“Ano Kamo nga Sahi sang mga Tawo!”
“Sanglit ini tanan nga butang matunaw, dapat talupangdon ninyo kon ano kamo nga sahi sang mga tawo may kaangtanan sa balaan nga paggawi kag sa mga buhat sang diosnon nga debosyon!”—2 PED. 3:11.
1. Ngaa ang ikaduha nga sulat ni Pedro nagakaigo gid nga laygay para sa mga Cristiano sadto?
SANG ginhimo ni apostol Pedro ang iya ikaduha nga inspirado nga sulat, ang Cristianong kongregasyon nagaatubang na sang madamo nga paghingabot. Apang, wala ini nagpaluya sang ila kakugi ukon nagpahinay sang ila pag-uswag. Gani, ang Yawa naggamit sang isa pa ka paagi nga napamatud-an niya nga epektibo gid. Subong sang ginpakita ni Pedro, ginatinguhaan gid ni Satanas nga gub-on ang integridad sang katawhan sang Dios paagi sa di-matuod nga mga manunudlo nga may ‘mga mata nga puno sang panghilahi kag may tagipusuon nga nahanas sa pagkamahamkunon.’ (2 Ped. 2:1-3, 14; Jud. 4) Ang ikaduha nga sulat ni Pedro isa gid ka hanuot nga laygay nga makabulig sa mga Cristiano nga mahuptan ang ila katutom sa Dios.
2. Sa ano nakasentro ang 2 Pedro kapitulo 3, kag ano ang dapat naton ipamangkot sa aton kaugalingon?
2 Si Pedro nagsulat: “Ginakabig ko nga nagakaigo, samtang yari ako sa sini nga tabernakulo, nga pukawon kamo paagi sa pagpahanumdom sa inyo, kay nahibaluan ko nga malapit na kuhaon ang akon tabernakulo . . . Gani himuon ko man ang akon bug-os nga masarangan sa tanan nga tion agod sa tapos sang akon pagtaliwan, madumduman ninyo ini nga mga butang.” (2 Ped. 1:13-15) Huo, nakahibalo si Pedro nga malapit na lang sia mapatay, apang luyag niya nga dumdumon nila ang iya suno sa tion nga laygay. Sa pagkamatuod, ang iya mga laygay nangin bahin sang Biblia kag mahimo naton mabasa karon. Ang kapitulo 3 sang ikaduha nga sulat ni Pedro makabulig gid sa aton bangod nasentro ini “sa katapusan nga mga adlaw” sining sistema sang mga butang kag sa kalaglagan sang malaragwayon nga langit kag duta. (2 Ped. 3:3, 7, 10) Ano ang laygay ni Pedro para sa aton? Paano ang pag-aplikar sang iya laygay makabulig sa aton nga kahamut-an kita ni Jehova?
3, 4. (a) Anong makapahulag nga pinamulong ang ginsiling ni Pedro, kag ano nga paandam ang iya ginhatag? (b) Ano ang tatlo ka punto nga binagbinagon naton?
3 Sa tapos niya ginsambit ang tuhoy sa kalaglagan sang kalibutan ni Satanas, si Pedro nagsiling: “Ano kamo nga sahi sang mga tawo may kaangtanan sa balaan nga paggawi kag sa mga buhat sang diosnon nga debosyon!” (2 Ped. 3:11, 12) Maathag nga ang iya ginsiling indi pamangkot kundi isa ka makapahulag nga pinamulong. Nakahibalo si Pedro nga ang mga tawo lamang nga nagahimo sang kabubut-on ni Jehova kag nagapakita sang diosnon nga debosyon amo ang maluwas sa “adlaw sang pagtimalus.” (Isa. 61:2) Gani, ang apostol nagdugang: “Busa kamo, mga hinigugma, bangod nakahibalo na kamo nga daan sini, magbantay kamo agod indi kamo mapahilayo kaupod nila [sang di-matuod nga mga manunudlo] paagi sa sayop sang mga tawo nga di-matinumanon sa kasuguan kag madula ang inyo kaugalingon nga kapag-on.”—2 Ped. 3:17.
