“Magpalapit Kamo sa Dios, kag Magapalapit Sia sa Inyo”

Sang Una kag Karon—Kon Paano Ginbag-o sang Biblia Ini nga Tawo

ANG musika amo ang pinakaimportante sa kabuhi ni Rolf-Michael. Ang mga droga amo ang iya obsesyon. Sang pamatan-on pa sia sa Alemanya, palahubog sia kag palagamit sing LSD, cocaine, marijuana, kag iban pa nga mga droga nga nagaapektar sa iya panghunahuna.

Sang gintinguhaan niya nga magpasulod sing kontrabando nga droga sa isa ka pungsod sa Aprika, nadakpan si Rolf-Michael kag ginpriso sa sulod sang 13 ka bulan. Ining iya pagtener sa prisuhan naghatag sa iya sing tion nga mamensar tuhoy sa matuod nga katuyuan sang kabuhi.

Si Rolf-Michael kag ang iya asawa, si Ursula, nagtinguha gid nga hibaluon ang kahulugan sang kabuhi kag pangitaon ang kamatuoran. Bisan indi maayo ang ila mga eksperiensia sa ginatawag nga Cristiano nga mga relihion, daku gid ang ila handum nga makilala ang Dios. Apang may mga pamangkot sila kag indi sila kontento sa mga sabat gikan sa nanuhaytuhay nga mga grupo sang relihion. Dugang pa, ining mga relihion wala makahatag sa ila sing mabaskog nga motibo agod bag-uhon ang ila kabuhi.

Nakilala sang ulihi ni Rolf-Michael kag ni Ursula ang mga Saksi ni Jehova. Sang nagatuon na sia sa Biblia, napahulag gid si Rolf-Michael sa laygay: “Magpalapit kamo sa Dios, kag magapalapit sia sa inyo.” (Santiago 4:8) Determinado sia nga ‘ubahon ang daan nga personalidad nga nahisuno sa iya una nga dalanon kag isuklob ang bag-o nga personalidad, nga gintuga suno sa kabubut-on sang Dios sa matuod nga pagkamatarong kag pagkamainunungon.’​​—⁠Efeso 4:​22-​24.

Paano masuklob ni Rolf-Michael ang bag-o nga personalidad? Ginpakita sa iya gikan sa Biblia nga “paagi sa sibu nga ihibalo” ang personalidad sang isa ka indibiduwal mahimo ‘mabag-o suno sa larawan sang Isa nga nagtuga sini,’ nga amo si Jehova nga Dios.​​—⁠Colosas 3:​9-​11.

Samtang nagakuha sia sing sibu nga ihibalo, gintinguhaan ni Rolf-Michael nga ipahisanto ang iya kabuhi sa mga prinsipio sang Pulong sang Dios. (Juan 17:3) Mabudlay gid untatan ang paggamit sang droga, apang nahangpan ni Rolf-Michael ang importansia sang pagpalapit kay Jehova paagi sa pangamuyo kag pagbaton sang iya bulig. (1 Juan 5:​14, 15) Nabuligan man sia bangod sang suod nga pagpakig-upod sa bawtismado na nga mga Saksi ni Jehova, nga nagatinguha gid sa paghimo sang kabubut-on sang Dios.

Ang ihibalo nga ang kalibutan nagalipas apang ang nagahimo sang kabubut-on sang Dios magapabilin sa walay katubtuban nakabulig man kay Rolf-Michael. Nakabulig ini sa iya nga pilion, indi ang umalagi lamang nga gugma sa kalibutan, kundi ang walay katubtuban nga pagpakamaayo sang suod nga kaangtanan sa mahigugmaon nga Dios, si Jehova. (1 Juan 2:​15-​17) Natandog gid si Rolf-Michael sa mga tinaga sang Hulubaton 27:11: “Magmaalam ka, anak ko, kag pahalipaya ang akon tagipusuon, agod nga masabat ko sia nga nagayaguta sa akon.” Mapinasalamaton sia nga nagasiling: “Ginapakita sining bersikulo kon daw ano ka daku ang gugma ni Jehova, bangod ginahatagan niya ang mga tawo sing kahigayunan agod pahalipayon sia.”

Kaangay ni Rolf-Michael, sang iya asawa, kag sang ila tatlo ka kabataan, ginatos ka libo ang nakabenepisyo sa pagtuman sa mga prinsipio sa Biblia. Masapwan ining mga indibiduwal sa mga kongregasyon sang mga Saksi ni Jehova sa bug-os nga kalibutan. Makasulubo ugaling nga sa pila ka pungsod, ang mga Saksi ginapatupatuan subong makatalagam nga sekta nga nagaguba sang mga pamilya. Ginpamatud-an sang eksperiensia ni Rolf-Michael nga indi ini matuod.​​—⁠Hebreo 4:⁠12.

Si Rolf-Michael nagasiling nga ang Mateo 6:​33, nga nagapalig-on sa aton nga unahon ang espirituwal nga mga hilikuton, amo ang giya sang iya pamilya padulong sa husto nga direksion sang kabuhi. Sia kag ang iya pamilya nagapasalamat gid kay Jehova sa malipayon nga pamilya nga ila ginaagom subong mga Cristiano. Nabatyagan man nila ang balatyagon sang salmista nga nagsiling: “Ano bala ang ibalos ko kay Jehova tungod sa tanan nga kaayuhan niya sa akon?”​​—⁠Salmo 116:12.

[Kahon sa pahina 9]

Epektibo nga mga Prinsipio sa Biblia

Ang masunod amo ang pila ka prinsipio sa Biblia nga nagpahulag sa madamo agod talikdan ang makamamatay nga pagkagiyan:

“O kamo nga nagahigugma kay Jehova, dumti ang malaut.” (Salmo 97:10) Pagkatapos makumbinsi nga malain ang makamamatay nga mga bisyo kag mapalambo ang matuod nga pagdumot sa sini, mangin mahapos para sa isa ka tawo nga himuon kon ano ang ginakahamut-an sang Dios.

“Sia nga nagalakat upod sa maalam nga mga tawo magaalam, apang sia nga nagapakig-angot sa mga buangbuang magaantos.” (Hulubaton 13:20) Agod masikway ang droga kag iban pa makapagiyan nga mga butang, kinahanglan mahalungon nga pilion sang isa ka tawo ang iya mga kaupdanan. Mapuslanon gid ang pagpalambo sang pagpakig-abyan sa mga Cristiano nga magasuportar sa iya desisyon nga sikwayon ini nga pagkagiyan.

“Indi kamo magkabalaka sa bisan ano nga butang, kundi sa tagsa ka butang paagi sa pangamuyo kag pag-ampo nga may pagpasalamat ipakilala sa Dios ang inyo mga pangabay; kag ang paghidait sang Dios nga nagalabaw sa tanan nga panghunahuna magabantay sa inyo tagipusuon kag sa inyo ikasarang sa paghunahuna paagi kay Cristo Jesus.” (Filipos 4:​6, 7) Wala sing bisan ano nga makatupong sa sining paghidait sang tagipusuon kag hunahuna. Kag ang mapangamuyuon nga pagsalig sa Dios nagabulig sa isa nga malandas ang mga problema sa kabuhi nga wala nagagamit sang makapagiyan nga droga.

[Retrato sa pahina 9]

Ang Dios nagahatag sa mga tawo sing kahigayunan agod pahalipayon sia