May Iskedyul Ka Bala sa Pagtuon sa Biblia?
SANG nagligad nga tuig, ginpahibalo sang Nagadumala nga Hubon nga may yara pagbag-o sa iskedyul sang mga miting sa kongregasyon agod hatagan sing dugang nga tion ang pamilya sa pagtuon kag pagbinagbinag sang Biblia. Kon isa ikaw ka ulo sang panimalay, pat-ura nga madumalahan mo ang mapuslanon kag regular nga pangpamilya nga pagtuon sa Biblia upod sa imo asawa kag kabataan. Sa mga mag-asawa nga wala sing anak, mahimo nila gamiton ini nga tion para sa pagtuon sang Biblia nga magkaupod. Para naman sa di-minyo nga mga utod nga lalaki kag babayi, mahimo nila gamiton ini nga tion para sa personal nga pagtuon sa Biblia.
Madamo ang nagpabutyag sang ila apresasyon sa kahimusan sang gab-i nga Pangpamilya nga Pagsimba. Halimbawa, si Kevin nga isa ka gulang nagsulat: “Kulang pa ang tinaga nga ‘salamat’ para ipabutyag ang amon apresasyon. Subong mga gulang, ginbinagbinag namon kon paano sundon ang ginpanugda sang Nagadumala nga Hubon—nga gamiton ini nga gab-i para sa pagtuon upod sa amon pamilya.”
Si Jodi nga asawa sang isa ka gulang nagsulat: “May tatlo kami ka anak nga babayi nga nagaedad sing 15, 11, kag 2 ka tuig. Bag-o lang kami nagsaylo sa sign language nga kongregasyon. Kinahanglan gid namon ang bastante nga tion kag pagpanikasog para sa paghanda sa tanan nga mga miting. Bangod sini nga pagbag-o, may yara na kami isa pa ka gab-i nga magamit para sa amon pangpamilya nga pagsimba.”
Ang mag-asawa nga regular payunir nga sanday John kag JoAnn nagsulat: “Ang amon pangpamilya nga pagtuon sa Biblia indi regular kag ginasal-ot lang namon sa iban namon nga mga hilikuton sa kongregasyon. Ining bag-o nga kahimusan isa gid ka regalo gikan kay Jehova nga nagapaumpaw sa amon sa espirituwal—kon gamiton namon ini nga tion suno sa katuyuan sini.”
Si Tony, isa ka soltero nga utod nga 25 anyos, nag-iskedyul sang Martes sang gab-i para sa iya personal nga pagtuon. Nagahanda sia para sa mga miting sang kongregasyon sa iban nga tion. Apang, si Tony nagsiling: “Nalangkag gid ako nga ginapaabot ang Martes sang gab-i.” Ngaa? “Ina nga gab-i amo ang akon pinasahi nga tion para kay Jehova.” Si Tony nagdugang: “Sa sulod sang mga duha ka oras, ginatun-an ko ang mga topiko nga nagapasuod pa gid sa akon kay Jehova. Ang dugang nga tion sa pagtuon, nagahatag sa akon sing kahigayunan nga mapamalandungan ang mga bersikulo sa Biblia nga akon nabasa.” Ano ang resulta? “Subong ko lang nabatyagan nga nagsalop gid sa akon tagipusuon ang laygay ni Jehova.” Naghatag sia sing halimbawa. “Nabasa ko sa Insight nga libro ang pag-abyanay nanday Jonatan kag David. Madamo ako sing natun-an sa indi makagod nga panimuot ni Jonatan. Ang iya halimbawa nakabulig sa akon nga mahangpan kon paano mangin isa ka matuod nga abyan. Nalangkag gid ako nga ginapaabot ang Martes sang gab-i kay madamo naman ako sing bag-o nga mga butang nga matun-an!”
Pat-od gid nga ang tanan nga alagad ni Jehova makabenepisyo sing daku kon panginpuslan nila ang gab-i nga gintalana para sa mapuslanon nga pagtuon sa Biblia kag pangpamilya nga pagsimba.