4 Bangod si Pedro isa sa mga ‘nakahibalo na nga daan’ sang mahanabo sa palaabuton, nahibaluan niya nga dapat gid magbantay ang mga Cristiano agod mahuptan nila ang ila integridad sa katapusan nga mga adlaw. Sang ulihi, ginpaathag ni apostol Juan ang rason kon ngaa. Nakita niya ang pagtabog kay Satanas gikan sa langit nga may “daku nga kaakig” batok sa mga “nagatuman sa mga sugo sang Dios kag may hilikuton sa pagpanaksi tuhoy kay Jesus.” (Bug. 12:9, 12, 17) Ang mainunungon nga mga hinaplas lakip ang matutom nga “iban nga mga karnero” nga kaupod nila magamadinalag-on. (Juan 10:16) Apang, kamusta kita subong mga indibiduwal? Mahuptan bala naton ang aton integridad? Mahuptan naton ini kon tinguhaan naton nga (1) palambuon ang diosnon nga mga kinaiya, (2) magpabilin nga wala sing higko kag wala sing depekto sa moral kag espirituwal, kag (3) matigayon ang husto nga pagtamod sa mga pagtilaw. Binagbinagon naton ini nga mga punto.
Palambua ang Diosnon nga mga Kinaiya
5, 6. Ano nga mga kinaiya ang dapat naton palambuon, kag ngaa kinahanglan gid ang “pagpanikasog sing maukod”?
5 Sa una nga bahin sang ikaduha nga sulat ni Pedro, nagsiling sia: “Paagi sa pagpanikasog sing maukod tungod sini nga mga butang, idugang sa inyo pagtuo ang labaw gid nga pagkamaayo, sa inyo labaw gid nga pagkamaayo ang ihibalo, sa inyo ihibalo ang pagpugong sa kaugalingon, sa inyo pagpugong sa kaugalingon ang pagbatas, sa inyo pagbatas ang diosnon nga debosyon, sa inyo diosnon nga debosyon ang utudnon nga pagpalangga, sa inyo utudnon nga pagpalangga ang gugma. Kay kon ini nga mga butang yara sa inyo kag nagaawas, magapugong ini sa inyo nga mangin di-aktibo ukon di-mabungahon may kaangtanan sa sibu nga ihibalo tuhoy sa aton Ginuong Jesucristo.”—2 Ped. 1:5-8.
6 Huo, kinahanglan gid ang “pagpanikasog sing maukod” agod makapakigbahin sa mga hilikuton nga makapalambo sang aton diosnon nga mga kinaiya. Halimbawa, agod matambungan mo ang tanan nga Cristianong miting, mabasa ang Biblia adlaw-adlaw, kag mangin regular sa personal nga pagtuon kinahanglan mo manikasog. Nagakinahanglan man sing panikasog kag maayo nga pagplano agod mangin regular, makalilipay kag mapuslanon ang gab-i sang Pangpamilya nga Pagsimba. Kon maanad na kita sa sini nga rutina, mangin mahapos na sa aton ang paghimo sini—ilabi na kon makita naton ang mga benepisyo.
7, 8. (a) Ano ang ginsiling sang pila tuhoy sa Pangpamilya nga Pagsimba? (b) Paano ka nakabenepisyo sa inyo pangpamilya nga pagsimba?
7 Tuhoy sa kahimusan sang Pangpamilya nga Pagsimba, ang isa ka utod nga babayi nagsulat: “Nakabulig ini sa amon nga matun-an ang madamo nga topiko.” Ang isa pa nagsiling: “Sa tuod-tuod lang, indi ko gid gusto nga madula ang pagtinuon sa libro. Amo ini ang paborito ko nga miting. Apang sang nagahiwat na kami sang Pangpamilya nga Pagsimba, narealisar ko nga mas nakahibalo si Jehova kon ano ang amon kinahanglan kag kon san-o namon ini kinahanglan.” Ang isa ka ulo sang pamilya nagsiling: “Daku gid ang nabulig sa amon sang Pangpamilya nga Pagsimba. Nalipay kami kay ini nga miting daw gindesinyo gid para sa kinahanglanon namon nga mag-asawa! Nabatyagan namon nga napalambo namon ang mga bunga sang espiritu kag labi kami nga nangin malipayon sa pagministeryo.” Ang isa pa ka ulo sang pamilya nagsiling: “Ang mga bata nagamatumato na sa pag-research kag madamo sila sing natun-an—kag nanamian gid sila sa sini. Bangod sa sini nga kahimusan nangin kumbinsido kami nga si Jehova nakahibalo gid sang amon mga kinahanglanon kag nagasabat sang amon mga pangamuyo.” Amo man bala sini ang imo ginabatyag sa sining dalayawon nga espirituwal nga mga aman?
