Sin-o ang Dios?

Madamo ang nagasiling nga nagapati sila sa Dios. Pero kon pamangkuton sila kon sin-o ang Dios, sarisari ang ila sabat. Ang iban nagasiling nga ang Dios mapintas nga hukom, nga gusto lang magsilot sa mga nakasala. Para sa iban, mapinalanggaon kag mapinatawaron sia, bisan ano pa ang ila himuon. Kag may nagapati man nga ang Dios malayo kag indi interesado sa aton. Bangod sini, madamo ang nagasiling nga imposible gid nga makilala ang Dios.

Dapat gid bala nga makilala ang Dios? Huo, kay makahatag ini sing katuyuan sa imo kabuhi. (Binuhatan 17:26-28) Kon mas malapit ka sa Dios, palanggaon ka pa gid niya kag buligan. (Santiago 4:8) Kag kon makilala mo gid sing maayo ang Dios, matigayon mo ang kabuhi nga wala sing katapusan.—Juan 17:3.

Paano mo makilala ang Dios? Pamensara ang imo suod nga abyan. Paano kamo nangin mag-abyan? Mahimo nahibaluan mo ang iya ngalan, personalidad, ang iya gusto kag indi gusto, kon ano ang iya nahimo na kag ang iya mga plano, kag iban pa. Nangin suod kamo kay kilala mo gid sia.

Gani, makilala naton ang Dios paagi sa pagsabat sini nga mga pamangkot:

• ANO ANG NGALAN SANG DIOS?

• ANO ANG IYA MGA KINAIYA?

• ANO NA ANG NAHIMO SANG DIOS?

• ANO PA ANG IYA HIMUON?

• ANO ANG IMO MABENEPISYO KON MAKILALA MO ANG DIOS?

Ini nga mga pamangkot sabton sa sini nga magasin paagi sa Biblia. Buligan ka sang mga artikulo nga makilala ang Dios kag kon ano ang mabenepisyo mo kon malapit ka sa iya.