Ang Pagtinguha sang mga Tawo nga Pahamut-an ang Dios

“WALA sing katilingban nga wala nagapati sa Dios, nga masami ginakilala subong nagakontrol kag Manunuga sang uniberso. Matuod ini bisan gani sa indi relihioso nga mga katilingban.” Amo sini ang ginsiling ni John Bowker sa iya libro nga God​—A Brief History (Dios—Isa ka Malip-ot nga Maragtas). Sa pila ka paagi, ang pagpangita sa Dios kag ang pagtinguha nga matigayon ang iya kahamuot nangin bahin na sang kinaugali sang tawo. Sa bilog nga kalibutan, madamo nga tawo ang sinsero nga nagahandum nga pahamut-an ang Dios. Sa pagkamatuod, ang ila pagpaninguha sa paghimo sini nagadepende sa kon ano ang ila ginapatihan.

Ang iban nagapati nga ang kinahanglanon lamang agod mapahamut-an ang Dios amo ang pagkabuhi sing matarong. Ang iban nagapati nga agod matigayon ang kahamuot sang Dios dapat sila maghimo sing maayong mga butang sa mga imol. Dugang pa, para sa minilyon ka tawo importante gid ang relihioso nga mga seremonya kag mga ritwal.

Sa pihak nga bahin, may mga tawo nga nagapati nga ang Dios tuman kalayo—malayo ukon masako katama sa iban nga butang amo nga indi na mahatagan sing atension ang ordinaryo nga mga tawo. Ang pilosopo nga si Epicurus sang dumaan nga Gresya nagapati nga ‘tuman kalayo sang mga dios amo nga wala na sila nagasapak sa nagakalatabo sa mga tawo.’ Apang, madamo sang nagahunahuna sini mga relihioso. Ang iban nagahalad pa gani kag nagahimo sing mga ritwal sa paglaum nga mapahamut-an ang ila patay nga mga katigulangan.

Ano sa banta mo? Ginatalupangod gid bala sang Dios ang aton mga panikasog nga pahamut-an sia? Posible bala naton matandog ang balatyagon sang Dios kag mapahamut-an sia?

[Credit Line sang retrato sa pahina 2]

COVER: Courtesy of ROE/Anglo-Australian Observatory, photograph by David Malin