Natun-an Mo Na Bala ang Sekreto Kon Paano Mangin Kontento?

1. Ano ang buot silingon sang mangin kontento, kag ano ang indi buot silingon sini?

KONTENTO ka bala? Kon kontento ang isa ka tawo, nalipay sia sa mga pagpakamaayo nga nabaton niya kag matawhay ang iya hunahuna. Bisan pa may mga butang nga wala sia, wala nagalain ang iya buot ukon wala sia naakig. Pero indi buot silingon nga kon kontento ang isa, nagapatawhay na lang sia. Halimbawa, bilang alagad ni Jehova, nagatinguha gid ang isa ka Cristiano nga dugangan pa gid ang iya ginahimo sa pag-alagad. (Roma 12:1; 1 Tim. 3:1) Pero bisan wala pa niya nabaton subong ang pribilehiyo nga gusto niya, indi madula ang iya kalipay kon kontento sia.

2. Ngaa indi gid maayo kon indi kita kontento?

² Kon indi kita kontento, posible gid nga makahimo kita sang indi maayo nga mga desisyon. Halimbawa, kon indi kontento ang isa ka tawo sa iya mga pagkabutang, posible gid nga pirme sia maobertaym para mabakal niya ang mga butang nga indi man niya kinahanglan. Masubo gid kay may pila ka utod nga nangawat sang kuarta kag sang mga butang nga gusto nila. Posible nahunahuna nila, ‘Akon gid man ’ni dapat,’ ‘Ngaa mangabudlay pa ’ko nga ari na gid?’ ukon ‘Ulian ko lang ’ni ang ginkuha ko nga kuarta.’ Pero, naakig gid si Jehova sa tanan nga klase sang pagpangawat kag mapakahuy-an sini ang iya ngalan. (Hulu. 30:9) May pila naman nga naglalain gid sang wala ginhatag sa ila ang pribilehiyo sa pag-alagad nga gusto nila, gani nag-untat sila sa pag-alagad kay Jehova. (Gal. 6:9) Ano ayhan ang rason kon ngaa mahimo sang isa ka alagad ni Jehova ini nga mga butang? Posible gid nga amat-amat sia nga nangin indi kontento.

3. Ano ang ginapasalig sa aton sang Filipos 4:​11, 12?

³ Masarangan naton tanan nga mangin kontento. Nagsulat si apostol Pablo nga “natun-an [niya] nga mangin kontento sa bisan ano nga kahimtangan.” (Basaha ang Filipos 4:​11, 12.) Ginsulat niya ini sang ara sia sa prisuhan. Pero bisan pa napriso sia, malipayon sia gihapon. Kay man, ‘natun-an niya ang sekreto’ kon paano mangin kontento. Kon nabudlayan kita mangin kontento, ginapasalig kita sang ginsiling ni Pablo kag sang iya eksperiensia nga masarangan naton ini nga ipakita. Pero, indi naton dapat paghunahunaon nga mahapos lang nga mangin kontento sa aton kahimtangan. Sa baylo, dapat naton tun-an kon paano mangin kontento. Paano? Binagbinagon naton ang mga kinaiya nga makabulig sa aton nga mahimo ini.

PIRME MAGPASALAMAT

4. Kon pirme kita nagapasalamat, paano ini makabulig sa aton nga mangin kontento? (1 Tesalonica 5:18)

⁴ Kon pirme nagapasalamat ang isa ka tawo, mabuligan gid sia sini nga mangin kontento. (Basaha ang 1 Tesalonica 5:18.) Halimbawa, kon nagapasalamat kita kay may ara kita sang aton mga kinahanglanon, malikawan naton nga handumon ang mga butang nga wala sa aton. Kag kon nagapasalamat kita sa aton mga pribilehiyo sa pag-alagad subong, himuon gid naton ang aton pinakamaayo sa sini nga mga pribilehiyo imbes nga pamensaron pirme ang pribilehiyo nga gusto kuntani naton. Gani, ginapalig-on kita sang Biblia nga ilakip naton sa aton mga pangamuyo ang pagpasalamat kay Jehova. Kon pirme kita nagapasalamat, mabatyagan naton “ang paghidait sang Dios nga labaw sa tanan nga paghangop.”​—Fil. 4:​6, 7.

