Posible Bala Kita Mangin Kontento?
“Ang pagkakontento nagapamanggaranon sa imol; ang pagkadi-kontento nagapaimol sa manggaranon.” —Benjamin Franklin.
MATUOD gid ini nga hulubaton, kay napamatud-an sang madamo nga mabudlay gid mangin kontento. Gusto sang mga tawo subong nga magdamo pa ang ila pagkabutang, malab-ot ang ila mataas nga mga handum, ukon mangin pareho ang ila kabuhi sa iban! Nabatyagan mo man bala ang impluwensia sang mga masunod?
• Ginapakita sang mga advertisement nga mas kontento ka kon mas madamo ang imo baklon.
• Ang kompetensiahanay sa trabaho kag eskwelahan nagapabatyag sa imo nga mangin maayo ka lang kon mahimo mo man ang masarangan sang iban.
• Wala ginaapresyar sang mga tawo ang imo nahimo para sa ila.
• Nahisa ka sa kon ano ang ara sa imo mga abyan.
• Wala masabat ang imo mga pamangkot parte sa kabuhi.
Base sa sini, posible pa bala nga mangin kontento kita? Ginsugid ni apostol Pablo kon ano “ang sekreto nga mangin kontento.” May mga panahon nga bugana sia, kag kon kaisa ginakulang man. Ginadayaw sia sang iya mga abyan, pero ginapakanubo sang iban. Nagsiling sia nga “natun-an [niya] nga mangin kontento bisan ano ang [iya] kahimtangan.”—Filipos 4:11, 12.
Madamo ang wala makahibalo kon ano ang pagkakontento. Pero pareho sang ginsiling ni Pablo, puede ini matun-an. Gani, ginaagda ka namon nga binagbinagon ang ginasiling sang Pulong sang Dios, ang Biblia, parte sa lima ka sekreto para mangin kontento.