Palambua ang mga Kinaiya nga Makabulig sa Imo sa Paghimo sing Disipulo
“Lakat kamo kag himoon nga mga gintoton-an ang tanan nga kapungsuran.”—MATEO 28:19.
1. Ano nga mga kalantip kag panimuot ang kinahanglan palambuon sang mga alagad sang Dios sang una?
KON kaisa, ang mga alagad ni Jehova kinahanglan magpalambo sing mga kalantip kag mga panimuot nga makabulig sa ila sa paghimo sang iya kabubut-on. Halimbawa, sang ginsugo sang Dios sanday Abraham kag Sara nga biyaan ang matin-ad nga siudad sang Ur, kinahanglan sila magpalambo sing mga kinaiya kag mga ikasarang agod makapasibu sa pagpuyo sa mga tolda. (Hebreo 11:8, 9, 15) Sang ginpangunahan ni Josue ang mga Israelinhon pasulod sa Ginsaad nga Duta, kinahanglan magtigayon sia sing kaisog, pagsalig kay Jehova, kag ihibalo sa iya Kasuguan. (Josue 1:7-9) Kag ang kalantip nanday Bezalel kag Oholiab, pat-od nga ginpauswag pa gid sang espiritu sang Dios agod magmadinalag-on sila sa pagpakigbahin kag pagdumala sa pagtukod sang tabernakulo kag sang iban pa nga hilikuton may kaangtanan sa sini.—Exodo 31:1-11.
2. Ano nga mga pamangkot may kaangtanan sa paghimo-disipulo nga hilikuton ang aton binagbinagon?
2 Mga pila ka siglo sang ulihi, ginsugo ni Jesucristo ang iya mga sumulunod: “Lakat kamo kag himoon nga mga gintoton-an ang tanan nga kapungsuran, . . . nga nagapanudlo sa ila sa pagtuman sang tanan nga ginsogo ko sa inyo.” (Mateo 28:19, 20) Sa sini pa lang nga tion nakatigayon sing amo sini ka pinasahi kag ka daku nga pribilehiyo ang mga tawo. Ano nga mga kinaiya ang kinahanglanon sa paghimo-disipulo nga hilikuton? Paano naton mapalambo ini nga mga kinaiya?
Magpakita sing Tudok nga Gugma sa Dios
3. Ano nga kahigayunan ang ginahatag sa aton sang sugo nga maghimo sing disipulo?
3 Agod masugilanon ang mga tawo kag makumbinsi sila nga magsimba sa matuod nga Dios dapat may tudok kita nga gugma kay Jehova. Mapamatud-an sang mga Israelinhon ang ila gugma sa Dios paagi sa bug-os-tagipusuon nga pagtuman sa iya mga sugo, pagdulot sing kalahamut-an nga mga halad, kag pagdayaw sa iya paagi sa ambahanon. (Deuteronomio 10:12, 13; 30:19, 20; Salmo 21:13; 96:1, 2; 138:5) Subong mga manughimo sing disipulo, ginatuman man naton ang mga kasuguan sang Dios, apang ginapabutyag man naton ang aton gugma kay Jehova paagi sa pagsugid sa iban tuhoy sa iya kag sa iya mga katuyuan. Dapat maghambal kita nga may kombiksion, nagapili sing husto nga mga tinaga agod ipabutyag ang aton hanuot nga balatyagon tuhoy sa aton hatag-Dios nga paglaum.—1 Tesalonica 1:5; 1 Pedro 3:15.
4. Ngaa nalipay si Jesus sa pagtudlo sa mga tawo tuhoy kay Jehova?
4 Bangod may tudok sia nga gugma kay Jehova, nalipay gid si Jesus sa pagpakigsugilanon tuhoy sa mga katuyuan sang Dios, sa Ginharian, kag sa matuod nga pagsimba. (Lucas 8:1; Juan 4:23, 24, 31) Sa katunayan, si Jesus nagsiling: “Ang akon kalan-on amo ang paghimo sang kabubut-on sang nagpadala sa akon, kag ang pagtuman sang iya buluhaton.” (Juan 4:34) Naaplikar kay Jesus ining ginsiling sang salmista: “Nagakalipay ako sa paghimo sang imo kabubut-on, O Dios ko; ang imo kasogoan yari sa sulud sang akon tagiposoon. Nabantala ko ang malipayon nga mga balita sang katarungan sa dakung pagtilipon; yari karon, dili ako magpugung sang akon mga bibig. O GINOO, ikaw nakahibalo.”—Salmo 40:8, 9; Hebreo 10:7-10.