5. Ano ang mga ginhimo ni Jehova para sa mga Israelinhon nga dapat nila kuntani pasalamatan? (Tan-awa man ang piktyur.)

⁵ Binagbinaga ang natabo sa mga Israelinhon. Sang ara sila sa kamingawan, madamo nga beses sila nga nagreklamo kay Jehova bangod ginapangita nila ang mga pagkaon nga ara sa Egipto. (Num. 11:​4-6) Mabudlay gid man ang ila kabuhi sa kamingawan. Pero, ano kuntani ang ginhimo nila para nangin kontento sila? Mas maayo kuntani kon ginpamalandungan nila ang tanan nga ginhimo ni Jehova para sa ila kag ginpasalamatan sia. Gindumdom kuntani nila nga sang ara sila sa Egipto, ginpintasan sila bilang mga ulipon. Pero ginhilway sila ni Jehova paagi sa napulo ka kalalat-an. Kag paghalin nila sa Egipto, “ginpanguha nila ang mga pagkabutang sang mga Egiptohanon,” pareho sang pilak, bulawan, kag mga bayo. (Ex. 12:​35, 36) Sang nakibon sila sa Pula nga Dagat, gintunga ini ni Jehova para makatabok sila. Kag sang nagalakbay sila sa kamingawan, gin-amanan sila ni Jehova sing manna kada adlaw. Ti, ngaa nagreklamo sila parte sa pagkaon? Nangin indi kontento ang mga Israelinhon, indi bangod wala sila sing makaon, kundi bangod wala nila gin-apresyar ang gin-aman sa ila ni Jehova.

6. Ano ang puede naton himuon para pirme kita magpasalamat?

⁶ Ano ang puede mo himuon para pirme ka magpasalamat? Una, magpain sang tion kada adlaw para hunahunaon ang mga butang nga ara sa imo subong nga nagapalipay sa imo. Puede mo isulat ang duha ukon tatlo ka butang nga ginapasalamatan mo. (Pan. 3:​22, 23) Ikaduha, ipabutyag ang imo pagpasalamat. Siguraduha nga mapasalamatan mo ang iban kon may ginhimo sila para sa imo. Labaw sa tanan, pasalamati pirme si Jehova. (Sal. 75:1) Ikatlo, makigsuod sa mga tawo nga pirme nagapasalamat. Kon pirme nagareklamo ang aton mga abyan, mangin reklamador man kita. Pero kon pirme nagapasalamat ang aton mga abyan, mailog man naton sila. (Deut. 1:​26-28; 2 Tim. 3:​1, 2, 5) Gani kon panikasugan naton nga pirme magpasalamat, malikawan naton nga mangin indi kontento sa aton kahimtangan.

7. Ano ang ginhimo ni Aci para mangin mapinasalamaton sia, kag ano ang nabulig sini sa iya?

⁷ Binagbinaga ang eksperiensia sang isa ka sister sa Indonesia nga si Aci. Nagsiling sia: “Sa tion sang COVID-19 nga pandemic, ginpaanggid ko ang akon kahimtangan sa iban nga utod. Bangod sini, nangin indi ako kontento.” (Gal. 6:4) Ano ang nakabulig sa iya nga bag-uhon ang iya pagtamod? Nagsiling si Aci: “Gin-isip ko ang mga pagpakamaayo nga nabaton ko kada adlaw, kag ginpamalandungan ko ang mga benepisyo kay bahin ako sang organisasyon sang Dios. Dayon ginpasalamatan ko si Jehova. Nakabulig ini sa akon nga mangin kontento.” Kon indi ka kontento sa imo kahimtangan, puede mo ilugon ang ginhimo ni Aci para mangin mapinasalamaton ka man.

