Pagtuo sa Isa ka Dios nga Ayhan Wala Naton Makilala
DUHA sa kada tatlo ka tawo sa Alemanya ang nagatuo sa Dios. Apang, sang ginpamangkot ang kapin sa isa ka libo nahanungod sa Dios nga ila ginatuuhan, halos tanan naghatag sing magkatuhay nga sabat. “Ang mga Aleman may sari-sari nga paghangop sa Dios subong nga sila sari-sari man nga mga tawo,” report sang magasin nga FOCUS. Bisan pa dalayawon ang pagtuo sa Dios, indi bala kanugon lang nga magtuo sa iya nga wala nahibaluan kon ano sia nga sahi sang Dios?
Ining kakulang sa ihibalo tuhoy sa kinaiya ukon persona sang Dios masapwan indi lamang sa Alemanya; nagaluntad man ini sa iban pa nga bahin sang Europa. Ang isa ka pagtuon nga ginhimo sa Austria, Britanya, kag Netherlands nagpakita nga lapnag ang alalangay nga paghangop nga ang Dios isa ka “mas mataas nga gahom ukon isa ka sekreto nga indi mapaathag.” Isa sia ka misteryo, labi na gid sa tunga sang mga lamharon, bisan pa gani sa tunga sang mga nagatuo sa iya.
Personal Mo Bala nga Kilala ang Dios?
Magkatuhay gid ang katunayan nga basta kilala mo lang ang isa sangsa personal mo sia nga kilala. Ang basta pagkakilala lang sa isa ka tawo—sa isa ka daw indi mapalapitan nga hari ukon reyna, isa ka bantog nga atleta, isa ka artista sa pelikula—amo lamang ang pagbaton nga sia nagaluntad. Apang, ang personal nga pagkakilala sa isa nagakahulugan sing kapin pa. Nagakahulugan ini nga pamilyar ka sa batasan, paggawi, balatyagon, mga luyag kag mga indi luyag, kag mga plano sa palaabuton sang isa ka tawo. Ang personal nga pagkakilala sa isa ka tawo nagadul-ong sa isa ka suod nga kaangtanan upod sa iya.
Ginatos ka libo nga mga indibiduwal ang naghinakop nga ang pagtigayon sing kinaandan nga paghangop tuhoy sa Dios—ukon ang pagkabati lang tuhoy sa iya—indi pa bastante. Naghimo sila sing kapin pa paagi sa suod nga pagkilala sa Dios. Nasapwan bala nila nga mapuslanon ini? Si Paul, nga nagapuyo sa naaminhan nga Alemanya nga may yara kinaandan lang nga pagpati sa Dios sang una, namat-od nga personal Sia nga kilalahon. Si Paul nagpaathag: “Kinahanglan ang tion kag panikasog agod makilala sing maayo ang Dios, apang mapuslanon gid ang mga benepisyo sini. Ang suod nga kaangtanan sa Manunuga nagahimo sang aton matag-adlaw nga pagkabuhi nga mas maayo.”
Takus bala ang tion kag panikasog nga kinahanglanon agod makilala ang Dios sing suod? Basaha palihug ang masunod nga artikulo.
[Blurb sa pahina 3]
Magkatuhay gid ang katunayan nga basta kilala mo lang ang isa sangsa personal mo sia nga kilala