8 Indi pagtuguti nga may mag-upang sa inyo pangpamilya nga pagsimba. Ang isa ka mag-asawa nagsiling: “Apat na ka sagunson nga Huebes sang gab-i nga may nagakatabo pirme sa amon pamilya kag diutayan lang sini mapauntat ang amon pagtuon, apang wala namon ini gintugutan nga mag-upang sa amon.” Huo, may mga tion nga kinahanglan ninyo bag-uhon ang inyo iskedyul. Apang, tinguhai nga indi malaktawan ang inyo Pangpamilya nga Pagsimba—bisan isa lang ka semana!
9. Paano ginsakdag ni Jehova si Jeremias, kag ano ang matun-an naton sa iya halimbawa?
9 Si manalagna Jeremias isa gid ka maayo nga halimbawa para sa aton. Ginpabaloran gid niya ang espirituwal nga pagkaon nga ginhatag sa iya ni Jehova. Amo ini ang nakabulig sa iya nga magpadayon sa pagbantala bisan pa indi mabinatunon ang mga tawo. “Ang polong sang GINOO . . . subong sang kalayo nga nagadabdab nga natakpan sa akon mga tul-an,” siling niya. (Jer. 20:8, 9) Sa bulig sini, nabatas niya ang mabudlay nga kahimtangan tubtob sang nalaglag ang Jerusalem. Sa karon, may yara na kita kompleto nga nasulat nga Pulong sang Dios. Kon tun-an naton ini sing maukod kag ilugon ang pagtamod sang Dios, kaangay ni Jeremias, mabatas man naton nga may kalipay ang mga kabudlayan sa ministeryo, makapabilin kita nga matutom walay sapayan sang mga pagtilaw, kag mahuptan naton ang katinlo sa moral kag espirituwal.—Sant. 5:10.
Magpabilin nga “Wala sing Higko kag Wala sing Depekto”
10, 11. Ngaa dapat naton himuon ang aton bug-os nga masarangan nga magpabilin nga “wala sing higko kag wala sing depekto,” kag paano naton ina mahimo?
10 Subong mga Cristiano nahibaluan naton nga nagakabuhi na kita sa tion sang katapusan. Gani, wala na kita nagakatingala kon ngaa ang kalibutan nagapatuyang sa mga butang nga ginakangil-aran ni Jehova subong sang kakagod, seksuwal nga imoralidad, kag kasingki. Suno sa Bugna 2:13, 14, ang paagi ni Satanas mahimo masumaryo sing subong sini: ‘Kon ang mga alagad sang Dios indi madala sa pagpamahog, mahimo sila madala sa kahigkuan.’ Gani, dapat gid naton sundon ang mahigugmaon nga laygay ni Pedro: “Himua ninyo ang inyo bug-os nga masarangan agod sa katapusan masapwan niya [sang Dios] kamo nga wala sing higko kag wala sing depekto kag sa paghidait.”—2 Ped. 3:14.
11 Ang ekspresyon nga “himua ninyo ang inyo bug-os nga masarangan” kaanggid man sa una nga ginlaygay ni Pedro nga ‘magpanikasog sing maukod.’ Maathag nga si Jehova—ang nag-inspirar kay Pedro nga ipabutyag ina nga pinamulong—nakahibalo gid nga kinahanglan naton manikasog agod makapabilin nga “wala sing higko kag wala sing depekto” sa imoral nga kalibutan ni Satanas. Agod mahimo ini, dapat man naton amligan ang aton tagipusuon nga indi madaug sang sayop nga mga kailigbon. (Basaha ang Hulubaton 4:23; Santiago 1:14, 15.) Dapat man kita magpabilin nga malig-on batok sa mga nagayaguta sa aton Cristiano nga pagkabuhi kag “padayon nga nagapakalain sa [aton].”—1 Ped. 4:4.
12. Ano nga pasalig ang mabasa naton sa Lucas 11:13?
12 Bangod indi kita himpit, nabudlayan kita nga himuon kon ano ang husto. (Roma 7:21-25) Magamadinalag-on lamang kita kon magsalig kita kay Jehova—ang isa nga maalwan nga nagahatag sang iya balaan nga espiritu sa mga hanuot nga nagapangayo sini sa iya. (Luc. 11:13) Ini nga espiritu ang magapalambo sang aton mga kinaiya nga ginakahamut-an sang Dios. Ini man ang magabulig sa aton nga malandas indi lamang ang mga pagsulay kundi pati man ang mga pagtilaw nga padayon nga nagadugang samtang nagahilapit ang adlaw ni Jehova.
