Ang mga Naggradwar sa Gilead Ginpalig-on sa Pagpamulong sang “Dalagkung mga Buhat”

ANG programa sa gradwasyon sang ika-115 nga klase sang Watchtower Bible School of Gilead sang Septiembre 13, 2003 gintambungan sang 6,635 halin sa 52 ka pungsod.

Nabatian nila ang pasad-sa-Biblia nga pagpalig-on nga ginhatag sa 48 ka estudyante sang klase nga dalhon nila ang “dalagkung mga buhat sang Dios” sa mga tawo sa 17 ka pungsod. (Binuhatan 2:11) Didto himuon sang mga naggradwar ang ila hilikuton sa pagmisyonero.

Sa iya nagabukas nga komento, si Stephen Lett, nga katapo sang Nagadumala nga Hubon sang mga Saksi ni Jehova kag tsirman sang gradwasyon, nagpahanumdom sa mga estudyante: “Kon magkadto na kamo sa inyo mga asaynment, bisan diin man ini ukon bisan ano man ang inyo maeksperiensiahan, mas madamo ang dampig sa inyo sangsa batok sa inyo.” Ginagamit ang kapitulo 6 sang Ikaduhang Hari, ginpahanumdom ni Utod Lett ang mga estudyante nga makasalig sila nga si Jehova nga Dios kag ang madamong mga anghel magasuportar sa ila samtang ginabantala nila ang “dalagkung mga buhat sang Dios.” (2 Hari 6:​15, 16) Ang unang-siglo nga mga Cristiano nag-atubang sing pagpamatok kag di-pagsapak sang nagbantala sila kag nagpanudlo, kag ang Cristianong mga misyonero karon nagaatubang sing kaanggid man nga mga kahimtangan. Apang, makasalig sila sa suportar gikan sa langit kag subong man gikan sa organisasyon ni Jehova sa duta.​​—⁠Salmo 34:⁠7; Mateo 24:45.

Ipamulong ang “Dalagkung mga Buhat sang Dios”

Pagkatapos sang nagabukas nga komento sang tsirman, si Harold Corkern sang Komite sang Sanga sang Estados Unidos nagpamulongpulong sa tema nga “Realistiko nga mga Pagpaabot​​—⁠Yabi sa Makalilipay kag Madinalag-on nga Pag-alagad.” Ginpatalupangod ni Utod Corkern nga ang indi matuman nga mga paglaum mahimo magdul-ong sa kapaslawan, subong sang ginapakita sang Hulubaton 13:12. Apang, ang kapaslawan masunson nga resulta sang di-realistiko nga mga pagpaabot nga wala natuman. Dapat tamdon sang mga naggradwar ang ila kaugalingon kag ang iban sing balanse kag realistiko. Dapat sila magpaabot nga makahimo sila sing pila ka kasaypanan, apang indi sila dapat magkasubo sing tuman sa sini samtang ginapanikasugan nila nga buligan ang iban nga mahangpan ang “dalagkung mga buhat sang Dios.” Ginpalig-on ni Utod Corkern ang bag-ong mga misyonero nga magsalig kay Jehova, ang “manugbalos sa mga nagapangita sa iya.”​​—⁠Hebreo 11:6.

Ang masunod nga may bahin sa programa amo si Daniel Sydlik, isa ka katapo sang Nagadumala nga Hubon, nga nagpamulongpulong sa tema nga “Ang Cristianong Paglaum​​—⁠Ano Ini?” Nagsiling sia: “Ang paglaum isa ka Cristianong kinaiya. Isa ini ka husto nga talaksan nga nagapaposible agod ang isa makatigayon sing nagakaigo nga kaangtanan sa Dios. Ang isa ka di-Cristiano imposible nga maglaum kaangay naton.” Ginlaragway pa ni Utod Sydlik ang nagkalainlain nga mga aspekto sang Cristianong paglaum nga nagabulig sa isa nga mangin malaumon walay sapayan sang mga kabudlayan sa kabuhi. “Bangod sa paglaum maatubang naton ang kabuhi nga may napasag-uli nga kaukod kag malipayon nga espiritu.” Ang paglaum sang isa ka Cristiano nagabulig sa iya nga tamdon si Jehova subong isa ka Dios sang katuyuan kag magkasadya sa pag-alagad sa iya.​​—⁠Roma 12:12.

