“Ginpun-an Sini ang Kulang sa Akon Tagipusuon”
“SALAMAT gid sa matahom nga regalo nga Mangin Suod kay Jehova. Ginpun-an sini ang kulang sa akon tagipusuon—ang kinahanglanon nga magbatyag nga ginahigugma kag ginapalangga ni Jehova. Mas malapit ako karon kay Jehova kag sa iya pinalangga nga Anak. Luyag ko sugiran ang tanan tuhoy sini nga libro kag hatagan sing kopya ang akon tanan nga hinigugma.” Amo ini ang ginbatyag sang isa sang mga Saksi ni Jehova tuhoy sa bag-ong 320-pahina nga libro nga ginpagua sa “Makugi nga mga Manugbantala Sang Ginharian” nga Distrito nga mga Kombension nga ginhiwat sang 2002/03. Usisaon naton ang pila ka bahin sining bag-o nga libro kag kon ngaa ginbalhag ini.
Ang Pila ka Bahin sang Bag-o nga Libro
Ano ang ginaunod sining bag-o nga libro? Ang tanan nga impormasyon nga ginpresentar sa duha ka artikulo nga tulun-an sa sining gua—kag madamo pa! Ang libro may 31 ka kapitulo, nga ang tagsa subong kalaba sa ginatun-an nga artikulo sa Ang Lalantawan. Sa tapos sang introduksion kag sang una nga tatlo ka kapitulo, ang libro nabahin sa apat ka seksion, isa para sa tagsa ka panguna nga mga kinaiya ni Jehova. Ang tagsa ka seksion nagabukas paagi sa isa ka sumaryo sang kinaiya. Ang masunod nga pila ka artikulo nagapaathag kon paano ginapakita ni Jehova ang iya kinaiya. Ang tagsa ka seksion nagaunod sing isa ka kapitulo tuhoy kay Jesus. Ngaa? Bueno, si Jesus nagsiling: “Sia nga nakakita sa akon nakakita man sa Amay.” (Juan 14:9) Subong himpit nga banaag ni Jehova, ginapakita ni Jesus sa aton ang maathag nga mga halimbawa sang mga kinaiya sang Dios. Ang tagsa ka seksion nagahinakop paagi sa isa ka kapitulo nga nagatudlo sa aton kon paano ilugon si Jehova sa pagpakita sang kinaiya nga ginabinagbinag. Sa pagbinagbinag sa mga kinaiya ni Jehova, ining bag-o nga libro nagapatuhoy sa tagsa ka tulun-an sang Biblia.
Ang libro nga Mangin Suod kay Jehova nagaunod man sing pila ka pinasahi nga mga bahin. Sugod sa kapitulo 2, ang tagsa ka kapitulo nagaunod sing isa ka bahin nga natig-uluhan “Mga Pamangkot Para sa Pagpamalandong.” Ang mga kasulatan kag mga pamangkot nga ginaaman wala gintuyo subong repaso sang kapitulo. Sa baylo, gindesinyo ini agod buligan ka nga gamiton ang Biblia sa pagpamalandong tuhoy sa tema. Basaha sing maayo ang tagsa ka Kasulatan. Nian pamalandungi ang pamangkot kag tinguhai nga iaplikar ini sa imo kaugalingon. Ini nga pagpamalandong makapukaw sang imo tagipusuon, makabulig sa imo sa pagpalapit sing suod pa kay Jehova.—Salmo 19:14.
Ang mga laragway sa libro nga Mangin Suod kay Jehova ginpanalawsaw kag ginhanda sing maayo agod makatudlo kag makapahulag. Napulog-pito ka kapitulo ang nagaunod sing matahom nga bug-os pahina nga mga laragway sang mga danyag sa Biblia.
Ngaa Ginbalhag?
Ngaa ginbalhag ang libro nga Mangin Suod kay Jehova? Ang panguna nga katuyuan sining bag-ong publikasyon amo nga buligan kita nga makilala sing maayo pa si Jehova agod makatukod kita sing isa ka mas mabakod nga personal nga kaangtanan sa aton Dios.
May nahunahuna ka bala nga mahimo makabenepisyo gikan sa libro nga Mangin Suod kay Jehova, ayhan isa ka estudyante sa Biblia ukon bisan isa ka di-aktibo nga Cristiano nga utod? Kamusta ka—nasugdan mo na bala ang pagbasa sa sining bag-o nga libro? Kon wala pa, ngaa indi ka mag-iskedyul sing tion agod sugdan ini gilayon nga basahon kon mahimo? Maghinguyang sing tion sa pagbinagbinag sang imo nabasa. Kabay nga ining bag-o nga publikasyon makabulig sa imo sa pagpalapit sing suod kay Jehova nga Dios, agod nga ibantala mo ang maayong balita sang iya Ginharian nga may daku pa nga kalipay kag kakugi!