5, 6. Anong panguna nga kinaiya ang kinahanglan sang mga manughimo sing disipulo?
5 Bangod ginapahulag sang ila gugma sa Dios, kon kaisa bisan ang mga bag-o pa lang nakatuon sang mga kamatuoran sa Biblia nagahambal na nga may kombiksion tuhoy kay Jehova amo nga epektibo gid sila sa pagkumbinsi sa iban nga usisaon ang Kasulatan. (Juan 1:41) Ang gugma sa Dios amo ang panguna nga kinaiya nga nagapahulag sa aton nga magpakigbahin sa paghimo-disipulo nga hilikuton. Busa kabay nga huptan naton nga buhi inang gugma paagi sa regular nga pagbasa kag pagpamalandong sa iya Pulong.—1 Timoteo 4:6, 15; Bugna 2:4.
6 Pat-od nga ang gugma kay Jehova amo gid ang nakabulig kay Jesus nga mangin isa ka makugihon nga manunudlo. Apang indi lamang ina ang rason kon ngaa nangin epektibo gid sia nga manugbantala sang Ginharian. Kon amo, ano pa nga kinaiya ang nakabulig kay Jesus nga mangin isa ka madinalag-on nga manughimo disipulo?
Magpakita sing Mahigugmaon nga Kabalaka sa mga Tawo
7, 8. Paano gintamod ni Jesus ang mga tawo?
7 Nabalaka gid si Jesus sa mga tawo kag nagpakita sia sing hanuot nga interes sa ila. Bisan sang antes sia nangin tawo subong “pangolo nga manugpangabudlay” sang Dios, nalipay na sia sa mga butang nga may kaangtanan sa katawhan. (Hulubaton 8:30, 31) Sang yari sia sa duta subong tawo, naluoy sia sa katawhan kag ginpaumpawan yadtong mga nagpalapit sa iya. (Mateo 11:28-30) Ginpabanaag ni Jesus ang gugma kag kaluoy ni Jehova, kag bangod sini, naganyat ang mga tawo nga simbahon ang lamang matuod nga Dios. Nagpamati kay Jesus ang tanan nga sahi sang tawo bangod nagpakita sia sing mahigugmaon nga kabalaka sa ila kag sa ila mga kahimtangan.—Lucas 7:36-50; 18:15-17; 19:1-10.
8 Sang ginpamangkot sang isa ka tawo si Jesus kon ano ang himuon niya agod makapanubli sing kabuhi nga walay katapusan, “si Jesus nga nagatolok sa iya naghigugma sa iya.” (Marcos 10:17-21) Tuhoy naman sa mga tawo nga gintudluan ni Jesus sa Betania, aton mabasa: “Ginhigugma ni Jesus si Marta kag ang iya utud nga babayi kag si Lazaro.” (Juan 11:1, 5) Daku gid ang pag-ulikid ni Jesus sa mga tawo amo nga ginpaiway niya bisan ang pagpahuway agod tudluan sila. (Marcos 6:30-34) Bangod sining tudok kag mahigugmaon nga kabalaka ni Jesus sa iya isigkatawo nangin labi sia ka epektibo sangsa kay bisan sin-o sa pagganyat sa mga tawo sa matuod nga pagsimba.
9. Ano ang panimuot ni Pablo subong manughimo sing disipulo?
9 Si apostol Pablo nagpakita man sing tudok nga kabalaka sa mga tawo nga iya ginbantalaan. Halimbawa, ginsilingan niya ang mga nangin Cristiano sa Tesalonica: “Sanglit nga nagahandum sa inyo sing mahigugmaon, nahamuut kami sa pagpaambit sa inyo indi lamang sang maayong balita sang Dios kondi [pati] man sang amon mga kaugalingon, bangud nga nanginmahal gid kamo sa amon.” Bangod sa gugma nga ginpakita ni Pablo, ang pila sa Tesalonica ‘nagliso gikan sa mga diosdios, agod mag-alagad sa buhi nga Dios.’ (1 Tesalonica 1:9; 2:8) Kon may tunay kita nga kabalaka sa mga tawo, subong sang ginpakita ni Jesus kag ni Pablo, mahimo man naton maeksperiensiahan ang kalipay nga makita kon paano malab-ot sang maayong balita ang tagipusuon sang mga “husto nga nahuyog para sa kabuhi nga walay katapusan.”—Binuhatan 13:48, NW.
Magpakita sing Masinakripisyuhon nga Espiritu
10, 11. Ngaa kinahanglan ang masinakripisyuhon nga espiritu sa paghimo sing disipulo?