Tuguti ang mga Pagtilaw nga Magpabakod sa Imo
13. Kon makaatubang kita sang mga pagtilaw, ano ang makabulig sa aton nga mabatas ini?
13 Samtang nagakabuhi pa kita sa sining daan nga sistema sang mga butang, makaatubang gid kita sang nanuhaytuhay nga mga pagtilaw. Apang sa baylo nga paluyahon kita sini, ngaa indi naton ini pagkabigon nga kahigayunan agod pamatud-an ang aton gugma sa Dios kag pabakuron ang aton pagtuo sa iya kag sa iya Pulong? Si disipulo Santiago nagsulat: “Kabiga ninyo nga bug-os nga kalipay, mga kauturan ko, kon nagaatubang kamo sang nanuhaytuhay nga pagtilaw, kay nahibaluan ninyo nga ining natilawan nga kinaiya sang inyo pagtuo nagapatubas sang pagbatas.” (Sant. 1:2-4) Dumduma man nga “nahibaluan ni Jehova kon paano luwason ang mga tawo nga may diosnon nga debosyon gikan sa pagtilaw.”—2 Ped. 2:9.
14. Paano ka napabakod sang halimbawa ni Jose?
14 Binagbinaga ang halimbawa sang anak ni Jacob nga si Jose, nga ginbaligya subong ulipon sang iya mga utod. (Gen. 37:23-28; 42:21) Nadula bala ang pagtuo ni Jose bangod sa kapintas sang iya mga utod? Naakig bala sia sa Dios bangod gintugutan Niya nga matabo ini sa iya? Maathag ang sabat sang Biblia nga wala! Indi lamang ina ang mga pagtilaw nga naagyan ni Jose. Gin-akusahan sia nga manglugos kag bangod sini nabilanggo sia. Bisan pa amo sina ang natabo sa iya, nagpabilin nga malig-on ang iya debosyon sa Dios. (Gen. 39:9-21) Gintugutan niya ang mga pagtilaw nga magpabakod sa iya, kag bangod sini ginpakamaayo sia sing bugana.
15. Ano ang matun-an naton sa halimbawa ni Noemi?
15 Huo, mahimo kita masubuan ukon mapung-awan bangod sa mga pagtilaw. Ayhan may mga tion nga amo sina ang ginbatyag ni Jose. Luwas sa iya, may iban pa nga matutom nga alagad sang Dios nga nakabatyag man sing subong sina. Binagbinaga ang halimbawa ni Noemi nga namatyan sang bana kag duha ka anak nga lalaki. “Dili ninyo ako pagtawga Noemi,” siling niya. “Tawga ako Mara [kon sayoron Mapait], kay ang Makaako naghisayo sing mapait sa akon.” (Rut 1:20, 21, footnote) Ang reaksion ni Noemi normal lang nga reaksion sang isa ka tawo nga napung-awan. Apang kaangay ni Jose, wala nadula ang iya pagtuo ukon nagluya ang iya kaangtanan sa Dios. Gani, ginpadyaan ni Jehova ang katutom sini nga babayi. (Rut 4:13-17, 22) Wala labot sina, kon ang duta mangin Paraiso na, dulaon sang Dios ang tanan nga halit nga gintuga ni Satanas kag sang iya malaut nga kalibutan. “Ang una nga mga butang indi na pagdumdumon, ukon mag-abut sa painoino.”—Isa. 65:17.
16. Ano dapat ang aton panimuot sa pangamuyo, kag ngaa?
16 Ano man nga pagtilaw ang aton maatubang, ang gugma sang Dios magabulig sa aton nga malandas ini. (Basaha ang Roma 8:35-39.) Bisan pa indi mag-untat si Satanas sa pagtinguha nga paluyahon kita, indi gid sia magmadinalag-on kon magpabilin kita nga ‘maligdong sing hunahuna’ kag “mabinantayon may kaangtanan sa pangamuyo.” (1 Ped. 4:7) Si Jesus nagsiling: “Gani, magpadayon kamo nga nagamata nga nagaampo sa tanan nga tion agod magmadinalag-on kamo sa pagpalagyo sa sini tanan nga butang nga gintalana nga mahanabo, kag sa pagtindog sa atubangan sang Anak sang tawo.” (Luc. 21:36) Talupangda nga gingamit ni Jesus ang tinaga nga “nagaampo,” ang pinakahanuot nga sahi sang pangamuyo. Ang laygay ni Jesus nga mag-ampo nagapahangop nga dapat gid naton tamdon sing serioso ang aton tindog sa atubangan niya kag sa iya Amay. Kay yadto lamang ang may kahalamut-an nga tindog ang maluwas sa adlaw ni Jehova.
