Magbenepisyo sa Pagtuon sa Mangin Suod kay Jehova
1 Sa “Makugi nga mga Manugbantala Sang Ginharian” nga Distrito nga Kombension, nalipay kita nga mabaton ang libro nga Mangin Suod kay Jehova. Madamo ang nagbasa dayon sang libro. Madamo pa ang wala sing duhaduha nga napahulag nga himuon ang suno sa tuigan nga teksto para sa 2003: “Magpalapit kamo sa Dios kag sia magapalapit sa inyo.”—Sant. 4:8, NW.
2 Sa Marso sugdan naton sa pagtuon ang Mangin Suod kay Jehova sa Pagtinuon Sang Kongregasyon sa Libro. Paano gid kita makabenepisyo gikan sa aton pagtuon? Importante ang paghanda. Duha ka semana ang ihinguyang sa kada kapitulo, diin diutay lamang nga mga parapo ang gin-eskedyul nga tun-an kada semana. Magahatag ini sing bastante nga tion agod makakomento ka sing tinagipusuon pasad sa imo pagtuon kag pagpamalandong sa materyal. Dugang pa, mas diutay nga mga parapo ang binagbinagon sa mga semana nga nagalakip sang repaso sang isa ka kapitulo, agod may tion nga magamit ang isa ka pinasahi nga bahin sang libro.
3 Sugod sa kapitulo 2, ang kahon nga may tig-ulo nga “Mga Pamangkot Para sa Pagpamalandong” makita malapit sa katapusan nga bahin sang tagsa ka kapitulo. Pagkatapos mabinagbinag ang katapusan nga parapo sang kapitulo, hinun-anunan sang manugtatap sa pagtinuon sa libro kag sang grupo ang kahon. Palig-unon niya ang mga katapo sang grupo nga magkomento, nagatinguha nga mapalutaw ang maayo nga mga punto nga ila napamalandungan sa Kasulatan. (Hul. 20:5) Dugang sa mga pamangkot nga yara sa kahon, sarang sia makapamangkot kon kaisa subong sang masunod: “Ano ang ginasugid sining impormasyon sa imo tuhoy kay Jehova? Ano ang epekto sini sa imo kabuhi? Paano mo magamit ini sa pagbulig sa iban?” Ang tulumuron sang konduktor amo ang pagpakomento sing tinagipusuon sa mga tumalambong, indi ang pagtilaw sa ila tuhoy sa magagmay lamang nga mga detalye.
4 Ang Mangin Suod kay Jehova pinasahi nga publikasyon. Bisan pa nga ang tanan nga publikasyon sang “matutom kag mainandamon nga ulipon” nagahimaya kay Jehova, ini nga libro ginpatuhoy gid sa paghinun-anon sa mga kinaiya ni Jehova. (Mat. 24:45-47) Daw ano ka makalilipay nga kahigayunan ang nagahulat sa aton! Makabenepisyo gid kita gikan sa madalom nga pagtuon sa personalidad ni Jehova. Kabay nga ang pagtuon makabulig sa aton nga mangin suod sa aton langitnon nga Amay, kag kabay nga mangin epektibo pa gid kita sa pagbulig sa iban nga himuon man ini.