10 Ang epektibo nga mga manughimo sing disipulo handa sa paghimo sing mga sakripisyo. Ang pagtipon sing manggad indi amo ang pinakaimportante nga butang para sa ila. “Daw ano kaiwat [ukon kabudlay para] sa mga may manggad ang pagsulud sa ginharian sang Dios!” Nakibot gid ang mga disipulo sang nabatian nila ini, apang nagsiling pa si Jesus: “Mga anak, daw ano kaiwat sa mga nagasalig sa manggad ang pagsulud sa ginharian sang Dios! Mahapus pa sa camelyo nga maglapus sa boho sang dagum sang sa magsulud ang manggaranon sa ginharian sang Dios.” (Marcos 10:23-25) Ginrekomendar ni Jesus sa iya mga sumulunod nga magkabuhi sing simple agod makakonsentrar sila sa paghimo sing disipulo. (Mateo 6:22-24, 33) Paano ang masinakripisyuhon nga espiritu makabulig sa aton sa paghimo sing disipulo?
11 Ang pagtudlo sang tanan nga ginsugo ni Jesus isa ka daku nga hilikuton. Sa masami, ginapanikasugan sang isa ka manughimo-disipulo nga dumalahan sing pagtuon sa Biblia ang isa ka interesado kada semana. Agod madamo pa nga sinsero nga mga tawo ang ila masalapuan, ang iban nga manugbantala sang Ginharian nagbiya sa ila bug-os tion nga trabaho kag nagtrabaho na lang sing part-time. Linibo ka Cristiano ang nagtuon sing iban nga lenguahe agod mabantalaan ang mga tawo nga tuhay sing lenguahe sa ila lugar. Ang iban nga manughimo-disipulo nagbiya sa ila puluy-an kag nagsaylo sa iban nga lugar ukon pungsod agod makapakigbahin sing bug-os sa pagpangani. (Mateo 9:37, 38) Ini tanan nagakinahanglan sing masinakripisyuhon nga espiritu. Apang indi lamang ini ang kinahanglan agod mangin isa ka epektibo nga manughimo sing disipulo.
Mangin Mapailubon Apang Indi Mag-uyang sing Tion
12, 13. Ngaa ang pagkamapailubon importante katama sa paghimo sing disipulo?
12 Ang isa pa ka kinaiya nga makabulig sa aton sa paghimo sing disipulo amo ang pagkamapailubon. Ang aton mensahe nagakinahanglan sing maabtik nga paghulag, apang ang paghimo sing disipulo indi madalidali kundi nagakinahanglan sing pagpailob. (1 Corinto 7:29) Nangin mapailubon si Jesus sa iya utod sa iloy nga si Santiago. Bisan pa nahibaluan ni Santiago ang pagbantala nga ginhimo ni Jesus, may pila pa ka butang nga nagpugong sa iya agod mangin disipulo. (Juan 7:5) Apang, sa ulot sang malip-ot nga tion halin sang kamatayon ni Jesus kag sang Pentecostes 33 C.E., si Santiago maathag nga nangin isa ka disipulo, kay ginpahangop sang Kasulatan nga isa sia sa mga nagtipon agod mangamuyo upod sa iya iloy, sa iya mga utod nga lalaki, kag sa mga apostoles. (Binuhatan 1:13, 14) Nangin maayo ang pag-uswag ni Santiago sa espirituwal, kag sang ulihi nag-abaga sia sing mabug-at nga mga salabton sa Cristianong kongregasyon.—Binuhatan 15:13; 1 Corinto 15:7.
13 Kaangay sang mga mangunguma, ang mga Cristiano nagakultibar man sing mga butang nga sa masami mahinay magtubo, subong sang paghangop sa Pulong sang Dios, gugma kay Jehova, kag tulad-Cristo nga panimuot. Nagakinahanglan ini sing pagpailob. Si Santiago nagsulat: “Mga kauturan, magpailub kamo tubtub sa pag-abut [“presensia,” NW] sang Ginoo. Yari karon, ang mangunguma nagahulat sang hamiling bunga sang duta, nga nagapailub tubtub nga mabaton sini ang una kag olihing ulan. Magpailub man kamo. Palig-ona ang inyo mga tagiposoon, kay ang pag-abut sang Ginoo malapit na.” (Santiago 5:7, 8) Ginlaygayan ni Santiago ang iya masigkatumuluo nga ‘magpailob tubtob sa presensia sang Ginuo.’ Kon ang mga disipulo may butang nga indi mahangpan, si Jesus mapailubon nga nagpaathag ukon naghatag sing ilustrasyon. (Mateo 13:10-23; Lucas 19:11; 21:7; Binuhatan 1:6-8) Karon nga yari na kita sa presensia sang Ginuo, kinahanglan man kita magpailob samtang nagahimo kita sing mga disipulo. Yadtong mga nangin sumulunod ni Jesus sa aton panahon nagakinahanglan sing mapailubon nga pagtudlo.—Juan 14:9.