MAGPOKUS SA PAG-ALAGAD KAG MANGIN MAPAINUBUSON

8. Ngaa may tion nga nangin indi kontento si Baruc?

⁸ May tion nga nangin indi kontento ang sekretaryo ni manalagna Jeremias nga si Baruc. Mabudlay ang asaynment ni Baruc. Kay man, dapat niya buligan si Jeremias sa pagsugid sang paghukom ni Jehova sa rebelyuso nga mga Israelinhon. Pero imbes nga magpokus sa ginapahimo sa iya ni Jehova, mas nagpokus sia sa iya kaugalingon kag sa iya handum. Paagi kay Jeremias, ginsilingan ni Jehova si Baruc: “Nagapangita ka sing dalagku nga mga butang para sa imo kaugalingon. Indi ka na magpangita sina.” (Jer. 45:​3-5) Daw pareho lang nga ginsilingan ni Jehova si Baruc: “Mangin kontento ka sa imo kahimtangan subong.” Namati si Baruc sa laygay, gani padayon sia nga nangin abyan ni Jehova.

9. Kon parte sa aton mga pribilehiyo, ano ang matun-an naton sa 1 Corinto 4:​6, 7? (Tan-awa man ang mga piktyur.)

⁹ Kon kaisa, posible magbatyag ang isa ka Cristiano nga dapat ihatag sa iya ang isa ka pribilehiyo sa pag-alagad. Posible nga madamo sia sing talento, mapisan, ukon madugay na sia nga nagaalagad kay Jehova. Posible pa gani nga ara sa iya ining tatlo. Pero, ano abi kon ginhatag sa iban ang gusto gid niya nga pribilehiyo? Ano ang puede niya himuon para indi maglain ang iya buot? Puede niya pamalandungan ang ginsiling ni apostol Pablo sa 1 Corinto 4:​6, 7. (Basaha.) Halin kay Jehova ang tanan naton nga pribilehiyo kag talento. Wala niya ini ginhatag sa aton bangod mas maayo kita sangsa iban. Sa baylo, ginhatag ini ni Jehova bangod sa iya wala tupong nga kaayo.​—Roma 12:​3, 6; Efe. 2:​8, 9.

10. Ano ang himuon naton para mangin mapainubuson kita?

¹⁰ Para mangin mapainubuson kita, puede naton pamalandungan ang halimbawa ni Jesus kag ilugon sia. Ginhinawan ni Jesus ang mga tiil sang iya mga apostoles bisan pa nga Anak sia sang Dios kag ginhatagan sia sang daku nga awtoridad. Nagsiling si apostol Juan: “Nahibaluan ni Jesus nga ginhatag na sang Amay ang tanan nga butang sa iya kag nahibaluan niya nga naghalin sia sa Dios kag mabalik na sa Dios,” pero “ginhinawan [niya] ang mga tiil sang iya mga disipulo.” (Juan 13:​3-5) May rason kuntani si Jesus nga magbatyag nga dapat hinawan sang iya mga apostoles ang iya mga tiil. Pero sang ari si Jesus sa duta, wala gid niya ginhunahuna nga dapat madamo sia sing kuarta kag dapat komportable ang iya kabuhi bangod Anak sia sang Dios. (Luc. 9:58) Mapainubuson kag kontento si Jesus. Perpekto gid sia nga halimbawa para sa aton.​—Juan 13:15.