Si Wallace Liverance, ang registrar sang Eskwelahan sang Gilead, nagpalig-on sa mga estudyante nga “Magpadayon sa Paglakat sa Espiritu.” (Galacia 5:​16, NW) Ginpakita niya kon paano si Baruc, nga sekretaryo ni Jeremias, amat-amat nga nag-untat sa paglakat sa espiritu. Sa isa ka tion, si Baruc ginlapyo kag nagsugod sa pagpangita sing mga butang nga dalagku para sa iya kaugalingon. (Jeremias 45:​3, 5) Pagkatapos sini ginpatalupangod ni Utod Liverance nga ang iban nag-untat sa pagsunod kay Jesus kag ginsikway ang espirituwal nga kamatuoran, nga amo ang kinahanglanon para sa kaluwasan. Ginhimo nila ini bangod wala nila mahantop ang iya gintudlo, kag napaslawan sila nga ang ila undanon nga mga pagpaabot wala matuman sadto nga tion. (Juan 6:​26, 27, 51, 66) Ano ang matun-an sang mga misyonero, nga ang ila hilikuton amo ang pagpatuhoy sang igtalupangod sa Manunuga kag sa iya katuyuan, gikan sa sining mga sugilanon? Ang mga estudyante ginpalig-on nga indi magkabalaka sa pagtigayon sing posisyon, sa pagbaton sing pagkilala sang mga tawo, ukon sa paggamit sa teokratikong asaynment para sa personal nga kaayuhan.

“Ikaw Bala Mangin Manughatag Ukon Manugbaton?” amo ang ginpamangkot sang instruktor sang Gilead nga si Mark Noumair. Ginpasad niya ang iya komento sa Hukom 5:​2, diin ang indibiduwal nga mga Israelinhon gindayaw bangod sang di-makagod nga pagboluntaryo nga mag-alagad sa hangaway ni Barak. Ang mga estudyante sang Gilead gindayaw bangod sang ila espiritu sa pagsabat sa panawagan sang Daku Pa nga Barak, nga si Jesucristo, nga makigbahin sing kapin pa sa espirituwal nga inaway. Ang mga soldado ni Cristo dapat mangin interesado sa pagpahamuot sa isa nga nagtawag sa ila. Ginpahanumdom ni Utod Noumair ang mga estudyante: “Kon magsugod kita sa pagkonsentrar nga pahamut-an ang aton kaugalingon, magauntat kita sa pagpakig-away sa kaaway. . . . Ang pagmisyonero indi tuhoy sa imo. Tuhoy ini kay Jehova, sa iya pagkasoberano, kag sa pagtuman sang iya kabubut-on. Wala kita nagmisyonero bangod luyag naton nga si Jehova magapahalipay sa aton, nagaalagad kita sa iya bangod ginahigugma naton sia.”​​—⁠2 Timoteo 2:4.

Ang instruktor sang Gilead nga si Lawrence Bowen amo ang masunod nga nagdumala sang bahin nga “Pakabalaana Sila Paagi sa Kamatuoran.” (Juan 17:​17, NW) Nagsiling sia nga ang mga estudyante sang ika-115 nga klase ginpakabalaan nga mga ministro sang Dios. Samtang nagaeskwela, nakigbahin man sila sa ministeryo sa latagon kag ginpangita ang bunayag-sing-tagipusuon nga mga nagahigugma sang kamatuoran. Kaangay ni Jesus kag sang iya mga disipulo sang una, ang mga estudyante wala magpamulong gikan sa ila “kaugalingon.” (Juan 12:​49, 50) Makugi nila nga ginpresentar ang inspirado kag nagahatag-kabuhi nga pulong sang kamatuoran. Ginpakita sang liwat nga mga pag-akto kag mga eksperiensia sang mga estudyante ang daku nga epekto sang Biblia sa ila mga nabantalaan.

Ang Laygay kag Eksperiensia Makapalig-on

Gin-interbyu ni Anthony Pérez kag ni Anthony Griffin, mga katapo sang Service Department sang sanga sang Estados Unidos, ang mga katapo sang Komite sang Sanga gikan sa bug-os nga kalibutan. Ginhambalan nila ang mga kabudlayan nga ginaatubang sang bag-ong mga misyonero kag naghatag sila sing praktikal nga laygay pasad sa ila mismo naeksperiensiahan. Ang pila sa mga kabudlayan nagalakip sa mga kinatuhayan sa kultura, sa bug-os tuig nga klima sa tropiko, ukon sa kahimtangan sa relihion kag politika nga tuhay sa naandan sang mga estudyante. Ano ang makabulig agod malandas sang bag-ong mga misyonero ang ila bag-ong kahimtangan? Ang gugma kay Jehova, gugma sa mga tawo, indi pagbalikid, kag indi pagpanghikot sing padasudaso. Ang isa ka katapo sang komite sang sanga nagsiling: “Ang mga tawo sa amon asaynment nagpuyo na didto sa sulod sang madamong siglo antes namon. Pat-od gid nga mahimo kami mabuhi didto kag makigbagay. Kada makasumalang kami sing mga kabudlayan, ginatamod namon ini subong mga kahigayunan agod mapauswag ang amon kinaugali. Magsalig ka sa pangamuyo kag sa espiritu ni Jehova, kag maeksperiensiahan mo ang kamatuoran sang ginsiling ni Jesus, ‘Ako kaupod ninyo.’”​​—⁠Mateo 28:20.