14. Bisan pa mapailubon kita, paano naton magamit sing maalamon ang aton tion subong mga manughimo sing disipulo?
14 Bisan pa mapailubon kita, ang pulong wala nagapamunga sa kalabanan nga ginatun-an naton sing Biblia. (Mateo 13:18-23) Busa, kon nahimo na naton ang tanan agod buligan sila, maalamon nga untaton naton ang pagtuon sa sinang mga tawo kag pangitaon yadtong mahimo magapabalor sang kamatuoran sa Biblia. (Manugwali 3:1, 6) Siempre, bisan yadtong mga nagapabalor sang kamatuoran sa Biblia mahimo nagakinahanglan man sing dugang pa nga bulig agod mabag-o ang ila mga pagtamod, mga panimuot, kag mga prioridad sa kabuhi. Busa magpailob kita, subong sang pagpailob nga ginpakita ni Jesus sa mga disipulo nga nagakinahanglan pa sing tion agod magpalambo sing husto nga panimuot.—Marcos 9:33-37; 10:35-45.
Pagpalambo sing Kalantip sa Pagpanudlo
15, 16. Ngaa importante ang pagkasimple kag maayong paghanda sa paghimo sing disipulo?
15 Ang gugma sa Dios, kabalaka sa mga tawo, masinakripisyuhon nga espiritu, kag pagpailob mga importante nga butang sa madinalag-on nga paghimo disipulo. Kinahanglan man kita magpalambo sing kalantip sa pagtudlo, kay makabulig ini sa aton sa pagpaathag sang mga butang sa klaro kag simple nga paagi. Halimbawa, madamo nga pinamulong sang Dakung Manunudlo ang epektibo katama bangod sa pagkasimple sini. Mahimo nga madumduman mo pa ang mga pinamulong ni Jesus subong sang: “Magtipon kamo sa inyo kaugalingon sing mga bahandi sa langit.” “Dili ninyo pag-ihatag sa mga ido ang mga butang nga balaan.” “Ang kaalam ginapakamatarung sang iya mga binuhatan.” “Ihatag kay Cesar ang mga butang nga iya ni Cesar, kag sa Dios ang mga butang nga iya sang Dios.” (Mateo 6:20; 7:6; 11:19; 22:21) Apang, wala lamang nagpamulong si Jesus sing malip-ot nga mga pinamulong. Klaro sia magtudlo kag nagapaathag kon kinahanglanon. Paano mo mailog ang estilo ni Jesus sa pagtudlo?
16 Ang maayo nga paghanda amo ang yabi sa pagkasimple kag pagkaathag. Ang manugbantala nga wala nakahanda masami nga madamo sing ginahambal. Subong resulta, mahimo niya matabunan ang panguna nga mga punto bangod sa pagsaysay sing madamo nga butang nga iya nahibaluan tuhoy sa topiko. Sa kabaliskaran, ang manugbantala nga nakahanda sing maayo nagabinagbinag sa tawo nga iya ginatudluan, nagapamalandong sa topiko, kag nagapaathag sang kinahanglanon lamang nga materyal. (Hulubaton 15:28; 1 Corinto 2:1, 2) Ginahunahuna niya kon ano na ang nahibaluan sang iya estudyante kag kon ano nga mga punto ang kinahanglan ipadaku sa pagtuon. Mahimo madamo kita sing nahibaluan nga makawiwili nga detalye tuhoy sa topiko, apang madula ang pagkaathag kon isaysay naton pati ang di-kinahanglanon nga impormasyon.
17. Paano naton mabuligan ang mga tawo nga mangatarungan sa Kasulatan?
17 Ginabuligan man ni Jesus ang mga tawo nga mangatarungan sa baylo nga hungitan lamang sila sing impormasyon. Halimbawa, sang isa ka bes, namangkot sia: “Ano bala sa hunahuna mo, Simon? Sa kay sin-o bala nagasukot sing mga balayran ukon buhis ang mga hari sa duta? Sa ila mga anak ukon sa mga dumoloong?” (Mateo 17:25) Kinahanglan naton magpakita sing pagpugong sa kaugalingon agod indi kita madaranan sa pagpaathag sang Biblia sa amo makasal-ot ang estudyante sa pagpabutyag sang iya ginahunahuna ukon sa pagpaathag sang materyal nga ginabinagbinag sa tion sang pagtuon sang Biblia sa puluy-an. Apang, indi man naton dapat pagpatam-an sing pamangkot ang mga tawo. Sa baylo, paagi sa pagkamataktikanhon, sibu nga mga ilustrasyon, kag makapahunahuna nga mga pamangkot, mabuligan naton sila nga mahangpan ang Makasulatanhon nga mga punto sa aton pasad-Biblia nga mga publikasyon.