11. Ano ang nakabulig kay Dennis nga mangin kontento?

¹¹ Binagbinaga ang halimbawa ni Dennis nga taga-Netherlands. Gintinguhaan niya nga mangin mapainubuson pareho kay Jesus, pero may mga tion nga indi ini mahapos himuon. Nagsiling sia: “May mga tion nga nagalain ang akon buot kon ginhatag sa iban ang pribilehiyo nga gusto ko. Nagabatyag ako nga dapat sa akon ginhatag ina nga pribilehiyo. Kon amo sina ang ginabatyag ko, ginatun-an ko ang parte sa pagkamapainubuson. Sa JW Library^® nga app, ginbutangan ko sing tag ang pila ka teksto parte sa pagkamapainubuson para hapos ko ini makita. Gin-download ko man sa akon cell phone ang pila ka pamulongpulong parte sa pagkamapainubuson, kag pirme ko ini ginapamatian.a Natun-an ko nga si Jehova ang dapat dayawon sa tanan naton nga ginahimo para sa iya, indi ang aton kaugalingon. Si Jehova gid ang nagapahanabo nga mangin madinalag-on ang iya hilikuton, kag gamay lang gid ang aton nabulig sa sini.” Kon daw indi ka kontento sa imo mga pribilehiyo, panikasugi nga mangin mas mapainubuson pa gid. Paagi sa sini, magabakod ang imo kaangtanan kay Jehova kag mangin kontento ka.​—Sant. 4:​6, 8.

PAMALANDUNGI PIRME ANG IMO PAGLAUM SA PALAABUTON

12. Ano ang aton paglaum sa palaabuton nga makabulig sa aton nga mangin kontento? (Isaias 65:​21-25)

¹² Kon pamalandungan naton ang aton paglaum sa palaabuton, mas mangin kontento kita. Sa libro sang Isaias, nagsiling si Jehova nga naintiendihan niya nga nagaantos kita sang madamo nga kabudlayan subong. Pero nagpromisa man sia nga dulaon niya ang tanan naton nga problema. (Basaha ang Isaias 65:​21-25.) Magaistar kita sa mabakod kag matahom nga mga balay. Manamian kita kag malipay sa aton mga obra, kag magakaon kita sang masustansia kag manamit nga mga pagkaon. Kag indi na gid kita mabalaka nga basi may malain nga matabo sa aton ukon sa aton kabataan. (Isa. 32:​17, 18; Ezeq. 34:25) Makasalig kita nga matuman gid ang aton ginalauman nga dalayawon nga palaabuton.

13. Sa ano nga mga sitwasyon kinahanglan gid naton magpokus sa aton paglaum?

¹³ Kinahanglan gid naton magpokus subong sa aton paglaum. Ngaa? Bangod nagakabuhi na kita “sa katapusan nga mga adlaw” kag makaeksperiensia kita sang mga problema nga “mabudlay atubangon.” (2 Tim. 3:1) Kada adlaw, ginahatagan kita ni Jehova sang giya, kusog, kag bulig para makabatas kita. (Sal. 145:14) Kag kon grabe kabudlay sang aton sitwasyon, mabuligan man kita sang aton paglaum nga mabatas ini. Halimbawa, basi nabudlayan ka sa pag-aman sang materyal nga kinahanglanon sang imo pamilya. Amo na lang gid bala sini ang imo sitwasyon asta san-o? Indi. Kay man, nagpromisa si Jehova nga iaman niya ang imo mga kinahanglanon subong. Kag sa Paraiso, madamo pa gid ang ihatag niya sa imo. (Sal. 9:18; 72:​12-14) May malala ka bala nga balatian ukon depresyon? Antuson mo na lang bala ini asta san-o ukon wala ka na gid bala tsansa nga mag-ayo? Indi. Kay man, wala na sing balatian kag kamatayon sa bag-ong kalibutan sang Dios. (Bug. 21:​3, 4) Bangod sa sini nga paglaum, wala kita nagalalain sa aton sitwasyon subong. Kag matawhay ang aton hunahuna bisan pa makaeksperiensia kita sang inhustisya, mapatyan kita sang pinalangga, ukon mag-antos kita sang lainlain nga pagtilaw. Ngaa? Bangod bisan pa grabe kabudlay sang aton sitwasyon subong, kabalo kita nga ‘umalagi lang ang kapipit-an nga ginaatubang naton’ kag wala na sang pag-antos sa bag-ong kalibutan.​—2 Cor. 4:​17, 18.