Ginhatag ni Samuel Herd, nga katapo sang Nagadumala nga Hubon, ang talipuspusan nga bahin sang programa paagi sa iya pamulongpulong, “Padayon sa Pagpamulong Tuhoy sa Dalagkung mga Buhat Sang Dios.” Ang pagpasagahay sang balaan nga espiritu sang adlaw sang Pentecostes 33 C.⁠E. nagpapagsik sa mga disipulo ni Jesus sa pagpamulong tuhoy sa “dalagkung mga buhat sang Dios.” Ano ang makabulig sa bag-ong mga misyonero karon sa pagpamulong nga may kaanggid nga kakugi tuhoy sa Ginharian sang Dios? Ang amo man nga balaan nga espiritu. Ginpalig-on ni Utod Herd ang naggradwar nga mga estudyante nga “magmainit sa espiritu,” nga magkalipay sa ila mga asaynment, nga wala gid ginakalimtan ang paghanas nga ginhatag sa ila. (Roma 12:11) “Ang Biblia isa ka daku nga buhat sang Dios,” siling ni Utod Herd. “Indi pagpakadiutaya ang kabilihanan sini. Ang mensahe sini buhi. Nagadulot ini sa pinakaimportante nga bahin sang isa ka butang. Gamita ini sa pagtadlong sang mga butang sa imo kabuhi. Tuguti ini sa pagpabag-o sang imo panghunahuna. Bantayi ang imo panghunahuna paagi sa pagtuon, pagbasa, kag pagpamalandong sa Kasulatan . . . Himua nga imo tulumuron kag determinasyon nga gamiton ang paghanas sa imo sa Gilead nga magpadayon sa pagpamulong sang ‘dalagkung mga buhat sang Dios.’ ”

Pagkatapos mabasa ang mga panamyaw gikan sa bug-os nga kalibutan kag mahatag ang mga diploma, ginbasa sang isa sa naggradwar ang sulat halin sa klase nga nagapabutyag sing apresasyon sa paghanas nga nabaton. Nian nagakaigo nga gintapos ni Utod Lett ang malipayon nga okasyon paagi sa pagpatalupangod sang 2 Cronica 32:7 kag Deuteronomio 20:​1, 4. Gin-angot ang iya katapusan nga komento sa iya nagabukas nga komento, naghinakop sia: “Gani pinalangga nga mga naggradwar, samtang nagalakat kamo, samtang nagamartsa kamo sa espirituwal nga inaway sa inyo bag-ong mga asaynment, tandai nga si Jehova nagamartsa kaupod ninyo. Indi gid pagkalimti ang kamatuoran nga mas madamo ang dampig sa inyo sangsa batok sa inyo.”

[Kahon sa pahina 25]

ESTADISTIKA SANG KLASE

Kadamuon sang mga pungsod nga gintiglawas: 7

Kadamuon sang mga pungsod nga ginpadalhan: 17

Kadamuon sang mga estudyante: 48

Promedyo nga edad: 33.7

Promedyo nga tuig sa kamatuoran: 17.8

Promedyo nga tuig sa bug-os tion nga ministeryo: 13.5

[Retrato sa pahina 26]

Ika-115 nga Naggradwar nga Klase sang Watchtower Bible School of Gilead

Sa listahan sa ubos, ang mga raya ginanumeruhan halin sa atubangan pakadto sa likod kag ang mga ngalan ginalista halin sa wala pakadto sa tuo sa kada raya.

(1) Brown, T.; Goller, C.; Hoffman, A.; Bruzzese, J.; Trahan, S. (2) Smart, N.; Cashman, F.; Garcia, K.; Lojan, M.; Seyfert, S.; Gray, K. (3) Beckett, M.; Nichols, S.; Smith, K.; Gugliara, A.; Rappenecker, A. (4) Gray, S.; Vacek, K.; Fleming, M.; Bethel, L.; Hermansson, T.; Hermansson, P. (5) Rappenecker, G.; Lojan, D.; Dickey, S.; Kim, C.; Trahan, A.; Washington, A.; Smart, S. (6) Goller, L.; Burghoffer, T.; Gugliara, D.; Nichols, R.; Washington, S.; Kim, J. (7) Beckett, M.; Dickey, J.; Smith, R.; Garcia, R.; Hoffman, A.; Seyfert, R.; Brown, H. (8) Fleming, S.; Bruzzese, P.; Burghoffer, W.; Bethel, T.; Cashman, J.; Vacek, K.