18. Ano ang nadalahig sa pagpalambo sing “kalantip sa pagpanudlo”?
18 Ang Kasulatan nagsambit tuhoy sa “kalantip sa pagpanudlo.” (2 Timoteo 4:2, NW; Tito 1:9, NW) Ining ikasarang sa pagtudlo indi lamang basta pagbulig sa isa nga sauluhon ang mga detalye. Dapat tinguhaan naton nga buligan ang aton estudyante sa Biblia nga mahangpan ang kinatuhayan sang kamatuoran sa butig, sang maayo sa malain, kag sang kaalam sa kabuangan. (Mateo 6:5, 6) Samtang ginahimo naton ini kag ginapanikasugan nga palambuon ang gugma kay Jehova sa tagipusuon sang tawo, mahimo niya makita kon ngaa dapat sia magtuman sa Iya.
Makigbahin sing Makugi sa Paghimo sing Disipulo
19. Paano nagapakigbahin ang tanan nga Cristiano sa paghimo sing mga disipulo?
19 Ang Cristianong kongregasyon isa ka nagahimo-disipulo nga organisasyon. Kon ang isa ka tawo mangin disipulo, indi lamang ang Saksi ni Jehova nga nagbulig sa iya pagtuon sa Biblia ang may rason nga magkalipay. Bilang halimbawa, kon mag-organisar ang mga tawo sing isa ka grupo sa pagpangita sa isa ka nadula nga bata, mahimo nga isa gid lamang sa ila ang makakita sa bata. Apang kon mabalik na nila ang bata sa mga ginikanan sini, ang tanan nga nakigbahin sa pagpangita nagakalipay. (Lucas 15:6, 7) Sing kaanggid, ang paghimo sing disipulo indi lamang hilikuton sang isa ka tawo. Ang tanan nga Cristiano nagapakigbahin sa pagpangita sang potensial nga mga disipulo ni Jesus. Kag kon ang isa ka bag-uhan magsugod na sa pagtambong sa mga miting sa Kingdom Hall, ang tanan nga presente nga Cristiano nagapakigbahin sa pagpalambo sang iya apresasyon sa matuod nga pagsimba. (1 Corinto 14:24, 25) Busa, nagakalipay ang tanan nga Cristiano bangod ginatos ka libo ka bag-o nga mga disipulo ang nagadugang kada tuig.
20. Ano ang dapat mo himuon kon luyag mo itudlo ang kamatuoran sa Biblia sa iban?
20 Madamong matutom nga Cristiano ang malipay gid sa pagtudlo sa isa ka tawo tuhoy kay Jehova kag sa matuod nga pagsimba. Apang, walay sapayan sang ila mga pagtinguha, wala sila nagamadinalag-on. Kon amo sina ang imo kahimtangan, padayon nga pabakura ang imo gugma kay Jehova, mangin mabinalak-on sa mga tawo, mangin masinakripisyuhon, magpailob, kag tinguhai nga pauswaga ang imo kalantip sa pagtudlo. Labaw sa tanan, ipangamuyo ang imo handum nga itudlo ang kamatuoran sa iban. (Manugwali 11:1) Dumduma pirme nga ang tanan mo nga ginahimo sa pag-alagad kay Jehova nagasakdag sa paghimo-disipulo nga hilikuton nga nagahimaya kay Jehova nga Dios.
Mapaathag Mo Bala?
• Ngaa ang paghimo sing disipulo isa ka pagtilaw sang aton gugma sa Dios?
• Ano nga mga kinaiya ang kinahanglan sang mga manughimo sing disipulo?
• Ano ang nadalahig sa “kalantip sa pagpanudlo”?
[Piktyur sa pahina 21]
Ginapasundayag sang mga Cristiano ang ila tudok nga gugma sa Dios paagi sa paghimo sing disipulo
[Piktyur sa pahina 23]
Ngaa ang mga manughimo sing disipulo dapat mangin interesado sa iban?
[Piktyur sa pahina 24]
Ano ang pila sa mga kinaiya nga kinahanglan sang mga manughimo disipulo
[Piktyur sa pahina 25]
Ang tanan nga Cristiano nalipay gid sa maayong mga resulta sang paghimo sing disipulo