14. Paano naton mapabakod ang aton pagsalig nga matuman gid ang aton ginalauman?

¹⁴ Importante gid ang paglaum para mangin kontento kita. Ti, paano naton mapabakod ang aton pagsalig nga matuman gid ang aton ginalauman? Binagbinaga ini nga ilustrasyon: Kon indi makakita sa layo ang isa ka tawo, posible nga kinahanglan niya mag-antipara. Sing kaanggid, mahimo may kinahanglan man kita himuon para mangin maathag sa aton hunahuna ang aton ginalauman nga Paraiso. Kon grabe ang aton kabalaka bangod sa kapigaduhon, imadyinon naton nga sa Paraiso indi na kinahanglan ang kuarta kag wala na sing pigado. Ano abi kon nagaluya ang aton buot bangod wala naton nabaton ang pribilehiyo nga gusto naton? Imadyinon naton nga kon mangin perpekto na kita kag maalagad na naton si Jehova sing linibo ka tuig, indi na importante ini nga mga pribilehiyo. (1 Tim. 6:19) Posible nga nabudlayan kita nga imadyinon ang matahom nga palaabuton bangod madamo kita sing ginakabalak-an subong. Pero kon pirme naton pamalandungan ang ginpromisa ni Jehova sa aton, mas magapokus kita sa sini imbes sa aton mga problema.

15. Ano ang imo natun-an sa ginsiling ni Christa?

¹⁵ Binagbinaga ang eksperiensia ni Christa nga asawa ni Dennis nga ginsambit kaina. Nakabulig gid sa iya ang iya paglaum. Nagsiling sia: “Bangod sa akon balatian, amat-amat nga nagakadula ang akon puersa. Naga-wheelchair ako bangod indi na ako makalakat, kag pirme na lang ako nagahigda. Nagapalanakit man pirme ang akon lawas. Ginsilingan ako sang akon doktor nga indi na ako mag-ayo. Pero ginpamensar ko dayon, ‘Indi pareho ang pagtan-aw namon sa palaabuton.’ Nagapokus ako sa akon paglaum, gani malinong ang akon hunahuna. Bisan pa kinahanglan ko batason ang akon balatian subong, kabalo ’ko nga mangin malipayon gid ang akon kabuhi sa bag-ong kalibutan.”

“WALA GINAKULANG ANG MGA NAGAKAHADLOK SA IYA”

16. Ngaa nakasiling si Hari David nga “wala ginakulang” ang mga nagakahadlok kay Jehova?

¹⁶ Bisan pa kontento kita, makaeksperiensia kita gihapon sang mga problema. Binagbinaga si Hari David. Ang Biblia nagasiling nga may tatlo sia ka anak nga napatay kag grabe gid ang iya kasubo sa sini. Ginpasibangdan man sia nga naghimo sang malain, gintraidoran sia, kag tinuig sia nga nalagyo kay gusto sia patyon sang hari. Pero bisan pa ginabatas niya ini nga mga kabudlayan, amo ini ang ginsiling niya parte kay Jehova: “Wala ginakulang ang mga nagakahadlok sa iya.” (Sal. 34:​9, 10) Ngaa nakasiling sia sini? Bangod bilang katawhan ni Jehova, sigurado kita nga bisan pa ginatugutan ni Jehova nga makaeksperiensia kita sang mga problema, ihatag gid niya ang aton mga kinahanglanon. (Sal. 145:16) Kag makasalig kita nga buligan kita ni Jehova nga mabatas ang tanan naton nga kabudlayan. Gani ano man ang aton sitwasyon, puede kita mangin kontento.

17. Ngaa dapat mo panikasugan nga tun-an ang sekreto kon paano mangin kontento?

¹⁷ Gusto ni Jehova nga mangin kontento ka. (Sal. 131:​1, 2) Gani panikasugi nga tun-an ang sekreto kon paano mangin kontento. Kon tinguhaan mo nga pirme magpasalamat, kon magpokus ka sa pag-alagad kag mangin mapainubuson ka, kag kon pabakuron mo ang imo pagsalig nga matuman gid ang imo ginalauman, makasiling ka man: “Huo, kontento gid ako.”​—Sal. 16:​5, 6.