Magpabilin nga Aktibo sa Pag-alagad kay Jehova
17. Kon mabudlay ang pagbantala sa inyo teritoryo, paano ka makabenepisyo sa maayo nga halimbawa sang mga manalagna sang una?
17 Ang pagpakigbahin sa espirituwal nga mga hilikuton makapaumpaw. Nagapahanumdom ini sa aton sang pinamulong ni Pedro: “Ano kamo nga sahi sang mga tawo may kaangtanan sa balaan nga paggawi kag sa mga buhat sang diosnon nga debosyon!” (2 Ped. 3:11) Ang pinakaimportante sa sini nga mga hilikuton amo ang pagbantala sang maayong balita. (Mat. 24:14) Huo, may mga teritoryo nga mabudlay gid ang pagbantala, ayhan bangod ang mga tawo wala sing interes, nagapamatok ukon tuman kasako sa ila adlaw-adlaw nga mga hilikuton. Amo man sini ang ginbatas sang mga alagad ni Jehova sang una. Apang, wala sila nangampo kundi “adlawadlaw” sila nga nagabalik dala ang mensahe gikan sa Dios. (2 Cron. 36:15, 16; basaha ang Jeremias 7:24-26.) Ano ang nakabulig sa ila nga magbatas? Gintamod nila ang ila hilikuton suno sa pagtamod ni Jehova kag indi suno sa pagtamod sang kalibutan. Dugang pa, ginkabig nila nga isa ka daku nga kadungganan ang pagdala sang ngalan sang Dios.—Jer. 15:16.
18. Ano ang kaangtanan sang aton pagbantala sang Ginharian nga hilikuton sa paghimaya sang ngalan sang Dios sa palaabuton?
18 Sa karon, pribilehiyo man naton nga ibantala ang ngalan kag katuyuan ni Jehova. Hunahunaa ini: Subong resulta sang aton pagbantala, ang mga kaaway sang Dios indi makabalibad kon hukman na sila ni Jehova sa iya dakung adlaw. Kaangay ni Paraon sang una, makilala nila nga si Jehova amo ang nagapakig-away batok sa ila. (Ex. 8:1, 20; 14:25) Sa amo man nga tion, padunggan ni Jehova ang iya matutom nga mga alagad paagi sa pagpakilala nga sila ang iya mga tiglawas.—Basaha ang Ezequiel 2:5; 33:33.
19. Paano naton mapakita nga ginapanginpuslan naton ang pagpailob ni Jehova?
19 Sa hingapusan nga bahin sang ikaduha nga sulat ni Pedro, sia nagsiling sa iya mga masigkatumuluo: “Kabiga ninyo ang pagpailob sang aton Ginuo subong kaluwasan.” (2 Ped. 3:15) Huo, dapat naton panginpuslan ang tion nga nagapailob pa si Jehova. Paano? Paagi sa pagpalambo sang mga kinaiya nga ginakahamut-an niya, pagpabilin nga “wala sing higko kag wala sing depekto,” pagtigayon sang husto nga panimuot sa mga pagtilaw, kag pagpabilin nga masako sa hilikuton sang Ginharian. Kon himuon naton ina, maagom naton ang walay katapusan nga mga pagpakamaayo sang “bag-ong langit kag bag-ong duta.”—2 Ped. 3:13.
Madumduman Mo Bala?
• Paano naton mapalambo ang diosnon nga mga kinaiya?
• Paano kita makapabilin nga “wala sing higko kag wala sing depekto”?
• Ano ang matun-an naton kay Jose kag kay Noemi?
• Ngaa ang pagpakigbahin sa pagbantala nga hilikuton isa ka daku nga pribilehiyo?
[Retrato sa pahina 9]
Mga bana, ano ang makabulig sa inyo kag sa inyo pamilya nga mapalambo ang diosnon nga mga kinaiya?
[Retrato sa pahina 10]
Ano ang matun-an naton kay Jose sa pag-atubang sa mga pagtilaw?