Ano Bala nga Sari sang mga Tawo Dapat Mangin Amo Kamo?

¹ Ang tion sang paghusay nagahilapit para sa tanan nga katawhan. Amo ini ang tion nga ang paghukom sang Dios igapatuman batok sa mga malauton; amo man ini ang tion sang kaluwasan para sa mga matarong. Ang tanan nga mga tawo nga nagakabuhi sa sina nga tion magapanabat sa kon paano sila nagkabuhi. Nagahunahuna sina, si Pedro namangkot: “Ano bala nga sari sang mga tawo dapat mangin amo kamo”? Ginapadaku niya ang importansia sang ‘balaan nga mga paggawi, mga buhat sang diosnon nga debosyon, kag paghupot nga malapit sa hunahuna sang adlaw ni Jehova,’ subong man ang kinahanglanon nga mangin ‘walay dagta, walay kasawayan, kag sa paghidait.’​—2 Ped. 3:​11-14.

² Balaan nga mga Paggawi kag mga Buhat sang Diosnon nga Debosyon: Ang balaan nga paggawi nagalakip sang mga buhat nga nagapakita sing pagtahod sa mga prinsipio sang Biblia. (Tito 2:​7, 8) Ang isa ka Cristiano dapat maglikaw sa kalibutanon nga paggawi nga ginapahulag sang makagod, undanon nga mga kailigbon.​—Roma 13:​11, 14.

³ Ang “diosnon nga debosyon” ginalaragway subong “personal nga kaangtanan sa Dios, nga nagagikan sa tagipusuon nga ginpahulag sang tudok nga pagkilala sa iya makagalanyat nga mga kinaiya.” Ang aton kakugi sa ministeryo amo ang isa ka paagi nga ginapadayag naton ini nga kinaiya. Ang aton motibo sa pagbantala indi lamang isa ka obligasyon; nagagikan ini sa tudok nga gugma kay Jehova. (Mar. 12:​29, 30) Bangod ginapahulag sina nga gugma, ginakabig naton ang aton ministeryo subong isa ka pagpakita sang aton diosnon nga debosyon. Ang aton pagpakigbahin sa pagbantala nga hilikuton dapat mapinadayunon. Dapat ini mangin isa ka kinahanglanon nga bahin sang aton semanal nga iskedyul sang hilikuton.​—Heb. 13:15.

⁴ Ang paghupot sang adlaw ni Jehova nga “malapit sa hunahuna” nagakahulugan sang paghupot sini nga panguna sa aton adlaw-adlaw nga mga panghunahuna, nga wala gid ini ginapahigad. Nagakahulugan ini sang paghupot sa mga interes sang Ginharian nga una sa aton kabuhi.​—Mat. 6:33.

⁵ Walay dagta, Walay Kasawayan, kag sa Paghidait: Subong bahin sang dakung kadam-an, ‘ginbunakan naton ang aton mga panapton kag ginpaputi ini sa dugo sang Kordero.’ (Bug. 7:14) Ang mangin “walay dagta” nagakahulugan nga ginaamligan naton ang aton matinlo, dedikadong kabuhi nga indi mawisikan sang mga kahigkuan sang kalibutan. Ginahuptan naton ang aton kaugalingon nga “walay kasawayan” paagi sa indi-pagtugot nga gub-on sang didiosnon, materyalistikong mga paghimud-os ang aton Cristianong pagginawi. (Sant. 1:27; 1 Juan 2:​15-17) Ginapakita naton nga nagakabuhi kita “sa paghidait” paagi sa paghunahuna sang “paghidait sang Dios” sa tanan naton nga mga pagpakig-angot sa iban.​—Filip. 4:7; Roma 12:18; 14:19.

⁶ Kon madinalag-on kita nga nagabantay nga indi madagtaan sang kalibutan, ang aton maayong mga buhat magabulig sa iban nga makita ang kinatuhayan “sang nagaalagad sa Dios kag sang wala nagaalagad sa iya.”​—Mal.3:18.

⁷ Ang ngalan ni Jehova ginapadunggan, ang kongregasyon ginapabakod, kag ang iban nagapanginpulos kon matutom nga ginahuptan naton ang “maayong mga buhat.” (1 Ped. 2:12) Kabay nga pirme kita mangin amo sina nga sahi sang tawo.